Dr. Med. Xhezide Lumi, një profesioniste e shquar në fushën e mjekësisë dhe psikoterapisë për fëmijët dhe të rinjtë, ka dhënë një kontribut të veçantë në zhvillimin e konsultimeve prind-fëmijë, me një fokus të veçantë te fëmijët e moshës 0-5 vjeç. Në një ligjëratë të fundit tematike me studentët e programit të Psikologjisë në UBT, Dr. Lumi ndau përvojën e saj shumëvjeçare dhe ekspertizën në këto fusha, duke nxitur diskutime të rëndësishme dhe frymëzuese.

Që nga viti 2017, Dr. Lumi ka shërbyer si Kryemjeke në ambulantën e Klinikës për fëmijë dhe të rinj PDAG në Kantonin e Aargaut, në Zvicër. Ndërsa, nga viti 2019, ajo udhëheq repartin për fëmijët e vegjël, duke ofruar mbështetje të specializuar dhe trajtime për fëmijët 0-5 vjeç. Gjatë ligjëratës së saj në UBT, ajo ndau njohuri të thelluara mbi rëndësinë e konsultimeve prind-fëmijë në zhvillimin e shëndetit emocional dhe mendor të fëmijëve të vegjël.

Përveç kësaj, Dr. Lumi ka përfunduar specializime të shumta në fusha të ndryshme të psikoterapisë, duke përfshirë terapinë e sjelljes dhe sistemike, si dhe psikologjinë e thellë (analitike) për fëmijë dhe prindër. Specializimet e saj janë kryer në disa prej institucioneve më prestigjioze si Universitetet e Bernit, Zürichut dhe Baselit. Për më tepër, ajo ka përfunduar një diplomë për supervizore në Universitetin e Zürichut, ku ka ofruar supervizion për psikologë, mjekë dhe pedagogë, duke ndihmuar në formimin profesional të këtyre profileve.

Gjatë ligjëratës, ajo diskutoi me studentët e UBT-së për sfidat që prindërit dhe fëmijët përballen në fazat e hershme të jetës, si dhe për rëndësinë e një qasjeje të integruar në trajtimin psikoterapeutik. Ajo përmendi gjithashtu përvojat e saj në dhënien e supervizionit në çerdhe dhe shkolla në Basel, si dhe në trajnimet autogjenike (autohipnozë) që ajo ofron në bashkëpunim me departamentin e shëndetësisë në Basel.

Një aspekt tjetër i rëndësishëm i ligjëratës ishte roli i saj në komunitetin shqiptar në Zvicër, ku ajo mban ligjërata në gjuhën shqipe për prindërit shqiptarë, në bashkëpunim me shoqatën “Parandalo” në Basel. Kjo përvojë ka ndihmuar në ngritjen e vetëdijes për shëndetin mendor në mesin e prindërve dhe fëmijëve shqiptarë që jetojnë në diasporë.

Në fund të vitit 2025, Dr. Lumi do të përfundojë specializimin e saj për psikoterapinë e çifteve në Freiburg të Gjermanisë, ndërsa nga viti 2026 planifikon të nisë një qendër të pavarur për psikoterapi të fëmijëve, të rinjve dhe familjeve në Basel.

Ligjërata e saj në UBT u prit me interes të madh nga studentët, të cilët përfituan njohuri të vlefshme dhe këshilla praktike nga një eksperte e fushës, e cila ka pasionin dhe përkushtimin për të avancuar shëndetin mendor të brezave të rinj./UBTnews/

Fakulteti i Shkencave Mjekësore në UBT mirëpriti Prof. Dr. Pier Paolo Piccaluga, i cili mbajti një ligjëratë tematike për studentët e këtij fakulteti. Pritjen e organizoi Prof. Dr. Fitim Alidema, dekan i shkencave mjekësore në UBT, ndërsa në këtë ngjarje ishin të pranishëm edhe Dr. Adriatik Berisha dhe Prof. Dr. Fisnik Laha.

Ligjërata u fokusua në tematika të rëndësishme si mjekësia, patologjia dhe onkologjia, me një theks të veçantë në integrimin e inteligjencës artificiale në këto fusha. Prof. Dr. Piccaluga, MD, Ph.D., është profesor i asociuar i patologjisë në Departamentin e Mjekësisë Eksperimentale, Diagnostikuese dhe Mjekësisë Speciale në Shkollën e Mjekësisë të Universitetit të Bolonjës, si dhe njëkohësisht shërben si mjek ekzekutiv në Biobankën e Kërkimeve në Spitalin IRCCS S. Orsola-Malpighi.

Me një karrierë të pasur akademike dhe profesionale, në vitin 2018, Prof. Dr. Piccaluga u emërua profesor në Universitetin Queen Mary në Londër dhe në Universitetin e Bujqësisë dhe Teknologjisë Jomo Kenyatta në Nairobi, Kenia.

Ai ka publikuar në revista prestigjioze ndërkombëtare si Nature Medicine, Journal of Clinical Investigation, Journal of Experimental Medicine, Journal of Clinical Oncology, Blood, Lancet Oncology dhe Lancet Infectious Diseases.

Për më tepër, Dr. Piccaluga është renditur si një nga shkencëtarët më të shquar italianë nga VIA-Academy, duke dëshmuar kështu për kontributin e tij të rëndësishëm në fushën e mjekësisë dhe kërkimeve shkencore. Ligjërata e tij solli një debat të frytshëm mbi rolin e teknologjisë moderne në avancimin e shëndetësisë dhe përmirësimin e kujdesit ndaj pacientëve./UBTNews/

Në ambientet e UBT-së në Prishtinë, u mbajt një ligjëratë e veçantë në kuadër të lëndës “Sjellja Organizative dhe Lidershipi”, e cila u drejtua nga studenti i vitit të dytë në Fakultetin për Menaxhment, Biznes dhe Ekonomi, në bashkëpunim me profesorin Engelbert Zefaj.

Ligjërata u realizua nga eksperti i njohur gjerman, Guenter Schrom, i angazhuar në Kosovë përmes projektit “Mbështetja e Bashkimit Evropian për Reformat në Menaxhimin e Financave Publike”, financuar nga Bashkimi Evropian dhe organizata gjermane GIZ.

Tematika e ligjëratës ishte “Kuptimi dhe aplikimi i standardeve të vendeve të zhvilluara për rekrutimin e punonjësve në kompani private dhe në organizata publike”.

Ligjëruesi Schrom, ilustroi rëndësinë e standardeve të avancuara në procesin e rekrutimit, duke sjellë si shembull të fundit procesin e rekrutimit brenda Doganave të Kosovës dhe rolin kyç të mbështetësve të këtij projekti.

Gjatë prezantimit, ligjëruesi theksoi kriteret thelbësore që duhet të aplikohen për të identifikuar kandidatët e duhur për pozita në sektorin privat dhe atë publik. Ai theksoi standardet dhe teknikat e nevojshme për një përzgjedhje efektive, duke i inkurajuar studentët që të përgatiten seriozisht për sfidat e procesit të rekrutimit pas përfundimit të studimeve.

Interesimi i studentëve ishte i lartë, të cilët e vlerësuan ligjëratën si të dobishme dhe të rëndësishme për të ardhmen e tyre profesionale. Ata shprehën se, për shkak të moshës së tyre, nuk kishin pasur ende përvojë në procedurat e rekrutimit, por ligjëratat premtuese premtoi se do t’i merrnin seriozisht këshillat e dhëna nga eksperti, me qëllim që të përgatiten më mirë për mundësitë e punësimit në të ardhmen.

Kjo ngjarje ofron një mundësi të shkëlqyer për studentët, duke i pajisur ata me njohuri praktike dhe këshilla që do t’u shërbejnë gjatë karrierës së tyre./UBTNews/

Instituti i Gjuhëve të Huaja në UBT, në bashkëpunim me Ambasadën Italiane në Kosovë, organizoi një event të veçantë në kuadër të Javës së Gjuhës Italiane. Kjo ngjarje shënoi inaugurimin e Qendrës për Njohuritë e Gjuhës Italiane, një arritje e rëndësishme për përhapjen e studimit të kësaj gjuhe në vend.

Ceremonia u zhvillua në një atmosferë festive, duke sjellë së bashku studentë, profesorë dhe përfaqësues të Ambasadës Italiane, të gjithë të angazhuar për të thelluar lidhjet kulturore mes Kosovës dhe Italisë.

Rektori i UBT-së, Prof. Dr. Edmond Hajrizi, përshëndeti të pranishmit në këtë ngjarje të rëndësishme. Ai theksoi se hapja e Qendrës për Njohuritë e Gjuhës Italiane është një arritje e madhe për institucionin dhe për të rinjtë e Kosovës, duke e konsideruar këtë bashkëpunim me Ambasadën Italiane një hap të rëndësishëm për forcimin e lidhjeve kulturore mes dy vendeve.

Gjuha italiane, sipas rektorit Hajrizi, nuk është thjesht një mjet komunikimi, por një pasuri kulturore dhe historike që na lidh me trashëgiminë e pasur të Italisë. Dhe se ajo na ofron mundësinë të kuptojmë më mirë kulturën dhe traditat italiane, dhe të forcojmë marrëdhëniet tona kulturore dhe ekonomike.

“Njohja e gjuhës italiane është një investim në arsimimin e studentëve, duke u ofruar atyre mundësi për të zhvilluar karrierat e tyre në një treg gjithnjë e më global,” u shpreh rektori Hajrizi. Ai e përfundoi fjalimin duke shprehur besimin se njohja e gjuhës italiane do t’i ndihmojë studentët në zhvillimin e karrierave të tyre dhe do të forcojë lidhjet kulturore mes Kosovës dhe Italisë.

Pas fjalës së rektorit, Ambasadori i Italisë në Kosovë, Antonello De Riu, mori fjalën dhe shprehu përkushtimin e thellë të ambasadës për të mbështetur iniciativa që promovojnë kulturën italiane. Ai theksoi se aktivitete si ky event janë thelbësore për ndërtimin e urave të komunikimit dhe miqësisë midis popujve të Kosovës dhe Italisë.

Ambasadori De Riu inkurajoi studentët dhe të pranishmit të përfitojnë nga mundësitë që ofrohen për të njohur më mirë kulturën italiane, duke e parë atë si një mundësi për rritje personale dhe profesionale. “Le të shfrytëzojmë këtë mundësi për të thelluar njohuritë tona dhe për të forcuar lidhjet mes dy vendeve tona,” përfundoi ai, duke inkurajuar gjithashtu një angazhim të vazhdueshëm në promovimin e kulturës italiane.

Më pas, Media Grupi i UBT-së prezantoi një video të veçantë, e cila ishte përgatitur në gjuhën italiane me titra shqip nga profesorë dhe studentë që kanë studiuar dhe vepruar në Itali, duke ndarë eksperiencën e tyre dhe duke vënë në theks se sa e rendësishme është gjuha italiane për ta.  Kjo video shërbeu si një pasqyrë e angazhimeve dhe përvojave të tyre në këtë vend, duke ilustruar mundësitë e shumta që ofron gjuha italiane.

Më pas, eventi vazhdoi me shfaqjen e filmit “Perfetti Sconosciuti” të Paolo Genovese (2016), një komedi-dramë që trajton temat e marrëdhënieve dhe miqësive. Filmi u shfaq në italisht me titra në anglisht, duke ofruar një mundësi për studentët të përmirësojnë njohuritë e tyre gjuhësore në një atmosferë argëtimi.

Ky aktivitet jo vetëm që festoi kulturën italiane, por gjithashtu forcoi lidhjet ndërkulturore mes Kosovës dhe Italisë, duke promovuar bashkëpunimin dhe miqësinë ndërmjet popujve. Inaugurimi i Qendrës për Njohuritë e Gjuhës Italiane është një hap i rëndësishëm drejt avancimit të edukimit dhe ofrimit të mundësive të reja për të rinjtë kosovarë, duke e bërë italishten një pjesë të rëndësishme të arsimit të tyre./UBTNews/D.E./