E përditësuar:

11:51 – Nëntë deputetët nga radhët e Listës Serbe kanë dështuar që të marrin më shumë se nëntë vota për tu bërë nënkryetar të Kuvendit të Republikës së Kosovës.

Një nga një, në tri tentime për secilin, asnjëri nuk mori votat e mjaftueshme.

I pari që u kandidua ishte nënkryetari i Listës Serbe, Sllavko Simiq, ndërsa i fundit, Igor Simiq.

Më poshtë sjellim votimin për secilin kandidat veç e veç:

Kandidati tjetër i propozuar nga Lista Serbe për nënkryetar të Kuvendit të Kosovës ishte  deputeti Igor Simiq, i cili nuk arriti t’i marrë votat e mjaftueshme në të tri raundet për këtë pozitë.

Ai në raundin e parë mori 9 vota për, 49 kundër dhe 36 abstenime.

As në raundin e dytë, deputeti Simiq, nuk arriti t’i marrë votat e mjaftueshme për pozitën e nënkryetarit të Kuvendit të Kosovës.

Ai në këtë raund mori 9 vota për, 51 vota kundër dhe 37 abstenime.

Simiq edhe në raundin e tretë nuk i morri votat për, ai në këtë raund mori 9 vota për, 51 vota kundër dhe 39 abstenime. Me këtë rast, Simiq është ezauruar si kandidat, dhe kryetari i Kuvendit Dimal Basha ka kërkuar nga Lista Serbe që të propozojë një kandidat të ri./D.B/EO

11:07 – Kandidatja e radhës e propozuar nga Lista Serbe për nënkryetare të Kuvendit të Kosovës është deputetja Liliana Stefanović, e cila nuk arriti t’i marrë votat e mjaftueshme për këtë pozitë. Ajo mori 9 vota për, 51 kundër dhe 41 abstenime./D.B/EO

10:57 – Kandidati i radhës i Listës Serbe për nënkryetar të Kuvendit të Kosovës, deputeti Zlatan Elek, nuk i mori votat e mjaftueshme për këtë post. Ai mori 9 vota për, 52 kundër dhe 42 abstenime.

Votat s’i mori as në raundin e dytë e të tretë.

Elek që është edhe kryetar i kësaj partie, mori sërish 9 vota për, 53 vota kundër dhe 42 abstenime.

Me këtë rast, Elek është ezauruar si kandidat, dhe kryetari i Kuvendit Dimal Basha ka kërkuar nga Lista Serbe që të propozojë një kandidat të ri./D.B/EO

10:56 – Sllavko Simiq, nga Lista Serbe, as në raundin e tretë nuk arriti t’i marrë votat e mjaftueshme për nënkryetar të Kuvendit të Kosovës nga radhët e pakicave serbe.

Ai edhe në këtë raund mori 9 vota për, 53 vota kundër dhe 41 abstenime. Me këtë rast, Simiq është ezauruar si kandidat, dhe kryetari i Kuvendit ka kërkuar nga Lista Serbe që të propozojë një kandidat të ri./D.B/EO

 Kuvendi i Kosovës po vazhdon sot seancën konstituive të legjislaturës së nëntë.

Deputetët e Kuvendit janë mbledhur nga ora 10:00 në përpjekje për të zgjedhur nënkryetarin nga radhët e komunitetit serb, transmeton KosovaPress.

Në seancën e sotme konstituive janë të pranishëm 106 deputetë, kurse deputetët e Nismës nuk janë parë në sallë.

Në sallë nuk janë parë as deputetët e AAK përveç, Lahi Brahimaj dhe Time Kadrijaj./D.B/KP

10:07 – Ministri në detyrë i Financave, Hekuran Murati, ka komentuar aktgjykimin e Gjykatës Kushtetuese lidhur me konstituimin e Kuvendit, i cili, sipas tij, nuk i jep ndonjë të drejtë ekskluzive Listës Serbe për postin e nënkryetarit.

“Gjykata Kushtetuese e ka konstatuar që ndarja e deputetëve nga pakoja nuk ishte shkelje kushtetuese. Ka konstatuar që deputeti apo nënkryetari i pestë duhet të vijë nga deputetë që janë përfaqësues të komunitetit jo shumicë serb. Në asnjë pikë, në asnjë paragraf, në asnjë faqe nuk përmend që kjo e drejtë i jepet Listës Serbe. Mund të jetë njëri nga 10 deputetët serbë. Ka konstatuar që edhe mekanizmat debllokues, siç është rasti i tre tentativave për një kandidat, vlejnë edhe për nënkryetarin, si dhe mekanizmi tjetër debllokues ka konstatuar që është në rregull, që është zgjedhje përmes shortit,” ka thënë Murati./D.B/EO

Deputetja e AAK-së, Time Kadrijaj, ka thënë se kjo parti nuk do të votojë për asnjë kandidat për nënkryetar të Kuvendit nga pakicat serbe.

Sipas saj, situatën duhet ta zhbllokojnë “ata që e kanë bllokuar”.

“Nuk do të votojmë asnjë, thashë ata që e kanë bllokuar këtë situatë le ta zhbllokojnë. Ne kemi dashur t’i japim epilog, kemi ardhur deri këtu. Asnjëherë zgjedhja e nënkryetarëve nuk është politizuar në këtë formë”, ka deklaruar Kadrijaj./D.B/EO

10:02 – Deputeti i VV-së, Glauk Konjufca, ka deklaruar se pas aktgjykimit të Gjykatës Kushtetuese është qartësuar se askush nuk ka të drejtë vetoje në konstituimin e Kuvendit.

Ai tha se të gjithë deputetët duhet të jenë të pranishëm dhe se Vetëvendosje nuk ka votuar asnjëherë për kandidatët e Listës Serbe. Konjufca shtoi se Dimal Basha, i zgjedhur kryetar i Kuvendit, ka legjitimitet dhe do ta udhëheqë mirë institucionin.

“Pas këtij aktgjykimi të plotë të Gjykatës Kushtetuese u bë e qartë se nuk ka kurrfarë te drejte te vetos të askujt në konstituimin e Kuvendit ky është përfundimi i parë i rëndësishëm. I dyti i rëndësishëm është që të gjithë deputetët duhet të jenë të pranishëm të votojnë. Dhe i treti është që Lëvizja Vetëvendosje nuk ka kurrëfarë vote për Listën Serbe asnjë të propozuarit. Kështu di të zhvillohet seanca mendoj që deputet marrin pjesë prej gjitha partive politike. Kur do të dështojnë të gjitha opinionet atëherë mbete i fundit Nenad Rashiq dhe zgjedhja e tij nuk është antikushtetuese. Kështu ka thënë aktgjykimi dhe kështu mendoj që do te ndodh. Sot ma merr mendja që do të përfundojnë të gjitha ju e dini që maksimalisht do te kishte 27 opsione që të votohen derisa të shterren propozimet e Listës Serbe besoj që më së miri është që kuvendi të mos e zgjas dhe të kryhet të gjitha sot”, ka thënë Konjufca.

Konjufca gjithashtu u shpreh se deputeti Dimal Basha, i cili tani mban postin e kryetarit të Kuvendit, është zgjedhur me legjitimitet dhe do ta udhëheqë mirë institucionin.

Ai është i propozuar i Vetëvendosjes është votuar nga gjithë ne, është zgjedhur me legjitimet mendoj që do ta udhëheq mirë kuvendin./D.B/EO

Lidhja Demokratike e Kosovës po mban një mbledhje para fillimit të seancës konstituive të Kuvendit të Kosovës. Sot pritet që deputetët që të votojnë për zgjedhjen e një nënkryetari serb, për çka deputeti i LDK-së, Arben Gashi tha se “detyrimet kushtetuese duhet të zbatohen”.

Para fillimit të seancës, ai tha para gazetarëve se bllokimi nuk është kushtetues, por politik.

“Bllokimi nuk është kushtetues, bllokimi është politik. Mungesa e konsensusit, mungesa e vullnetit për konsensus dhe mungesa e fuqisë politike për të formuar institucionet. Krejt këto tjerat janë lojëra dhe taktizime kushtetuese dhe nuk është aspak bllokadë kushtetuese”, deklaroi Gashi.

“Ajo është detyrim kushtetues por tash po shkojmë në mbledhje të Grupit Parlamentar për të parë një vendimin final. Unë mendoj se detyrimet kushtetuese duhet të zbatohen”, shtoi ai.

Deputetët e Kuvendit të Kosovës do të mblidhen sërish sot në tentimin e gjashtëdhjetë për konstituimin e legjislaturës së nëntë. Të zgjedhurit e popullit para vetes kanë vetëm një pikë në rend të ditës: zgjedhja e nënkryetarit të Kuvendit nga radhët e komunitetit serb./D.B/KP

9:53 – Deputeti i Lëvizjes Vetëvendosje, Agim Bahtiri, është shprehur optimist se deputeti nga komuniteti serb, Nenad Rashiq, do të zgjidhet nënkryetar i Kuvendit të Kosovës.

Ai, në vazhdimin e seancës konstituive për herë të 60-të, ku deputetët pritet të votojnë për ta zgjedhur nënkryetarin e pestë nga komuniteti serb, tha se Lëvizja Vetëvendosje nuk ka votë për asnjë kandidat nga Lista Serbe.

Madje nënvizoi se “më përpara e pres dorën, sesa votoj ndonjë kandidat nga Lista Serbe”.

“Sigurisht se Rashiq do të zgjidhet (nënkryetar). Unë kam deklaruar se e pres dorën dhe nuk votoj për Listën Serbe. Kështu e kanë vendimin edhe kolegët në Lëvizjen Vetëvendosje. Kjo është e bazuar në problemet që i kanë bërë në veri dhe janë të kyçur direkt në atë pjesë. Nuk votoj njerëz që kokën e kanë në Beograd dhe trupin në Prishtinë”, tha ai.

Megjithatë, Bahtiri nuk tregoi sesi do ta zgjedhin deputetin Rashiq si nënkryetar të Kuvendit, pas aktgjykimit të tretë të Kushtetueses në lidhje me konstituimin e Kuvendit dhe procedurat për zgjedhjen e nënkryetarit nga radhët e komunitetit serb.

“Tash është e qartë se edhe gjërat kanë ndryshuar për momentin dhe janë vetëdijesuar”, theksoi Bahtiri./D.B/KP

9:43 – Deputeti i Partisë Demokratike të Kosovës, Nait Hasani, ka kërkuar që të votohet kandidati i Listës Serbe për nënkryetar të Kuvendit.

Ai, në vazhdimin e seancës konstituive për herë të 60-të, ku deputetët pritet të votojnë për ta zgjedhur nënkryetarin e pestë nga komuniteti serb, tha se ata që e duan dhe mbrojnë shtetin e Kosovës duhet ta votojnë nënkryetarin, qoftë edhe nga Lista Serbe, pas aktgjykimit të Gjykatës Kushtetuese.

Hasani u shpreh optimist se përmes një marrëveshjeje politike do të konstituohet Kuvendi, madje, siç tha, deri të hënën e javës së ardhshme.

“Ata që e duan shtetin e Kosovës, e mbrojnë shtetin e Kosovës dhe kanë luftuar për shtetin e Kosovës, për me bë shtetin e Kosovës, duhet ta votojnë…(Vota e tij) Varet prej Grupit Parlamentar”, tha ai.

Megjithatë, deputeti i PDK-së kritikoi Gjykatën Kushtetuese që ka publikuar aktgjykimin dy ditë para zgjedhjeve lokale.

“Sot do të kemi një mbledhje të Grupit Parlamentar dhe sigurisht do të dalim me një qëndrim. E shoh si jo të drejtë daljen e aktgjykimit dy ditë para zgjedhjeve, që do t’i vë të gjitha partitë politike në presion. Besoj në një marrëveshje, do t’ia dalim, nëse jo tash, të hënën besoj po”, theksoi Hasani.

Gjykata Kushtetuese më 8 tetor ka publikuar aktgjykimin e plotë pas ankesës së Listës Serbe lidhur me konstituimin e Kuvendit. Gjykata ka thënë se Kuvendi nuk është konstituuar, ndërsa ka dhënë 12 ditë afat për deputetët që të përfundojnë procesin e konstituimit. Afati prej 12 ditësh ka nisur të rrjedhë prej ditës kur aktgjykimi i plotë u publikua në faqen zyrtare të gjykatës – më 8 tetor./D.B/KP

Kuvendi i Kosovës rikthehet sot në seancë të re konstituive në orën 10:00 si një tentativë për të përfunduar procesin që ka ngecur tash e sa kohë.

Njoftimi është bërë në faqen zyrtare të parlamentit, ku theksohet se një nga pikat kryesore është zgjedhja e nënkryetarit të Kuvendit nga radha e komunitetit serb.

Gjykata Kushtetuese, në vendimin e saj të plotë, ka konstatuar se seanca Konstituive e Kuvendit, e filluar më 15 prill 2025, nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit serb, dhe Kuvendi nuk është konstituuar në pajtim me përcaktimet e paragrafit 1 të nenit 66 dhe paragrafët 1 dhe 4 të nenit 67 të Kushtetutës së Republikës së Kosovës.

Kryetari i Kuvendit, Dimal Basha, kishte përmbyllur seancën e kaluar më 30 gusht pa zgjedhjen e këtij nënkryetari, duke lënë procesin pezull për më shumë se një muaj./S.K/KP/