Teknologji

Shumë të rinj nga Kosova po marrin pjesë në garën “Datathon Business Analysis”

Publikuar

Ka filluar gara më e madhe në vend “Datathon Business Analysis”, që sivjet ka bashkuar studentët e nivelit bachelor dhe master të të gjitha universiteteve dhe kolegjeve publike dhe private në Kosovë.

15 ekipe të studentëve do të testojnë aftësitë dhe njohuritë e tyre në të dhëna dhe fushën “machine learning”, përmes gjuhëve programuese si: Python, R Programing, Weka, Tableau, SPSS, RapidMinder e IBM Watson.

Rektori i UBT-së, prof.dr. Edmond Hajrizi, në hapjen e kësaj gare të madhe ka thënë se kjo garë është një koncept i ri, që studentëve u jep një mundësi unike bashkëpunimi mes vete për zgjidhjen e problemeve në të dhëna, e që me këtë rast nga kjo garë mund të dalin talentë e profesionistë të kësaj fushe.

“Mendoj se kjo garë është një koncept i ri, koncept modern, koncept që duhet të shtyhet përpara, pasi që Hackathon dhe Datathon kanë dal si koncepte që lidhen me rritjen e kompetencave në fusha të ndryshme. Momentumet e ndryshme të kësaj gare krijojnë presion kohor, momente të bashkëpunimit në grupe, gjetjen e alternativave, rritjen e shkallës së kreativitetit, dhe të gjitha këto janë pjesë përbërëse e rritjes profesionale e akademike të garuesve”, ka thënë rektori Hajrizi.

Anëtari i Bordit Menaxhues në Raiffeisen Bank, Shukri Mustafa, është shprehur i lumtur me organizimin e kësaj gare, duke thënë se UBT dhe Raiffeisen do të mbahen mend për organizime të tilla si Datathon dhe Hackathon.

“Datathon ka një rëndësi të veçantë si garë dhe fokusi i ekipeve që garojnë është që me të dhënat që posedon banka të përmirësojnë edhe më shumë shërbimin ndaj klientëve tanë ekzistues të bankës në një të ardhme të afërt. Datathoni duhet të vazhdojë të organizohet dhe të bëhet kjo edhe si organizim tradicional, çdo vit,  që Raiffeisen dhe UBT të mbahen mend si lider të organizimeve si Datathon dhe Hackathon”, ka thënë Shukri Mustafa nga Raiffeisen Bank.

Ndërkaq, drejtori i Qendrës për Shërbime Profesionale dhe Produkte, Besnik Skenderi, ka falënderuar të gjithë pjesëmarrësit, teksa ka thënë se kjo garë është një mundësi shumë e mirë për studentët, të cilët me talentin e tyre në të ardhmen do ta prezantojnë Kosovën në mënyrë dinjitoze në arenën ndërkombëtare. Ai ka shtjelluar mënyrën e vlerësimit, teksa ka prezantuar veç e veç jurinë profesionale e cila do të bëj vlerësimin e punës së kandidatëve.

“E gjithë kjo punë filloi para 3 viteve, si ide e prof.dr. Edmond Hajrizi dhe anëtarit të Bordit Menaxhues në Bankën Raiffeisen, zotëri Shukri Mustafa, dhe ne e filluam dhe doli mirë, besojmë që edhe këtë vit do të dal shumë mirë, dhe në bazë të listave që pashë të pjesëmarrësve unë po shoh lider që kanë për ta dërguar Kosovën përpara, sepse nuk është e lehtë ta sfidosh vetën dhe ta marrësh guximin të shkosh në një garë online me programe si Python, Business Analysis, Tablou dhe SPSS, dhe kjo garë është shumë e mirë për Kosovën”, ka thënë drejtori i Qendrës për Shërbime Profesionale dhe Produkte, Besnik Skenderi.

Gara “Datathon Business Analysis” është duke u zhvilluar në platformën online, teksa është organizuar nga UBT dhe Raiffeisen Bank.

Teknologji

TikTok sërish probleme me përdoruesit

Publikuar

nga

TikTok po përballet me një sfidë ligjore nga ish-komisionerja e fëmijëve për Anglinë, Anne Longfield, mbi mënyrën se si i mbledh dhe përdor të dhënat e fëmijëve.

Pretendimi po depozitohet në emër të miliona fëmijëve në Britaninë e Madhe dhe BE të cilët kanë përdorur aplikacionin e famshëm. Nëse pretendimi rezulton i vërtetë, fëmijëve të prekur TikTok mund t’u detyrohet mijëra paundë.

Avokatët pretendojnë se TikTok merr informacione personale të fëmijëve, duke përfshirë numrat e telefonit, videot, vendndodhjen e saktë dhe të dhënat biometrike, pa paralajmërim të mjaftueshëm, transparencë ose pëlqimin e nevojshëm të kërkuar nga ligji, dhe pa e ditur fëmijët ose prindërit se çfarë po bëhet me ato informacione.

Si përgjigje, aplikacioni tha:

“Privatësia dhe siguria janë përparësitë kryesore për TikTok dhe ne kemi politika të fuqishme, procese dhe teknologji të vendosura për të ndihmuar në mbrojtjen e të gjithë përdoruesve, dhe veçanërisht të përdoruesve tanë adoleshentë. Ne besojmë se pretendimet nuk kanë baza dhe do t’i shkojmë kësaj çështjeje deri në fund”.

Pretendimi është ngritur në emër të të gjithë fëmijëve që kanë përdorur TikTok që nga 25 maji i vitit 2018.

Longfield tha pët BBC se ajo ishte përqëndruar te TikTok sepse, ndërsa të gjitha platformat e mediave sociale mblidhnin informacion, TikTok kishte politika “të tepërta” të mbledhjes së të dhënave.

“TikTok është një platformë jashtëzakonisht e popullarizuar e mediave sociale që ka ndihmuar fëmijët të mbajnë lidhje me miqtë e tyre gjatë një viti tepër të vështirë. Sidoqoftë, prapa këngëve argëtuese, sfidave të vallëzimit dhe trendeve të sinkronizimit të buzëve qëndron diçka shumë më e keqe.”

Ajo pretendon se firma është “një shërbim i mbledhjes së të dhënave që është mbuluar si një rrjet social” i cili ka “mashtruar qëllimisht dhe me sukses prindërit”.

Ajo shtoi se ata prindër kanë të drejtën të dinë se çfarë informacioni privat po mblidhet përmes TikTok.

Çështja po përfaqësohet nga firma ligjore “Scott and Scott”. Partneri Tom Southwell tha se ai besonte se informacioni i mbledhur nga TikTok përfaqëson “një shkelje të rëndë të ligjit për mbrojtjen e të dhënave në Mbretërinë e Bashkuar dhe BE”.

“Të ardhurat nga reklamat e TikTok dhe ByteDance janë të bazuara në informacionin personal të përdoruesve të saj, përfshirë fëmijët. Të përfitosh nga ky informacion pa përmbushur detyrimet e tij ligjore dhe detyrën e tij morale për të mbrojtur fëmijët në internet, është e papranueshme”, -tha ai.

Kjo nuk është hera e parë që ndaj TikTok ngrihen pretendime për problemin e sigurisë së përdoruesve.

Vazhdo të lexosh

Teknologji

Dështon shitja e Discord tek Microsoft

Publikuar

nga

Platforma e komunikimit Discord i ka dhënë fund bisedimeve me Microsoft dhe planifikon të përqendrohet tek zgjerimi i biznesit si një kompani më vete raportoi agjencia e lajmeve Reuters.

Kompania do të fokusohet tek ndërtimi i platformës dhe gjenerimi i të ardhurave nga baza e përdoruesve që është rritur me shpejtësi gjatë pandemisë.

Në Mars u raportua se Microsoft ishte në bisedime për blerjen e Discord për mëse 10 miliardë dollarë. Rrjeti social është rritur bujshëm gjatë pandemisë së Covid-19-ës ndërsa njerëzit po investonin në gaming.

Platforma e cila lejon grupet publike dhe private, është zgjeruar përtej aktiviteteve gaming në lloj lloj komunitetesh si sporti, muzike e madje edhe kriptomonedhat.

Me mbi 140 milionë përdorues, modeli i biznesit distancohet nga rrjetet e tjera sociale si Facebook dhe Twitter që mbështeten tek reklamimi.

Ofron abonime me pagesë Nitro që kushton 99.99 dollarë në vit me emoji të veçanta apo video të rezolucionit të lartë.

Në Dhjetor ngriti 100 milionë dollarë investim privat duke u vlerësuar me 7 miliardë dollarë. /CIO Albanian

Vazhdo të lexosh

Kompjuterë

Apple prezantoi iMac e ri me procesorin M1

Publikuar

nga

Modeli bazë i iMac vjen me dy porta USB-C/Thunderbolt ndërsa modeli më i shtrenjtë me dy porta shtesë USB-C por pa mbështetje për Thunderbolt.

Ditën e Marte Apple prezantoi një iMac të ridizajnuar me procesorin e Apple dhe një kasë shumëngjyrëshe duke rimëshiruar iMac all-in-one klasikë.

Apple tha se iMac i ri është dizajnuar nga e para për procesorin Apple M1. Ka ekran 24-inç 4.5K me korniza të holla anash dhe në krye ndërsa në fund mbetet ende një kornizë e trashë.

Është 11.5mm i trashë dhe Apple thotë se bën më pak zhurmë dhe qëndron më i ajruar sesa modeli i kaluar falë procesorit M1.

Një kabëll magnetik karikimi vendoset në pjesën e pasme dhe ngjan shumë me një kabëll MagSafe. Porta e karikimit shërben edhe si portë interneti që kalon nëpër të njëjtin kabëll.

Modeli bazë i iMac vjen me dy porta USB-C/Thunderbolt ndërsa modeli më i shtrenjtë me dy porta shtesë USB-C por pa mbështetje për Thunderbolt.

Çuditërisht kompjuteri ka edhe një portë kufjesh 3.5mm. Së bashku me iMac e ri Apple prezantoi edhe një tastierë, maus dhe trackpad të ri me ngjyrat e iMac. Tastiera përmban një buton Touch ID për identifikim.

Çmimet fillojnë nga 1,299 dollarë për modelin bazë me 8GB RAM dhe 256GB SSD dhe shkojnë deri në 1,499 dollarë për 16GB RAM dhe 2TB SSD. Porositë nisin nga data 30 Prill ndërsa shitjet në gjysmën e muajit Maj.

Është hera e parë që Apple kalon një iMac në procesorin M1, çipe të krijuara nga vetë gjiganti i iPhone. Kompania fillimisht shtoi këtë procesor tek MacBook Air, MacBook Pro dhe Mac mini në Nëntor.

Në fund pritet që Apple të kalojë çdo produkt Mac në procesorët e rinj të arkitekturës ARM. Kjo do të thotë se softuerët e macOS duhet të përditësohen për të funksionuar me procesorin e ri dhe deri më sot ecuria ka qenë e mirë në këtë drejtim.LEXO EDHE:  Versioni i ri i Opera fokusohet në produktivitet

Gjenerata e parë e Apple M1 u prit shumë mirë dhe mori vlerësime të larta veçanërisht në konsumin e energjisë dhe jetëgjatësinë e baterisë. /PCWorld Albanian

Vazhdo të lexosh

Mobile

Mënyra e duhur për dezinfektimin e telefonit celular

Publikuar

nga

Njerëzit, dashje pa dashje, janë të varur ndaj telefonit celular.

Atë e mbajmë gjithnjë në duar, ua japim të tjerëve dhe e lëmë në sipërfaqe nga më të ndoturat.

Pastrimi dhe disinfektimi i tij është i domosdoshëm në këtë periudhë pandemie por jo vetëm.

Sa herë që ne prekim telefonin celular, me gishtat tanë transferojmë bakteret dhe viruset nga pajisja drejt fytyrës dhe gjithçka tjetër që na rrethon.

Çfarë ju duhet për pastrimin e duhur të telefonit celular

Për pastrimin e kësaj pajisjeje ju nevojiten:

Ujë të pijshëm

Alkol (mbi 70%)

Shishe spërkatëse

Pambuk

Leckë prej mikrofibre

Hiqeni telefonin nga karikuesi dhe çdo fishë tjetër.

Fikeni atë dhe hiqeni këllëfin mbrojtës, i cili duhet pastruar veçmas.

Në një shishe spërkatëse përzieni sasi të barabarta të ujit dhe alkoolit.

Uji i rubinetit nuk është i përshtatshëm sepse është i rëndë dhe mund të gërvishtë ekranin.

Tundeni shishen mirë dhe më pas spërkateni leckën prej mikrofibre me të.

Solucioni nuk duhet hedhur kurrë direkt mbi telefonin dhe lecka nuk duhet të jetë qull.

Fërkojeni telefonin në të gjithë gjatësinë dhe gjerësinë e tij, para dhe mbrapa.

Në pjesën e kufjeve, karikimit apo pikave të tjera hyrëse mund të përdorni një kunj veshësh ose dhëmbësh me pak pambuk.

Lëreni telefonin të thahet për 15 minuta përpara se ta përdorni.

Në të njëjtën mënyrë pastroni edhe kufjet, edhe fishën e karikimit apo këllëfin mbrojtës.

Nëse këllëfi është prej silikoni, atë mund ta lani mirë me ujë dhe sapun dhe ta lejoni të thahet natyralisht.

Për këllëfët prej një materiali më të fortë, mund të zgjidhni pastrimin me alkool.

Pas pastrimit të telefonit, mos harroni të lani duart mirë me ujë të rrjedhshëm dhe sapun për mbi 20 sekonda.

Produktet dhe solucionet që nuk duhet t’i përdorni kurrë për pastrimin e telefonit

Telefoni celular është një pajisje delikate ndaj substanca dhe solucione të caktuara e dëmtojnë atë.

Bëhet fjalë për solucionet e pastrimit të dyshemesë, xhamave dhe tryezave, acetoni, amoniaku apo zbardhuesi i zakonshëm i rrobave dhe i shtëpisë.

Vazhdo të lexosh

Të kërkuara