Kryeministri i Republikës së Kosovës, Albin Kurti, mori pjesë mbrëmë në pritjen lamtumirëse për Ambasadorin e Bullgarisë në Kosovë, Hristo Gudjev.

Në fjalën e tij para të pranishmëve, shprehu mirënjohjen e tij ndaj diplomatit Gudjev që përfaqëson Republikën e Bullgarisë, një vend që është jo vetëm mik i sinqertë, por edhe partner strategjik i Republikës së Kosovës.

“Gjatë viteve që kemi punuar së bashku, me përkushtimin tuaj, kemi arritur të avancojmë dhe thellojmë marrëdhëniet dypalëshe mes dy shteteve tona”, tha kryeministri.

Gjatë mandatit të ambasadorit Gudjev, në Kosovë janë realizuar pesë vizita të zyrtarëve bullgarë, përfshirë Presidentin e Bullgarisë, Rumen Radev dhe janë organizuar 21 vizita të zyrtarëve të Kosovës në Bullgari, përfshirë këtu takimin e kryeministrit Kurti me Kryeministrin e Bullgarisë, Dimitar Glavchev dhe Presidentin e Bullgarisë,  Rumen Radev.

Teksa përmendi marrëveshjet e arritura në mes të dyja vendeve, kryeministri tha se Bullgaria ka qenë avokuese për ne sa herë që e kemi kërkuar, prandaj sinqerisht falënderojmë autoritetet përkatëse për përkushtimin e tyre të vazhdueshëm dhe të dëshmuar për Kosovën. Në veçanti falënderoi ushtarët dhe oficerët bullgarë që kanë shërbyer dhe shërbejnë në Kosovë në kuadër të KFOR-it.

“Ambasadori Gudjev po përfundon misionin e tij diplomatik, por miqtë që ai ka bërë këtu do të zgjasin përjetë. Do të na mungojë dhe jam i sigurt se do t’i mungojë edhe Kosova. Prandaj, shpresoj të jetë mysafir i rregullt në vendin tonë, të cilin mund ta konsiderojë si shtëpinë e tij të dytë. Me këtë rast, më duhet të falënderoj jo vetëm Shkëlqesinë e Tij për gjithçka që ka bërë, por nëpërmjet tij, vendin që ai përfaqësoi në mënyrë të admirueshme në Kosovë”, tha në fjalën e tij kryeministri Kurti.

Britania po përballet me një mot të keq të karakterizuar nga reshje të dendura dëbore, duke shkaktuar mbylljen e mbi 200 shkollave dhe një mori problematikash të tjera. Ekspertët meteorologjikë paralajmërojnë se ky mot do të vazhdojë edhe në ditët në vijim, duke përkeqësuar situatën për qytetarët dhe infrastruktura në të gjithë vendin.

Sipas informacionit nga mediat ndërkombëtare, Shërbimi Meteorologjik i Qeverisë britanike ka lëshuar katër paralajmërime të verdha për reshje dëbore, ngrica dhe rrezik për aksidente rrugore. Ndër të tjera, janë raportuar devijime të rrugëve dhe ndërprerje të mundshme të energjisë elektrike në disa zona.

Një nga paralajmërimet mbulon Uellsin jugor dhe është në fuqi deri në mesnatën e së martës, ndërsa një tjetër është lëshuar për Skocinë jugore, që do të jetë në fuqi deri në orën 10 të mëngjesit të së mërkurës. Paralajmërimi i tretë përfshin Skocinë dhe lindjen e Anglisë dhe do të jetë në fuqi deri në mesditë të së mërkurës, ndërkohë që një paralajmërim shtesë është dhënë edhe për zonën e Irlandës së Veriut, i cili do të jetë në fuqi deri në orën 10 të mëngjesit të së mërkurës.

Në disa zona të prekura, siç pritet në Aberdeenshire, lartësia e borës mund të arrijë deri në 10 centimetra, duke e bërë motin më të vështirë për të udhëtuar dhe duke rritur mundësinë për aksidente. Temperaturat gjatë natës së së hënës ishin të ulëta në të gjithë Britaninë, me termometrin që tregoi vlera nën zero. Më i ftohti u regjistrua në Aberdeenshire, ku temperatura arriti -11.2 gradë Celsius.

Përveç shkollave të mbyllura, reshjet e borës kanë shkaktuar vështirësi edhe në transport, me rrugë të bllokuara dhe vonesa në linjat e trenave. Autoritetet kërkojnë që qytetarët të jenë të kujdesshëm dhe të shmangin udhëtimet në kushtet e këtij moti ekstrem, duke pasur parasysh edhe mundësinë e ndërprerjeve të energjisë elektrike.

Ky fenomen i motit të keq është pjesë e një serie të ngjarjeve atmosferike që kanë prekur Britaninë këtë muaj, duke i shtuar shqetësimet për dimrin që pritet të jetë më i ftohtë dhe më i rrezikshëm se zakonisht./UBTNews/

Ambasada e Shteteve të Bashkuara në Kiev ka pranuar informata për mundësinë e një sulmi të madh ajror të mërkurën, dhe si pasojë do të mbyllet përkohësisht, njoftoi Departamenti amerikan i Shtetit për Çështjet Konsullore.

“Ambasada do të mbyllet dhe punonjësit e Ambasadës janë udhëzuar të strehohen në vend, si masë parandaluese”, tha Departamenti në një komunikatë të publikuar në uebsajtin e Ambasadës amerikane në Kiev.

“Ambasada amerikane i këshillon shtetasit amerikanë të jetë të gatshëm për strehim të menjëhershëm në rast se njoftohet për ndonjë sulm ajror”, tha ajo.

Kjo nuk është hera e parë që Ambasada amerikane në Kiev mbyll dyert nga rreziku i sulmeve ajrore.

Ky njoftim vjen një ditë pasi Ukraina i përdori raketat amerikane me rreze të gjatë, ATACMS, për të kryer sulme në tokën ruse, duke e shfrytëzuar lejen që administrata në largim e presidentit amerikan, Joe Biden, ia tha në ditën e 1.000-të të luftës.

Rusia ka muaj që e paralajmëron Perëndimin se, nëse Uashingtoni e lejon Ukrainën të hedhë raketa amerikane, britanike dhe franceze thellë brenda Rusisë, atëherë Moska do t’i konsiderojë këto vende anëtare të NATO-s si të përfshira drejtpërdrejt në luftën në Ukrainë.

Presidenti i Rusisë, Vladimir Putin, tha në tetor se Moska do të përgjigjet, nëse Ukraina sulmon me armë amerikane thellë brenda Rusisë.

Të martën, Putini e ndryshoi doktrinën bërthamore të Rusisë, duke e rritur rrezikun për sulme bërthamore në një kohë kur tensionet mes Rusisë dhe Perëndimit kanë arritur pikën më të lartë në 50 vjetët e fundit./REL/