Elena Sadiku po shkruan histori në futbollin suedez. Trajnerja shqiptare është nominuar për çmimin e trajneres më të mirë të vitit në futbollin e femrave, në kuadër të ceremonisë së Topit të Artë.

Lajmi e emocionoi tej mase 32-vjeçaren, e cila e mori vesh nominimin gjatë përgatitjeve me Hackenin për ndeshjen e Kupës ndaj Goteborgut.

Skuadra sapo kishte përfunduar stërvitjen kur ndihmëstrajnerja Matilda Bergstrand e thirri Sadikun. Fillimisht, ajo nuk e kuptoi se për çfarë bëhej fjalë.

“Ajo tha diçka si: ‘Topi i Artë’. Pastaj e pashë foton dhe e pashë fytyrën time aty. Më pas stafi dhe lojtaret erdhën, u hodhën mbi mua dhe u gëzuan”, ka rrëfyer Sadiku për “Sportbladet”.

Kur kuptoi se ishte përfshirë në mesin e pesë kandidateve për trajneren më të mirë të vitit, emocionet e pushtuan.

“Fillova të qaj në dhomën e trajnerëve. Ishte e pabesueshme. Lotët më dolën, por ishte bukur sepse pata mundësinë ta ndaja këtë moment me to. Kjo është një arsye e madhe pse jam nominuar”, tha ajo.

Nominimi vjen pas një viti të jashtëzakonshëm për Sadikun. Ajo udhëhoqi Hackenin drejt trofeut të parë evropian në historinë e klubit, pasi në maj triumfoi ndaj Hammarbyt në finale të Kupës së Evropës.

Para aventurës në Göteborg, Sadiku drejtoi edhe Celticun, me të cilin fitoi titullin e parë në historinë e klubit.

Sadiku është njëra nga pesë kandidatet për çmimin prestigjioz dhe veçon një detaj të veçantë në mesin e të nominuarave.

“Ajo që mendoj se është interesante është se jam e vetmja vajzë. Mendoj se kjo është shumë interesante”, u shpreh ajo.

Megjithatë, ajo që e ka prekur më shumë Sadikun ka qenë reagimi i futbollisteve të saj.

“Nominimi është një gjë, por fakti që vajzat janë kaq të lumtura për mua më bën të emocionohem”, tha trajnerja shqiptare.

Ceremonia e ndarjes së çmimeve të Topit të Artë do të mbahet më 26 tetor në Londër, ku do të mësohet edhe fituesja e çmimit për trajneren më të mirë të vitit.

D.L

Presidenti i Comos, Mirwan Suwarso, dhe disa drejtues të klubit kanë vendosur të heqin dorë nga vendet e tyre në stadium për debutimin historik të skuadrës në Ligën e Kampionëve, në mënyrë që ato t’u dhurohen tifozëve më të moshuar.

Como do ta presë Leipzigun të enjten, në ndeshjen e parë të klubit në Champions League në historinë 119-vjeçare.

Interesimi për këtë përballje historike ka qenë jashtëzakonisht i madh, me kërkesën për bileta që ka tejkaluar dukshëm kapacitetin e stadiumit “Giuseppe Sinigaglia”.

Stadiumi ka kapacitet prej rreth 12 mijë ulësesh, por për këtë ndeshje numri është reduktuar për rreth 1 mijë vende për shkak të kërkesave të UEFA-s sa i përket transmetimit dhe operacioneve organizative.

Pasi të gjitha biletat u shitën, presidenti indonezian i Comos, Mirwan Suwarso, njoftoi për një gjest të veçantë. Ai dhe disa drejtues të klubit do t’i lirojnë vendet e tyre për tifozët që e kanë ndjekur Comon për dekada.

“Me kapacitetin e reduktuar dhe numrin e kufizuar të biletave në dispozicion, për fat të keq nuk mund t’i akomodojmë të gjithë ata që dëshironin të ishin në stadium. Megjithatë, unë dhe disa drejtues të klubit kemi vendosur të heqim dorë nga vendet tona për këtë ndeshje”, shkroi Suwarso.

Ai bëri të ditur se këto vende do t’u ndahen tifozëve të lindur në vitin 1950 ose më herët, të cilët e kanë ndjekur klubin në çdo kategori dhe gjatë çdo epoke të tij.

“Duam që këto vende t’u ndahen tifozëve që kanë pritur më gjatë. Do të jemi të nderuar të heqim dorë nga vendi ynë për ta”, shtoi presidenti i Comos.

Një gjest që tregon se për Comon debutimi në Champions League nuk është vetëm një ndeshje historike, por edhe një moment për të nderuar tifozët që kanë qëndruar besnikë ndaj klubit ndër vite.

Lionel Messi është shumë pranë një tjetër investimi në futbollin spanjoll, pasi raportohet se ka arritur marrëveshje në parim për blerjen e klubit Eldense, që garon në kategorinë e dytë të futbollit në Spanjë.

Sipas gazetës spanjolle AS, fituesi i Kupës së Botës 2022 ka arritur marrëveshje me grupin kolumbian të investimeve TH për blerjen e 100 për qind të aksioneve që ky grup zotëron në klub.

Megjithatë, marrëveshja ende nuk është përfundimtare dhe duhet të marrë miratimin e Këshillit të Sportit të Spanjës.

Nëse gjithçka finalizohet, Messi do të bëhet për herë të parë pronar i një klubi profesionist spanjoll. 39-vjeçari, i cili aktualisht luan sezonin e tij të katërt me Inter Miami në Shtetet e Bashkuara, tashmë ka investime në futbollin spanjoll, ku është pronar i klubit të kategorisë së pestë, Cornella.

Kryetari i komunës së Eldës, Ruben Alfaro, ka konfirmuar se kanë marrë njoftim për marrëveshjen në parim.

“Ne kemi pranuar konfirmimin se një marrëveshje në parim është arritur. Në këtë fazë duhet të presim për të parë nëse marrëveshja do të finalizohet”, ka deklaruar Alfaro.

Ai e ka cilësuar interesimin e Messit si një lajm të jashtëzakonshëm për qytetin dhe klubin.

“Duhet të jemi krenarë për qytetin tonë dhe klubin e futbollit që na përfaqëson. Fakti që një personalitet si Lionel Messi është i interesuar dhe dëshiron ta përkrahë klubin dhe Eldën është lajm spektakolar”, ka thënë ai.

Eldense është promovuar në Segunda División, ndërsa pas katër xhirove ndodhet në pjesën e poshtme të tabelës.

Klubi nga qyteti Elda, i cili ka rreth 55 mijë banorë, i zhvillon ndeshjet në stadiumin me kapacitet prej 5,800 ulësesh.

Nëse marrëveshja përfundon me sukses, Messi do të nisë një kapitull të ri në karrierën e tij jashtë fushës, këtë herë si pronar i një klubi profesionist në Spanjë.

D.L

Cristian Romero është zgjedhur kapiteni i ri i Kombëtares së Argjentinës, pas tërheqjes së Lionel Messit nga futbolli ndërkombëtar.

Mbrojtësi 28-vjeçar do të marrë shiritin e kapitenit që për rreth 15 vjet ishte në krahun e Messit, i cili e mbajti atë që nga viti 2011. Romero pritet të jetë një prej liderëve kryesorë të “La Albicelestes” në këtë kapitull të ri të ekipit kombëtar.

Futbollisti i Atlético Madridit është një nga lojtarët më të rëndësishëm të skuadrës së drejtuar nga Lionel Scaloni. Ai e ka bartur shiritin e kapitenit edhe në tri ndeshje të mëparshme, ndaj Venezuelës, Kilit dhe Mauritanisë.

Romero ka zhvilluar 58 paraqitje me Argjentinën, gjatë të cilave ka shënuar katër gola dhe ka regjistruar dy asistime.

Tash, atij i besohet detyra për të udhëhequr kombëtaren pas epokës së Lionel Messit, nën kapitenllëkun e të cilit Argjentina fitoi dy herë Copa América dhe Kupën e Botës.

Romero do të ketë për detyrë të ruajë unitetin dhe konkurrueshmërinë e një gjenerate që ka shkruar një nga kapitujt më të suksesshëm në historinë e futbollit argjentinas.

Epoka pas Messit nis me një kapiten të ri – Cristian Romero.

D.L