Prokuroria Themelore në Prizren ka njoftuar se dy infermierë të Qendrës Kryesore të Mjekësisë Familjare (QKMF) janë ndaluar nën dyshimin se kanë përvetësuar para nga pagesat e pacientëve për shërbime mjekësore.

Sipas Prokurorisë, të dyshuarit Xh.B., në cilësinë e kryeinfermierit, dhe B.R., në cilësinë e infermierit, dyshohet se gjatë ndërrimeve të natës, në periudha të ndryshme nga viti 2024 deri në fund të vitit 2025, kanë përvetësuar mjetet financiare të arkëtuara nga pagesat e pacientëve.

Hetimet kanë zbuluar se Xh.B. dyshohet se ka përvetësuar 1,250 euro, ndërsa B.R. 1,032 euro. Sipas Prokurorisë, shuma e përgjithshme e mjeteve të përvetësuara arrin në 2,282 euro.

Veprimet e tyre dyshohet se përbëjnë veprën penale “Përvetësimi në detyrë”.

Pas intervistimit, në prani të mbrojtësve, me vendim të Prokurorit të Shtetit, të dyshuarve u është caktuar masa e ndalimit për 48 orë, ndërsa hetimet për rastin po vazhdojnë./A.K/

Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë konfirmuar se kanë pranuar ftesë për takim nga kryeministri në detyrë, Albin Kurti.

Mirëpo, nga të dyja këto subjekte politike nuk është bërë ende e ditur nëse do t’i përgjigjen pozitivisht ftesës për të marrë pjesë në takimin e thirrur. Nga ana tjetër, Lidhja Demokratike e Kosovës (LDK) nuk ka dhënë ndonjë deklaratë apo përgjigje lidhur me këtë çështje.

Paralajmërimi për këto konsultime erdhi gjatë ditës së sotme nga ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, e cila bëri të ditur se kryetari i Lëvizjes Vetëvendosje pritet t’u dërgojë ftesa partive parlamentare për të diskutuar rreth formimit të institucioneve të reja dhe zgjedhjes së presidentit. Po ashtu, vetë Kurti ka lënë të kuptohet se gjatë kësaj jave mund të ketë lëvizje konkrete drejt një marrëveshjeje të mundshme me LDK-në.

Këto zhvillime politike vijnë në prag të seancës konstituive për inaugurimin e legjislaturës së 11-të të Kuvendit të Kosovës, e cila është caktuar të mbajë punimet më 6 gusht. /E.A/

Kryeprokurori i Shtetit, Zejnulla Gashi, ka reaguar përmes një deklarate zyrtare lidhur me rastin e zbulimit të varrezave masive në komunën e Zubin Potokut, ku janë gjetur mbetje mortore dhe dyshohet për trupa të tjerë të viktimave nga lufta e fundit në Kosovë.

Kryeprokurori Gashi ka vlerësuar lart punën e të gjitha institucioneve ligjzbatuese që janë të përfshira në këtë proces, duke theksuar rëndësinë e madhe që ka ky rast për drejtësinë dhe familjarët.

“Zbulimi i këtyre varrezave masive është një përpjekje dhe angazhim shtetëror për zbardhjen e së vërtetës dhe vendosjen e drejtësisë. Mbi të gjitha, ndriçimi i këtyre rasteve përbën një detyrim institucional dhe ligjor ndaj viktimave dhe familjeve të tyre që prej vitesh presin përgjigje për fatin e më të dashurve të tyre“, ka deklaruar Kryeprokurori Gashi.

Në deklaratën e tij, ai nënvizoi gjithashtu rëndësinë e bashkëpunimit gjithëpërfshirës për identifikimin e përgjegjësve për këto krime.

“Kryeprokurori i Shtetit vlerëson praninë e të gjitha institucioneve dhe qytetarëve në vendin e ngjarjes ku janë gjetur mbetjet mortore. Kontributi dhe bashkëpunimi i secilit kanë qenë dhe mbetet thelbësor për zbardhjen e këtyre rasteve, si dhe për identifikimin e personave përgjegjës të përfshirë në kryerjen e këtyre krimeve me qëllim që ata të përballen me drejtësinë“, përmbyllet deklarata. /E.A/

Kryeministri në detyrë i Kosovës, Albin Kurti, ka pritur në takim kryetarin e partisë Lidhja Shqiptare dhe deputetin në Kuvendin e Maqedonisë së Veriut, Zijadin Selën.

Gjatë takimit, Kurti i uroi mirëseardhje Selës në Prishtinë dhe e falënderoi për vizitën, ndërsa bashkëbiseduan për zhvillimet aktuale politike në Kosovë dhe në Maqedoninë e Veriut.

Në fokus të bisedës ishin përgatitjet për konstituimin e legjislaturës së njëmbëdhjetë të Kuvendit të Kosovës, formimin e Qeverisë së re dhe procesin e zgjedhjes së presidentit ose presidentes së vendit.

Palët diskutuan gjithashtu për rëndësinë e bashkëpunimit ndërmjet dy shteteve, me theks të veçantë te projektet infrastrukturore, përfshirë ndërtimin e rrugës Prizren–Tetovë dhe aksit Bllacë–Shkup./A.K/