Elon Musk ka reaguar ashpër ndaj Bashkimit Evropian pasi rrjeti i tij social, X, u gjobit me 120 milionë euro për shkelje të rregullave të transparencës.

Shefi i Teslas tha se gjoba nuk ishte vendosur vetëm ndaj platformës, por edhe ndaj tij personalisht, duke e quajtur këtë “absurde”.

Ai paralajmëroi se përgjigjja e tij do të drejtohet jo vetëm ndaj BE-së, por edhe ndaj zyrtarëve që morën vendimin.

Reagimi i Muskut erdhi pasi Komisioni Evropian njoftoi se X ka shkelur detyrimet e transparencës sipas Ligjit për Shërbimet Digjitale.

Komisioni kritikoi sistemin e verifikimit me shenjën blu, i cili nga proces identifikimi u kthye në shërbim me pagesë, si dhe mungesën e transparencës në reklama dhe kufizimin e aksesit të studiuesve në të dhënat publike.

Musk i quajti komisionerët e BE-së “Woke Stasi”, duke paralajmëruar se ata do të përballen me “efektin Streisand” – një situatë ku përpjekjet për të kufizuar diçka sjellin edhe më shumë vëmendje ndaj saj.

Ai nuk sqaroi ende se çfarë hapash konkrete do të ndërmarrë apo cilët individë synon t’i kundërshtojë. /A.Z/UBT News/

Tesla ka sjellë në Evropë versionin me çmim më të ulët të Model 3, duke synuar të ringjallë shitjet pas reagimeve negative ndaj angazhimit të Elon Musk me Donald Trump dhe dobësimit të kërkesës për automjete elektrike.

Modeli i ri 3 Standard është i listuar me çmim prej 37,970 euro dhe ofron një rreze veprimi mbi 480 km, pavarësisht se ka hequr disa nga karakteristikat premium të versioneve më të shtrenjta.

Ky lëvizje vjen pas lansimit të SUV Model Y me çmim më të ulët, në Evropë dhe SHBA, duke synuar të tërheqë gamë më të gjerë blerësish.

Shitjet e Teslës në Evropë kanë pësuar rënie, ndërsa kompania përballet me konkurrencë të fortë nga prodhuesi kinez BYD, i cili për herë të parë e ka tejkaluar Teslën në tregun evropian gjatë pranverës.

Mbështetja e Musk për fushatën e Trump dhe angazhimi në administratën e mëparshme ka shkaktuar reagim negativ nga blerësit.  /A.Z/UBT News/

Motorola ka prezantuar një version të ri të smartphone-it Edge 70, pas lansimit fillestar në tetor me tre ngjyra Pantone: Gadget Grey, Lily Pad dhe Green Bronze.

Ky edicion i ri vjen me një nuancë të veçantë, që shënon ngjyrën Pantone të vitit 2026, e quajtur Cloud Dancer.

Kjo ngjyrë përshkruhet si “një bardhësi e ajrosur që sjell qartësi në vend të rrëmujës, butësi në vend të spektaklit dhe prezencë në vend të presionit”.  Cloud Dancer “vepron qetësues dhe frymëzues, duke reflektuar balancën dhe sofistikimin në mënyrë perfekte”.

Një veçori e veçantë e këtij edicioni janë kristalet Swarovski, të cilat ofrojnë “një detaj eterik që i lejon kreativitetit të marrë frymë dhe thellon fokusin, duke rikthyer qetësinë në xhepa, pëllëmbë dhe jetën digjitale”.

Smartphone-i pritet të dalë në tregje të përzgjedhura në mbarë botën, megjithatë çmimi e data e saktë nuk janë zbuluar. /A.Z/UBT News/