Kulturë

Shpenzoni para në eksperienca e jo në gjëra

Eksperiencat bëhen pjesë e identitetit tonë.

Published

on

Kur punoni shumë çdo ditë dhe ju mbesin para për t’i shpenzuar pasi t’i keni paguar të gjitha detyrimet, atëherë padyshim se duhet të siguroheni se do t’i shpenzoni mirë.

Shkenca ju sugjeron që paratë tuaja t’i shpenzoni në atë se çfarë ju bën të lumtur.

Një studim 20-vjeçar i kryer nga dr. Thomas Gilovich, profesor i psikologjisë, ka konstatuar diçka interesante: mos i shpenzoni paratë në gjëra.

Problemi me këtë fenomen është se lumturia të cilën jua sjellin gjërat zhduket shumë shpejt.

Ka tri arsye kritike se përse ndodh kjo:

– Mësohemi me gjërat e reja që i kemi blerë. Pra, gjëja që dikur na u është dukur shumë e nevojshme dhe e mirë, shumë shpejt kthehet në asgjë sepse veç e posedojmë.

– Vazhdojmë t’i rrisim dëshirat. Blerjet e reja shpijnë në pritshmëri të reja. Posa të mësohemi me një gjë të re që e kemi blerë, ne fillojmë të kërkojmë për një gjë tjetër më të mirë.

– Krahasimi… Gjërat, nga vetë natyra e tyre, krijojnë krahasime. Ne e blejmë një veturë të re dhe ndihemi shumë të emocionuar derisa një shok i yni e blen një veturë më të mirë.

“Një nga armiqtë e lumturisë është adaptimi. Ne blejmë gjëra që na bëjnë të lumtur dhe e arrijmë këtë. Por, vetëm për një periudhë të shkurtë. Gjërat e reja që i blejmë janë emocionuese në fillim për ne, por pastaj mësohemi me to”, ka deklaruar Gilovich.

Paradoksi i zotërimit të gjërave është se supozojmë që lumturia të cilën e arrijmë kur blejmë diçka do të zgjatë po aq shumë sa vet ajo gjëja që e blejmë. Por, kjo është gabim.

Gilovich dhe hulumtuesit tjerë kanë zbuluar se eksperiencat ju furnizojnë me lumturi më afatgjate sesa gjërat materiale.

Qe përse:

Eksperiencat bëhen pjesë e identitetit tonë. Ne nuk jemi gjërat që i kemi, por jemi akumulimi i çdo gjëje që e kemi parë, e kemi bërë dhe i vendeve që i kemi vizituar. Të blerit një orë “Apple” nuk do t’ju ndryshojë juve si person; por nëse merrni pushim nga puna për të bërë hiking në një vend shumë të veçantë, padyshim se do t’ju ndryshojë si person.

Eksperiencat janë pjesë më e madhe e vetës sonë sesa të mirat materiale që i kemi. Ne jemi shuma totale e eksperiencave që i kemi.

Krahasimet kanë më pak rëndësi. Ndryshe nga gjërat materialiste, ne nuk i krahasojmë eksperiencat njësoj sikurse gjërat.

Pritja ka rëndësi. Gilovich gjithashtu ka studiuar pritjen dhe ka zbuluar se pritja e një eksperience shkakton kënaqësi dhe emocionet ë mira, ndërkaq pritja për ta blerë një gjë materiale shkakton mos durim. Eksperiencat janë të kënaqshme qysh nga momentet e para të planifikimit e deri te kujtimet që do t’i mbani mend gjithmonë.

Vlen të ceket se Gilovich me kolegët e tij nuk janë të vetmit që besojnë se eksperiencat na bëjnë më të lumtur sesa gjërat. Dr. Elizabeth Dunn gjithashtu e ka studiuar këtë çështje dhe ka treguar se lumturia të cilën e fitojmë kur blejmë gjëra të reja zhduket shpejt dhe na lë duke dëshiruar më shumë.

Gjërat mund të zgjasin më shumë se eksperiencat, por kujtimet që mbesin gjithmonë janë më të rëndësishme.

Continue Reading

Lajmet

54 vjet nga Kongresi i Drejtshkrimit të Gjuhës Shqipe

Published

on

Sot shënohen 54 vjet nga hapja e punimeve të Kongresit të Drejtshkrimit të Gjuhës Shqipe, i cili nisi më 20 nëntor 1972 në Tiranë, me pjesëmarrjen e albanologëve nga të gjitha trevat shqiptare.

Në Kongres morën pjesë 87 delegatë nga Shqipëria, Kosova, Maqedonia e Veriut, Mali i Zi dhe arbëreshët e Italisë.

Qëllimi i këtij tubimi ishte përcaktimi i parimeve dhe drejtimeve kryesore për hartimin e një sistemi të njësuar të drejtshkrimit, me synimin e krijimit të një standardi të përbashkët të gjuhës shqipe.

Në këtë proces, rol të rëndësishëm luajti edhe delegacioni nga Prishtina. Kongresi u parapri nga një takim me rëndësi i mbajtur në Prishtinë, ku ishin diskutuar dhe përcaktuar disa nga standardet gjuhësore.

Kongresi i vitit 1972 shënoi një moment të rëndësishëm në historinë e gjuhës shqipe dhe në përpjekjet për njësimin e saj në të gjitha trevat shqiptare./A.K/

Continue Reading

Lajmet

Reka dhe Çitaku diskutojnë promovimin e filmave kosovarë në garën për Oscar

Published

on

Ambasadori i Kosovës në Shtetet e Bashkuara të Amerikës, Blerim Reka, ka pritur në Konsullatën e Përgjithshme të Kosovës në Nju-Jork, Lum Çitakun, drejtor i Programeve në Qendrën Kinematografike të Kosovës. Në takim është diskutuar promovimi ndërkombëtar i kinematografisë kosovare.

Në fokus të takimit ishte filmi “DUA”, me regji të Blerta Bashollit, i cili po shfaqet këto ditë në Nju-Jork dhe është propozimi zyrtar i Kosovës për edicionin e 99-të të çmimeve Oscar, në kategorinë “Filmi më i mirë ndërkombëtar”.

Në të njëjtën kategori garon edhe filmi “Shame and Money”, me regji të Visar Morinës, i cili, sipas raportimit të Telegrafit, është kualifikuar drejtpërdrejt pas fitimit të çmimit kryesor të jurisë, World Cinema Grand Jury Prize, në Festivalin e Filmit Sundance në janar të këtij viti.

Gjatë takimit, Reka theksoi rëndësinë e mbështetjes institucionale për krijimtarinë filmike dhe promovimin e kulturës së Kosovës në arenën ndërkombëtare. Ai vlerësoi kinematografinë si një nga mënyrat e rëndësishme për përfaqësimin dhe afirmimin e vendit në botë./A.K/

Continue Reading

Lajmet

Vazhdojnë punimet për rinovimin e teatrit ODA në Prishtinë

Published

on

Ministrja e Kulturës, Saranda Bogujevci, ka njoftuar se po vazhdojnë punimet për rinovimin e teatrit ODA në Prishtinë, duke bërë të ditur se kjo hapësirë së shpejti do të jetë e gatshme për artistët dhe publikun.

Përmes një njoftimi, Bogujevci ka theksuar se rinovimi i teatrit ODA është pjesë e investimeve në infrastrukturën teatrore në vend.

Ajo ka përmendur edhe projektet e përfunduara, përfshirë rinovimin e teatrit të qytetit “Muharrem Qena” në Mitrovicë dhe të hapësirave teatrore në Pallatin e Rinisë në Prishtinë, si dhe ndërtimin e Shtëpisë së Kulturës në Suharekë.

Sipas ministres, punimet po vazhdojnë edhe në Teatrin Kombëtar të Kosovës dhe në teatrin “Adriana” në Ferizaj, ndërsa Qendra për Arte në Rahovec ndodhet në fazën përfundimtare të ndërtimit.

Ndërkaq, Teatri i Operës dhe Baletit në Prishtinë është në fazën e fundit të projektimit./A.K/

Continue Reading

Lajmet

“Palimpsest”, projekt artistik që rikthen në vëmendje trashëgiminë muzikore shqiptare

Published

on

Teatri Kombëtar i Operës, Baletit dhe Ansamblit Popullor ka prezantuar projektin artistik “Palimpsest”, i cili synon të rikthejë në vëmendje trashëgiminë muzikore shqiptare të viteve ’30, ’40 dhe ’50.

Përmes krijimeve origjinale dhe përpunimeve të këngëve popullore, projekti sjell vepra të kompozitorëve Antonio Muçi, Karlo Pali, Muharrem Xhediku, Koço Uçi, Ramadan Sokoli dhe Çesk Zadeja.

Në këtë mbrëmje artistike do të interpretojnë Ardita Bufaj në piano, Armando Likaj në bariton dhe Maida Resulbegoviç në soprano, ndërsa e ftuar speciale do të jetë pianistja Norena Gaxha.

Koncepti artistik, hulumtimi arkivor dhe mbledhja e partiturave janë realizuar nga pedagogia Ardita Bufaj.

Projekti organizohet në bashkëpunim me Teatrin Kombëtar të Operës, Baletit dhe Ansamblit Popullor, në kuadër të Festivalit “Netët e Muzikës Shqiptare”, me synimin për të promovuar vlerat e trashëgimisë muzikore dhe për t’i përcjellë ato te brezat e rinj./A.K/

Continue Reading

Të kërkuara