Ka nisur sot në Melburn raundi i tretë i grand slam-it të “Australian Open” në tenis, ku të gjithë pretendientët e njohur kanë kaluar me sukses në raundin e katërt. Tenisti serb Novak Djokovic, 10 herë fitues i këtij turneu, fitoi 3-0 (6-1, 6-4, 6-4) ndaj Tomas Mahac dhe avancon më tej.

Po ashtu, spanjolli Carlos Alcaraz mundi 3-1 (6-2, 6-4, 6-7, 6-2) Nuno Borges dhe është kualifikuar për raundin e katërt. Nuk zhgënjen as numri 2 në botë, gjermani Alexander Zverev, i cili mundi 3-0 (6-3, 6-4, 6-4) Jacob Fearnley.

Te femrat, numri 1 në botë, bjellorusia Aryna Sabalenka, kaloi më tej duke fituar 2-0 (7-6, 6-4) ndaj Clara Tauson, ndërsa Naomi Osaka u eliminua pas tërheqjes nga gara pas humbjes së setit të parë (6-7) ndaj Belinda Bencic të Zvicrës. Tenistja amerikane Coco Gauff, numri 3 në botë, kaloi gjithashtu në raundin e katërt pas fitores 2-0 (6-4, 6-2) ndaj Laylah Fernandez. Po ashtu, spanjollja Paola Badosa, rusja Mirra Andreeva dhe rusja Anastasia Pavlyuchenkova janë gjithashtu të kualifikuara./UBTNews/

Në një mbrëmje gala të mbajtur para pak ditësh, janë shpallur më të mirët e futbollit në Zvicër për vitin 2024, dhe dominimi i shqiptarëve në këtë eveniment ishte i padiskutueshëm.

Nga katër çmime për futbollistë, tre prej tyre i kanë fituar lojtarët shqiptarë, sipas raportimit të albinfo.ch. Granit Xhaka u shpall futbollisti më i mirë i përfaqësueses së Zvicrës për vitin 2024, një çmim që ai e ka fituar për herë të tretë radhazi, duke theksuar ndikimin e tij të madh në futbollin ndërkombëtar dhe nivelin e lartë të arritjeve me Zvicrën dhe Bayer Leverkusenin.

Ardon Jashari, një yll i ri në ngjitje, u shpall lojtari më i mirë i ri për vitin 2024, ndërsa Valon Fazliu u shpall lojtari më i mirë i Challenge League, kategoria e dytë zvicerane. Renato Steffen ishte i vetmi lojtar joshqiptar që mori një çmim, duke u shpallur lojtari më i mirë i Superligës së Zvicrës për vitin 2024.

Ceremonia në Bern vërtetoi edhe një herë ndikimin e fuqishëm të shqiptarëve në futbollin zviceran, një ndikim që ka ardhur pas një periudhe suksesi dhe kontributi të jashtëzakonshëm në futbollin ndërkombëtar.

Xhaka, i cili ka udhëhequr Zvicrën si kapiten dhe ka fituar titullin e kampionit në Bundesligë me Bayer Leverkusenin, është një nga emrat që do të kujtohet gjatë për arritjet e tij. Ndërsa Jashari dhe Fazliu janë shembujt më të rinj të një brezi të ri shqiptarësh që do të vazhdojnë të kontribuojnë për Zvicrën në vitet në vijim.

Përveç kësaj, shumë emra të njohur të futbollit shqiptar si Valon Behrami, Blerim Xhemaili, Admir Mehmedi dhe Albert Bunjaku kanë përfunduar karrierat e tyre, por ndikimi i shqiptarëve vazhdon të mbetet i fuqishëm në futbollin zviceran.

Aktualisht, klubet e Zvicrës janë të mbushura me talente shqiptare. Në skuadra si Lugano, Basel, Lausanne, dhe Luzern, shqiptarët vazhdojnë të japin kontribut të rëndësishëm në fushën e lojës. Me këtë trend të vazhdueshëm, shqiptarët duket se do të vazhdojnë të fitojnë çmime të rëndësishme në Superligën e Zvicrës dhe do të mbajnë pozita kyçe në skuadra të mëdha.

Ndërkohë, kritikat që shpesh janë drejtuar ndaj shqiptarëve të rritur në Zvicër për zgjedhjen e përfaqësueses zvicerane mbi Shqipërinë ose Kosovën, nuk i kanë ulur lidhjet e tyre me vendin e origjinës. Përkundrazi, sukseset e tyre vazhdojnë të sjellin përfitime të mëdha edhe për Kosovën dhe Shqipërinë, duke forcuar pozitat e futbollit shqiptar në arenën ndërkombëtare./UBTNews/

Real Madridi është gati të nisi një ‘revolucion’ në skuadër pas disa rezultateve të paqëndrueshme dhe humbjes shkatërruese 5-2 kundër Barcelonës në Superkupën e Spanjës më 12 janar. Sipas një raportimi të “Fichajes.net,” klubi madrilen ka vendosur të largohet nga tre lojtarë të rëndësishëm: Aurelien Tchouameni, Ferland Mendy dhe Lucas Vazquez.

Pas humbjes drastike nga rivalët katalanas, Real Madridi nuk ka arritur të rikthehet në formën e dëshiruar, duke e pasur të vështirë edhe të kalojë në Kupën e Mbretit kundër Celta Vigos, kur ndeshja shkoi deri në shtesë. Kjo ka nxitur klubin që të rishikojë planet dhe të bëjë ndryshime të mëdha në skuadër.

Aurelien Tchouameni ka pasur një sezon të vështirë, sidomos në rolin e qendërmbrojtësit të improvizuar, ku ka bërë disa gabime të kushtueshme që kanë ndihmuar kundërshtarët të shënojnë. Tchouameni, i cili erdhi në Madrid për 80 milionë euro, ka regjistruar 23 paraqitje këtë sezon dhe ka një kontratë në “Bernabeu” deri në qershor 2028. Megjithatë, duke pasur parasysh lidhjet e tij me Liverpoolin dhe vlerën e tij të lartë, Reali mund të jetë i gatshëm ta shesë dhe të përdorë të ardhurat për të përforcuar mesfushën.

Në anën tjetër, Ferland Mendy ka pasur një rënie të dukshme të performancës këtë sezon. Pavarësisht se është një lojtar i rëndësishëm, kërkesat e tij për një rritje rroge, së bashku me vendimin e Real Madridit për të mos e plotësuar, mund të çojnë në largimin e tij pas përfundimit të kontratës në verën e vitit 2025.

Lucas Vazquez është një tjetër lojtar që mund të largohet. Pas disa sezoneve të mira, performanca e tij si mbrojtës i djathtë ka qenë e paqëndrueshme, dhe kontrata e tij skadon në fund të këtij sezoni. Kjo mund të jetë një mundësi për Madridin që të rigrupojë skuadrën, duke synuar për një përforcim në këtë pozicion, me ndjekjen e Trent Alexander-Arnold të Liverpoolit që mund të jetë një sinjal i kësaj lëvizjeje.

Përkundër performancave të dobëta, Vazquez ka arritur të regjistrojë dy gola dhe tre asistime në 25 paraqitje këtë sezon, duke treguar ende një vlerë për skuadrën. Megjithatë, duke pasur parasysh ndryshimet që mund të ndodhin, kjo mund të jetë koha e fundit e tij në Madrid.

Me këto ndryshime të mundshme, Real Madridi duket se është gati për të nisur një periudhë të re, duke synuar përforcime dhe riorganizim të skuadrës për të vazhduar dominimin e tij në futbollin botëror./UBTNews/

Erling Haland ka marrë një vendim historik që do të mbetet i paharruar në historinë e futbollit. Sulmuesi norvegjez ka firmosur një kontratë rekord me Manchester Cityn për një periudhë të jashtëzakonshme prej 9.5 vitesh. Lajmi është konfirmuar nga “The Athletic,” sipas të cilit ky marrëveshje përfshin heqjen e të gjitha klauzolave të mëparshme të lirimit, duke siguruar që Haland do të qëndrojë me kampionët e Premier Ligës për shumë vite në të ardhmen.

Marrëveshja e re është një nga kontratat më fitimprurëse të të gjitha kohërave, duke e vendosur Halandin në një pozicion të jashtëzakonshëm në listat e kontratave më të paguara të futbollit botëror. Me këtë marrëveshje, ai do të jetë 34 vjeç kur kontrata të skadojë, një fakt që thekson angazhimin afatgjatë të sulmuesit në projektin e Manchester Cityt.

Në kohën kur kontrata ekzistuese e Haland ishte afër skadimit, me një marrëveshje që do të përfundonte në verën e vitit 2027, kjo zgjatje është një hap i fuqishëm i klubit për të mbajtur një nga yjet më të shndritshëm të futbollit botëror. Kjo do të japë një shtysë të madhe për Cityn, sidomos mes një sezoni të vështirë për kampionët në fuqi të Premier Ligës, të cilët aktualisht renditen në vendin e gjashtë në tabelë dhe janë 12 pikë prapa kryesuesve të momentit, Liverpool.

Erling Haland ka vazhduar të shkëlqejë në fushë dhe është një nga lojtarët më të pëlqyer dhe më të frikshëm për mbrojtësit kundërshtarë. Deri tani, ai ka shënuar 16 gola në 21 ndeshje në kampionatin anglez, duke vazhduar të konfirmojë vlerën e tij të jashtëzakonshme për Manchester Cityn dhe futbollin botëror./UBTNews/