Lajmet

Sindikatat skeptike për Ligjin e pagave, nuk presin të hyjë në fuqi as vitin e ardhshëm

Ligji për Buxhet për vitin 2023 pritet të diskutohet dhe të votohet këtë të enjte në Kuvendin e Kosovës.

Published

3 years ago

on

Sindikatat e punëtorëve të sektori publik e kanë përkrahur propozimin e Aleancës për Ardhmërinë e Kosovës që përmes amendamentimit të bëhet rritja lineare e pagave prej 30% për gjithë punëtorët e sektorit publik, deri në miratimin e Ligjit të pagave. Derisa u shprehën skeptik se ky i fundit do të hyjë në fuqi në vitin 2023.

Kjo u bë e ditur nga vetë kryesindikalistët e punëtorëve publikë gjatë një tryeze të organizuar nga Grupi Parlamentar i Aleancës për Ardhmërinë e Kosovës (AAK) me temën “Projektligji i Buxhetit të Kosovës për vitin 2023 – Ligji i pagave”.

Deputeti i AAK-së, Pal Lekaj u shpreh se në mes të dy leximeve të Ligjit për buxhet do të propozojnë amandamentimin për rritje të pagës në mënyrë lineare për 30% nëse pajtohen edhe sindikatat.

“Kemi menduar që ta shfrytëzojmë këtë kohë që një 30% nëse ju mendoni që është e arsyeshme duke u bazuar edhe në inflacion 20%, por edhe një rritje sepse trendi i inflacionit ka me shkua prapë në vitin 2023 kemi me pas kriza ekonomike dhe nuk kemi deshtë me shkua në 50% dhe me bë politik por kemi menduar që në bazë të analizave që 30% është i arsyeshëm deri në miratimin e ligjit të Pagave… Kryetema e vijave buxhetore do të jetë ky amendament që ka 30% nëse dakordohemi… Nëse e shihni ju të arsyeshme në rregull nëse ka ndonjë plotësim apo ndryshim ne mundemi gjatë rrugës të ndryshojmë”, theksoi ai.

Time Kadrijaj po ashtu nga ky subjekt politik tha se kryesindikalistët nuk i kanë ftuar për tu politizuar. Ajo tha se shihet qartë se po rrezikohet mos miratimi i Ligjit të Pagave në këtë kohë kur inflacioni ka arritur shifra të larta.

“Nuk ju kemi ftuar për me u politizuar, por ne jemi deputet të zgjedhur nga vota e popullit dhe ne duhet të përfaqësojmë interesat e popullit dhe qytetarëve të Kosovës dhe ky takim është i kësaj fryme sepse ne si deputet duhet të ngrisim gjithë padrejtësitë që bëhen në sferën shoqërore dhe në këtë rast po shihet që qytetarët tanë do të jenë të rrezikuar me mos miratimin e Ligjit të pagave dhe do të jenë të rrezikuar me paga të ulëta dhe inflacionin që është arritur në shifra enorme dhe që është padrejtësi dhe normal që ne si deputet duhet t’i ngrisim këto shqetësime”, theksoi ajo.

Kryetari i SBAShK-ut, Rrahman Jasharaj ka mbështetur idenë e AAK-së për ngritjen e pagës në mënyrë lineare për 30%. Sipas tij, kjo ide do t’i ulte tensionet të cilat pritet të ngriten në janar, pasi Jasharaj beson që nuk do të ketë miratim të Ligjit të pagave as në vitin e ardhshëm. Jasharaj u shpreh se Qeveria e Kosovës nuk po ndalet me tendencat për të zhbërë sindikatat.

“Ideja që të kemi një ngritje lineare deri në 30% do të ishte një ndihmës e madhe për të gjithë ne sidomos do të ishte domethënëse për ata që i kemi me paga tepër të ulëta në arsim e kam fjalën për punëtorët tekniko-ndihmës… Lajmet e konfirmuara se nuk është ndarë një pjesë e duhur nga projektligji për buxhetin 2023 për Ligjin e Pagave flet qartë dhe duhet ta kuptim të vërtetën e hidhur se as në vitin 2023 ligjit të Pagave nuk do të kemi dhe po e bëjë një krahasim për ta dëshmuar lojën e bërë nga Qeveria. Gjatë grevës kishin dal me pompozitet se ligji i Pagave po bëhet, arsimtarët kanë kaq koeficiente e zbuluan atë 120 që e mohuan vetë… Kërkesa 30% do t’i qetësonte gjakrat do ta qetësonte situatën të punësuarit do ta kuptonin si mbështetje të këtyre institucioneve sepse mos të harroj qeveria se greva nuk është mbyllur është pezulluar dhe ato premtimet se në janar do të kemi ligjin e Pagave dhe do të jetë i shkëlqyer prapë do të ngritën pikëpyetje dhe tensione”, theksoi ai.

Edhe kryetari i Sindikatës së Pavarur të Administratës të Kosovës, Ali Gashi e ka përshëndetur propozimin e AAK-së për rritje në mënyrë lineare të pagës për 30%. Gashi u shpreh se Ligji për shërbyesit civilë e kap dhe politizon administratën publike.

“Ky është një mashtrim i radhës nga ana e Qeverisë së Kosovës dhe për t’i vërë kapak është ky projektligj i buxhetit ku rrjedhimisht në kontingjentin për implementimin apo rritjen eventuale të pagave nuk është përfshirë… Tendenca që përmes këtij ligji ta kap dhe ta politizoj ta prish strukturën organizative të shërbimit civil i cili është formuar dhe është profesionalizuar me shumë mund dhe sakrificë është një e keqe e madhe që e ka pllakosur komplet sistemin qeveritar të Kosovës me theks të veçantë shërbimin civil, nëse lejojmë një tendencë të tillë mund të themi se nuk do të kemi shërbim civil të përfshirë dhe meritokracisë por do të kemi administratë të kapur e politike… Propozimi juaj është i jashtëzakonshëm duke marr parasysh sfidën që jemi duke kaluar megjithatë konsideroj se tek çështja e nxjerrjes së pagës mesatare të Kosovës duhet të kihet parasysh për arsye se në nxjerrje të mesatares së pagës është mirë të përjashtohen grupet e interesit, institucionet që janë të mandatuara bordet dhe agjencitë sepse një numër i tyre e ngrit këtë mesatare, por të merren për bazë zyrtar publik komunal arsimi, shëndetësia”, u shpreh Gashi.

Por ndonëse e mirëpriti një propozim të tillë, udhëheqësi i Sindikatës së Policëve të Kosovës, Imer Zeqiri tha se propozimi i AAK-së është pak për pagat e policëve të Kosovës. Ai adresoi edhe nevojën për sigurime shëndetësore.

“Do të shkojë kjo në pagën bazë apo do të jetë në neto për arsyes se e dini që paga bazë e një polici është 392 euro dhe për mendimin tim sa i përket Policisë së Kosovës kjo është pak, propozimi është shumë me vend nuk po dua të anashkalojë propozimin”, theksoi ai.

Se nuk do të ketë ndonjë rritje shumë të madhe në paga rritja lineare prej 30% u shprehën edhe nga Federata Sindikale e Mjekëve.

Ligji për Buxhet për vitin 2023 pritet të diskutohet dhe të votohet këtë të enjte në Kuvendin e Kosovës.

Related Topics:
Continue Reading

Rajoni

UBT organizoi me sukses Konferencën e parë Ndërkombëtare të Mjekësisë Sportive

Published

23 minutes ago

on

October 24, 2025

By

Në Parkun Shkencor, Inovativ dhe Teknologjik të UBT-së në Lipjan, u mbajt me sukses Konferenca e parë Ndërkombëtare e Mjekësisë Sportive (IC-SM 2025) – një ngjarje e nivelit të lartë që shënoi një moment historik për zhvillimin e kësaj fushe në Kosovë dhe rajon.

Në këtë konferencë morën pjesë figura të njohura ndërkombëtare të mjekësisë sportive, përfshirë Presidentin e Federatës Ndërkombëtare të Mjekësisë Sportive (FIMS), Prof. Dr. Fabio Pigozzi nga Italia, Prof. Dr. Norbert Bachl nga Austria, Annika Hangleiter, M.Sc. nga Universiteti Teknik i Mynihut (Gjermani), dhe Prof. Dr. Gobert von Skrbensky nga Austria, së bashku me shumë ekspertë vendorë dhe ndërkombëtarë.

Në hapje të konferencës, Rektori i UBT-së, Prof. Dr. Edmond Hajrizi, theksoi se që nga themelimi, UBT ka qenë e përkushtuar ndaj dijes, inovacionit dhe krijimit të një shoqërie të zgjuar, ku shkenca, teknologjia dhe praktika bashkohen për të krijuar ndikim të qëndrueshëm në shoqëri.

“Mjekësia sportive është një nga fushat që mishëron më së miri këtë filozofi – duke bashkuar shëndetin, edukimin, performancën dhe inovacionin teknologjik”, u shpreh Rektori Hajrizi, duke theksuar se përmes Themelimit të Qendrës për Mjekësi Sportive në UBT, është hapur një kapitull i ri për zhvillimin e kësaj fushe në Kosovë.

Ai gjithashtu përmendi se falë kësaj nisme, Kosova është bërë për herë të parë anëtare e Federatës Ndërkombëtare të Mjekësisë Sportive (FIMS), përmes Shoqatës së Mjekësisë Sportive dhe Ushtrimeve të Kosovës (KASEM) — një arritje që e rendit vendin përkrah mbi 117 shteteve anëtare të kësaj organizate prestigjioze.

Në fjalën e tij përshëndetëse, Prof. Dr. Fabio Pigozzi, President i FIMS-it, vlerësoi kontributin e UBT-së në zhvillimin e mjekësisë sportive dhe theksoi rëndësinë e bashkëpunimit ndërkombëtar për avancimin e kërkimit dhe praktikave klinike në këtë fushë.

Në hapje të konferencës morën fjalën edhe: Fitim Arifi, përfaqësues i Komitetit Olimpik të Kosovës; Agim Ademi, Kryetar i Federatës së Futbollit të Kosovës; Agim Krasniqi, Kryetar i KASEM; Iber Alaj, Drejtor i Departamentit të Sportit në Ministrinë e Kulturës, Rinisë dhe Sportit.

Pjesa kryesore e konferencës përfshiu sesionet shkencore me ligjërata nga:

Prof. Dr. Fabio Pigozzi (Itali) – “Sudden Cardiac Death in Sports and Exercise”

Prof. Dr. Norbert Bachl (Austri) – “Sports Medicine as a Specialty in Europe: Shaping Precise Prevention”

Prof. Dr. Edmond Hajrizi (Kosovë) – “UBT Smart City – An Integrated Platform of Emerging Technologies and Smart Support for Sports Medicine Education, Research, Innovation, and Clinical Services”

Annika Hangleiter, M.Sc. (Gjermani) – “Wearable Technologies in Personalized Prevention: The Future is Already Present”

Prof. Dr. Gobert von Skrbensky (Austri) – “Concepts in Sports Surgery Following Knee Trauma: The Role of Activity Level and Biological Age”

Prezantimet shkencore dhe punimet kërkimore

Në sesionin e dytë të konferencës, të udhëhequr nga Dr. Milaim Berisha dhe Dr. Agron Thaqi, u prezantuan punime shkencore të recenzuara, ndër të cilat:

“The New Era FitScore Test: A Comprehensive General Fitness Assessment” – Era Deva, Milaim Berisha

“The Success Ratio of Non-Surgical Management of Proximal Hamstring Injury in Judo: The Case of Olympic Gold Medalist” – Nora Gjakova, Milaim Berisha

“Beyond Consensus, Into Action: Kosovo’s Response to Elite Athlete Mental Health Challenges” – L.J., Zhu., J., Hell & V. Klissouras

“Comparative Analysis of Body Composition in Elderly Residents of Nursing Homes in Kosovo” – Agron Thaqi

Konferenca IC-SM 2025 shërbeu si një platformë e rëndësishme ndërkombëtare për bashkëpunim, shkëmbim përvojash profesionale dhe prezantim të trendeve më të fundit në mjekësinë sportive. Ngjarja synon të nxisë kërkimin shkencor, inovacionin në rehabilitim, edukimin profesional dhe ndërtimin e rrjeteve ndërkombëtare në fushën e sportit dhe shëndetit.

Konferenca u organizua nga UBT, në bashkëpunim dhe mbështetje të:

  • Kosovo Association of Sports and Exercise Medicine (KASEM),
  • International Federation of Sports Medicine (FIMS),
  • Komitetit Olimpik të Kosovës, dhe
  • Sport, Health and the People – A Western Balkan University Network (SHAPE Project).

IC-SM 2025 u vlerësua si një ngjarje që shënon fillimin e një tradite të re shkencore në Kosovë, duke e pozicionuar vendin në hartën ndërkombëtare të kërkimit në mjekësinë sportive dhe shëndetin publik.

Continue Reading

Lajmet

Kusari-Lila: Të dielën seanca e jashtëzakonshme për Qeverinë, ftesa është dërguar tashmë tek të gjithë deputetët

Published

2 hours ago

on

October 24, 2025

By

Në Kuvendin e Kosovës të dielën, më 26 tetor, do të mbahet seanca për votimin e Qeverisë së re të Kosovës.

Shefja e Grupit Parlamentar të Lëvizjes Vetëvendosje, Mimoza Kusari – Lila, konfirmoi për Telegrafin se ftesa tashmë është dërguar tek të gjithë deputetët për seancë të jashtëzakonshme.

“Po, kemi bërë kërkesë dhe tashmë është dërguar ftesa tek të gjithë deputetët për seancë të jashtëzakonshme për të dielën, ora 10:00, me një pikë të rendit të ditës: Zgjedhja e Qeverisë së Republikës së Kosovës”, tha ajo.

Më 11 tetor, presidentja e Kosovës, Vjosa Osmani, e ka mandatuar liderin e Lëvizjes Vetëvendosje (LVV), Albin Kurti, që të formojë Qeverinë e re të vendit, tetë muaj pas mbajtjes së zgjedhjeve të përgjithshme.

Derisa kanë mbetur edhe dy ditë afat për ta paraqitur përbërjen e re të Qeverisë, deri më tani nga LVV nuk është ndërmarrë asnjë hap konkret.

Nuk është raportuar për ndonjë takim apo negociatë me subjektet e tjera politike që do të mundësonte ndërtimin e një koalicioni qeverisës.

Kjo, pasi LVV-së i nevojiten të paktën 61 vota në Kuvend për të formuar Qeverinë, ndërsa në zgjedhjet e 9 shkurtit, kjo parti ka siguruar 48 ulëse./EO

Continue Reading

Lajmet

Në Kroaci po futet shërbimi i detyrueshëm ushtarak, parlamenti voton pro

Published

2 hours ago

on

October 24, 2025

By

Parlamenti kroat sot, me 84 vota pro, 30 abstenime dhe 11 kundër, ndryshoi Aktin e Mbrojtjes, duke konfirmuar kështu rikthimin e trajnimit bazë ushtarak të detyrueshëm.

Stërvitja bazë ushtarake (TVO) do të zgjasë dy muaj, thirrjet e para do të fillojnë deri në fund të vitit, dhe rekrutët e parë në kazermat në Knin, Slunj dhe Pozhega priten në fillim të vitit të ardhshëm. Siç është njoftuar nga Ministria e Mbrojtjes, është planifikuar të thirren rreth 4,000 rekrutë çdo vit, të ndarë në pesë breza.

Të gjithë të rinjtë 18-vjeçarë janë të regjistruar në regjistrin ushtarak dhe do të dërgohen në stërvitje ushtarake në vitin kalendarik kur të mbushin 19 vjeç. Rekrutët do t’i nënshtrohen një kontrolli mjekësor para stërvitjes për të përcaktuar nëse janë të aftë për stërvitje ushtarake dhe Ministria e Mbrojtjes deklaron se kjo do të organizohet sa më afër vendbanimit të rekrutëve për ta bërë më të lehtë aksesin për pjesëmarrësit.

Ekzaminimi përcakton aftësinë mjekësore të një rekruti potencial, njoftoi Ministria e Mbrojtjes, duke shtuar se ata që i nënshtrohen shërbimit ushtarak mund të dërgohen për stërvitje ose të marrin një shtyrje të përcaktuar me ligj deri në fund të vitit të 29-të të jetës, ose të përjashtohen nga detyrimi sipas kushteve dhe mënyrës së përcaktuar me ligj.

Përjashtimisht, rekrutët mbi moshën 19 vjeç dhe deri në moshën 30 vjeç mund të dërgohen edhe në stërvitje ushtarake, pasi shërbimi mund të shtyhet në rastin e studimit dhe për atletët që të marrin pjesë në kampionatet botërore dhe evropiane./EO

Continue Reading

Lajmet

​Trump thotë se tregjet e aksioneve amerikane janë ‘më të forta se kurrë më parë’ falë tarifave

Published

3 hours ago

on

October 24, 2025

By

Presidenti i SHBA-së, Donald Trump, tha të premten se tregjet e aksioneve amerikane janë “më të forta se kurrë” falë tarifave që ai ka vendosur që kur u kthye në Shtëpinë e Bardhë në fillim të këtij viti.

Bursa e Nju Jorkut ka pasur një periudhë të vështirë me ulje-ngritje në gjashtë muajt që nga njoftimi i tarifave të Trump në prill.

Pavarësisht disa pengesave, tre indekset kryesore fituan në periudhën gjashtëmujore, duke arritur gjithashtu nivele rekord. Indeksi Doë Jones u rrit me më shumë se 17%, indeksi i përbërë Nasdaq u rrit me 34% dhe S&P 500 u rrit me 23%.

Në një postim të veçantë, presidenti theksoi se vendi “Është përsëri i pasur, i fuqishëm dhe i sigurtë kombëtarisht, të gjitha fal tarifave”.

Shumë ekonomistë argumentuan se tarifat janë të dëmshme, joproduktive dhe kanë rritur çmimet, duke dëmtuar konsumatorin amerikan, si dhe bizneset.

– Gjykata Supreme e SHBA-së do të shqyrtojë çështjen e tarifave

Trump u ndal edhe te çështja e tarifave para Gjykatës Supreme të SHBA-së, duke e quajtur atë “çështja më e rëndësishme që ka arritur në gjykatë ndonjëherë”, shkruan AA.

Gjykata Supreme ka caktuar datën 5 nëntor për të dëgjuar argumentet nëse Trump i përdori ligjërisht fuqitë e emergjencës për të vendosur tarifa gjithëpërfshirëse në të gjithë botën.

Në gusht, një gjykatë federale e apelit vendosi 7-4 se Trump tejkaloi autoritetin e tij sipas Aktit Ndërkombëtar të Fuqive Ekonomike të Emergjencës, një ligj i vitit 1977 që lejon sanksione ekonomike kundër kërcënimeve “të pazakonta dhe të jashtëzakonshme”.

Disa vendime të gjykatave më të ulëta, përfshirë një të 29 gushtit nga Gjykata e Apelit e SHBA-së për Qarkun Federal, arritën në përfundimin se Trump tejkaloi në mënyrë të paligjshme autoritetin e Kongresit për të vendosur tarifa të larta mbi importet nga shumë vende./KP

Continue Reading

Të kërkuara