Një tjetër histori suksesi shënohet në Fakultetin e Inxhinierisë së Ndërtimit dhe Infrastrukturës në UBT. Studentja Diellza Vishi ka përmbyllur me sukses studimet e saj të nivelit master, duke realizuar një hulumtim të rëndësishëm shkencor në kuadër të programit të mobilitetit Erasmus+.

Gjatë një semestri të kaluar në Valencia të Spanjës, pjesën eksperimentale dhe hulumtimin shkencor për temën e saj të diplomës, Diellza i ka zhvilluar në laboratorin e njohur ICITECH (Instituto de Ciencia y Tecnología del Hormigón), brenda Universitat Politècnica de València (UPV). ICITECH njihet si një nga institutet kërkimore më me zë në Evropë në fushën e materialeve ndërtimore dhe inxhinierisë strukturore.

Hulumtimi shkencor u zhvillua nën mbikëqyrjen e dy emrave të shquar të fushës: Prof. Dr. Pedro Serna Ros, ekspert me reputacion ndërkombëtar në fushën e betonit të përforcuar me fibra, si dhe Prof. Dr. Visar Krelani, Dekan i Fakultetit të Inxhinierisë së Ndërtimit dhe Infrastrukturës në UBT.

Studentja Diellza Vishi mbrojti me sukses temën me titull “Experimental Analysis of the Effect of Fiber Orientation on the Mechanical Behavior of Prismatic and Slab Elements”.

Pjesë e komisionit në mbrojtjen e diplomës ishte edhe vetë Prof. Dr. Pedro Serna Ros, i cili u kyç drejtpërdrejt nga Spanja përmes platformës Google Meet.

Ky sukses dëshmon edhe një herë cilësinë e përgatitjes akademike në UBT dhe mundësitë e mëdha që institucioni u ofron studentëve për të depërtuar në qendrat më të njohura kërkimore evropiane. /E.A/

Një burri nga fshati Zupç i komunës së Zubin Potokut i është caktuar masa e ndalimit policor deri në 48 orë, të martën, pasi dyshohet për deklarim të rremë gjatë një hetimi për krime lufte.

Sipas avokatit të tij, Milosh Deleviq, personi me inicialet D.V. ishte ndaluar rreth orës 13:00 në pikëkalimin kufitar në Bërnjak dhe ishte dërguar për të dhënë dëshmi si dëshmitar në hetimin që Prokuroria Speciale po zhvillon për krime lufte në Zubin Potok. Më pas, prokurori vendosi të nisë procedurë ndaj tij për deklarim të rremë, siç ka deklaruar avokati për mediumin lokal Zubin Potok INFO.

Edhe Policia e Kosovës ka bërë të ditur se të martën rreth orës 14:30 është arrestuar një burrë në Mitrovicën e Veriut, pasi kishte deklaruar rrejshëm gjatë intervistimit nga njësia policore, duke u dërguar në mbajtje me vendim të prokurorit.

Prokuroria Speciale e Kosovës është duke zhvilluar hetime për krime lufte në komunën e Zubin Potokut, ku po kryhen gërmime në disa lokacione për mbetje mortore të personave të zhdukur nga lufta e vitit 1999. Në lidhje me këtë rast, më parë janë arrestuar tre persona ndaj të cilëve është caktuar masa e paraburgimit prej një muaji. /Telegrafi/

Një shtetas i Serbisë është arrestuar në Leposaviq pasi, nën ndikimin e alkoolit, ka sulmuar një burrë kosovar.

Sipas raportit 24-orësh të Policisë së Kosovës, ngjarja ka ndodhur në orët e para të mëngjesit të së hënës.

Nga ky sulm nuk raportohet për të lënduar.

Me vendim të prokurorit, i dyshuari është liruar dhe rasti shkon në procedurë të rregullt.

Tregu i punës po ndryshon me ritme të shpejta, ndërsa nevoja për profesionistë të kualifikuar në sektorët e ushqimit, bujqësisë, teknologjisë dhe mbrojtjes së mjedisit po rritet vazhdimisht. Këto fusha nuk janë vetëm profesione të së ardhmes, por edhe shtylla kryesore për zhvillimin ekonomik dhe qëndrueshmërinë e Kosovës.

Fakulteti i Shkencave të Ushqimit dhe Bioteknologjisë në UBT u ofron studentëve përgatitje profesionale në teknologjinë ushqimore, sigurinë dhe cilësinë e ushqimit, bioteknologjinë dhe inovacionin në industrinë ushqimore.

Në një kohë kur siguria ushqimore dhe standardet e prodhimit janë bërë prioritete globale, të diplomuarit e këtij fakulteti gjejnë mundësi punësimi në industrinë ushqimore, laboratorë, institucione publike, kompani private, organizata vendore dhe ndërkombëtare, si dhe në projekte kërkimore e zhvillimore.

Ndërkohë, Fakulteti i Inxhinierisë së Agrikulturës dhe Mjedisit përgatit inxhinierë të aftë për të projektuar dhe zbatuar zgjidhje moderne në bujqësi, për të menaxhuar në mënyrë të qëndrueshme burimet natyrore dhe për të kontribuar në mbrojtjen e mjedisit. Me zhvillimin e teknologjive të reja, mekanizimit bujqësor dhe praktikave të qëndrueshme, kërkesa për ekspertë në këtë fushë është në rritje, si në Kosovë ashtu edhe në tregun ndërkombëtar.

Zgjedhja e këtyre drejtimeve është një investim në një karrierë me perspektivë. Studentët fitojnë njohuri teorike të mbështetura nga përvoja praktike, zhvillojnë aftësi profesionale të kërkuara nga punëdhënësit dhe krijojnë mundësi për punësim, sipërmarrje, studime të avancuara dhe pjesëmarrje në projekte shkencore e zhvillimore.

Kosova ka nevojë për profesionistë që do të kontribuojnë në prodhimin e ushqimit cilësor, zhvillimin e industrisë agro-ushqimore, modernizimin e bujqësisë dhe mbrojtjen e mjedisit. Pikërisht për këtë arsye, këto dy fakultete ofrojnë një mundësi të shkëlqyer për të rinjtë që synojnë të ndërtojnë një karrierë të suksesshme dhe të japin kontribut të drejtpërdrejtë në zhvillimin e vendit.

Nëse kërkoni një profesion me vlerë, me perspektivë punësimi dhe me ndikim real në shoqëri, Fakulteti i Shkencave të Ushqimit dhe Bioteknologjisë dhe Fakulteti i Inxhinierisë së Agrikulturës dhe Mjedisit janë zgjedhje që hapin dyert drejt së ardhmes.