Teknologji

Si të mbrosh jetën private në epokën e mediave sociale?

Gjithsecili ka qasje në një audiencë globale.

Published

3 years ago

June 12, 2022

Betim Gashi

Bryce Dallas Howard

Në vitin 2016, filmova një episod të “Black Mirror”, me titull “Nosedive”. Bënte fjalë për një grua me emrin Lacie, e cila jetonte në një botë futuriste, ku çdokush vlerëson dhe rendit ndërveprimet e tua shoqërore. Dhe për ata që nuk e kanë parë, po ju zbuloj diçka. Në episod, kaloj në një krizë nervore për shkak të përpjekjeve që të marr pëlqime nga njerëzit. Për shumë njerëz, ai episod ngjau shumë i njohur.

Deri kohët e fundit, vetëm një pjesë shumë e vogël e popullsisë njerëzore e jetonin jetën e tyre në publik. Dhe, ndërkohë që ende nuk kemi hyrë në botën e Black Mirror, ne gjithësesi jemi futur në një epokë të re.

Gjithsecili ka qasje në një audiencë globale.

Ne të gjithë jetojmë në publik. Disa e bëjnë këtë, më me dëshirë se të tjerë. Ka një presion për të ndarë nga vetja jonë, më shumë se sa do të donim. Shpesh herë ndjehemi sikur nuk kemi zgjedhje tjetër. Duam të jemi të rëndësishëm. Të zëmë një vend. Të çajmë përpara. Të na besojnë dhe të na pëlqejnë. Të na pranojnë dhe të na kuptojnë.

Kjo shtytje e re drejt vetëekspozimit, është ndoshta eksperimenti social më i madh i historisë. Ne jemi duke marrë vendime, nga ato që të ndryshojnë jetën, në lidhje me kufijtë personalë, pa patur një udhërrëfyes dhe pa precedentë. Për fat të mirë, një gjurmë gjithësesi ekziston.

Kushdo që ka jetuar në sytë e publikut si sportist, aktor apo politikan, ka kaluar nëpër një version të kësaj situate.

Babai im ka qenë figurë publike, që në moshën 5 vjeç. Si aktor, me një fëmijë aktore dhe më pas regjisor. Dhe unë kam qenë aktore që në fillim të 20-tave. Në fakt, familja ime ka qenë e përfshirë në fushën e kinemasë dhe argëtimit për tre breza. Në 70 vitet e fundit, kemi vrarë vazhdimisht mendjen se si duhet të shfaqemi në sytë e publikut.

Mamaja ime, Cheryl, nuk ka dashur kurrë që të jetë në sytë e publikut. Por, ndodhi që ra në dashuri me një burrë që ishte në sytë e publikut. Mamaja ime u njoh me tim atë, Ronin, kur ishte 16 vjeç. Në atë moshë, ajo tashmë kishte fluturuar e vetme në avion, ishte bërë anëtare e një klubi armësh vetëm për çuna, ishte përfshirë në dhjetëra grindje me grushta, dhe kishte ndihmuar babanë e saj që të rriste motrat e saj më të vogla. I them këto, për të treguar se ime më ishte një grua e re shumë e angazhuar dhe pasionante, e cilla fillimisht e injoroi vëmendjen e djaloshit të famshëm në shkollë të mesme. Ishte fillimi i viteve shtatëdhjetë, dhe babai im ishte i njohur sepse luante rolin e Opie në “Andy Griffith Shoë”, dhe shumë shpejt do të filmonte serinë e parë të një serieli me emrin “Happy Days”. Por, mamasë time shumica e këtyre nuk i bënin përshtypje. E vetmja gjë që ajo shikonte në televizor, ishte “Star Trek”.

Pasi babai im i propozoi tre herë, pasi ata u martuan dhe lindën fëmijë, ime më u transformua në një grua luftëtare e gatshme për të mbrojtur.

Por, vetëm kur mua më dhanë një skenar në moshë parashkollore, si një mënyrë që ai skenar të gjente rrugën për tek babai, ime më kuptoi se vizibiliteti i tim eti, po shtrohej tek e gjithë familja, dhe se ajo do të duhej të na përgatiste ne fëmijëve, për diçka që, ajo vetë nuk e kishte përjetuar kurrë.

Të rriteshim, në sytë e publikut.

Dhe kjo kërkonte disa taktika prindërimi ekstreme. Së pari, nuk lejoheshin përkëdhelitë. Kurrë. Në fëmijëri, unë isha e tmerruar nga gjarpërinjtë, dhe çfarë bëri mamaja? Më bleu një gjarpër të vogël. Kur ngeca në recitalin tim të parë të pianos dhe u largova nga skena duke qarë, ime më këmbënguli që të qëndroja dhe të duartrokisja shokët. Vite më vonë, kur im bir zgërdhihej përballë skeletit të një ketri që macja jonë kishte lënë tek porta, Cheryl e detyroi që të pastronte mbetjet.

IMe më donte që të na bënte sa më të fortë, me qëllim që ne të kishim më shumë kurajë dhe më pak frikë kur të përballeshim me situata të sikletshme. Dhe kjo nënkuptonte zero përkëdhelira. Largoje rehatinë, na predikonte ajo. Çdo sfidë që shfaqej, ishte në fakt një shans për të qenë më të fortë.

Vetëbesimi vjen prej karakterit, dhe jo prej pamjes sonë, thoshte ajo.

Kur vinte re që po shihesha në pasqyrë, kur isha fëmijë, ajo mbulonte të gjitha pasqyrat e shtëpisë. Një kompliment i bukur ishte “ti ke karakter të mrekullueshëm”, dhe jo “ti je e bukur”.

Dhe karakteri, ndërtohej duke bërë punët e shtëpisë.

Kur nuk isha duke pastruar haurin, unë isha duke qethur delet, ndërruar gomat, pastruar tualetet, bërë punë vullnetare, pastruar dëborën. Cheryl besonte se puna, sidomos në shërbim të të tjerëve, ushqen vetëbesimin, diçka që na duhet gjithmonë e më shumë kur ekspozohemi në sytë e publikut.

Por, ndoshta mësimi më i rëndësishëm ishte: është jeta private, ajo që bën të ia vlejë të jetuarit e jetës publike. Cheryl, e dinte se, ndërkohë që fama vjen bashkë me shumë bekime, kishte gjithësesi një impakt dhe një kosto potenciale, të jetuarit e jetës tënde në publik. Dhe kështu, më shumë se çdo gjë, ajo, ashtu si gjyshërit e mi përpara saj, theksonte fort vlerën e privatësisë.

Sepse kultivimi i një jete private është diçka e çmuar. Eshtë e shenjtë. Vlera e saj qëndron në atë që nuk ndan me të tjerët. Atë që mban. Dhe për kë e mban.

Bota është sot një qytet i madh e i vogël në të njëjtën kohë. Por, brenda atij sheshi virtual të këtij qyteti, ka shtresëzime marrëdhëniesh, ka shkallë intimiteti, dhe gjithësecili meriton një sasi të ndryshme të personit tënd, një anë të ndryshme.

Tani, se ku qëndrojnë ata kufij, kjo varet nga ti.

Por që të marrim këto vendime, ne të gjithë duhet të jemi Cheryli i vetes sonë, duhet të jemi mbrojtës të vetes sonë. Sepse është tunduese të mendosh që, sa më shumë të ndaj me të tjerët nga jeta private, aq më shumë ata kanë rrugë për t’u lidhur me mua. Por ka diçka speciale, kur di se çfarëdo që të jetë që unë ndaj me tim shoq, me fëmijët a me miqtë, është vetëm për ta dhe për askënd tjetër. Pa atë rreth të brendshëm, ne mbetemi me një cektësi dhe një boshllëk. Jemi të njohur, por nuk na njeh kush me të vërtetë, madje as vetja jonë.

Të jetuarit në publik kërkon prej nesh të jemi të guximshëm dhe të fortë, por ruajtja e jetës private na fuqizon për të patur këto aftësi.

Kështu, kur im bir, 15 vjeç hapi një kanal në YouTube, dhe ime bijë, 10 vjeç kërkoi që të futej në TikTok, unë pyeta veten “çfarë do të bënte Cheryl?”

Sado që dua t’i mbroj fëmijët e mi, unë e di se përgjigja nuk është që t’i inkurajoj të rrijnë larg këtyre. Pra, unë nuk i dua fëmijët në përleshjen e madhe digjitale, deri kur ata të dijnë se kush janë. Por, njeriu e zhvillon sensin e vetes duke marrë pjesë në botë. Kështu që, unë përpiqem t’i mbroj të njohin veten, përmes këtyre teknologjive, jo duke mbetur jashtë tyre. Dhe i jap vetes sime, po atë mbrojtje dhe këshillë mëmësore, duke zbatuar dy parime kryesore.

Parimi i parë, vonesa dy ditore.

Çfarëdo që të jem duke përjetuar, unë përpiqem të pres 48 orë para se të postoj në rrjete sociale. Sepse në këtë mënyrë, unë mund të jem e pranishme në atë që po ndodh me njerëzit që dua, para se të filloj të llogaris se si do ta pozicionoj publikisht.

Parimi i dytë, posto me një qëllim.

Para se të ndaj diçka, unë pyes veten pse? Kush është qëllimi? Dhe më e rëndësishme, si u shërben postimi njerzve që unë dua?

Rrëziqet dhe shanset e të jetuarit të jetës në publik kanë ekzistuar shumë kohë më parë. Por është e rëndësishme të dimë, atë që familja ime e dinte atëherë, dhe e di edhe sot. Se vlera jote e vërtetë, matet prej pasurisë së vlerave të jetës tënde private. Ajo copëz e jotja, që vetëm pak njerëz e njohin dhe kanë qasje.

Sepse trashëgimia që ne krijojmë privatësisht, është po aq e fuqishme dhe jetëgjatë, sa çdo vlerësim publik. Ndoshta edhe më shumë. / TED Talks – Bota.al

Related Topics:jeta private mediat sociale

Up Next

NASA mbledh shkencëtarët për të studiuar UFO-t

Don't Miss

Teleskopi James Webb goditet nga një meteor i vogël

Teknologji

Microsoft prezantoi ekranin Xbox-PC

Published

2 days ago

March 29, 2025

Albina Zeneli

Microsoft po vazhdon me përmirësime agresive në aplikacionin Xbox për PC, por duket se aksidentalisht ka zbuluar një funksion që pak kush e priste.

Së fundmi, është zbuluar “Project Kennan”, një partneritet mes Microsoft dhe ASUS për zhvillimin e një konsole të dorës për video-lojëra.

Ky pajisje është e para në kuadër të një programi të ri Xbox, i cili përfshin partnerë tradicionalisht të lidhur me Windows, me qëllim formësimin e së ardhmes së harduerit të lojërave në këtë platformë. Të gjithë ata që kanë përdorur pajisje si Lenovo Legion Go ose ASUS ROG Ally e dinë se Windows thjesht nuk është i përshtatur për një përdorim të tillë. Megjithatë, situata po ndryshon gradualisht, raporton Windows Central.

Microsoft ka shtuar opsione në Xbox Game Bar, si modaliteti kompakt e mundësia e përdorimit të “tastierës në ekran” përmes kontrolluesit.

Megjithatë, informacionet më të fundit të rrjedhura sugjerojnë një hap edhe më të madh përpara.

Mbetet e paqartë nëse bëhet fjalë për një gabim të paqëllimshëm apo për një vizion të qartë të planeve të ardhshme të dizajnit.

Ndodh të jetë diçka më e rëndësishme, bashkëpunim i mundshëm mes Microsoft dhe Valve, që sjellë dyqanin Steam në konsolat Xbox.

Kjo mund të çojë në një situatë ku nuk do të ketë më dy versione të së njëjtës lojë, një për Windows dhe një për Xbox, por vetëm një – për Windows PC.

The Verge vuri re se Microsoft e hoqi me shpejtësi imazhin pasi gazetarët i kontaktuan për të pyetur mbi domethënien e tij, duke e bërë edhe më misterioze këtë veçori të mundshme të re.

Teknologji

Poco prezanton telefonin e mençur F7 Ultra

Published

3 days ago

March 28, 2025

Albina Zeneli

Poco prezantoi zyrtarisht telefonin e mençur të saj të parë “Ultra”, Poco F7 Ultra. Me të erdhi edhe F7 Pro. Është telefoni i mençur i parë që vjen me procesorin aktual të modelit të avancuar.

Në vend të procesorit më të mirë të vitit të kaluar, F7 Ultra fuqizohet nga Snapdragon 8 Elite më i fundit.

Telefoni është dy gjenerata përpara modelit Poco F6 Pro, i cili përdor një procesor Snapdragon 8 Gen 2, Snapdragon 8 Gen 3 shkoi te modeli Poco F7 Pro. Krahasuar me Snapdragon 8 Gen 3, Elite ka një CPU 45 për qind më të shpejtë dhe 40 për qind GPU më të shpejtë.

Duke e krahasuar me Snapdragon 8 Gen 2, ndryshimi në performancë është edhe më i madh. Mirëpo, në Poco nuk u mjaftuan me këtë.

F7 Ultra është telefoni i parë në familje me një çip grafik të dedikuar, VisionBoost D7. Është një çip 12 nm që mundëson një rritje të rezolucionit, i cili gjeneron korniza dhe Game HDR. Është funksional për YouTube dhe Netflix, jo vetëm për lojëra.

Kur bëhet fjalë për lojërat, Snapdragon dhe VisionBoost ekzekuton Genshin Impact në rezolucion 2K Super me 120 fps, pa degradim të performancës edhe pas një ore lojërash.

Çipi Surge G1 kujdeset për baterinë 5,300 mAh, ndërsa Surge P3 kontrollon karikimin, kështu që 120 W HyperCharge mund të ngarkojë plotësisht baterinë në vetëm 34 minuta.

Ekziston edhe karikimi me valë HyperCharge 50 W. Të dy procesorët ndihmojnë në zgjatjen e jetëgjatësisë së baterisë, kështu që ata do të ruajnë të paktën 80 përqind të kapacitetit të tyre edhe pas 1600 cikleve të karikimit.

Modeli Ultra e fitoi emrin jo vetëm me performancën, por edhe me kamerat. Ai mori sistemin më të avancuar të kamerës në historinë e markës Poco.

Ka një sensor 50 MP Light Fusion 800 (1/1.55″, 1.0µm) me një hapje f/1.6 dhe stabilizim optik të imazhit. Aplikacioni i kamerës ofron mundësinë e zgjedhjes së disa gjatësive fokale si 35 dhe 48 mm, të cilat menaxhohen nga ky sensor.

Ekziston një modul telefoto me një lente “lundruese”, e cila ka një gjatësi fokale origjinale prej 60 mm (2.5x) dhe mund të kalohet në 120 mm (5x) falë sensorit 50 MP.

Kamera telefoto gjithashtu ka stabilizues optik të imazhit dhe mund të bëjë foto tele-makro në një distancë prej 10 cm. P7 Ultra është gjithashtu i pajisur me një kamerë ultra të gjerë 32 MP që mbulon një fushë shikimi 120 gradë, si dhe një kamerë selfie 32 MP.

Telefoni ka një ekran OLED 6,67 inç 12-bit 120 Hz me një rezolucion prej 1,440×3,200 pikselë dhe Poco zgjodhi xhamin e tij mbrojtës Poco Shield Glass. Si parazgjedhje, ekrani arrin një shkëlqim prej 1800 nits, por shkon deri në 3200 nits. Zvogëlimi PWM me frekuencë të lartë (3,840 Hz) mundëson 16,000 nivele ndriçimi.

Shpejtësia standarde e përgjigjes me prekje është 480 Hz, por nëse është e nevojshme mund të rritet deri në 2,560 Hz. Gjurmimi i qetë i hyrjes përmirësohet më tej nga çipi VisionBoost D7. Poco F7 Ultra është në dispozicion në të zezë dhe të verdhë, si dhe në dy konfigurime memorie, përkatësisht 12/256 dhe 16/512 GB. Bëhet fjalë për RAM LPDDR5X dhe memorie UFS 4.1. Çmimi është 749 ose 799 euro.

Sa i përket modelit Pro, ka një çip grafik VisionBoost D7. Në anën e pasme është një kamerë kryesore 50 MP me sensor Light Fusion 800 dhe stabilizues optik të imazhit, si dhe një kamerë ultra e gjerë 8 MP, ndërsa pjesa e përparme është një kamerë selfie 20 MP.

Ai përdor softuerin Xiaomi HyperOS 2 të bazuar në Android 15, si dhe paketën HyperAI dhe ka mbështetje për Google Gemini.

Poco premton 4 vjet përditësime Android, 6 përditësime sigurie. Pajisja ka certifikatë IP68 për rezistencë ndaj ujit e pluhurit. Ai mori një ekran AMOLED 6,67 inç me rezolucion FHD+ dhe një shpejtësi rifreskimi prej 120 Hz, në të cilin është integruar sensor ultrasonik i gjurmëve të gishtërinjve. Ekrani mbrohet nga Gorilla Glass 7i dhe ndriçimi maksimal i tij është 1800 nits.

Mundësohet nga një bateri 6000 mAh me mbështetje karikimi 90W. Vjen në ngjyrat e zeza, argjendi dhe blu dhe në konfigurime memorie prej 12/256 dhe 12/512 GB duke filluar nga 599 dhe 649 euro.

Teknologji

Ndryshimet po vijnë, si do të duket iOS 19?

Published

4 days ago

March 27, 2025

Albina Zeneli

Apple thuhet se po punon për një ndërfaqe të re për iOS 19 dhe macOS 16, e cila do t’i bëjë të dy sistemet operative më të ngjashme me visionOS.

Pamjet e zbuluara, të shpërndara nga YouTuberi, John Prosser, tregojnë aplikacionin Messages me butona të ridizajnuar në krye, të mbuluar me një efekt “rrethor, xhami” që të kujton visionOS.

Tastiera virtuale për iPhone gjithashtu është ridizajnuar pak, me skaje më të rrumbullakosura, transmeton Telegrafi.

Prosser pretendon se përdoruesit që presin një ndryshim rrënjësor në iOS 19 mund të mos jenë të kënaqur, pasi ndërfaqja e re nuk do të jetë shumë e ndryshme. Megjithatë, do të shtojë më shumë elementë të frymëzuar nga sistemi operativ Apple Vision Pro.

Mark Gurman i Bloomberg, përshkroi iOS 19 dhe macOS 16 si “rifreskimin më të madh të ndërfaqes në vite”, Prosser më parë ndau konceptet e aplikacionit të ri të të kamerës për iPhone.

Në mbështetje të thashethemeve është identiteti zyrtar vizual i ngjarjes WWDC 2025, i cili është me elementë qelqi, thellësi dhe hije, të cilat mund të lënë të kuptohet në drejtimin e dizajnit që do të marrë iOS 19.

Rifreskimi i fundit i plotë i sistemit iOS u bë në vitin 2013 me iOS 7, ndërsa më 2020 Apple solli macOS Big Sur me ikona 3D, gjë që shkaktoi spekulime se një stil i ngjashëm arrin në iOS.

Konfirmimi zyrtar pritet në konferencën WWDC 2025, të planifikuar për 9 qershor, kur Apple do të prezantojë këtë gazetë.

Automobilizëm elektrikë

Ford ka patentuar një transmision manual për veturat elektrike

Published

5 days ago

March 26, 2025

Albina Zeneli

Ford publikoi një aplikim të ri për patentë, që zbulojnë skica të një ndërruesit manual të shpejtësisë për automjetet elektrike.

Sipas Ford, kutia e ndryshimit menaxhon rrjedhën e energjisë elektrike që furnizohet nga bateria, duke kontrolluar shpejtësinë e motorit dhe momentin e rrotullimit që çdo motor prodhon.

Në fjalë të tjera, ndërsa lëvizni levën e kutisë së ndryshimit, dërgohen sinjale për të ndryshuar daljen e motorit të automjetit, duke imituar ndryshimet e kutisë tradicionale të ndryshimit.

Ford nuk është i vetmi që ka këtë ide, pasi disa prodhues të tjerë po përpiqen të shtojnë funksione të ngjashme në automjetet elektrike.

Natyrisht, patenta nuk do të thotë se Ford do ta prodhojë këtë kuti ndryshimi. Nëse do të ishim disi ironi, mund të konkludojmë se disa prodhues mund të rikthejnë kutitë e ndryshimit manuale në veturat me benzinë dhe naftë, aty ku ato kanë më shumë kuptim.

Në automjetet elektrike, kutitë e ndryshimit manuale ose automatike sekondare nuk janë të nevojshme.