Drejtoria për Hetimin e Krimit të Organizuar dhe Krimeve të Rënda, pas zhvillimit të veprimeve hetimore në bashkëpunim me Prokurorinë Themelore Prishtinë, ka realizuar operacionin policor nën dyshimin për veprën penale fajde, ku ka arrestuar personat B.F. (48) dhe A.F. (39), ndërsa B.B. (39) është vënë në kërkim.

Të dyshuarit kanë detyruar viktimën të paguajë shuma të ndryshme të parave si interes për fajde, po ashtu kanë kërkuar nga viktima marrjen e njësive banesore që janë në ndërtim ku viktima është pronar i tyre.

I dyshuari B.F. është arrestuar në flagrancë duke i pranuar paratë si interes nga fajdeja, ndërsa A.F. është arrestuar në vendbanimin e tij, teksa B.B., nuk është hasur në shtëpinë e tij dhe ndaj të njëjtit është lënë ftesë për paraqitje në polici.

Me urdhëresë nga gjykata janë kontrolluar tri vendbanimet e të dyshuarve me ç’rast janë gjetur dhe sekuestruar dëshmi materiale, të cilat do të përdoren në procedurën penale ndaj të dyshuarve.

Ndaj dy të dyshuarve B.F., A.F., prokurori i Shtetit ka lëshuar aktvendim për ndalim.

Në Shtime është përuruar në mënyrë solemne Unazën e vogël në rrugën “12 qershori”, projekt ky i Ministrisë së Infrastrukturës në vlerë rreth gjysmë milionë euro. Në ceremoni kjo rrugë me trotuar e ndriçim publik, u përmend ndër më modernet në komunën e Shtimes.

Kryeministri në detyrë Albin Kurti tha se kjo rrugë do të lehtësojë qarkullimin e banorëve të kësaj ane dhe më gjerë.

“Shpesh vijmë e kthehemi në shtime për shkak të investimeve të vlefshme, të cilat po i bëjmë edhe si Qeveri e Republikës së Kosovës, por edhe si komunë e Shtimes. Rrugë në gjatësi 375 metra, e cila e lidh rrugën ‘William Walker’ me atë “12 Qershori”, është rrugë me ndriçim publik dhe gjithashtu është rrugë, e cila rrit jo vetëm investimin në komunën e Shtimes, por në të njëjtën kohë, në mënyrë të prekshme edhe kushtet e jetesës e të qarkullimit për banorët këtu. Kostoja e gjithmbarshme ka qenë afro gjysmë milioni euro”, tha Kurti.

Ndryshe, kryetari Qemajl Aliu ka paralajmëruar se gjatë tridhjetë ditëve të ardhshme do të përurohen edhe tetë projekte të ngjashme në Komunën e Shtimes, të cilat po shkojnë drejt finalizimit të tyre.

Kurse në rrugën “Ibrahim Shabani” në Vojnoc të Shtimes, dy kilometra e gjatë, kanë filluar punimet, investim ky i Ministrisë se Mjedisit në vlerë 420 mijë euro, përmes së cilës do të ndihmohen qytetarët që të lidhen më lehtë me Lipjanin, Shtimen dhe Ferizajn.

Kryetari i Shtimes Qemajl Aliu tha se rregullimi i kësaj rruge ka qenë kërkesë e banorëve të kësaj ane tash e sa kohë dhe se punimet do të përfundojnë në fillim të muajit tetor.

“Fshati Vojnoc, hir së vërtetës në të kaluarën nuk ka qenë shumë i respektuar në aspektin e investimeve. Edhe unë e kam kënaqësinë dhe jam i hapur me qenë para miqve të mi, para bashkëvendësve të mi për të përuruar fillimin e një investimi tjetër të radhës, një rrugë ku është investuar menjëherë pas luftës dhe nuk është mirëmbajtur asnjëherë në një rrugë të demoluar. Ka qenë kërkesë e banorëve të fshatit Vojnoc, po edhe fshatrave përreth. Të mos harrojmë, kjo rrugë e lidh qytetin e Lipjanit, Shtimes dhe Ferizajt, përkatësisht fshatin Grackë, Vojnoc dhe fshatin Tërrn. Projekti kushton diku 420 mijë euro, mbi dy kilometra rrugë. Sipas operatorit kjo rrugë mund të përfundojë diku nga fillimi i tetorit”, tha Aliu.

Shtetet e Bashkuara të Amerikës kanë vendosur sanksione ndaj gjyqtarit francez Nicolas Yann Guillou, i cili pati një rol kyç në procedurën paraprake të rastit të ish-presidentit Hashim Thaçi në Hagë.

Departamenti Amerikan i Shtetit theksoi në një deklaratë se Guillou ka autorizuar lëshimin e urdhërarresteve ndërkombëtare për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, në lidhje me akuza për krime lufte.

Përveç Guillou, janë sanksionuar edhe tre persona të tjerë të Gjykatës Ndërkombëtare Penale: Kimberly Prost, Nazhat Shameem Khan dhe Mame Mandiaye Niang.

Zëvendësprokurorët Shameem Khan dhe Niang po emërohen për vazhdimin e mbështetjes së veprimeve të paligjshme të Gjykatës Ndërkombëtare Penale kundër Izraelit, duke përfshirë mbështetjen e urdhër-arresteve të Gjykatës Ndërkombëtare Penale që synojnë kryeministrin Netanyahu dhe ish-ministrin e Mbrojtjes Gallant që kur ata morën drejtimin e Zyrës së Prokurorit të Gjykatës Ndërkombëtare Penale.

Si rezultat i veprimeve të sotme që lidhen me sanksionet, të gjitha pronat dhe interesat në pronën e personave të sanksionuar të përshkruar më sipër që janë në Shtetet e Bashkuara ose në zotërim ose kontroll të personave amerikanë janë bllokuar dhe duhet të raportohen në Zyrën e Kontrollit të Pasurive të Huaja (OFAC) të Departamentit të Thesarit, thuhet në deklaratë.

Përveç kësaj, të gjithë individët ose subjektet që janë në pronësi, drejtpërdrejt ose tërthorazi, individualisht ose në total, 50 për qind ose më shumë nga një ose më shumë persona të bllokuar janë gjithashtu të bllokuara.

Bashkimi Evropian ka inkurajuar partitë politike në Kosovë ta respektojnë aktgjykimin e Kushtetueses dhe të konstituojnë sa më shpejt legjislativin e nëntë për ta zhbllokuar ngërçin politik.

Zyra e BE-së në Kosovë tha se blloku po i ndjek me kujdes zhvillimet që lidhen me konstituimin e Kuvendit dhe formimin e Qeverisë.

Deputetët u mblodhën dje për vazhdimin e seancës konstituive, pasi dy ditë më parë gjykata më e lartë e vendit e publikoi aktgjykimin e plotë lidhur me këtë çështje, i cili i detyron ata ta bëjnë Kuvendin e ri brenda 30 ditësh, i cili skadon më 18 shtator.

Megjithatë, konstituimi dështoi pasi asnjëra prej dy kandidateve të propozuara nga Lëvizja Vetëvendosje, Guxo e Alternativa , Albulena Haxhiu dhe Donika Gërvalla, nuk arritën t’i marrin më shumë se 57 vota, që është 4 vota më pak se të paktën 61 votat e nevojshme.

Zyra e BE-së theksoi se formimi i shpejtë i Kuvendit dhe i Qeverisë është thelbësor për Kosovën që të ecë përpara me reformat e rëndësishme në të gjitha sektorët, të cilat do të përmirësojnë cilësinë e jetës dhe standardin e jetesës së qytetarëve të Kosovës.

Ndërkohë, Ambasada e Italisë në Prishtinë, e pa si diçka inkurajuese faktin që Vetëvendosje propozoi një kandidat të ri për kryeparlamentar, pasi në të kaluarën kishte propozuar vetëm Albulena Haxhiun.

Në një përgjigje me shkrim për REL-in, Ambasada italiane tha se propozimi i Donika Gërvallës tregon gatishmëri për të bërë përparim, i cili do të duhet të konfirmohet në ditët në vijim.

“Shpresojmë që të gjithë aktorët politikë të punojnë me përgjegjësi për të siguruar konstituimin e Kuvendit me kohë, në përputhje me aktgjykimin e Gjykatës Kushtetuese”, tha ajo.

Pas seancës, Vetëvendosje akuzoi partitë e tjera të mëdha në Kuvend, PDK, LDK dhe AAK, se me këtë dëshmuan se emri i Albulena Haxhiut nuk ishte problemi kryesor, por se ato po synojnë bllokimin e formimit të institucioneve.

PDK përsëriti qëndrimin se ka votë vetëm për një kandidat të Vetëvendosjes, i cili nuk ka qenë pjesë e Qeverisë në mandatin paraprak. LDK-ja tha Vetëvendosje e ka ditur që Haxhiu dhe Gërvalla nuk kanë vota të mjaftueshme.

Ndërkaq, AAK-ja tha se pret që edhe në seancën e radhës Vetëvendosje të propozojë emra për të cilët nuk ka mbështetje.

Nisma Socialdemokrate tha se do të abstenojë dhe nuk do të japë votë për pa u arritur një marrëveshje politike.

Vazhdimi i seancës u caktua për të premten, më 22 gusht,