Misioni paqeruajtës i NATO-s në Kosovë, KFOR-i, ka njoftuar se ka nisur “tranzicionin gradual të pranisë” së tij të përhershme nga ura kryesore mbi lumin Ibër në Mitrovicë.

Në një deklaratë për Radion Evropa e Lirë, KFOR-i tha se ky hap po ndërmerret në përputhje me përmirësimin e situatës së sigurisë në Kosovë.

“Misioni KFOR, i udhëhequr nga NATO-ja, ka filluar tranzicionin gradual të pranisë së përhershme të KFOR-it nga ura kryesore në Mitrovicë. Në përputhje me përmirësimin e situatës së sigurisë në Kosovë, kjo është pjesë e procesit për optimizimin e pozicionimit të KFOR-it”, thuhet në përgjigjen e KFOR-it.

Sipas KFOR-it, ky proces “do të jetë gradual, në varësi të kushteve dhe po koordinohet ngushtë me të gjithë aktorët relevantë, përfshirë përfaqësuesit e institucioneve në Kosovë dhe të organizatave ndërkombëtare, si dhe me përfaqësuesit e Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX)”.

KFOR-i tha se edhe shefi i Shtabit të Përgjithshëm të Ushtrisë së Serbisë, gjenerali Millan Mojsilloviq, është informuar rregullisht për këtë proces.

Në përgjigjen e tij, KFOR-i siguroi se personeli i tij “është i pozicionuar mirë për t’iu përgjigjur çdo zhvillimi relevant, në përputhje me mandatin e kahershëm të KFOR-it nga OKB-ja”.

“KFOR-i do të mbajë një prani të dukshme në jug dhe në veri të Mitrovicës dhe në veri të Kosovës, duke vazhduar kontributin e tij për ruajtjen e një mjedisi të sigurt për të gjitha komunitetet”, thuhet tutje në përgjigjen e dhënë REL-it.

Më herët gjatë ditës, KFOR-i njoftoi se ka filluar “integrimin gradual të Policisë së Kosovës në arkitekturën e sigurisë së KFOR-it në Manastirin e Deçanit”.

Policia e Kosovës deri më tani nuk i është përgjigjur pyetjeve të Radios Evropa e Lirë, nëse pjesëtarë të saj janë vendosur mbi urën e Ibrit dhe nëse do të vazhdojnë të jenë të pranishëm atje pas largimit të trupave të KFOR-it.

Ura kryesore, që që lidh Mitrovicën e Jugut me shumicë shqiptare me Mitrovicën e Veriut me shumicë serbe, ka qenë në vazhdimësi vatër e tensioneve etnike.

Që nga përfundimi i luftës më 1999, ajo është ruajtur vazhdimisht nga trupat e KFOR-it.

Ndërkohë, Lista Serbe, partia më e madhe e serbëve të Kosovës, ka kundërshtuar tërheqjen apo çfarëdo zvogëlimi të pranisë së pjesëtarëve të KFOR-it në urën kryesore mbi lumin Ibër.

Në një komunikatë për media, kjo parti tha se ka kërkuar takim urgjent me komandantin e KFOR-it, gjeneralmajor Ozkan Ulutash, për t’ia përcjellë shqetësimet e komunitetit serb në veri dhe për të kërkuar ndaljen e kësaj mase.

Lista Serbe argumentoi se, për shkak të situatës politike dhe të sigurisë, si dhe tensioneve që në të kaluarën kanë shoqëruar zonën e urës, “çdo vendim për praninë e forcave të sigurisë aty duhet të merret me kujdes”.

Ajo gjithashtu pretendoi se Policia e Kosovës nuk e ka fituar besimin e serbëve në veri dhe tha se prania e KFOR-it në urë përbën “një faktor të rëndësishëm stabiliteti”.

Lista Serbe i bëri thirrje KFOR-it që të ruajë një prani adekuate në urën kryesore dhe të vazhdojë të kontribuojë në ruajtjen e sigurisë dhe stabilitetit.

Ura kryesore mbi lumin Ibër aktualisht është e hapur vetëm për këmbësorë, ndërsa Qeveria e Kosovës kishte paralajmëruar hapjen e saj për qarkullimin e automjeteve në korrik të vitit 2024, gjë që kishte nxitur tensione dhe reagime nga bashkësia ndërkombëtare.

Kosova dhe Serbia ishin pajtuar për hapjen e urës për trafik në vitin 2014, në kuadër të dialogut për normalizimin e marrëdhënieve. Marrëveshja parashihte revitalizimin e urës dhe largimin e të gjitha barrikadave të vendosura nga serbët lokalë.

Për të tejkaluar mospajtimet rreth interpretimit të marrëveshjeve të mëparshme, në vitin 2016 u dakordua një plan i ri zbatimi, sipas të cilit ura duhej të hapej për trafik në janar të vitit 2017.

Punimet për revitalizimin përfunduan në qershor të vitit 2018. Megjithëse në projekt u investuan rreth 1.5 milion euro, ura nuk u hap asnjëherë për automjete dhe vazhdoi të përdorej vetëm nga këmbësorët.

Ndërkohë, Qeveria e Kosovës ka ndërtuar edhe dy ura të tjera pranë urës kryesore – një për këmbësorë dhe një për automjete – me synimin për të lidhur Mitrovicën e Veriut me Mitrovicën e Jugut, në një qytet që mbetet i ndarë etnikisht që nga lufta. /REL/

Agjencia për Informim dhe Privatësi (AIP) dhe Administrata Tatimore e Kosovës (ATK) kanë nënshkruar një memorandum bashkëpunimi me qëllim fuqizimin e kontrollit dhe rritjen e transparencës ndaj subjekteve që zhvillojnë aktivitet ekonomik në hapësirën digjitale.

Përmes kësaj marrëveshjeje, të dyja institucionet do të zhvillojnë inspektime të përbashkëta dhe të koordinuara ndaj bizneseve online, faqeve në rrjete sociale, portaleve mediale dhe platformave të tjera digjitale, secila në përputhje me mandatin e saj ligjor.

Kjo iniciativë vjen si përgjigje ndaj rritjes së hovshme të tregtisë online dhe rasteve të evidentuara gjatë monitorimeve, ku janë vërejtur shkelje në mbrojtjen e të dhënave personale si dhe vështirësi në identifikimin e subjekteve ekonomike.

Në kuadër të inspektimeve: AIP do të mbikëqyrë ligjshmërinë e përpunimit të të dhënave personale, politikat e privatësisë, përdorimin e “cookies” dhe mbrojtjen e të drejtave të qytetarëve.

ATK do të verifikojë përmbushjen e detyrimeve tatimore dhe regjistrimin e rregullt të veprimtarisë ekonomike.

Përmes këtij bashkëpunimi, AIP dhe ATK synojnë të ndërtojnë një mjedis digjital më të sigurt, ku zhvillimi i biznesit bëhet në respektim të plotë të ligjit dhe të drejtave të konsumatorëve. /E.A/

Misioni i KFOR-it ka njoftuar se ka nisur procesin e integrimit të personelit të Policisë së Kosovës në arkitekturën e sigurisë përveç mbrojtjes së Manastirit të Deçanit. Përmes një komunikate zyrtare, KFOR-i bëri të ditur se ky hap vjen në përputhje me përmirësimin e situatës së sigurisë dhe është pjesë e procesit për optimizimin e pozicionimit të misionit në terren.

Sipas njoftimit, ky proces do të realizohet në mënyrë graduale dhe në bashkëpunim të ngushtë me institucionet vendore e ndërkombëtare.

“Ky proces do të jetë gradual dhe i bazuar në kushte, si dhe po koordinohet ngushtë me një sërë aktorësh, përfshirë përfaqësuesit e Kishës Ortodokse Serbe dhe të institucioneve të Kosovës, si dhe përfaqësuesit e Policisë së Kosovës dhe të Misionit të Bashkimit Evropian për Sundimin e Ligjit në Kosovë (EULEX).”

Pavarësisht këtij riorganizimi, KFOR-i njoftoi se mbetet reaguesi i parë për sigurinë e këtij monumenti të rëndësishëm të trashëgimisë kulturore e fetare.

“Personeli ynë është i pozicionuar për t’iu përgjigjur çdo zhvillimi, në përputhje me mandatin e KFOR-it të përcaktuar nga Kombet e Bashkuara. KFOR-i mbetet reaguesi i parë për sigurinë e Manastirit të Deçanit”, sipas reagimit të KFOR-it.

Po ashtu, misioni i udhëhequr nga NATO nënvizoi se do të vazhdojë bashkëpunimin me të gjitha palët e përfshira, përfshirë edhe Forcat e Armatosura të Serbisë, për të ruajtur transparencën dhe për të shmangur keqkuptimet, duke i bërë thirrje të gjithëve për angazhim konstruktiv në dialog.

Në përmbyllje, KFOR-i rikonfirmoi përkushtimin për përmbushjen e mandatit të tij sipas Rezolutës 1244 të Këshillit të Sigurimit të OKB-së, për garantimin e një mjedisi të sigurt dhe të lirisë së lëvizjes për të gjithë qytetarët në Kosovë. /E.A/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Spitali i Pejës

10 gusht 1993

Kosova për herë të parë në Këshillin e Sigurimit

Vështirësia me të cilën vëhet në lëvizje mekanizmi ndërkombëtar, në rend të parë veprimi i organizatës botërore, vërteton rëndësinë e Rezolutës së fundit të Këshillit të Sigurimit, ku bëhet fjalë për Kosovën.

Ndonëse, shkas për këtë rezolutë u mor vendimi i autoriteteve të Baogradit për t’i dëbuar vëzhguesit e KSBE-së nga Kosova, shqyrtimi i kësaj çështje në nivel të organit më të lartë të sigurisë në OKB, flet për vendosmërinë e pesë vendeve anëtare të përhershme të Këshillit të Sigurimit për të parapenguar përhapjen e konfliktit në Kosovë, rajon që tash shumë kohë konsiderohet vatër e rrezikshme dhe potenciale e luftës. Konkretisht, kjo do të thotë manifestim i diplomacisë preventive, diç që subjektet politike shqiptare në Kosovë dhe diplomacia e Shqipërisë kanë kërkuar vazhdimisht nga subjektet dhe bashkësia ndërkombëtare.

Rezoluta është decidive në kërkesat drejtuar Beogradit që të lejojë kthimin e vëzhguesve të KSBE-së në Kosovë, madje me numër të shtuar, siç qe paraparë më parë edhe me deklaratën e Pesëshes së Këshillit të Sigurimit. Kjo kërkesë bëhet në një kohë kur Serbia sikur e ndjeu se ka duart e lira për të shtuar represionin dhe dhunën në Kosovë, larg syve të vëzhguesve ndërkombëtarë dhe opinionit botëror. Ajo sfidoi bashkësinë ndërkombëtare me veprimet e veta të fundit në Kosovë, në një kohë kur përpiqej të mashtrojë botën me gjoja gatishmërinë e saj për të dhënë kontributin e vet “serioz” për arritjen e paqes në Bosnjë, që do të ishte, sipas saj, hap i mjaftueshëm që bota t’i heq sanksionet kundër Serbisë.

Rezoluta e Këshillit të Sigurimit ia tërheq vërejtjen Serbisë se çështja e Kosovës, jo vetëm që nuk është çështje e saj e brendshme, siç u përpoq ta përshkruajë Kosovën aleati i saj komunist – Kina, por se bota nuk do të tolerojë shtypjen dhe dhunën serbe mbi shqiptarët. Serbia, madje, nuk mund të “tregtojë për status në KSBE”, siç tha përfaqësuesja e SHBA-ve në OKB, duke kushtëzuar bashkësinë ndërkombëtare me lejimin apo moslejimin e pranisë ndërkombëtare në Kosovë. Për më tepër, çështja e Kosovës po bëhet kështu një kusht tjetër për heqjen e mundshme të sanksioneve ndaj Serbisë dhe Malit të Zi. Pasusi i fundit i Këshillit të Sigurimit, në të cilin theksohet vendosmëria për “të mbetur i preokupuar me këtë çështje”, është po aqë indikativ. Refuzimi i Serbisë për të zbatuar këtë rezolutë të Këshillit të Sigurimit do të thoshte sfidë e re ndaj Organizatës Botërore dhe arsye për ndërmarrje të hapave të tjerë dhe për thellimin e sanksioneve ndërkombëtare kundër Serbisë.

10 gusht 1994

Gjendje e rëndë në familjen Ramadani në Shajkofc

Familja e Hasan Ramadanit, të vrarë të dielën në mëngjes gjatë një akti terrorist të forcave serbe, është në gjendje të rëndë.

Përpos gjendjes së rëndë psiqike e shëndetësore pas sulmit disaorësh dhe terrorizimit të familjes në tërësi nga ana e forcave serbe, familja tetanëtarëshe: nëna Emine Ramadani (42) me fëmijët: Halitin (22), Hidajeten (20), Ajshen (18), Bedriun (16), Sevdaiun (15) Fitoren (11) dhe Liridonin (8), ka mbetur praktikisht pa kulm mbi kokë. Familjes Ramadani iu dogjën krejtësisht tri dhomat e shtëpisë nga zjarri i forcave serbe. Të padjegura kanë mbetur edhe dy dhoma, por ato janë shumë të dëmtuara.

Kjo familje nuk ishte në gjendje të mirë materiale edhe për të gjallë të Ramadanit, por tash pas vrasjes së tij dhe djegies së shtëpisë, gjendja e saj është shumë e rëndë.

Situatën edhe më të rëndë për këtë familje e bën fakti se afër tyre nuk ka shumë shtëpi, që do të mund t’u ofronin strehim të përkohshëm.

Duke pasur parasysh këtë gjendje Skënder Blakaj e dr. Rexhep Gjergji, funksionarë të LDK-së, shtruan çështjen e ndihmës për këtë familje në një bisedë me kryetarin e Nëndegës së LDK-së në Shajkofc.

 10 gusht 1995

Policia maqedonase ua mori pasaportat disa studentëve të UT-së

Rektorati i Universitetit të Tetovës njofton opinionin e gjerë publik se policia maqedonase keqtrajtoi tre studentë të Universitetit të Tetovës.

Më 5 gusht policia maqedonase ndali në rrugë dhe ia mori indeksin Fation Arifit, student i Fakultetit Filologjik – Dega e anglishtes, dhe më 9 gusht, gjithashtu duke shkuar rrugës, policia ndaloi Florent Munishin dhe Jetmir Hysenin, student të Fakultetit Ekonomik, të cilëve ua mori indeksat dhe librat e lëndës “Mbrojtja dhe siguria”. Policia për marrjen e indeksave dhe të librave atyre nuk u lëshoi kurrfarë vërtetimi.

Rektorati i Universitetit të Tetovës reagon ashpër ndaj sjelljeve të këtilla arbitrare të policëve ndaj këtyre studentëve dhe mendon se ky veprim është një provokim ndaj punës në Universitetin e Tetovës.

Kërkojmë që provokimet e këtilla të mos përsëriten dhe studentëve t’u kthehen indeksat e librat që u janë marrë, thuhet në fund të reagimit të Rektoratit të Universitetit të Tetovës, të nënshkruar nga rektori prof.dr.Fadil Sylejmani, njofton gazeta “Bujku”.

10 gusht 1998

Suharekë: Nga snajperi u vra Xhemajli M. Kryeziu

Mbrëmë, rreth orës 1. 15 pas mesnate, snajpersitët serbë vranë Xhemajli Muharrem Kryeziun (35) nga Suhareka.

KI i Degës së LDK-së në Suharekë njofton se, në momemtin kur u qëllua nga snajperët serbë, z. Kryeziu ishte në korridorin e shtëpisë së tij.

Katër të vrarë e shumë të plagosur në Hereç të Gjakovës

Mbrëmë dhe sot kanë vazhduar luftimet e rrepta në fshatrat anash rrugës magjistrale Gjakovë – Deçan. Përveç fshatrave të Deçanit, në këtë front të luftës janë përfshirë edhe fshati Dujakë, Plançor e sidomos luftimet më të rrepta kanë qenë në fshatin Hereç, ku janë zhvilluar luftime frontale, njofton KI i Degës së LDK-së në Gjakovë.

Njoftohet se në këtë fshat janë vrarë Musë Bajrami (80 vjeç), Asllan Bajrami (19), Dinë Rexhepi (63) dhe Metë Dervishi (80). Po ashtu gjatë këtyre luftimeve janë plagosur dhe shumë të tjerë, por numri dhe identiteti i tyre tash për tash nuk dihet. Bëhet me dije gjithashtu se në Hereç janë djegur të gjitha shtëpitë.

Të vrarë dhe dëme në mjete luftarake ka edhe në radhët e forcave serbe.

Edhe sot nga pozicionet e forcave serbe në Kodrën e Çabratit, në Sukën e Biteshit dhe në pozicionet tjera po dëgjohen detonimet e armëve të rënda artilerike.

Ndërkohë, ndonëse vazhdojnë luftimet, ushtria serbe u dhënë ultimatum banorëve të fshatit Skivjan që t’i dorëzojnë armët ose ta lëshojnë fshatin.

Luftimet në Hereç dhe në fshatrat tjera, si dhe ultimatumet e ushtrisë dhe policisë serbe kanë ndikuar në një zhvendosje të madhe të popullatës së kësaj ane. Rreth 15. 000 banorë të këtyre fshatrave gjenden në livadhet në mes të fshatit Skivjan dhe Novosellë. Përveç psikozës së luftës, kjo popullatë, kryesisht gra, pleq dhe fëmijë, janë pa ushqim, pa ujë të pijshëm, pa strehim.

Situatë e rëndë është edhe në Gjakovë. Sot në paralagjen e qytetit të Gjakovës, në mes të Piskotës dhe Osekut, është duke u bërë një kontroll i rreptë i policisë serbe, të cilët po i keqtrajtojnë popullatën e ikur nga këto fshatra dhe po i pengojnë që të hyjnë në qytet. Përkundër kësaj, grupe të mëdha të banorëve deri në 50 veta po arrijnë në qytet për të gjetur strehim dhe vendosje pak më të sigurta. Por, megjithë organizimin e subjekteve politike dhe popullatës së qytetit, e cila i ka hapur dyert e shtëpive, gjendja është tepër e keqësuar. Apelohet te institucionet ndërkombëtare që të ndërmarrin masa urgjente për për të ndaluar sulmet serbe dhe për t’i dalë në ndihmë popullatës së sulmuar.

Njoftimet nga terreni bëjnë të ditur se luftimet po vazhdojnë edhe në fshatrat e brezit të ngushtë kufitar, si dhe rreth Junikut. Njësitet e UÇK-së dhe në përgjithësi rezistenca shqiptare kanë arritur t’i rikthejnë pozicionet e tyre dhe t’i shkaktojnë dëme të mëdha armikut. Kështu, mbrëmë, një helikopter i ushtrisë serbe me shenjën e Kryqit të Kuq, disa herë ka aterruar në garnizonin e ushtrisë në Gjakovë dhe supozohet se ka bartur shumë të plagosur.

Edhe në anën e Dushkajës, mbrëmë dhe sot janë dëgjuar shkrehje armësh por me një intensitet më të ulët në krahasim me ditët e kaluara.

Katër trupa të pajetë në morgun e Pejës

Njoftohet se në morgun e spitalit të Pejës ndodhen katër trupa të pajetë, 2 meshkuj dhe dy femra, identiteti i të cilëve nuk dihet.

Nga Peja gjithashtu njoftohet se që sot nga ora 9 ky qytet nuk ka rrymë elektrike.

Në Petrovë u plagosën 4 shqiptarë

Sot në orën 13:00, gjatë granatimit të fshatit Petrovë të komunës së Shtimes janë plagosur 4 persona, njëri prej tyre rëndë. Këta janë: Nexhmie Hysenaj (44), Shëndrit Hysenaj (35) nga Petrova, Bujar Beqiri (13) nga Carraleva dhe Fatmir Duga (16) nga Shtimja, të cilët ishin të strehuar në këtë fshat.

Tre të parëve ndihma e parë u është dhënë në ambulancën private “Uroplastika”, kurse Fatmiri është dërguar në spitalin e Prishtinës në gjendje kritike, njofton KI i LDK në Ferizaj.