Në episodin më të ri të podcastit “Inside Politics with Anisa”, i ftuar ishte profesori i njohur i marrëdhënieve ndërkombëtare dhe gjeopolitikës, Alfred Marleku, me të cilin u zhvillua një debat i gjerë dhe aktual mbi zhvillimet globale, sigurinë ndërkombëtare dhe pozicionin e Kosovës në një botë gjithnjë e më të polarizuar.

Ky episod solli një analizë të thelluar të sfidave gjeopolitike që po tronditin botën, duke u fokusuar në ndikimin e luftës në Ukrainë, tensionet në Lindjen e Mesme, rivalitetin mes fuqive të mëdha dhe reflektimin e tyre në Ballkan dhe veçanërisht në Kosovë.

Profesori Marleku foli për sinjalet shqetësuese që po shfaqen në rajon, duke theksuar se Ballkani vazhdon të mbetet një hapësirë me rëndësi strategjike për interesat globale. Ai analizoi ndryshimet në arkitekturën e sigurisë pas luftës në Ukrainë, duke vlerësuar se rajoni po hyn në një periudhë të re sfidash, ku ndikimet politike, ekonomike dhe ushtarake mund të ndihen më fuqishëm se më parë.

Në diskutim u trajtua edhe tensioni mes Iranit dhe Shteteve të Bashkuara të Amerikës, si dhe mundësia që përshkallëzimi i konflikteve globale të ketë pasoja direkte për Evropën dhe Ballkanin. Profesori Marleku vlerësoi se shtetet e vogla, përfshirë Kosovën, duhet të jenë shumë më të përgatitura institucionalisht për t’u përballur me krizat e reja ndërkombëtare.

Një pjesë e rëndësishme e bisedës iu kushtua politikës së jashtme të Kosovës, sfidave të saj strategjike dhe nevojës për një qasje më të koordinuar në raport me partnerët ndërkombëtarë. U diskutua edhe mbi neutralitetin politik në kohë krizash globale, ku profesori Marleku theksoi se në një botë të polarizuar, aleancat strategjike mbeten jetike për sigurinë dhe stabilitetin.

Po ashtu, në podcast u analizuan çështjet e sigurisë energjetike dhe ekonomike, duke ngritur pyetjen se sa e ekspozuar mbetet Kosova ndaj krizave globale dhe çfarë hapash duhet të ndërmerren për të rritur qëndrueshmërinë institucionale dhe kombëtare.

Podcasti “Inside Politics with Anisa” vazhdon të sjellë diskutime dhe analiza profesionale mbi politikën, shoqërinë dhe zhvillimet globale, duke krijuar një hapësirë reflektimi dhe debati për çështjet më të rëndësishme të kohës.

Në kuadër të përgatitjes profesionale dhe avancimit të njohurive praktike të studentëve, Fakulteti i Inxhinierisë së Ndërtimit dhe Infrastrukturës – Programi Inxhinieria e Trafikut dhe Transportit në UBT, ka realizuar një vizitë studimore në kryqëzimet e rrugëve “B” dhe “C” në Prishtinë, me studentët që ndjekin lëndën “Rregullimi i fluksit të trafikut”.

Vizita studimore, e udhëhequr nga ligjëruesi monitorues Dr. Sc. Visar Baxhuku, u organizua me qëllim që studentët të njihen nga afër me funksionimin real të infrastrukturës moderne rrugore, mënyrën e organizimit të trafikut urban, si dhe sfidat dhe zgjidhjet bashkëkohore në menaxhimin e fluksit të automjeteve dhe këmbësorëve.

Përmes aktiviteteve të tilla praktike, programi i Inxhinierisë së Trafikut dhe Transportit dëshmon përkushtimin e tij për të ofruar një edukim të avancuar dhe të ndërlidhur drejtpërdrejt me praktikën profesionale dhe nevojat reale të tregut të punës.

Gjatë vizitës, studentët analizuan nga afër format e ndryshme të kryqëzimeve, përfshirë rrethrrotullimet dhe kryqëzimet me sinjale ndriçuese, duke vëzhguar mënyrën e funksionimit të tyre në raport me qarkullimin urban dhe kërkesat e larta të trafikut në kryeqytet.

Një vëmendje e veçantë iu kushtua paisjeve të sinjalizimit dhe komunikimit, sistemit të semaforëve, sinjalizimit horizontal dhe vertikal, si dhe analizës së pikave të konfliktit mes automjeteve dhe këmbësorëve. Studentët patën mundësinë të studiojnë në terren mënyrën e rregullimit të fluksit të trafikut dhe të identifikojnë pengesat dhe mangësitë që ndikojnë në rrjedhshmërinë e lëvizjes.

Po ashtu, gjatë vizitës u realizuan analiza konkrete lidhur me:

• pozicionin strategjik të kryqëzimeve në raport me rrjetin rrugor të qytetit;
• intensitetin dhe jolinearitetin ditor të fluksit të automjeteve;
• kohëzgjatjen e cikleve të semaforëve;
• krijimin e vargjeve të automjeteve në pritje;
• përparësitë e aplikimit të sistemeve moderne Adaptive Signal Control në menaxhimin inteligjent të trafikut.

Diskutimet interaktive dhe angazhimi aktiv i studentëve gjatë vrojtimeve në terren dëshmuan interesimin e madh të tyre për profesionin dhe rëndësinë e ndërlidhjes së teorisë me praktikën.

Sipas vlerësimeve të studentëve dhe stafit akademik, vizita studimore arriti plotësisht qëllimin e saj, duke iu mundësuar studentëve të kuptojnë në mënyrë konkrete sfidat e menaxhimit të trafikut urban dhe aplikimin praktik të njohurive të fituara në auditor.

Programi i Inxhinierisë së Trafikut dhe Transportit vazhdon të organizojë aktivitete të tilla profesionale dhe studimore, të cilat i përgatisin studentët për tregun modern të punës dhe i aftësojnë ata për të kontribuar në zhvillimin e infrastrukturës dhe sistemeve inteligjente të trafikut në Kosovë dhe më gjerë.

Në kuadër të angazhimit për ofrimin e një edukimi bashkëkohor dhe të ndërlidhur ngushtë me praktikën profesionale, studentët realizuan një vizitë studimore në Ekoparkun Solar të Gjakovës – parku më i madh solar në Republikën e Kosovës, me kapacitet të instaluar prej 24 MWp.

Vizita u organizua nën udhëheqjen e profesorëve Vehbi Sofiu, Nexhmi Krasniqi dhe Sami Gashi, duke dëshmuar përkushtimin e programit në zhvillimin profesional të studentëve përmes aktiviteteve praktike dhe njohjes direkte me teknologjitë moderne të energjisë së ripërtëritshme.

Studentët u pritën nga menaxheri i parkut, Jeton Dobruna, i cili prezantoi funksionimin e sistemit fotovoltaik, procesin e lidhjes së paneleve solare sipas stringjeve, konvertimin e energjisë nga DC në AC, si dhe transformimin e tensionit deri në nivelin 35 kV.

Gjatë kësaj vizite, studentët patën mundësinë të shohin nga afër operimin dhe menaxhimin e një prej investimeve më të rëndësishme në fushën e energjisë së gjelbër në Kosovë, duke ndërlidhur njohuritë teorike me aplikimin praktik në terren. Diskutimet interaktive dhe interesimi i madh i studentëve e bënë aktivitetin veçanërisht të vlefshëm për ngritjen e kompetencave të tyre profesionale.

Vizita vazhdoi edhe në qendrën monitoruese dhe menaxhuese të parkut, ku studentët u njohën me sistemet moderne të kontrollit, monitorimit dhe mbrojtjes së instalimeve fotovoltaike.

Aktivitete të tilla dëshmojnë përkushtimin e programit për t’u ofruar studentëve përgatitje cilësore, përvojë praktike dhe kontakt të drejtpërdrejtë me industrinë, duke i aftësuar ata për tregun modern të punës dhe sfidat e sektorit të energjisë së ripërtëritshme.

Në kuadër të “Ditëve të Artit dhe Dizajnit” në UBT, studentët e Artit dhe Medias Digjitale prezantuan projektet e tyre kreative në lëndën “Advanced Multimedia”, nën mentorimin e profesorit Dardan Luta, duke sjellë ide inovative që ndërthurin dizajnin e produktit me identitetin vizual të brendit.

Projekti i këtij viti u fokusua në krijimin e një identiteti të ri të markës përmes dizajnimit të një koleksioni llampash me tematikë të veçantë. Studentët zhvilluan koncepte unike që reflektojnë stile të ndryshme estetike, nga minimalizmi dhe dizajni futuristik, deri te format organike, duke synuar krijimin e një identiteti vizual të dallueshëm dhe modern.

Përveç dizajnimit të produktit, projektet përfshinë edhe krijimin e logos, përzgjedhjen e paletës së ngjyrave, idetë për paketim dhe materialet promovuese vizuale. Përmes kësaj qasjeje multidisiplinare, studentët eksploruan mënyrën se si dizajni i produktit dhe brendimi bashkëpunojnë për të ndërtuar një përvojë të fortë dhe të paharrueshme të markës.

Ky aktivitet dëshmoi kreativitetin, inovacionin dhe aftësitë profesionale të studentëve të AMD-së, duke reflektuar qasjen moderne të UBT-së në zhvillimin e talenteve në fushën e artit, dizajnit dhe komunikimit vizual.