Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Riçard Holbruk

26 korrik 1993

Dhunë e policisë serbe në komunën e Podujevës

Forca të mëdha të policisë serbe rrethuan sot në orët e hershme të mëngjesit disa lagje të fshatrave Gllamnik e Polanicë, 3 – 4 km larg Podujevës. Ndaj banorëve të lagjeve Breznicë e Lushak të Polanicës dhe të lagjes Sekiraqë të Gllamnikut policia ka ndërmarrë një fushatë të egër dhune.

Nga Podujeva njoftohet për shumë të arrestuar dhe të rrahur.

Në lagjen e Lushakëve u arrestuan: Rrahim, Bedri, Bujar, Shaip dhe Ilmi Lushaku; në lagjen Breznicë u arrestuan Raif, Izet, Gani dhe Idriz Breznica; në lagjen Sekiraqë janë arrestuar Nezir, Gazmend dhe Sami Ejupi. Janë arrestuar edhe Artan Topanica, Hasim Tërnava dhe Faton Boshnjaku, që të tretë ishin mysafirë në një familje të Lushakëve.

Në mesin e shumë familjeve të bastisura e të keqtrajtuara ishte edhe familja e Maliq Ejupit, baba i Mehmet Ejupit, të vrarë në demonstratat e vitit 1989 në Podujevë.

Nga Podujeva bëhet me dije se reth orës 11 policia serbe u tërhoq nga këto fshatra, por vazhduan bastisjet dhe keqtrajtimet e shqiptarëve në Podujevë.

Rruga Prishtinë-Podujevë është nën kontroll të rreptë të policisë. Nga orët e hershme të mëngjesit janë rrahur shumë udhëtarë, sidomos ata që udhëtonin prej Podujevës për në Prishtinë. Hasan Bahtiri, Hilmi Bahtiri dhe Lulzim Mahmuti, që po udhëtonin nga Podujeva për në Prishtinë, u rrahën nga policët serbë në orën 6,30 min.

Në bazë të dëshmive të të rrahurve, nuk përjashtohet mundësia që në këtë ekspeditë ndëshkuese, të jenë inkuadruar edhe policë nga Leskovci.

Policia po arreston qytetarë dhe veprimtarë politikë edhe në brendësi të qytetit të Podujevës. Njoftohet për arrestimin e disa veprimtarëve të UNIKOMB-it në Podujevë.

Kjo fushatë e egër represive po bëhet nën pretekst se pak pas mesnate nga persona të paidentifikuar u shti me armë në një patrollë të policisë serbe, në rrugën Prishtinë-Podujevë, në lagjen Sekiraqë të Gllamnikut.

Ndërkohë forca të mëdha të policisë serbe rrethuan fshatin Batllavë. Bëhet me dije se kjo ekspeditë e policisë vazhdoi me arrestime e ketrajtime të shqiptarëve. Sipas njoftimeve nede të paverifikuiara, dhuna serbe ka mundësi të ketë shkatuar edhe viktima ndër civilët shqiptarë.

…

Ngjarja në afërsi të Podujevës është incidenti i katërt i pa ndriçuar ende gjatë dy mujëve të fundit në Kosovë, të cilin policia serbe e shfrytëzon për fushatë të ashpër të represionit dhe dhunës kundër shqiptarëve, siç i shfrytëzoi ato më parë në Gllogovc, Pejë e Prizren.

Më 23 maj 1993, në afërsi të Gllogovcit, dy policë serb u vranë, kurse pesë të tjerë u plagosën – sipas policisë serbe në një pusi të organizuar nga një grup i armatosur. Sipas autoriteteve serbe dhe mjeteve serbe të informimit, ky incident u cilësua si akt terrorist, kurse kryesit e këtij akti ishin “terroristët shqiptarë.” Pasuan ekspedita të ashpra të policisë serbe, ku qindra shqiptarë të këtyre rajoneve u burgosën, u rrahën, ndërsa dhjetra prej tyre iu shkaktuan lëndime të rënda trupore.

“Borba” e 25 majit të këtij viti, shkruante se lideri i partisë opozitare serbe, Lëvizja e Ripërtritjes Serbe, Vuk Drashkoviq ka deklaruar se “Shesheli me muaj të tërë është duke bërë përgatitjet për luftë në Kosovë. Njerëzve të tij u janë dhënë urdhëra të kidnapojnë njerëz, të ndërmarrin akte terroriste dhe të ndërmarrin aksione kundër vetë serbve, policisë dhe ushtrisë serbe në mënyrë që ta ndezin barotin”.

Në fillim të këtij muaji, në natën mes tre e katër korrikut, në Vitomiricë afër Pejës, u plagosën dy policë serbë në rrethana që ende nuk janë ndriçuar. Mirëpo, sërish ky rast u përdorë si shkas që policia të ndërmarrë një aksion të ashpër kundër shqiptarëve të kësaj ane. Policia serbe bastisi dhjetëra shtëpi, shumë banorë u rrahën dhe u maltretuan. Posaçërisht në shënjestër të policisë serbe ishin ish-punëtorët shqiptarë të policisë.

Javën e kaluar, më 23 korrik, në rrethana ende të pandriçuara u plagosën tre policë serbë në Prizren. Autoritete serbe dhe mjetet e informimit nxituan që këtë rast ta cilësojnë si “akt terrorist”. “Jednstvo” (24 korrik) citon hetuesin e Gjykatës së Qarkut në Prizren, Jugosllav Skënderin, i cili thotë, se “akti terrorist” është kryer nga afërsia dhe policia shtiu me zjarrë në sulmues, të cilët arritën të ikin.

Me këtë rast dhjetëra shqiptarë u rrahën dhe u keqtrajtuan.

 26 korrik 1994

KMDLNJ (Ferizaj): Për gjashtë muaj – 257 “testime” policore

Sipas një analize të KMDLNJ-së, Dega në Ferizaj, gjatë gjashtë muajve të parë të këtij viti në qendrën e sigurimit të këtij qyteti në “biseda informative” ishin 257 qytetarë, policia ka arrestuar 229 veta, fizikisht janë keqtrajtuar 217 prej tyre, janë bastisur 132 shtëpi të pjesëtarëve të këtij kombi, për kundërvajtje janë dënuar gjashtë veta, kurse pesë edhe për vepër penale. Penalisht me 8 vjet burg është dënuar edhe Bajrush Xhemaili, kryetar i Nënkëshillit të KMDLNJ-së në Ferizaj e deputet, kurse me 6 vjet burg është dënuar Adem Salihaj, kryetar i Degës së LDK-së e deputet i Parlamentit të Republikës së Kosovës. Ismet Mehmeti e Sylejman Hasani janë dënuar me nga 5 vjet burg, thuhet në këtë analizë.

Në shënjestër të policisë ishin veçanërisht veprimtarët partiakë, sidomos ata të LDK-së. Në “testim policor”, u morën edhe afër 70 aktivistë të tjerë, të cilët, pos për aktivitetin partiak, inspektorët i pyetën edhe për opcionet personale të tyre për zgjidhjen e çështjes së Kosovës. Ndaj disave janë kërkuar edhe armë, e mdje 90 për qind të bsatisjeve të shtëpive janë bërë me po këtë pretekst. Në shumicën e rasteve policia nuk ka gjetur armë, e megjithatë i ka keqtrajtuar kryefamiljarët. Ndaj disa qytetarëve të keqtrajtuar është përdorur edhe elektroshkopi, kurse Ajvaz Feratin e rrahën në SPB edhe pas plagosjes policore në qytet.

Nga banesa janë dëbuar katër familje shqiptare.

26 korrik 1995

R.Holbruk e çmoi të rëndësishëm parandalimin e konfliktit në Kosovë

Ndihmëssekretari i Shtetit, Riçard Holbruk tha se pas rreshtimit më të ri të aleatëve perëndimorë nuk beson që serbët do të vazhdojnë fushatën e tyre në përpjekje për t’i marrë zonat nën mbrojtje.

“Nuk besoj se serbët janë aq të marrë”, tha Holbruk duke nënvizuar se po vazhduan agresionin, mbi ta do të sulmonte e gjithë forca ajrore e NATO-s.

I pyetur nga udhëheqësi i kanalit televizv CBS, se cilat ishin deri tash sukseset e kësaj administrate në konfliktin ballkanik, nënsekretari Holbruk tha se SHBA-të kanë arritur me sukses ta pengojnë zgjerimin e mëtejmë të konfliktit në Ballkan.

Mendoj se sukses ka qenë parandalimi i shtrirjes së luftës në Shqipëri, në Kosovë dhe në ish-republikën jugosllave të Maqedonisë”, tha mes tjerash ndihmësskretari Holburk, njofton bashkëpunëtori i “Bujkut” nga Nju Jorku Sylejman Gashi.

26 korrik 1997

U shpall përbërja e qeverisë së re të Shqipërisë

Qeveria e re e Shqipërisë, e përbërë nga 21 ministra, në krye të të cilëve është Fatos Nano, kryetar i Partisë Socialiste, dha dje betimin.

Në qeverinë e re, të përbërë nga përfaqësues të subjekteve të koalicionit të majtë, që doi fitues në zgjedhjet e parakohshme të 29 qershorit, Partia Socialiste do të ketë 13 ministra, Aleanca Demokratike 3, Socialdemokratët 2,, Partia për të Drejtat e Njeriut 1 dhe ajo agrare 1, ndërsa në radhën e ministrave njëri është kandidat i pavarur.

Zëvendës i kryeministrit do të jetë ish-kryeministri i Qeverisë së Pajtimit Komëtar, Bashkim Fino, i cili parmbrëmë dha dorëheqjen në postin e tij të deritashëm. Nga postet e rëndësishme vlen të përmendet se arkeologu Neritan Ceka është ministër i Punëve të Brendshme, i Mbrojtjes Sabit Brojka, i Punëve të Jashtme Paskal Milo, i Drejtësisë Thimo Kondi, ndërsa i Transporteve Gaço Apostoli.

Ministër i Ekonomisë u emërua Ylli Bufi, që ishte kryeministër i Qeverisë së Unitetit Kombëtar më 1991-1992.

Ministër i Shtetit është Kastriot Islami, ndërsa ministër për Reforma dhe Marrëdhënie me Kuvendin Popullor Arben Imami.

Në Qeveri gjenden dy femra socialiste: Arta Dade, ministreshë e Kulturës, dhe Emelinda Meksi, ministreshë për Zhvillim e Bashkëpunim Ekonomik.

Ministër për Arsim e Shkencë u caktua Etem Ruka, për Tregti e Turizëm Shaqir Vuka, për Shëndetësi Leonard Sudis, për Bujqësi Lufter Gjuveli, për Pushtetin Lokal Lush Përpali, Sekretar Shteti për Mbrojtje Perikli Teta etj.

Të hënën qeveria e re shqiptare pritet të marrë votëbesimin nga parlamenti.

26 korrik 1998

Së pakut tre të vrarë dhe pesë të plagosur gjatë sulmit të djeshëm në fshatrat e Klinës

Në Klinë e rrethinë sot situata është diç më e qetë se dje, ndërkohë që nga drejtimi i Kijevës vazhdojnë të dëgjohen granatime.

KI i Degës së LDK-së në Klinë njofton se nga granatimet e djeshme në fshatin Cerovik u vranë Azem Daut Bashota (55), gruaja e tij Zelfije Bashota (50) dhe e reja e tij, emrin e së cilës nuk mundëm ta mësojmë, ndërsa u plagos rëndë djali i tij 20 vjeç.

Në Çabiç është plagosur në oborrin e shtëpisë së tij Sokol Jupë Gashi (52), si dhe fëmijët Fortesa Musë Gashi (8) dhe Puhie Musë Gashi (6), ndërsa në Gllarevë është plagosur Hajdin Musli Morina.

Sot, të jesh gazetar në Kosovë nuk është aspak e lehtë. Përkundrazi, është një profesion që kërkon kurajë, durim dhe integritet për të punuar në një klimë të rënduar nga gjuha e urrejtjes, linçimi publik dhe sulmet e vazhdueshme ndaj mediave dhe gazetarëve.

Në një shoqëri demokratike, kritika është legjitime, por shpifja, kërcënimi dhe gjuha e urrejtjes nuk janë liri e shprehjes. Historia e gazetarisë ka dëshmuar se gazetarët e pavarur janë përballur gjithmonë me presione, por askush nuk ka arritur ta ndalë misionin e tyre për të kërkuar dhe publikuar të vërtetën. Ata që besojnë se mund ta mposhtin gazetarinë me fyerje, linçime apo intimidim, zakonisht dështojnë përballë forcës së fakteve dhe të së vërtetës

Ky lumë fyerjesh dhe diskursi degradues nuk e dëmton vetëm dinjitetin e gazetarit; ai cenon vetë kulturën demokratike dhe përpjekjet për ndërtimin e një gazetarie profesionale, të lirë dhe moderne. Megjithatë, zhurma nuk e zëvendëson kurrë të vërtetën. Faktet, argumentet dhe puna serioze gazetareske mbeten gjithmonë më të forta se propaganda dhe etiketimet.

Gjatë rrugëtimit tim shumëvjeçar në gazetari, veçanërisht në gazetarinë hulumtuese, jam përballur me kërcënime, presione e tentativa të ndryshme për të më heshtur. Asnjëra prej tyre nuk më ka ndalur. Përkundrazi, ato më kanë bindur edhe më shumë se gazetaria ka kuptim vetëm kur sfidon krimin e organizuar, korrupsionin politik e ekonomik dhe çdo formë të abuzimit me pushtetin.

Në çdo rrethanë kam qëndruar në mbrojtje të kolegëve, edhe atëherë kur disa prej tyre zgjodhën të heshtnin përballë sulmeve ndaj meje. Por ajo që sot më shqetëson më së shumti nuk janë sulmet që vijnë nga politika apo grupet e interesit. Më shqetëson servilizmi i një pjese të vogël të gazetarëve, të cilët, në vend se ta mbrojnë profesionin, shndërrohen në zëdhënës të pushtetit dhe përpiqen të diskreditojnë kolegët e tyre me narrativa të fabrikuara dhe argumente të imponuara.

Ky deformim i rolit të gazetarit është ndër goditjet më të rënda që mund t’i jepen profesionit. Gazetaria nuk mund të ushtrohet me nënshtrim, as me besnikëri ndaj pushtetit. Misioni i saj është t’i shërbejë publikut dhe interesit qytetar, jo interesave politike apo personale.

Askush nuk është i pagabueshëm. Edhe gazetarët dhe mediat bëjnë gabime. Por ekziston një dallim thelbësor mes gabimit profesional dhe fushatës së organizuar për ta njollosur një koleg. Është e papranueshme që gazetarët të përdoren si instrumente për të goditur gazetarët e tjerë. Solidariteti profesional nuk nënkupton pajtim me çdo qëndrim, por respekt për parimet mbi të cilat ndërtohet liria e medias.

Fatkeqësisht, këtë klimë përçarëse e ka ushqyer edhe retorika e pushtetit aktual, i cili në vazhdimësi ka zgjedhur përballjen me mediat, duke i etiketuar ato si “media të Serbisë” apo duke i sulmuar për faktin se funksionojnë si biznese mediatike. Këto janë narrativa që nuk i shërbejnë demokracisë dhe nuk i shmangin institucionet nga përgjegjësia për transparencë e llogaridhënie.

Mediat financohen nga puna e tyre, nga audienca, nga shërbimet dhe tregu që u lejon të mbijetojnë. Në një shtet demokratik, kjo është krejtësisht legjitime. Pyetja që shtrohet është një tjetër: kush mban përgjegjësi për mënyrën se si shpenzohen paratë publike dhe për çdo cent të taksapaguesve? Pikërisht këtu duhet të drejtohet vëmendja e pushtetit, e jo te përpjekjet për ta delegjitimuar gazetarinë kritike.

Respekt për të gjithë ata gazetarë që, pavarësisht presioneve, vazhdojnë ta mbrojnë integritetin profesional, etikën dhe besueshmërinë e medias. Janë pikërisht ata që e mbajnë gjallë misionin e gazetarisë së lirë dhe e dëshmojnë se e vërteta nuk mund të mposhtet nga propaganda, por vetëm nga heshtja. Prandaj, heshtja nuk duhet të jetë kurrë zgjedhje.

Një fjalë edhe për ata që, të fshehur pas profileve në rrjetet sociale, qofshin nga Evropa, Amerika apo kudo tjetër, e kanë shndërruar fyerjen, kërcënimin dhe linçimin virtual në mjet “debati”.

Kujdes me gjuhën që përdorni dhe me rolin që i jepni vetes. Askush nuk ka të drejtë të marrë në dorë “gjykimin” e gazetarëve, të shpallë fajtorë apo të nxisë urrejtje ndaj tyre, sikur Kosova të mos ishte shtet me ligje, institucione, polici dhe drejtësi.

Në një shoqëri demokratike, kritika është legjitime, por shpifja, kërcënimi dhe gjuha e urrejtjes nuk janë liri e shprehjes. Historia e gazetarisë ka dëshmuar se gazetarët e pavarur janë përballur gjithmonë me presione, por askush nuk ka arritur ta ndalë misionin e tyre për të kërkuar dhe publikuar të vërtetën. Ata që besojnë se mund ta mposhtin gazetarinë me fyerje, linçime apo intimidim, zakonisht dështojnë përballë forcës së fakteve dhe të së vërtetës.

Musa Sabedini

Autori është ligjërues në Degën e Medias dhe Komunikimit në UBT

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Rexhep Mejdani – President i ri i Shqipërisë

25 korrik 1995

Dhuna e përditshme në Kosovë

Gllogovc: – Më 17 korrik, rreth orës 15:00, policia serbe me pretekst të kërkimit të armëve keqtrajtoi Aziz Bytyçin (1938) nga fshati Orllat, i cili pësoi lëndime të rënda trupore dhe njëkohësisht keqtraktoi edhe dy djemt e tij, Azem e Jonuz Bytyçin.

Më 23 korrik, në fshatin Negroc të Gllogovcit, tre policë serb keqtrajtuan fizikish Bedri dhe Avdi Krasniqin, të cilët me qerren e mbushur me dru po ktheheshin mga mali. Pasi i keqtrajtoi fizikisht, policia i urdhëroi ata që t’i shfryjnë gomat e çerres dhe të presin aty deri sa të kthehen sërish policia, ndërsa më vonë, pasi pritën rreth 40 minuta, policia i urdhëroi ata që të nisen në shtëpi me goma të shfryra!

Ferizaj: – Më 21 korrik, me pretekst të kërkimit të armëve, në polici u morën Nexhat Ademi, Ramush Murtezi dhe Adem Ademi nga fshati Koshare. Pasi u pyetën për armë, ata u liruan me kusht që të paraqiten sërish në polici më 25 korrik. Bëhet me dije se Nexhat Ademi u keqtrajtua fizikisht.

Nga i njëjti fshat dhe me të njëjtin pretekst, u urdhërua që të paraqitet më 25 korrik edhe Abdullah Krasniqi.

Prej 19 deri 21 korrik, në polici për armë u mor edhe Sadik Haliti nga Dremnjaku i Ferizajt.

Nga i njëjti fshat, në postkomandën e policisë në Nerodime, më 21 korrik u morën edhe vëllezërit Ilmi, Sefer dhe Rexhep Muhadini. Njoftohet se Ilmi Muhadini ishte për herë të tretë në polici.

Viti: – Dje, policia serbe me pretekst të kërkimit të armëve, ishte në shtëpinë e Izet Fetahut në Sadovinë të Jerlive dhe kërkuan djalin e tij Sabri Fetahun, i cili nuk gjendej në shtëpi. Policia ia la thirrjen për t’u paraqitur në polici. Ai u mor sot në pyetje.

Prizren: – Dje rreth orës 11:00, u mor në pyetje Bedri Çejku, kryetar i Shoqatës “Motrat Çiriazi” në Prizren. Ai u pyet kryesisht për veprimtarinë e kësaj shoqate, si dhe për veprimtaritë dhe aktivitetet tjera në këtë komunë.

Në stacionin e policisë në Prizren, Bedri Çejku u mbajt rreth dy orë.

 25 korrik 1997

Rexhep Mejdani – President i ri i Shqipërisë

Rexhep Mejdani, sekretar i deritashëm i përgjithshëm i Partisë Socialiste, u zgjodh dje me procedurë të përshpejtuar nga Kuvendi Popullor i Republikës së Shqipërisë, President i Republikës.

Në votim morën pjesë 122 deputetë, nga të cilët 110 votuan për Rexhep Mejdanin, tre ishin kundër dhe dy abstenuan, ndërsa 7 fletëvotime ishin të pavlefshme.

Në fjalën e tij inauguruese, z. Mejdani tha se vendi dhe populli kanë nevojë për paqe, për frymën e tolerancës, të dashurisë dhe të mirëkuptimit.

“Ne duhet të aspirojmë dhe të luftojmë së bashku që ta ringjallim Shqipërinë, të mënjanojmë dhe të minimizojmë papunësinë, krimin e korrupsionin, të synojmë që sa më shpejt t’u garantojmë njerëzve gëzimin e jetës, qetësinë e sigurinë e saj, mundësinë e gjithanshme dhe shans të mirë për t’i zhvilluar iniciativën e gjerë private dhe emancipimin ekonomik, social e qytetar. Të garantojmë në rrugë ligjore, në mënyrë të shëndetshme investimet e vendit e të huaja aq të domosdoshme, integrimin më të plotë në strukturat bashkëkohore evroatlantike dhe institucionet financiare botërore”, tha Mejdani, duke iu drejtuar deputetëve të parlamentit të ri shqiptar, të dominuar nga socialistët.

“Duke u mbështetur në angazhimin tuaj serioz me detyrën që më ngarkon do të shtoj përpjekjet për konkretizimin real e të vazhduar të politikës së pajtimit kombëtar, për ndërtimin e një politike të re integruese të bashkëpunimit, të bashkëjetesës të gjithë shqiptarëve vëllezër, të të gjitha forcave politike pozitare dhe opozitare, kundër politikës së konfrontimit, të bunkerizimit, të barrikadave, të intolerancës dhe përçarjes. Dhe për këtë të ndërtojmë shtetin real ligjor, të vëmë mbi gjithçka ligjin dhe ta respektojmë atë. Para tij të jemi të gjithë të barabartë që nga kryetari i shtetit e deri te njeriu i thjeshtë. Po ashtu ftoj intelektualët e specialistët shqiptarë të emigruar anembanë botës të punojnë për Shqipërinë e re, duke mundësuar maksimalisht me pjesëmarrjen e tyre të drejtpërdrejtë në teknokracinë e re, për të cilën ka aq shumë nevojë vendi dhe rimëkëmbja e tij”, shtoi ai.

“Duke pranuar detyrën e presidentit unë shpreh besimin se duke punuar të gjithë së bashku në kooperim të ngushtë planesh me shtetet evropiane e SHBA, me institucionet më prestigjioze ndërkombëtare ne do ta rimëkëmbim Shqipërinë. Ne situatën tejet kritike shqiptare do ta shohim si një ëndërr tepër të dhimbshme, tepër të mbrapshtë, që nuk do të rishfaqet më kurrë. Që Shqipëria sot me kokë të ulur të ringrejë shumë shpejt sytë e saj drejt së ardhmes evropiane për të qenë gjithmonë një faktor pozitiv, një faktor paqeje e mirëkuptimi në rajon e më tej, por në të njëjtën kohë të shërbejë si faktor politik integrues i çështjes shqiptare”, tha mes tjerash në fjalën e tij inauguruese në Parlamentin e ri shqiptar presidenti i ri i Shqipërisë, Rexhep Mejdani.

25 korrik 1998

Forcat serbe sulmojnë vendbanimet në mes Carralevës, Grykës së Llapushnikut e Kijevës

Forcat serbe kanë sulmuar prej mëngjesi fshatrat Belincë, Zborc, Carralevë e Reçak (Shtimje), Komaran e Potërk (Gllogoc), Gremnik, Jashanicë, Gllarevë, Cerovik, Stapanicë, Rigjevë, Zabërgjë (Klinë)

Forca të mëdha të ushtrisë dhe policisë serbe kanë filluar sot në orën 04 të mengjesit një sulm masiv kundër fshatrave të Grykës së Carralevës, Grykës së Llapushnikut dhe fshatrave përreth Kijevës.

Kryetari i Degës së LDK-së në Shtimje, Ali Sadria, i deklaroi QIK-ut se forcat serbe sulmuan sot në mëngjes fshatrat e Grykës së Carralevës: Belincën, Zborcin, Carralevën e Reçakun.

Këto fshatra të komunës së Shtimjes lidhen me fshatrat e Grykës së Llapushnikut e Komoranin në komunën e Gllogocit dhe me fshatrat e komunës së Malishevës.

Njoftohet se dje në orën 17. 30 në Shtime kanë ardhur forca speciale, pjesëtarët e të cilave ishin me fytyra të ngjyrosura.

Nga Shtimja në orën 10. 30 u njoftua se forcat e ushtrisë serbe kanë arritur deri në lagjen e Badragjive në Zborc, ku janë djegur dy shtëpi, ndërsa dy shtëpi të tjera janë djegur në lagjen në qendër të fshatit. Theksohet se granatimet janë të një intensiteti më të ulët, ndërkohë që forcave serbe u janë kundërvënë forcat mbrojtëse shqiptare në mbrojtje të fshatit e të shtëpive.

Veprimtari i NKMLDNJ-së në Gllogoc, Shaban Neziri, i tha QIK-ut sot herët në mëngjes se gjatë natës forcat të mëdha ushtarake e policore serbe ishin përqendruar në Komoran.

Komisioni për Informim i Degës së LDK-së në Gllogoc njoftoi se sot në orën 02:40 të mëngjesit, nga baza e “Ferronikelit” kishin dalë forca të mëdha të ushtrisë dhe të policisë serbe, të cilat kanë shkuar në drejtim të Komoranit. Këtyre forcave u janë bashkangjitur edhe forca të mëdha ushtarako-policore nga Magura e Lipjanit e nga Prishtina, të cilat po ashtu kanë shkuar sot në orët e mengjesit në Komoran. Ato janë vendosur në vendin e quajtur “Çuka e Zabelit” dhe gjatë tërë kohës po granatojnë drejt Grykës së Llapushnikut. Nga kjo pjesë shihen shtëpitë e lagjeve Mulaku e Vilaku të Komaranit, të cilat po digjen flakë nga granatimet e forcave serbe.

Dëshmitarët thonë se shihet të dalë tym nga shtëpitë e fshatit Potërk të Llapushnikut.

Popullsia e Gllogocit dhe e Çikatovës së Re, nga frika e ndonjë masakre të forcave serbe, ka filluar të largohet nga kjo pjesë e Kosovës në drejtim të viseve të tjera të Drenicës.

Një veprimtar i LDK-së në fshatin Likofc i tha QIK-ut se forcat serbe filluan në orën 04. OO një sulm të egër në drejtim të Grykës së Llapushnikut.

Nga fshatrat e Klinës njoftohet se forcat ushtarake e policore kanë ndërmarr sot një sulm përmasash të mëdha edhe kundër fshatrave Gremnik, Jashanicë, Gllarevë dhe fshatrave të tjera përreth Kijevës.

Forcat serbe po shtijnë kundër këtyre fshatrave me armë të ndryshme nga postblloku i Dollcit, nga Dresniku e nga Pogragja, si dhe nga kodrina e quajtur “Tikvesh”, e cila gjendet në vetë qytezën e Klinës.

Nga postblloku i Kijevës forcat serbe po granatojnë fshatrat Cerovik, Stapanicë, Rigjevë, Zabërgjë etj.

Te moteli “Nora” në Klinë dhe në postbllokun e Dollcit janë përqendruar forca të mëdha serbe, me një arsenal të madh armësh të të gjitha kalibrave, thuhet në një njoftim të Komisionit për Informim të Degës së LDK-së në Klinë.

Katër trupa të pajetë në morgun e spitalit të Pejës

NMDLNJ në Pejë njofton se në morgun e spitalit të Pejës gjenden katër trupa të pajetë, identiteti i të cilëve nuk dihet.

Organet serbe ia komunikuan këtë lajm kryetarit të Bashkësisë Islame në Pejë Nexhmedin Hoxhës, prej të cilit u kërkua që me ndërmjetësimin e BI të bëhet varrimi i tyre.

Gjendjen edhe ashtu të rënduar në Pejë po e bëjnë edhe më të rëndë lëvizjet e shumta gjatë natës të civilëve të armatosur serbë dhe të policëve. Gjithashtu po vazhdojnë tash disa ditë ndërhyrjet e policisë nëpër shtëpitë e shqiptarëve, bastisjet, demolimet, marrjet në polici, kërcënimet e keqtrajtimet e shumta.

Edhe më tutje forcat serbe vazhdojnë të qëndrojnë në kodrën e quajtur Tabe, ku janë edhe disa bunkerë të vendosur gjatë Luftës së Dytë Botërore. Gjithashtu, në rrokaqiellin e Pejës dhe në disa ndërtesa të tjera në orët e mëngjesit janë vërejtur snajperistët serbë.

Luftime të ashpra në disa fshatra të Deçanit

Në disa fshatra të komunës së Deçanit kanë filluar mbrëmë luftime, të cilat po zgjasin edhe më tutje, njofton Nënkëshilli Për Mbrojtjen e të Drejtave dhe Lirive të Njeriut në Deçan.

Forcat serbe, të pozicionuara në Sukën e Biteshit, kanë filluar mbrëmë të qëllojnë me artileri të rëndë fshatrat Shaptej e Gramoqel. Shumë shtëpive të këtyre fshatrave iu shkaktuan dëme të mëdha materiale, ndërsa ambulanca e Gramoqelit u shkatërrua pothuaj në tërësi. Deri tash nuk ka të dhëna për viktima eventuale në njerëz.

Po ky burim njofton se edhe sot janë zhvilluar luftime të ashpra në disa fshatra të komunës së Deçanit, sidomos rreth fshatrave Junik e Voksh.

Forcat ushtarako- policore dhe paramilitare serbe që mbrëmë kanë sulmuar Junikun në përpjekje që të depërtojnë në këtë fshat. Mirëpo, mbrojtësit e Junikut dhe forcat e UÇK-së i kanë zbrapsur forcat serbe.

Nga Deçani njoftohet se forcat serbe kanë vrarë mbrëmë në fshatin Lybeniq plakun Dervish Aliçkaj (78), i cili është varrosur mbrëmë vonë në varrezat e këtij fshati.

Burimet e Nënkëshillit për Mbrojtjen e të Drejtave dhe Lirive të Njeriut në Deçan kanë njoftuar edhe për luftimet e rrepta që janë zhvilluar në fshatrat e komunës së Klinës, të cilat shtrihen afër fshatrave të Lugut të Baranit. Në sulmet kundër këtyre fshatrave forcat serbe kanë përdorur edhe armët e rënda artilerike.

Forcat serbe nga Rahoveci kanë sulmuar fshatrat e Malishevës – të paktën dhjetë policë të vrarë

Njoftohet se sot forca të mëdha policore-ushtarake serbe të këmbësorisë, të ndihmuara nga tanket, nga Rahoveci sulmuan dhe provuan të depërtojnë drejt Malishevës. Atyre u dolën përballë forcat e UÇK-së duke i zmbrapsur me sukses ato sulme. Në luftimet e ashpra u vra një pjesëtar i UÇK-së, kurse një tjetër u plagos.

Ndërkaq në radhët e forcave agresore serbe ka pasur të paktën dhjetë policë të vrarë dhe dy tanke të shkatërruara. Njoftohet se nga policët e vrarë është konfiskuar një sasi armatimi dhe pajisjet kuftarake.

Në drejtim të forcave çlirimtare të Kosovë dhe fshatrave shqiptare të Malishevës gjatë sulmeve të sotme janë hedhur me dhjetra granata.