Lajmet

Stano: Takimet e Kurtit dhe Vuçiqit në Bruksel janë për rrugën e të dyjave vendeve drejt BE-së

Published

5 years ago

April 22, 2021

Betim Gashi

Kryeministri kosovar, Albin Kurti dhe presidenti serb Aleksandar Vuçiq, do të zhvillojnë takime të ndara në Bruksel javën e ardhshme.

Zëdhënësi i Bashkimit Europian për Punë të Jashtme dhe Siguri, Peter Stano, ka thënë për Klankosova.tv se këto vizita nga vendet e Ballkanit Perëndimor kanë për qëllim diskutimet e tyre rreth synimeve drejt anëtarësimit në BE dhe bashkëpunimit me institucionet e Unionit.

“Si rregull i përgjithshëm, institucionet e BE-së dhe përfaqësuesit e tyre ftojnë partnerë nga e gjithë bota rregullisht për vizita bilaterale në Bruksel për të diskutuar zhvillimin e marrëdhënieve dypalëshe dhe bashkëpunimin. Në rastin e partnerëve tanë nga Ballkani Perëndimor në këto takime përfshihen diskutime dhe përditësime rreth përpjekjeve drejt rrugës së tyre europiane dhe procesit të pranimit”.

Vuçiq do të pritet në Bruksel më 26 prill derisa mediat në Beograd raportuan se qëllimi i vizitës dhe bisedimeve midis kreut të shtetit serb dhe zyrtarëve më të lartë të BE-së do të jetë përshpejtimi i integrimit europian i Serbisë dhe se ai po shkon në Bruksel me ftesë të kryediplomatit europian, Josep Borrell, i cili do të organizojë një drekë pune për delegacionin e lartë nga Beogradi.

Ndërkaq, agjenda dhe se me kënd do të takohet kryeministri Kurti ende nuk janë bërë publike.

“Për takimet e tij për javën e ardhshme do të njoftohet të premten”, ka thënë Stano për portalin.

Në mesin e temave të diskutuara të Kurtit me krerët e lartë europianë mund të jetë edhe dialogu Kosovë-Serbi, i cili është ndërprerë në dhjetor të vitit të kaluar.

BE po pret nga Qeveria e Kosovës që të ketë vëmendjen e plotë ndaj dialogut me Serbinë dhe ta konsiderojë atë si prioritetin kryesor të politikës së jashtme.

“Kur bëhet fjalë për prioritetet e Qeverisë, nuk ka konkurrencë në mes prioriteteve individuale. Prioritetet e brendshme të Kurtit janë shumë të rëndësishme. Por, në të njëjtën kohë dialogu është prioriteti më i rëndësishëm i politikës së jashtme të Kosovës dhe nuk duhet të shihet si i ndarë apo që s’përputhet me prioritetet tjera që i ka përmendur kryeministri”, pati thënë Stano për Klankosova.tv.

Të mërkurën, zëdhënësi i Qeverisë, Përparim Kryeziu, ka konfirmuar se Kurti nuk do të takohet me Vuçiqin.

Lajmet

Dy persona dyshohet se sulmuan me thikë një burrë në Skenderaj

Published

53 minutes ago

September 21, 2026

UBT News

Në Skenderaj, më 20 shtator 2026, rreth orës 22:20, është raportuar një rast i cilësuar si vrasje në tentativë.

Sipas Policisë, një burrë kosovar është sulmuar fizikisht dhe me thikë nga dy të dyshuar, meshkuj kosovarë.

Viktima ka pranuar tretman mjekësor.

Për rastin është njoftuar prokurori, ndërsa hetimet janë duke vazhduar./A.K/

Lajmet

FSK e dyta në garën ushtarake në ShBA, shkëlqen ushtaraku Ismail Ahmeti

Published

1 hour ago

September 21, 2026

UBTNews

Tre pjesëtarë të Forcës së Sigurisë së Kosovës (FSK) kanë përfaqësuar me sukses Kosovën në “Garën për Luftëtarin më të mirë” e cila u mbajt në Ajova të Shteteve të Bashkuara të Amerikës, me ftesë të Gardës Kombëtare të Ajovës.

Gjatë katër ditëve sa zgjati ky aktivitet, ushtarakët iu nënshtruan sfidave të ndryshme me karakter ushtarak, të cilat vunë në provë të fortë përgatitjen e tyre fizike e mendore, aftësitë taktike si dhe qëndrueshmërinë.

Sukses të veçantë në këtë garë shënoi pjesëtari i FSK-së, OR3 Ismail Ahmeti, i cili arriti të renditet në mesin e finalistëve dhe të sigurojë vendin e dytë, duke dëshmuar nivel të lartë profesionalizmi.

Pjesëmarrja e pjesëtarëve të FSK-së në këtë garë vendimtare shërben si një mundësi e rëndësishme për shkëmbimin e përvojave, testimin e kapaciteteve profesionale, si dhe për forcimin e mëtejshëm të partneritetit strategjik ndërmjet FSK-së dhe Gardës Kombëtare të Ajovës. /E.A/

Lajmet

Kurti nderon në New York vëllezërit Bytyqi: “Koha nuk e zbeh krimin”

Published

1 hour ago

September 21, 2026

UBT News

Kryeministri i Kosovës, Albin Kurti, ka bërë homazhe në New York në kujtim të vëllezërve Ylli, Agron dhe Mehmet Bytyqi, të cilët i ka përshkruar si luftëtarë të lirisë nga Batalioni Atlantiku, qytetarë amerikanë dhe dëshmorë të kombit shqiptar.

Kurti ka bërë të ditur se në homazhe ishte së bashku me familjen Bytyqi, kryebashkiaken e Fairview City, Violetta Berisha, përfaqësues të Ligës Qytetare Shqiptaro-Amerikane, si dhe kolegë e bashkëpunëtorë.

“Vëllezërit Bytyqi, me veprat e tyre fisnike, përfaqësojnë vlerat më të larta të Ushtrisë Çlirimtare të Kosovës dhe të popullit tonë”, ka shkruar Kurti.

Ai ka theksuar se sakrifica e tyre, sipas tij, nderon edhe mërgatën shqiptare në Shtetet e Bashkuara, e cila i qëndroi pranë Kosovës gjatë periudhave më të vështira.

Kurti ka treguar se gjatë takimit, Ilir Bytyqi ka rrëfyer për burgosjen e tre vëllezërve të tij, transferimin, torturimin dhe vrasjen e tyre.

Sipas Kurtit, trupat e vëllezërve Bytyqi u gjetën më vonë në një varr masiv, ndërsa rasti mbetet një nga çështjet për të cilat, sipas tij, ende nuk është vendosur drejtësi.

“Kalimi i kohës nuk e zbeh krimin dhe as nuk e shuan detyrimin për përgjegjësi”, ka theksuar Kurti.

Ai ka thënë se Kosova do të vazhdojë, së bashku me Shtetet e Bashkuara, të kërkojë të vërtetën dhe drejtësinë për Yllin, Agronin dhe Mehmet Bytyqin.

Në fund, Kurti ka shprehur mirënjohje për Shtetet e Bashkuara dhe mërgatën shqiptare për mbështetjen e vazhdueshme ndaj Kosovës./A.K/