Lajmet

Shënohet 24-vjetori i Epopesë së Dukagjinit

Ramosaj me këtë rast ka përkujtuar veprën sublime të luftës së UÇK-së për lirinë që ne gëzojmë sot.

Publikuar

Epopeja e Dukagjinit i dha një dimension të ri luftës sonë, e cila e dridhi makinerinë serbe. Kështu u tha në manifestimin qendror me rastin e 24-vjetorit të shënimit të “Epopesë së Dukagjinit”.

Kryetari i komunës së Deçanit, Bashkim Ramosaj me këtë rast ka përkujtuar veprën sublime të luftës së UÇK-së për lirinë që ne gëzojmë sot.

“24 marsi është data që na bënë krenarë tërë kombin…Për ta kuptuar madhështinë e kësaj date duhet jetuar e përjetuar kontekstin kohore të viteve ’90, pikërisht të marsit 1998 deri në këtë kohë po mburreshin me përpjekjet tona për liri e që veniteshin e përfundonin me arrestime, burgosje e vrasje. Jemi në vitet kur u bë e zakonshme të silleshim si të nënshtruar ndaj persekutimit që bënte kundër nesh pushtuesi serb me aparatin shtetëror gjenocidial në të gjitha dimensionet jetësore dhe lavdia në këtë kohë mori rrugën e vet, Jasharët në Prekaz e Haradinajt në Gllogjan… Më 24 mars 1998, për herë të parë do të nderojmë krenarinë tonë sepse atë ditë kremtuam fitoren ndaj pushtuesit, atë ditë triumfuam si komb. Në këtë ditë përjetësisht morën lavdinë e do të kenë nderin tonë të brezave luftëtarët që ranë dëshmorë Gazmend e Agron Mehmetaj dhe Him Haradinaj”, tha ai.

Ndërsa, kryetarja e Preshevës, Ardita Sinani u shpreh e nderuar që merr pjesë në shënimin e Epopesë së Dukagjinit, duke thënë se sakrifica e atyre që ranë për liri nuk do të harrohet kurrë.

“Ky fshat ku jemi këtu është një nga vendet e shenjta të shqiptarëve Gllogjani i kullave të Dukagjinit i ka qëndruar stoikisht jo vetëm armëve, por idesë për liri, drejtësi dhe barazi. Unë jam një qytetare e Preshevës që qëndron sot para jush dhe jam e nderuar të jem këtu në mesin tuaj si bija e këtij vendi dhe e këtij kombi. Gllogjani nuk është vend i panjohur për bashkëqytetarët e mi që kemi kaluar një luftë të përbashkët për të njëjtin qëllim, por ky vend nuk na ka harruar në kohë krizash dhe prapë i është bashkangjitur dhe dëgjuar klithmat tona për ndihmë dhe thirrjeve tona për liri. Ndihem e nderuar por jo si një e huaj, si një mysafire, pasi unë jam këtu në shtëpinë time, në trungun tim dhe vendin tim… Neve në fakt na ndajnë kufijtë, por votra jonë është vetëm një, një atdhe, një gjuhë dhe një ndjenjë për liri prej brezash të shtypur në çdo të drejtë të tij… Sakrifica e këtyre njerëzve dhe familjeve të tyre është e madhe dhe dhimbje për ta”, tha ajo.

Ish-komandanti i Shtabit të Përgjithshëm të UÇK-së, Agim Çeku tha se Epopeja e Dukagjinit dha dimension të ri luftës sonë.

“Historia jonë e re është e mbushur plot me ngjarje e lavdishme, data të lavdishme. Epopeja e Dukagjinit i dha një dimension të ri luftës sonë, e cila në thelb e dridhi makinerinë serbe, sepse mendonin se me shuarjen e komandantit legjendar Adem Jashari dhe shuarjen e familjes Jashari do të shuhen edhe përpjekjet e armatosura të popullit tonë për liri, por nuk doli ashtu. Dukagjini u bë vatër e rezistencës së paparë deri atëherë, fshatrat e Dukagjinit, Jabllanica, Smolica u bënë vatra të rezistencës, por edhe qendra të furnizimit të trajnimit të ushtarëve të UÇK-së nga e gjithë Kosova”, tha ai.

Protagonisti i betejës së 24 marsit, Daut Haradinaj tha se janë ngjarjet e marsit ato që sollën lirinë e popullit tonë.

“Marsi shënon Epopenë e Jasharëve dhe shembullin se si duhet atdheu, marsi shënon Epopenë e Dukagjinit dhe gatishmëria për sakrificë dhe marsi po ashtu shënon aleancën e përjetshme me NATO-në krye me SHBA-në dhe pikërisht këto tri ngjarje dhe shumë ngjarje që pasuan pastaj qofte në Koshare apo kudo në Kosovë sollën liri”, tha Haradinaj.

Një fjalë rastin para të pranishmëve ka mbajtur edhe baca Rifat Jashari nga familja e komandantit legjendar Adem Jashari.

Jashari: Lavdi dhe respekt gjithë atyre bijë dhe bijave që dhanë gjakun e njomë (Video)

“Sot jemi tubuar këtu falë Zotit, NATO-s dhe Shteteve të Bashkuara të Amerikës t’i kujtojmë bijtë dhe bijat më të mira të kombit tonë shqiptarë…Lavdi dhe respekt gjithë atyre bijë dhe bijave që dhanë gjakun e njomë, ia kthyen pushkën serbit”, tha Jashari.

Ndryshe, sot janë bërë 24 vjet nga beteja e Ushtrisë Çlirimtare e Kosovës në Gllogjan që ndryshe njihet si Epopeja e Dukagjinit.

Lajmet

​Kuvendi miraton projektligjin për rrugët

Të zgjedhurit e popullit i dhanë dritën e gjelbër Projektligjit për rrugët.

Publikuar

nga

Kuvendi i Kosovës në seancën e sotme plenare, ka miratuar një sërë projektligjesh. Të zgjedhurit e popullit i dhanë dritën e gjelbër Projektligjit për rrugët, Projektligjit për faturat e kulturave bujqësore dhe fletëmagazinave, ndërkaq u miratua edhe Programi Kombëtar i Shkencës 2023-2028, raporti vjetor i Fondit të Kursimeve Pensionale të Kosovës për vitin 2022, po ashtu raporti për gjendjen në mjedis për vitin 2022, si dhe rezoluta për vlerësimin e punës së Zyrës së Rregullatorit të Energjisë për vitin 2022.

Krahas kësaj, në mungesë të kuorumit, kuvendi dështoi të miratoi të miratojë Projektligjin për verëra dhe Projektligjin për shpronësimin e pronës së paluajtshme.

Në këtë seancë s’po marrin pjesë deputetët opozitarë. Të njëjtit pasi dështoi të themelohet komisioni hetimor parlamentar për kontratat njëburimore lëshuan sallën.

Vazhdo të lexosh

Lajmet

​Përkujtohen viktimat në 25-vjetorin e masakrës së Podujevës

Kryeministri tha se njësoj të bashkuar jemi edhe ne sot në kujtim dhe në nderim të rënies së tyre për tokën e Kosovës dhe për lirinë e popullit.

Publikuar

nga

Në përvjetorin e 25-të të masakrës së kryer në Podujevë nga njësiti serb “Skorpionët”, kryeministri Albin Kurti bëri sot homazhe te varrezat e të vrarëve të familjeve Bogujevci, Duriqi dhe Llugaliu.

Sikurse ishin të bashkuara familjet Bogujevci, Duriqi dhe Llugaliu, kryeministri tha se njësoj të bashkuar jemi edhe ne sot në kujtim dhe në nderim të rënies së tyre për tokën e Kosovës dhe për lirinë e popullit.

“Ata na e kujtojnë dhe përkujtojnë se sa i lartë ishte çmimi i shtetit dhe lirisë, që e gëzojmë sot, se si rrënjët e shtetit dhe të lirisë janë te gjaku i martirëve dhe dëshmorëve. Njëkohësisht, zëri ynë do të jetë gjithnjë më i fuqishëm si institucional ashtu edhe qytetar për kërkim të drejtësisë”, tha ai.

Në mesin e të mbijetuarve të kësaj masakre, kryeministri përmendi Saranda Bogujevcin, tashmë deputete dhe nënkryetare e Kuvendit të Republikës së Kosovës, e cila bashkë me të mbijetuarit e tjerë i bënë ballë breshërive të plumbave dhe të cilët sot janë ndër dëshmitarët e gjenocidit të Serbisë në Kosovë.

“Në mesin e atyre që u masakruan këtu ishte edhe Saranda Bogujevci e cila iu mbijetoi 16 plumbave, pra para 25 viteve trupi i njomë i Saranda Bogujevcit, atëherë e mitur, përfundoi me 16 plumba dhe ata pesë që shpëtuan nga kjo masakër ishte një mrekulli e vërtetë dhe sot janë dëshmitarë të gjenocidit të Serbisë në Kosovë”, tha ai.

Kurti vazhdoi duke i bërë thirrje edhe një herë Prokurorisë në Kosovë të punojnë në ndjekjen e kriminelëve dhe vënien e drejtësisë, e cila do të finalizohej me vënien prapa grilave të vrasësve mizorë të familjeve Bogujevci, Duriqi e Llugaliu.

Ngjashëm, u shpreh edhe Enver Duriqi, të cilit në këtë masakër iu vranë katër fëmijë të moshave 3, 5, 8 edhe 10-vjeç, bashkë me gruan dhe prindërit.

“Është mbajtur një gjykim sa për sy e faqe dhe kisha me quajt se ata i kanë metodat e veta, injorojnë, nuk gjykojnë, nuk i pranojnë krimet, por si do që të jetë, ne do të qëndrojmë edhe më të fortë”, tha Duriqi.

Vazhdo të lexosh

Lajmet

S’ka kuorum për themelimin e Komisionit Hetimor Parlamentar për kontratat njëburimore

Kjo pasi deputetët e Lëvizjes Vetëvendosje nuk kanë marrë pjesë në votim.

Publikuar

nga

Në mungesë të kuorumit, ka dështuar të formohet Komisioni Hetimor Parlamentar që do t’i hetojë kontratat njëburimore të Qeverisë Kurti. Kjo pasi deputetët e Lëvizjes Vetëvendosje nuk kanë marrë pjesë në votim.

Gjatë diskutimit që ka zgjatur rreth tri orë, deputetët e opozitës e kanë akuzuar pushtetin për numër të madh të kontratave njëburimore të nënshkruara gjatë kësaj qeverisje.

Në sallë ishin të pranishëm 63 deputetë, ndërsa në votim morën pjesë 26 përfshirë edhe Konjufcën që votoi pro themelimit të këtij komisioni. Ata kanë kërkuar që Prokuroria të merret me hetimin e tyre. Por deputetët e pushtetit kanë thënë se themelimi i komisionit është ia panevojshëm dhe ka mohuar akuzat e opozitës se në këtë qeveri janë lidhur më shumë kontrata njëburimore se në qeveritë e kalaruar.

Shefja e GP të Vetëvendosjes, Mimoza Kusari-Lila, ka refuzuar t’i paraqesë në Kuvend pesë emrat e grupit të saj për komisionin hetimor, me arsyetimin se duhet të binden se opozita po kërkon zgjedhje fillimisht e pastaj i dërgojnë emrat.

“Shumë lartë e vlerësojmë ofertën për pesë anëtarë, ne frikësohemi se komisioni po i shtyn zgjedhjet e shumëkërkuara nga opozita dhe nuk po dimë a janë më me prioritet komisionet apo zgjedhjet. Derisa ta marrin vendimin dhe derisa të jemi të bindur se këta vërtetë po kërkojnë zgjedhje ne nuk i kemi këta 5 emra”, ka thënë ajo.

Shefi i GP të PDK-së, Abelard Tahiri, ka propozuar një datë për zgjedhje.

“Marrë parasysh josinqeritetin e këtyre dhe frikën për të shkuar ne e dimë që ajo ka qenë vetëm një lojë fjalësh sepse këta nuk guxojnë ta shpërndajnë kuvendin më 9 qershor. Nuk mundet me kaq lehtësi dhe me këtë sportivitet kaq të madh me anashkalu votimin e një komisioni hetimor”, ka thënë Tahiri.

Kurse Driton Selmanaj nga LDK-ja ka thënë se komisioni hetimor duhet të themelohet, ndërkohë ka treguar pozicionin e partisë për zgjedhje.

“Atë që mund të them në emër të LDK, ne kemi filluar me u dashuruar në postulatin hajnat në burg, por jo hajnat në zgjedhje. Ne po duam hajnat vërtetë të përfundojnë në burg. Mesa po e shohim VV po do me shku me postulatin hajnat në zgjedhje sepse po i duhen paratë për të bërë fushatë edhe një herë. Ne insistojmë në themelimin e komisionin hetimor”, deklaroi Selmanaj.

Shefi i GP të AAK-së, Besnik Tahiri, ka thënë se VV-ja po i ik temës së komisionit hetimor sepse ka frikë.

“Është një ikje nga tema nga komisioni hetimor që në fakt është frika e qeverisë me u ballafaqu me të vërtetën dhe mos emërimi i kandidatëve e vërteton pohimin tonë se tenderët njëburimorë janë vatra korruptive e kësaj qeverie”, deklaroi Tahiri.

Vazhdo të lexosh

Lajmet

​BQK: Dërgesat e mërgatës deri në fund të shkurtit arritën në mbi 174 milionë euro

Sipas një komunikate, 174.30 milionë euro është vlera preliminare e remitancave.

Publikuar

nga

Banka Qendrore e Kosovës ka njoftuar se vlera preliminare e dërgesave nga mërgata për muajin shkurt 2024, është 87.90 milionë euro. Sipas një komunikate, 174.30 milionë euro është vlera preliminare e remitancave.

“64.40%, dërgesat përmes IFJB-ve, 312.70 milionë euro, asetet e kompanive të sigurimeve, 2.80 miliardë euro, asetet e fondeve pensionale, 555.20 milionë euro, asetet e ndërmjetësve të tjerë financiar, 60.60%, kreditë e ekonomive familjare, sektori mikrofinanciar, 41.40 milionë euro, kreditë e reja nga ndërmjetësit e tjerë financiarë. Rreth 88 milionë euro është vlera preliminare e dërgesave të mërgatës që janë sjell në Republikën e Kosovës për muajin shkurt 2024”, thuhet në njoftimin e BQK-së.

Sipas raportit, prurjet më të mëdha të remitancave ishin nga institucionet financiare jo-bankare me pjesëmarrje prej 64.4 për qind, pasuar nga kanalet tjera me 19.7 për qind dhe bankat me 15.9 për qind.

Për sa i përket aseteve të kompanive të sigurimit, BQK-ja tregon se deri në këtë muaj vlera e tyre ishte 312.7 milionë euro, duke shënuar rritje prej rreth 600 mijë euro krahasuar me janarin e 2024-së.

Ndërsa asetet e fondeve pensionale kanë arritur vlerën e 2.8 miliardë euro, e cila përfaqëson rritje për 46.5 milionë euro.

Në fund, BQK-ja tregon se asetet e ndërmjetësve tjerë financiar në fund të muajit shkurt 2024 janë rritur për 15.1 milionë euro, duke arritur vlerën e 555.2 milionë eurove.

Vazhdo të lexosh

Të kërkuara