Kosova do të karakterizohet sot nga një mot kryesisht me diell dhe vranësira të pjesëshme.

Sipas parashikimit nga Instituti Hidrometeorologjik i Kosovës (IHMK), kushtet atmosferike do të jenë më të qëndrueshme në të gjithë vendin, duke bërë që mundësitë për reshje shiu të jenë mjaft të ulëta.

Sa i përket vlerave termike, temperaturat minimale gjatë mëngjesit dhe natës do të lëvizin ndërmjet 11 dhe 14°C. Ndërkohë, gjatë ditës pritet mot i ngrohtë, me temperaturat maksimale që do të rriten duke shënuar vlera nga 26 deri në 29°C.

Gjatë ditës do të fryjë edhe një erë e lehtë nga drejtimi i verilindjes, shpejtësia e së cilës do të lëvizë nga 1 deri në 4 m/s, duke sjellë një freski të lehtë.

Komisionerja për Zgjerim në Bashkimin Europian, Marta Kos, ka vlerësuar Shqipërinë si një nga vendet pararojë në procesin e integrimit, duke vënë theksin te përparimi i shënuar në fushën e mbrojtjes së mjedisit. Gjatë deklaratës së saj, Kos nënvizoi se ky progres është i njohur dhe i vlefshëm, por shtoi se çdo projekt zhvillimor – përfshirë atë në Zvërnec – duhet të jetë në përputhje të plotë me kuadrin ligjor të BE-së, veçanërisht me Kapitullin 27 që rregullon mjedisin.

Komisionerja bëri të ditur se Komisioni Europian është në kontakt të vazhdueshëm me autoritetet shqiptare dhe se ka marrë garanci të plota nga qeveria për një vlerësim të detajuar të ndikimit në mjedis për projektin e Zvërnecit. “Në situata të tilla është e rëndësishme që të gjithë të punojmë mbi bazën e fakteve,” u shpreh Kos.

Kjo deklaratë ka sjellë reagimin e menjëhershëm dhe të ashpër të Partisë Demokratike. Përmes një qëndrimi zyrtar, opozita e ka akuzuar komisioneren se po bazohet në “informacione të rrejshme dhe të pasakta të paraqitura nga miku i saj Edi” dhe se deklarata e saj nuk pasqyron realitetin ekzistues në Shqipëri.

Sipas PD-së, vlerësimet që vijnë nga Brukseli injorojnë krizën e rëndë politike dhe sociale që ka mbërthyer vendin. Opozita thekson se qëndrime të tilla, në vend që të ndihmojnë, vetëm sa e rëndojnë dhe e thellojnë më tej situatën, duke i shërbyer politikisht kryeministrit Rama. Në mbyllje të reagimit, Partia Demokratike rikonfirmoi mbështetjen e saj të plotë për pesë kërkesat e protestuesve, duke i cilësuar ato si kushte të panegociueshme për një zgjidhje paqësore të krizës në vend. /Euronews/ /E.A/

Presidenti i SHBA-së, Donald Trump, dhe Presidenti i Iranit, Masoud Pezeshkian, kanë nënshkruar një memorandum mirëkuptimi fillestar për t’i dhënë fund luftës që nisi më 28 shkurt, duke shpallur një armëpushim të menjëhershëm dhe të përhershëm në të gjitha frontet.

Marrëveshja, e nënshkruar gjatë samitit të G7-ës në Francë, parashikon rihapjen e menjëhershme të Ngushticës strategjike të Hormuzit, heqjen e të gjitha sanksioneve amerikane dhe një plan prej 300 miliardë dollarësh për rindërtimin e Iranit. Megjithatë, palët kanë lënë një afat prej 60 ditësh për të negociuar çështjen më komplekse: programin bërthamor të Iranit.

Sipas dokumentit të nënshkruar në Pallatin e Versajës, Irani ka rikonfirmuar se nuk do të zhvillojë armë bërthamore dhe ka pranuar që uraniumi i tij i pasuruar të hollohet brenda vendit nën mbikëqyrjen e IAEA-s, një lëshim ky nga ana e SHBA-së që fillimisht kërkonte largimin e materialit nga territori iranian. Presidenti Trump e mbrojti me ngulm marrëveshjen përpara gazetarëve, duke theksuar se ky hap shmangu një “depresion ekonomik global” dhe një “katastrofë” që po mbante tregjet nën presion të jashtëzakonshëm.

Pas njoftimit, çmimet e naftës Brent pësuan rënie të menjëhershme, duke zbritur në 78.79 dollarë për fuçi. Trump gjithashtu zbuti qëndrimin për raketat balistike, duke thënë se Teherani mund t’i mbajë ato nëse i posedojnë edhe vendet e tjera, por paralajmëroi me tone të ashpra se SHBA-ja do ta “bombardonte rëndë” Iranin nëse dështon arritja e një marrëveshjeje përfundimtare brenda 60 ditëve.

Pavarësisht nënshkrimit, tensionet dhe mosbesimi mbeten të larta. Kryetari i parlamentit iranian dhe negociatori kryesor, Mohammad Bagher Ghalibaf, deklaroi për mediat shtetërore se “gishti i Iranit mbetet mbi këmbëzën e armës” dhe la të kuptohet se pas periudhës 60-ditore, Irani mund të fillojë të vendosë tarifa për anijet që kalojnë në Ngushticën e Hormuzit – një rrugë detare nga ku kalon 20% e naftës në botë dhe që u bllokua de facto pas nisjes së konfliktit, ku SHBA dhe Izraeli vranë Udhëheqësin Suprem, Ajatollah Ali Khamenei, në ditën e parë të luftimeve.

Në rrafshin ndërkombëtar dhe të brendshëm, marrëveshja po përballet me pengesa të mëdha. Izraeli ka deklaruar se nuk ka ndërmend të tërheqë trupat nga Libani dhe ka vijuar sulmet ndaj Hezbollahut, gjë që ka sjellë një qortim publik nga Trump ndaj kryeministrit Benjamin Netanyahu, të cilit i kërkoi “pak më shumë butësi”. Ndërkohë, në Uashington, plani i paqes ka ndezur pakënaqësi të rënda te ligjvënësit e të dy krahëve politikë, ku senatori republikan Bill Cassidy e ka cilësuar tashmë këtë hap si “gafën më të madhe të politikës së jashtme në dekada”. /BBC/ /E.A/

Me vendimin e fundit të Këshillit Shtetëror të Cilësisë, UBT është akredituar me programe të reja studimi. Përveç 150 programeve dhe specializimeve në fusha të ndryshme, risitë e këtij viti përfshijnë programet Fintech dhe Analitika e Biznesit, Fintech dhe Menaxhim i Inovacionit, Estetikë dhe Kozmetologji, Inxhinieri e Mjedisit dhe Infrastrukturë e Qëndrueshme, si dhe Inxhinieri Mekanike, me orientime të fokusuara në teknologjitë që po transformojnë industrinë globale.

Programi i ri i Inxhinierisë Mekanike është konceptuar për t’i përgatitur studentët për profesionet e së ardhmes, duke përfshirë fusha si Inxhinieria e Dizajnit dhe Prodhimit, automatizimi industrial, inxhinieria e automjeteve, inxhinieria hapësinore, teknologjitë e dronëve, robotikë dhe sistemet inteligjente të prodhimit.

Një ndër programet më inovative është Fintech dhe Analitika e Biznesit, i cili ndërthur financat, teknologjinë, inteligjencën artificiale dhe analizën e të dhënave. Industria Fintech konsiderohet sot një nga sektorët me rritjen më të shpejtë në botë, ndërsa ekspertët e kësaj fushe janë ndër profesionistët më të kërkuar nga bankat, institucionet financiare, kompanitë teknologjike dhe startup-et inovative.

Në kuadër të studimeve master, UBT ka akredituar edhe programin Fintech dhe Menaxhim i Inovacionit, i cili synon të përgatisë liderë dhe ekspertë të aftë për të menaxhuar transformimin digjital, inovacionin dhe zhvillimin e teknologjive financiare në tregun global.

Po ashtu, UBT sjell për herë të parë programin Estetikë dhe Kozmetologji, i cili vjen si përgjigje ndaj zhvillimit të hovshëm të industrisë së bukurisë, mirëqenies dhe kujdesit estetik. Programi kombinon njohuritë shkencore nga fushat e shëndetit, dermatologjisë, kozmetologjisë dhe teknologjive moderne estetike, duke përgatitur profesionistë të kualifikuar për një treg që po shënon rritje të vazhdueshme në nivel global.

Në nivelin bachelor, UBT ka akredituar edhe programin Inxhinieri e Mjedisit dhe Infrastrukturë e Qëndrueshme, i cili fokusohet në zhvillimin e zgjidhjeve moderne për mbrojtjen e mjedisit, planifikimin urban, menaxhimin e resurseve natyrore dhe ndërtimin e infrastrukturës së qëndrueshme, në përputhje me standardet evropiane dhe sfidat globale klimatike.

Të gjitha programet e reja janë ndërtuar mbi ekosistemin unik të UBT-së, i cili përfshin laboratorë të avancuar, qendra inovacioni, platforma digjitale, projekte kërkimore-shkencore, bashkëpunime të ngushta me industrinë dhe mbi 500 partneritete ndërkombëtare. Ky ekosistem u mundëson studentëve të kombinojnë njohuritë teorike me përvojën praktike dhe të përgatiten për sfidat reale të profesionit.

Akreditimet e reja përfaqësojnë një kontribut të rëndësishëm në zhvillimin e kapitalit njerëzor dhe në përgatitjen e kuadrove që do të udhëheqin ekonominë, teknologjinë dhe industrinë e së ardhmes.

APLIKO TANI ONLINE!