Xi Jinping organizoi një pritje madhështore për Donald Trump-in në ditën e parë të një vizite që mund të rivendosë marrëdhëniet midis superfuqive rivale.

Garda e nderit ushtarak u rreshtua jashtë Sallës së Madhe të Popullit për të mirëpritur Trump-in, e shoqëruar me shtëna përshëndetëse dhe një bandë muzikore që luante himnin kombëtar të SHBA-së. Presidenti ndaloi dy herë për të përshëndetur fëmijët e shkollave që brohorisnin me flamuj kinezë dhe amerikanë.

Teksa shtrëngonte duart me Xi-në, ai u përkul për t’i rrahur krahun në atë që dukej si një gjest ngrohtësie, ndërsa nuk kurseu lëvdatat për mikpritësin e tij.

“Ju jeni një udhëheqës i madh. Këtë ua them të gjithëve,” deklaroi ai në ato që dukeshin si komente spontane. Më vonë, gjatë vizitës në Tempullin e Qiellit të shekullit XV, ai u shpreh para gazetarëve se Kina ishte e bukur. Në banketin e kësaj mbrëmjeje, ai i quajti bisedimet si një mundësi “të çmuar”.

Ishte një ditë e jashtëzakonshme, duke pasur parasysh se Trump e ndërtoi markën e tij politike duke folur ashpër ndaj Kinës.

“Ne nuk mund të vazhdojmë të lejojmë Kinën të përdhunojë vendin tonë, dhe kjo është ajo që po bëjnë,” u thoshte ai mbështetësve në një tubim fushate në vitin 2016.

Në vitin 2020, ai pretendoi se Kina e ka “vjollur Shtetet e Bashkuara si askush tjetër më parë” dhe e përshkroi pandeminë e Covid-19 si “virusi kinez”. Para se të kthehej në pushtet, ai u zotua se do ta “bënte Kinën të paguante”.

Në kulmin e luftës tregtare vitin e kaluar, të dyja palët kishin vendosur tarifa që kalonin 100% mbi produktet e njëra-tjetrës. Pasoi një armëpushim i brishtë, por një nga pyetjet kryesore që rëndon mbi këtë vizitë është se sa do të zgjasë ai dhe çfarë marrëveshjeje do të zërë vendin e tij?/BBC/

Presidenti rus, Vladimir Putin, pritet të vizitojë Kinën shumë shpejt, pasi përgatitjet për këtë udhëtim tashmë kanë përfunduar.

Lajmi është konfirmuar të enjten nga zëdhënësi i Kremlinit, Dmitry Peskov.

Kjo vizitë pason një histori të gjatë takimesh mes Putinit dhe presidentit kinez, Xi Jinping, të cilët janë takuar më shumë se 40 herë përgjatë viteve, me takimin e tyre të fundit që u zhvillua në Pekin shtatorin e kaluar.

Dy liderët patën nënshkruar një partneritet strategjik “pa kufij” në shkurt të vitit 2022, vetëm pak javë para se Rusia të niste pushtimin e Ukrainës.

Njoftimi i Moskës për këtë vizitë të afërt vjen pikërisht në ditën kur në Kinë po qëndron për vizitë zyrtare presidenti amerikan, Donald Trump. /BBC/

Dy udhëheqësit biseduan për dy orë, shumë më gjatë nga sa pritej. Presidenti Xi e paralajmëroi Donald Trump-in se çështja e Tajvanit, të cilin Pekini e pretendon si pjesë të territorit të tij, mund t’i çojë dy vendet drejt një konflikti. Ai po bën presion për një shtyrje ose reduktim të shitjeve të armëve amerikane drejt ishullit vetëqeverisës, të cilin Pekini e pretendon prej kohësh.

Donald Trump, nga ana tjetër, ka sjellë me vete në Pekin drejtorët ekzekutivë (CEO) të 30 bizneseve të mëdha teknologjike, me shpresën se Kina do t’i hapë dyert për më shumë firma amerikane.

Pas përfundimit të bisedimeve, Trump thuri lëvdata për mikpritësin e tij ndërsa vizitonte Tempullin e Qiellit të shekullit XV, ku perandorët kinezë dikur luteshin për korrje të mbarë. Trump e quajti Xi-në një udhëheqës të madh, i përshkroi bisedimet si “të shkëlqyera” dhe u shpreh para gazetarëve se Kina ishte e bukur.

Cila është çështja në lidhje me Tajvanin?

Kina e konsideron Tajvanin si një provincë të shkëputur që përfundimisht do të vijë nën kontrollin e saj dhe nuk e ka përjashtuar përdorimin e forcës për ta arritur këtë. Vitet e fundit, Pekini ka shtuar stërvitjet ushtarake me zjarr të vërtetë, duke përfshirë bllokada të simuluara të porteve rreth ishullit vetëqeverisës, gjë që ka shqetësuar autoritetet tajvaneze.

Uashingtoni i përmbahet politikës “Një Kinë”, e cila njeh Pekinin si qeverinë e vetme kineze, por ai mban lidhje jozyrtare me Taipein. SHBA-ja është gjithashtu e detyruar me ligj t’i sigurojë Tajvanit mjetet për të mbrojtur veten.

Vitin e kaluar, administrata e Trump-it njoftoi shitjen e një pakete armësh prej 11 miliardë dollarësh për Taipein, gjë që zemëroi Pekinin. Raportet thonë se Trump nuk e ka miratuar ende zyrtarisht shitjen, megjithatë, kjo temë do të jetë në tryezë gjatë bisedimeve të tij me Xi-në./BBC/

Presidenti amerikan Donald Trump zbriti shkallët e avionit Air Force One në Pekin të mërkurën në mbrëmje, i pritur me ceremoni dhe nderime përpara një takimi shumë të rëndësishëm me homologun e tij kinez, Xi Jinping.

Gjatë vizitës së tij dyditore, dy superfuqitë globale pritet të diskutojnë tarifat tregtare, konkurrencën teknologjike, luftën në Iran dhe marrëdhënien e SHBA-së me Tajvanin.

Trump rikthehet në një Kinë më të fuqishme dhe më të vendosur krahasuar me vizitën e tij të fundit në vitin 2017, ndërsa përballet me kritika në rritje lidhur me fushatën ushtarake në Lindjen e Mesme.

Trump fillimisht ishte planifikuar ta zhvillonte këtë vizitë në mars, por ajo u shty për shkak të luftës mes SHBA-së, Izraelit dhe Iranit, e cila vazhdon të trazojë ekonominë globale.

Kur Trump doli nga avioni të mërkurën në mbrëmje, ai u prit nga zëvendëspresidenti kinez Han Zheng, një nga liderët më të lartë të Kinës.

Ky veprim po interpretohet si një shenjë respekti nga Pekini ndaj presidentit amerikan, pasi gjatë vizitës së tij të fundit Trump ishte pritur nga një zyrtar i nivelit më të ulët.

Gjithashtu në ceremoninë e pritjes — ndërsa qilimi i kuq shtrihej në pistë — u panë djali i Trumpit, Eric Trump, si dhe disa nga figurat më të njohura të industrisë amerikane të teknologjisë, përfshirë Elon Musk nga Tesla dhe Jensen Huang nga Nvidia.

“Do t’i kërkoj Presidentit Xi, një lider me reputacion të jashtëzakonshëm, ta ‘hapë’ Kinën në mënyrë që këta njerëz brilantë të mund të tregojnë aftësitë e tyre dhe ta ndihmojnë Republikën Popullore të arrijë një nivel edhe më të lartë,” shkroi Trump në rrjetet sociale përpara uljes së tij.