Këngëtarja e njohur si mbretëresha e muzikës pop, Madonna, ka nënshkruar sërish kontratë me Warner Records, shtëpinë diskografike ku filloi karrierën e saj. Ajo ka paralajmëruar se vitin e ardhshëm do të publikojë një album të ri me titull “Confessions Of A Dance Floor Part 2”.

67 vjeçarja e njohur për hitin “Frozen”, kaloi 25 vitet e para të karrierës te Warner para se të largohej pothuajse dy dekada më parë.

Tani ajo thotë se ndihet e lumtur që është rikthyer.

“Që nga fillimi, Warner Records ka qenë një partner i vërtetë për mua. Jam e lumtur që jemi ribashkuar e mezi pres të sjell gjëra të papritura e të nxis disa biseda të nevojshme”, ka deklaruar Madonna, sipas FemaleFirst.

Në rrjetet sociale, ajo ka ndarë edhe disa fotografi, përfshirë disa me një makinë shkrimi.

“Pothuajse dy dekada më vonë, ndihet si të jem në shtëpi me Warner Records! Rikthim te muzika, te pista e vallëzimit, te gjithçka ku gjithçka filloi! COADF P.2, 2026”, shkruan artistja.

Kryetarët e Warner Records, Tom Carson dhe Aaron Bay-Schuck, e quajtën rikthimin moment historik: “Ky nënshkrim përfaqëson një rikthim të plotë në rrethin e saj artistik, duke e sjellë sërish aty ku gjithçka nisi dhe duke riafirmuar ndikimin e saj të pakrahasueshëm.”

Albumi i ri është vazhdim i suksesit të “Confessions on a Dancefloor” (2005), që solli hite si “Hung Up”, “Sorry” dhe “Jump”.

Madonna kishte dhënë sinjale për projektin që në shkurt, kur shkroi se po përgatit muzikë të re: “Dhurata ime e Shën Valentinit për të gjithë fansat është t’ju tregoj se po vë gjithë zemrën e shpirtin në muzikën e re. Nuk mund të pres ta ndaj me ju!! ‘Confessions Part 2’”.

Këngëtarja po punon sërish me producentin/DJ Stuart Price, i cili kishte punuar edhe në albumin e parë dhe kishte bashkëpunuar me të në turne të mëdha si Re-Invention Tour (2004), Confessions Tour (2006) dhe më së fundmi në The Celebration Tour (2023–2024).

Madonna kishte paralajmëruar rikthimin edhe në dhjetor:

“Punoj me Stuart Price për muzikë të re. Këta muaj kanë qenë ilaç për shpirtin tim. Shkrimi i këngëve dhe krijimi i muzikës është e vetmja gjë ku nuk më duhet leja e askujt. Jam shumë e emocionuar ta ndaj me ju. Kush dëshiron të dëgjojë muzikë të re në vitin 2025?”

Ky do të jetë albumi i saj i parë pas “Madame X” (2019). /A.Z/UBT News/

Këngëtari i njohur amerikan, John Legend, ka ndarë së fundmi detaje për marrëdhënien dhe martesën e tij me modelen Chrissy Teigen.

Në një intervistë për revistën People, gjatë mbrëmjes gala të BMAC në hotelin Beverly Hilton – ku ai u nderua me çmimin BMAC Quincy Jones – 46-vjeçari tregoi se lidhja e tij me Teigen është forcuar vit pas viti.

“Të qenit prind të detyron të rritesh të ndryshosh prioritetet. Përveç gëzimeve, kemi kaluar sfida së bashku. Kjo e forcon lidhjen, se e di që mund t’i përballosh me partnerin tënd. Ky është rrëfimi i marrëdhënies, kemi kaluar ulje-ngritje, por jemi rritur së bashku”, tha Legend.

Çifti i famshëm u martua më 10 shtator 2013 në një gjykatë në New York, ku Irina Shayk ishte dëshmitare. Vetëm disa ditë më vonë, ata organizuan një dasmë madhështore buzë liqenit Como në Itali. Teigen dhe Legend u fejuan në vitin 2011, gjatë pushimeve në Maldive.

Më 2023, dyshja festoi 10-vjetorin e martesës, Legend tregoi se përvjetori i tyre i 12-të ishte më i qetë: “Patëm një darkë të këndshme. Nuk ishte shumë e çmendur”, tha ai me humor.

John Legend dhe Chrissy Teigen janë prindër të katër fëmijëve: Luna Simone, Miles Theodore, Esti Maxine dhe Wren Alexander. /A.Z/UBT News/

Dua Lipa, një nga emrat më të mëdhenj të muzikës pop, ka marrë një vendim të fortë në karrierën e saj: ka shkarkuar agjentin e saj, David Levy nga agjencia prestigjioze WME.

Arsyeja lidhet me letrën që nënshkroi, ku kërkohej përjashtimi i Kneecap nga festivali Glastonbury, për shkak të qëndrimeve pro-Palestinë.

Ajo u bë publike e shkaktoi reagime të ashpra, por në vend që të përjashtoheshin, Kneecap performuan në skenë para një publiku të gjerë.

Nënshkrimi i Levy-t në atë letër, sipas burimeve pranë Dua Lipës, u pa prej saj si një shenjë mbështetjeje për luftën e Izraelit në Gaza dhe trajtimin e palestinezëve. Kjo ka qenë arsyeja kryesore që artistja vendosi ta shkarkonte.

Nuk është hera e parë që Lipa shpreh publikisht solidaritetin me Palestinën. Ajo ka reaguar disa herë në rrjete kundër dhunës e krimeve të luftës në Gaza, pavarësisht kritikave që ka marrë nga qarqe politike dhe mediatike.

Kneecap vazhdon të jetë në qendër të polemikave. Njëri prej anëtarëve të grupit, Liam, është akuzuar në Mbretërinë e Bashkuar për shkelje të ligjit antiterrorizëm, pasi dyshohet se ka shfaqur një flamur të Hezbollah-ut gjatë një koncerti. Grupi i ka mohuar akuzat, duke i cilësuar si përpjekje për t’i heshtur. Së fundmi, janë përballur edhe me ndalim në Kanada, ku nuk u lejuan të performonin.

Mbi 400 muzikantë dhe kompani menaxhimi nga e gjithë bota janë bashkuar me nismën “No Music for Genocide”, duke tërhequr muzikën e tyre nga tregu izraelit në shenjë proteste ndaj asaj që e quajnë “spastrim etnik dhe masakër të popullsisë palestineze”. /A.Z/UBT News/

Gjatë ceremonisë së ndarjes së yjeve në Hollywood Walk of Fame për gazetarin Chris Wallace më 18 shtator, Arnold Schwarzenegger bëri një referencë humoristike për ish-gruan e tij, Maria Shriver.

Aktori 78-vjeçar dhe ish-guvernatori i Kalifornisë e përshkroi Wallace, si një “gazetar fantastik” dhe shtoi: “Unë di shumë për gazetarët”.

Kam dhënë, mund ta imagjinoni, mijëra intervista në jetën time. Por jo vetëm kaq, unë kam qenë i martuar me një gazetare.” Pastaj, me humor, ai shtoi: “I vetmi ndryshim midis Chris dhe Maria është se Chris nuk mori kurrë gjysmën e parave të mia,” duke shkaktuar të qeshura nga publiku.

Arnold Schwarzenegger dhe Maria Shriver ishin të martuar për 25 vjet dhe kanë katër fëmijë: Katherine, Christina, Patrick dhe Christopher.

Çifti u martua në prill 1986 dhe u divorcua në maj 2011 pas raportimeve për pabesinë e Arnold. Aktori më vonë pranoi se kishte një djalë, Joseph Baena, me ish-shërbyesen e familjes, Mildred “Patti” Baena. Divorci i tyre u finalizua në dhjetor 2021.

Sipas dokumenteve gjyqësore të siguruara nga Us Weekly në qershor 2022, Maria Shriver ka të drejtë për gjysmën e të ardhurave të Arnold Schwarzenegger, përfshirë pensionin e tij, nga data e martesës deri në paraqitjen e divorcit.

Në një intervistë për The Hollywood Reporter maj 2023, Arnold pranoi: “Ishte budallallëku im. Ishte dështimi im.” Megjithatë, ai theksoi:

“Ne jemi miq të mirë dhe shumë të afërt. Jemi krenarë për mënyrën se si i rritëm fëmijët tanë. Pavarësisht dramës, kaluam Pashkët së bashku, Ditën e Nënës, Krishtlindjet dhe të gjitha ditëlindjet tona së bashku. Nëse do të kishte çmime Oscar për mënyrën si përballon një divorc, unë dhe Maria duhet t’i fitonim ato për ndikimin më të vogël tek fëmijët.”

Nga ana e saj, Maria Shriver foli për ndarjen e saj në librin e saj “Unë jam Maria”, botuar në prill.

Ajo shkroi: “Isha e mbytur nga pikëllimi dhe e shkatërruar nga konfuzioni, zemërimi, frika dhe ankthi. Nuk e dija kush isha, ku i përkisja. Sinqerisht, ishte brutale tmerruese.” Shriver shtoi se lajmi erdhi pas vdekjes së të dy prindërve të saj. Ajo përfundoi: “E ulur në dyshemenë e hotelit tim në errësirë, vetëm me lotët që më rridhnin në fytyrë, mendova: ‘Maria, ky nuk duhet të jetë fundi yt.’” /A.Z/UBT News/