Luka Modriq ka festuar të mërkurën ditëlindjen e 41-të, por mosha duket se është vetëm një numër për yllin kroat të futbollit.

Mesfushori vazhdon të jetë i motivuar për të fituar trofe me Milanin, ndërsa synon të udhëheqë edhe Kombëtaren e Kroacisë në Ligën e Kombeve.

Modriq është aktualisht lojtari më i vjetër që luan në pesë ligat kryesore të Evropës këtë sezon. Pas tij renditet Edin Xheko i Schalkes, i cili është 40-vjeçar.

Një tjetër statistikë interesante është se Modriq është më i vjetër se pesë trajnerë që aktualisht drejtojnë skuadra në Serie A.

Përveç urimeve private, kapiteni i Kroacisë mori edhe urime publike nga Milani. Klubi italian publikoi një video me disa prej lëvizjeve dhe momenteve më të mira të Modriqit, të shoqëruara me brohoritjet e tifozëve dhe mesazhin:

“Mjeshtri ynë mbush 41 vjet.”

Urime për Modriqin pati edhe nga Federata Kroate e Futbollit, e cila e cilësoi moshën 41-vjeçare si diçka të zakonshme për kapitenin e saj.

“Sipas kalendarit të Luka Modriqit, 41 është vetëm një numër për të rinjtë! I urojmë kapitenit shumë shëndet, lumturi dhe suksese në ditëlindjen e tij. Shpresojmë që të vazhdojë të thyejë rekorde dhe të kënaqë botën e futbollit”, shkroi federata kroate.

Pavarësisht 41 viteve, Modriq vazhdon të shkruajë histori në futbollin evropian.

D.L

Elena Sadiku po shkruan histori në futbollin suedez. Trajnerja shqiptare është nominuar për çmimin e trajneres më të mirë të vitit në futbollin e femrave, në kuadër të ceremonisë së Topit të Artë.

Lajmi e emocionoi tej mase 32-vjeçaren, e cila e mori vesh nominimin gjatë përgatitjeve me Hackenin për ndeshjen e Kupës ndaj Goteborgut.

Skuadra sapo kishte përfunduar stërvitjen kur ndihmëstrajnerja Matilda Bergstrand e thirri Sadikun. Fillimisht, ajo nuk e kuptoi se për çfarë bëhej fjalë.

“Ajo tha diçka si: ‘Topi i Artë’. Pastaj e pashë foton dhe e pashë fytyrën time aty. Më pas stafi dhe lojtaret erdhën, u hodhën mbi mua dhe u gëzuan”, ka rrëfyer Sadiku për “Sportbladet”.

Kur kuptoi se ishte përfshirë në mesin e pesë kandidateve për trajneren më të mirë të vitit, emocionet e pushtuan.

“Fillova të qaj në dhomën e trajnerëve. Ishte e pabesueshme. Lotët më dolën, por ishte bukur sepse pata mundësinë ta ndaja këtë moment me to. Kjo është një arsye e madhe pse jam nominuar”, tha ajo.

Nominimi vjen pas një viti të jashtëzakonshëm për Sadikun. Ajo udhëhoqi Hackenin drejt trofeut të parë evropian në historinë e klubit, pasi në maj triumfoi ndaj Hammarbyt në finale të Kupës së Evropës.

Para aventurës në Göteborg, Sadiku drejtoi edhe Celticun, me të cilin fitoi titullin e parë në historinë e klubit.

Sadiku është njëra nga pesë kandidatet për çmimin prestigjioz dhe veçon një detaj të veçantë në mesin e të nominuarave.

“Ajo që mendoj se është interesante është se jam e vetmja vajzë. Mendoj se kjo është shumë interesante”, u shpreh ajo.

Megjithatë, ajo që e ka prekur më shumë Sadikun ka qenë reagimi i futbollisteve të saj.

“Nominimi është një gjë, por fakti që vajzat janë kaq të lumtura për mua më bën të emocionohem”, tha trajnerja shqiptare.

Ceremonia e ndarjes së çmimeve të Topit të Artë do të mbahet më 26 tetor në Londër, ku do të mësohet edhe fituesja e çmimit për trajneren më të mirë të vitit.

D.L

Lutfi Dalipi po kalon nëpër një formë të jashtëzakonshme në Superligën e Zvicrës. Futbollisti ofensiv i Vaduzit është shpallur lojtari më i mirë i javës së shtatë në elitën e futbollit zviceran.

Dalipi shkëlqeu në fitoren 3:1 ndaj Lausannes, ku realizoi një gol dhe regjistroi dy asistime.

20-vjeçari ka shënuar tre gola dhe shtatë asistime në shtatë ndeshjet e para të sezonit. Vaduz ka realizuar gjithsej 16 gola, ndërsa Dalipi ka marrë pjesë drejtpërdrejt në 10 prej tyre, një rekord në kampionat.

Sipas Ligës Zvicerane të Futbollit (SFL), Dalipi ka vendosur një rekord të veçantë.

“Lojtari i FC Vaduz është bërë futbollisti i parë 20-vjeçar ose më i ri që arrin kuotën e 10 pikëve – 3 gola dhe 7 asistime – në shtatë ndeshjet e para të një edicioni të Superligës”, ka njoftuar SFL.

Dalipi është i huazuar te Vaduz për këtë sezon nga Young Boys, me të cilin ka kontratë deri në vitin 2030.

Dalipi mes Zvicrës, Shqipërisë dhe Kosovës

Paraqitjet e tij të mira kanë bërë që për Dalipin të rritet interesimi edhe në nivel ndërkombëtar. Ai ka gjashtë paraqitje me Zvicrën U20, ndërsa së fundmi është kontaktuar edhe nga Federata Shqiptare e Futbollit.

20-vjeçari ka mundësi të luajë edhe për Shqipërinë apo Kosovën, ndërsa në aspektin e prejardhjes sportive ekziston edhe mundësia e Portugalisë.

Megjithatë, konkurrenca te Portugalia dhe Zvicra është e madhe. Për këtë arsye, në të ardhmen Dalipi mund të jetë përballë një vendimi të rëndësishëm mes Shqipërisë dhe Kosovës.

Me formën që po tregon në Zvicër, talenti 20-vjeçar tashmë po tërheq vëmendjen dhe pritet që zgjedhja e tij për kombëtaren të jetë një prej temave interesante të futbollit shqiptar dhe kosovar.

D.L

Presidenti i Comos, Mirwan Suwarso, dhe disa drejtues të klubit kanë vendosur të heqin dorë nga vendet e tyre në stadium për debutimin historik të skuadrës në Ligën e Kampionëve, në mënyrë që ato t’u dhurohen tifozëve më të moshuar.

Como do ta presë Leipzigun të enjten, në ndeshjen e parë të klubit në Champions League në historinë 119-vjeçare.

Interesimi për këtë përballje historike ka qenë jashtëzakonisht i madh, me kërkesën për bileta që ka tejkaluar dukshëm kapacitetin e stadiumit “Giuseppe Sinigaglia”.

Stadiumi ka kapacitet prej rreth 12 mijë ulësesh, por për këtë ndeshje numri është reduktuar për rreth 1 mijë vende për shkak të kërkesave të UEFA-s sa i përket transmetimit dhe operacioneve organizative.

Pasi të gjitha biletat u shitën, presidenti indonezian i Comos, Mirwan Suwarso, njoftoi për një gjest të veçantë. Ai dhe disa drejtues të klubit do t’i lirojnë vendet e tyre për tifozët që e kanë ndjekur Comon për dekada.

“Me kapacitetin e reduktuar dhe numrin e kufizuar të biletave në dispozicion, për fat të keq nuk mund t’i akomodojmë të gjithë ata që dëshironin të ishin në stadium. Megjithatë, unë dhe disa drejtues të klubit kemi vendosur të heqim dorë nga vendet tona për këtë ndeshje”, shkroi Suwarso.

Ai bëri të ditur se këto vende do t’u ndahen tifozëve të lindur në vitin 1950 ose më herët, të cilët e kanë ndjekur klubin në çdo kategori dhe gjatë çdo epoke të tij.

“Duam që këto vende t’u ndahen tifozëve që kanë pritur më gjatë. Do të jemi të nderuar të heqim dorë nga vendi ynë për ta”, shtoi presidenti i Comos.

Një gjest që tregon se për Comon debutimi në Champions League nuk është vetëm një ndeshje historike, por edhe një moment për të nderuar tifozët që kanë qëndruar besnikë ndaj klubit ndër vite.