Lajmet

Solidariteti impresionues i gjermanëve me refugjatët nga Ukraina

Me gatishmëri të madhe ata po i mirëpret si popullsia, ashtu edhe strukturat shtetërore, landet dhe komunat.

Published

4 years ago

April 1, 2022

Betim Gashi

Refugjatët e luftës nga Ukraina po priten në Gjermani me një solidaritet impresionues. Me gatishmëri të madhe ata po i mirëpret si popullsia, ashtu edhe strukturat shtetërore, landet dhe komunat.

Persona privatë me tabela në duar ofrojnë në stacionet e trenit apartamente banimi për të ardhurit; komunat hapin sallat e bashkive për të strehuar refugjatët; punonjës bashkiakë aktivizojnë qendrat e para të pranimit të refugjatëve, të vitit 2015; gjermanë të thjeshtë organizojnë fqinjët dhe mbledhin rroba e sende të jetës së përditshme për refugjatët; pensionistë që ofrohen për të ndihmuar në qendrat e mbledhjes së refugjatëve. Një pamje e zakonshme këto ditë në shumë qytete gjermane.

Sipas ministrisë së Brendshme të Gjermanisë, deri sot në Gjermani kanë ardhur mbi 283.000 refugjatë lufte nga Ukraina. Numri i të ardhurve mund të jetë faktikisht edhe më i madh, pasi ukrainasit kanë të drejtë të vijnë pa vizë në Gjermani. Si të tillë ata nuk janë të detyruar të regjistrohen. Por tani shumica po regjistrohen që të marrin ndihma nga shteti gjerman.

Në Gjermani, refugjatët e luftës nga Ukraina mbërrijnë kryesisht në Berlin dhe në Hamburg, prej andej shpërndahen në pjesë të tjera të Gjermanisë. Për një periudhë kohe, në Berlin mbërrinin deri 10.000 refugjatë lufte në ditë.

Mbështetje e strukturuar për refugjatët nga Ukraina

Shteti gjerman ka vënë në dispozicion të të ardhurve strehime, oferta për kualifikim, ushqim, ndihma sociale. Federata dhe landet diskutuan të premten (01.04.) me kancelarin Olaf Scholz për ndarjen e shpenzimeve të konsiderueshme. Për refugjatët e traumatizuar ka oferta për trajtim psikologjik. Shumë ndihmës për refugjatët janë sensibilizuar që të dallojnë refugjatët me shenja traume nga lufta, për t’u ofruar atyre pastaj trajtim të veçantë.

Shumica e të ardhurve janë gra me fëmijë. Ekspertët e arsimit vlerësojnë se të paktën një e treta e refugjatëve nga Ukraina në Gjermani janë fëmijë ose adoleshentë. Ata do të kenë nevojë për shkollë ose për kopshte ditore.

Shkollat në lande të ndryshme të Gjermanisë po ngrejnë klasa mikpritjeje për fëmijët nga Ukraina. Në këto klasa bëhen përpjekje që refugjatët ta mësojnë gjermanishten sa më shpejt që të jetë e mundur, që më pas të integrohen në klasa të rregullta. Në Berlin, p.sh. në shkollat publike të këtij landi ka tashmë 50 klasa të tilla. Në Bavari janë ngritur “grupe edukative të mirëseardhjes”.

Edhe në kopshtet ditore po punohet që të zgjerohet oferta. Ka qytete, ku përkujdesjen për fëmijët e marrin përsipër vetë gra refugjate nga Ukraina. Shumë të rëndësishme për qëndrimin në Gjermani janë njohuritë e gjermanishtes. Autoritetet shohin një nga detyrat kryesore për integrimin, zgjerimin e ofertës me kurse të gjermanishtes, për të ardhurit.

Ukrainasit marrin leje pune

Në dallim nga refugjatët e viteve 2015/2016, ukrainasit kanë të drejtë të punojnë menjëherë. Për herë të parë, në rastin e Ukrainës Bashkimi Evropian aktivizoi të ashtuquajturën „direktivë të fluksit masiv”. Si rrjedhim, refugjatët nga Ukraina mund të qëndrojnë në BE deri në tre vjet, pa shtruar kërkesë për azil. Ata marrin menjëherë edhe një leje pune.

Kompanitë gjermane kanë postuar mijëra oferta pune, në portalet e ndërmjetësimit të punës në internet. Ofrojnë punë dhe praktika për refugjatët nga Ukraina. Kërkohen punonjës me kualifikime të ndryshme, si zhvillues të programeve kompjuterike Java dhe Cloud, ashtu edhe infermierë, luleshitës, kuzhinierë e shoferë kamioni.

Integrim më i shpejtë i ukrainasve

Sa do të qëndrojnë refugjatët nga Ukraina në Gjermani, kjo nuk dihet.

Për ata që do të qëndrojnë, sipas Institutit kërkimor Empirica, integrimi do të jetë më i shpejtë si i emigrantëve të tjerë. Në një studim në mes të marsit, ky institut përshkroi nivelin e lartë arsimor të të ardhurve, “veçanërisht të femrave.” Edhe ministri gjerman i Punës, Hubertus Heil tha se gjysma e të ardhurve kanë mbaruar shkollat e larta, sjellin kualifikim akademik.

Për këtë arsye Agjencia Federale e Punës dhe Dhomat e Tregtisë po përpiqen së bashku që këta njerëz të mos përfundojnë në punë të nivelit të dytë, p.sh. duke lehtësuar njohjen e diplomave të të ardhurve. Diplomat e refugjatëve shpesh nuk janë të barazvlershme me diplomat gjermane. Vështirësi paraqet edhe fakti që një pjesë e të ikurve nuk kanë marrë dot me vete dokumenta.

Ritmet e ardhjes janë ngadalësuar

Sipas Organizatës së refugjatëve të OKB-së, UNHCR, deri sot nga Ukraina janë larguar katër milionë vetë. Shumica e të larguarve kanë qëndruar në shtete pranë Ukrainës. Rreth 1 milion prej tyre kanë vazhduar rrugën drejt Perëndimit, njoftoi Komisioni Evropian. Por ndërkohë, nga Ukraina po largohen më pak refugjatë. Aktualisht, Ukrainën e braktisin rreth 40.000 vetë në ditë. Shifra më e lartë e largimit ka qenë 200.000 vetë në ditë. Në disa zona kanë filluar edhe kthimet e para të të ikurve.

Dallime me valën e refugjatëve të 2015-ës

Në vitin 2015, mikpritja në Gjermani për refugjatët fillimisht ishte e madhe. Pastaj atmosfera ndryshoi. Prandaj vëzhguesit shtrojnë pyetjen a mund të përsëritet edhe me refugjatët e luftës nga Ukraina një fenomen i tillë.

Ka disa dallime nga situata e vitit 2015. Në vjeshtën e vitit 2015 refugjatët u pritën me duartrokitje kur mbërritën në Gjermani. Por vërshimi i refugjatëve vazhdoi pa u ndalur, duke kaluar shifrën e 850.000 vetëve. Goditje të fortë, entuziazmi mori veçanërisht pas sulmeve seksuale në stacionin kryesor të trenit të Këlnit, natën e vitit të ri 2015/2016. Edhe debati politik në Gjermani, deklaratat e disa politikanëve, ndikuan atëherë në pakësimin e mbështetjes për refugjatët. Prandaj rol vendimtar në kulturën aktuale të mikpritjes do të luajë qëndrimi i mëtejshëm i politikës.

Refugjatët e luftës nga Ukraina dallohen nga refugjatët e viteve 2015/2016. Ukrainasit janë evropianë. Në pikëpamje kulturore ata janë më të afërt me popullsinë e vendeve të BE, edhe të Gjermanisë, ku vijnë. Një nga elementët ku vërehet dallimi kulturor me refugjatët e viteve 2015/2016 është p.sh. edhe ndarja tipike e roleve në familje. Shumica e femrave ukrainase që vijnë tani e kanë të natyrshme të punojnë. Në këtë mënyrë edhe bashkëjetesa është më e lehtë.

Ukrainaisit nuk janë të panjohur në Gjermani. Sidomos prej vitit 2014, në Gjermani kanë ardhur shumë prej tyre. Ata kanë krijuar në Gjermani një komunitet prej rreth 300.000 ukrainaisish.

Edhe autoritetet gjermane kanë mësuar nga përvoja e vitit 2015. Koncepti i trajtimit të të ardhurve është përmirësuar. Të ardhurit trajtohen tani në mënyrë integrative. Në vitin 2022 nuk pritet sa refugjatët të kenë mësuar njëherë gjermanishten dhe pastaj të nisin hapat e tjerë. Por në Jobcenters, në qendrat e punësimit, punohet me ritëm dhe punohet paralelisht: për gjetje strehimi, për situatën familjare dhe për integrimin kulturor njëkohësisht./DW

Vendi

Dekani i Shkencave të Sportit në UBT, Agron Thaqi, pjesë e konferencës shkencore në Universitetin “Aleksandër Xhuvani” në Elbasan

Published

8 hours ago

May 2, 2026

ubtnews

Dekani i Fakultetit të Shkencave të Sportit në UBT, Assoc. Prof. Dr. Agron Thaqi, po merr pjesë në konferencën shkencore të organizuar nga Universiteti “Aleksandër Xhuvani” në Elbasan.

Gjatë kësaj vizite, ai zhvilloi një takim me rektoren e universitetit, ku u diskutuan mundësitë e zgjerimit të bashkëpunimit ndërinstitucional në të ardhmen, me fokus në projekte të përbashkëta, shkëmbime akademike dhe organizimin e aktiviteteve shkencore.

Me këtë rast, u bë edhe një ftesë zyrtare për pjesëmarrje në konferencën vjetore të UBT-së, ndërsa u theksua bashkëpunimi ekzistues në kuadër të projektit ndërkombëtar SHAPE, ku të dy institucionet janë partnere.

Ky angazhim përfaqëson një hap të rëndësishëm drejt forcimit të lidhjeve akademike dhe avancimit të arsimit të lartë në nivel rajonal.

Lajmet

Koalicionet parazgjedhore: afati deri më 7 maj

Published

12 hours ago

May 2, 2026

UBTNews

Partitë politike në Kosovë duhet të deklarohen deri më 7 maj nëse do të marrin pjesë në zgjedhjet e 7 qershorit, si dhe nëse do të hyjnë në koalicione parazgjedhore.

Sipas planit të aktiviteteve të miratuar nga Komisioni Qendror i Zgjedhjeve, më 2 maj ka nisur edhe periudha për aplikimin për certifikimin e partive të reja, si dhe për dorëzimin e listave të kandidatëve për deputetë. Afati për regjistrimin e partive të reja përfundon më 10 maj, ndërsa dorëzimi i listave të kandidatëve mund të bëhet deri më 12 maj.

Deri tani, nuk ka indikacione se partitë e mëdha politike do të formojnë koalicione para zgjedhjeve. Në zgjedhjet e fundit të mbajtura më 28 dhjetor, nga subjektet kryesore shqiptare vetëm Lëvizja Vetëvendosje kishte garuar në koalicion me parti më të vogla, përfshirë Guxo, Alternativën dhe PSHDK-në.

Një ditë më parë, KQZ-ja miratoi si planin e aktiviteteve ashtu edhe buxhetin për organizimin e zgjedhjeve të parakohshme, i cili arrin në 10 milionë e 887 mijë euro.

Sipas këtij plani, fushata zgjedhore do të zgjasë 10 ditë, duke filluar më 28 maj dhe duke përfunduar më 7 qershor në orën 07:00, kur edhe hapen vendvotimet.

Vendimi për kufizimin e shpenzimeve të fushatës pritet të merret më 5 maj, ndërsa më 16 maj do të hidhet shorti për renditjen e subjekteve politike në fletëvotim.

Procesi i votimit përmes postës do të zhvillohet nga 25 maji deri më 6 qershor. Një ditë para zgjedhjeve do të organizohet edhe votimi në përfaqësitë diplomatike të Kosovës. Ndërkohë, periudha për regjistrimin e votuesve nga diaspora është caktuar nga 6 deri më 17 maj.

Më 21 maj, KQZ-ja do të bëjë certifikimin e listës së votuesve, si për ata brenda vendit ashtu edhe për votuesit jashtë Kosovës.

Live

SHBA planifikon të tërheqë rreth 5,000 trupa nga Gjermania brenda një viti

Published

13 hours ago

May 2, 2026

UBTNews

Shtetet e Bashkuara të Amerikës pritet të tërheqin rreth 5,000 trupa nga Gjermania gjatë gjashtë deri në 12 muajve të ardhshëm, ka njoftuar Pentagoni të premten.

Ky vendim vjen në një kohë tensionesh mes presidentit Donald Trump dhe udhëheqjes gjermane, në lidhje me qasjen e SHBA-së ndaj konfliktit me Iranin. Më herët gjatë javës, Trump kishte paralajmëruar tërheqjen e trupave nga Gjermania, aleate e NATO-s, pas kritikave të kancelarit Friedrich Merz, i cili kishte deklaruar se SHBA-ja po “poshtërohej” nga Irani dhe kishte vënë në pikëpyetje strategjinë e Washingtonit.

Zëdhënësi i Pentagonit, Sean Parnell, tha se vendimi është marrë pas një rishikimi të plotë të vendosjes së forcave amerikane në Evropë, duke marrë parasysh nevojat operative dhe zhvillimet në terren.

Gjermania mbetet një nga qendrat kryesore të pranisë ushtarake amerikane në Evropë. Ajo strehon objekte të rëndësishme si selitë e komandave amerikane për Evropën dhe Afrikën, Bazën Ajrore Ramstein dhe një qendër të madhe mjekësore në Landstuhl, ku janë trajtuar ushtarë të plagosur nga konfliktet në Afganistan dhe Irak. Në territorin gjerman janë të vendosura edhe armë bërthamore amerikane.

Tërheqja e paralajmëruar përfaqëson rreth 14 për qind të afro 36,000 trupave amerikane të stacionuara aktualisht në Gjermani. Në total, në Evropë zakonisht ndodhen midis 80,000 dhe 100,000 trupa amerikane, në varësi të operacioneve dhe rotacioneve.

Aleatët e NATO-s prej më shumë se një viti kanë pritur që trupat e vendosura pas nisjes së luftës së Rusisë në Ukrainë në shkurt 2022 të jenë të parat që do të tërhiqen.

Lajmet

Trump paralajmëron Italinë dhe Spanjën me largimin e trupave amerikane nga Evropa

Published

1 day ago

May 1, 2026

UBTNews

Presidenti i Donald Trump ka paralajmëruar Italinë dhe Spanjën me mundësinë e tërheqjes së trupave amerikane nga territoret e tyre, si pjesë e një rishikimi më të gjerë të pranisë ushtarake të SHBA-së në Evropë.

Italia dhe Spanja i janë shtuar listës në rritje të vendeve që Trump po i vë në shënjestër me kërcënime të tilla. Duke folur për media, ai deklaroi se “me gjasë” do ta shqyrtojë këtë hap, duke e lidhur drejtpërdrejt me qëndrimet kritike të dy vendeve ndaj fushatës ushtarake amerikane në Iran, sipas raportimit të The Guardian.

“Pse të mos e bëj? Italia nuk ka qenë ndihmë për ne dhe Spanja ka qenë e tmerrshme, absolutisht e tmerrshme”, është shprehur Trump.

Të dy shtetet kanë kundërshtuar ashpër veprimet ushtarake të SHBA-së në Lindjen e Mesme. Presidenti amerikan ka kritikuar vazhdimisht udhëheqësit e tyre për refuzimin që të mbështesin këtë fushatë.

Kryeministrja italiane, Giorgia Meloni, ka refuzuar përdorimin e një baze ajrore në Sicili nga forcat amerikane për operacionet në Iran, ndërsa Trump e ka akuzuar atë se “i mungon guximi”.

Në anën tjetër, kryeministri spanjoll Pedro Sánchez ka qenë një nga kritikët më të fortë evropianë të kësaj lufte që nga fillimi. Ai është përballur vazhdimisht me reagime dhe kërcënime nga Trump, përfshirë edhe paralajmërime për pezullim të anëtarësimit të Spanjës në NATO.