Lajmet

SHBA: Irani po bëhet prodhues global i dronëve pas luftës në Ukrainë

Një zyrtar e përshkroi Teheranin si një lider global në prodhimin e dronëve të lirë dhe shumë efektivë.

Published

on

Irani po shfaqet si një lider global në prodhimin e dronëve të lirë dhe vdekjeprurës, sipas zyrtarëve amerikanë, të cilët thonë se Teherani po përdor luftën në Ukrainë për të treguar teknologjinë e tij.

Analistët në Agjencinë e Inteligjencës së Mbrojtjes thonë se Irani është kthyer nga një lojtar rajonal i dronëve në Lindjen e Mesme në një mbështetës të rëndësishëm ushtarak të Moskës në luftë.

Një zyrtar e përshkroi Teheranin si një lider global në prodhimin e dronëve të lirë dhe shumë efektivë.

Irani e ka furnizuar Rusinë me tri modele dronësh: drone kamikaze Shahed 131 dhe 136 njëpërdorimshe, të përdorur nga Moska si një alternativë më e lirë për raketat e lundrimit, dhe dronin me shumë role Mohajer-6.

Al-Monitor, një faqe lajmesh, raportoi së fundmi për disa deklarata të bëra nga një zyrtar i inteligjencës ushtarake iraniane që fliste rreth interesimit për blerjen e dronëve, teksa u shpreh se dhjetëra vende kanë shprehur interes për dronët iranianë.

“Fuqia jonë është rritur në nivele ku Kina po pret në radhë për të blerë 15 mijë nga dronët tanë”, tha zyrtari.

Gjatë fundjavës së kaluar, Guardian zbuloi se si Irani ka përdorur varkat dhe një linjë ajrore shtetërore për të kontrabanduar lloje të reja dronësh të avancuar të armatosur me rreze të gjatë veprimi në Rusi për t’i përdorur në luftën e tij kundër Ukrainës.

Të paktën 18 dronë iu dorëzuan marinës së Vladimir Putinit pasi oficerët dhe teknikët rusë bënë një vizitë speciale në Teheran gjatë muajit nëntor, ku iu shfaq një gamë e plotë e teknologjive të Iranit, zbuluan burime në Iran. Me atë rast, delegacioni rus prej dhjetë personash përzgjodhi gjashtë dronë Mohajer-6.

Të hënën, Mbretëria e Bashkuar paraqiti dëshmi në OKB se Irani ka furnizuar me armë të avancuara rebelët Houthi në Jemen, duke shkelur rezolutat e OKB-së./UBTNews/

Vendi

Erërat e fuqishme shkaktojnë dëme në disa komuna të Kosovës, rrëzohen kulme dhe sera

Published

on

Erërat e fuqishme që kanë përfshirë Kosovën gjatë natës së kaluar kanë shkaktuar dëme materiale në disa komuna të vendit.

Si pasojë e motit të lig, janë rrëzuar kulme të objekteve të banimit dhe bizneseve, janë dëmtuar sera bujqësore, ndërsa në disa zona janë raportuar edhe ndërprerje të energjisë elektrike.

Në fshatin Koshare të Ferizajt, erërat kanë dëmtuar dhe rrëzuar kulmin e një lokali. Ndërkaq, në qytetin e Ferizajt është rrëzuar kulmi i një banese, duke bllokuar përkohësisht rrugën “Dëshmorët e Kombit”.

Dëme janë raportuar edhe në Obiliq, ku erërat kanë shkaktuar dëme materiale dhe kanë shpërndarë mbeturinat në qendër të qytetit. Një pjesë e qytetit ka mbetur gjithashtu pa energji elektrike.

Në fshatin Dardhishtë janë rrëzuar shtylla elektrike të tensionit të lartë, duke lënë zonën pa furnizim me energji. Banorët dhe anëtarët e një shoqate janë angazhuar për vendosjen e sinjalistikës paralajmëruese dhe masave mbrojtëse deri në intervenimin e institucioneve.

Dëme të konsiderueshme janë shkaktuar edhe në bujqësi. Në Krushë të Madhe të Rahovecit janë publikuar pamje të dëmeve në sera, ndërsa në fshatin Ruboc të Kamenicës janë rrëzuar dy sera me sipërfaqe të përgjithshme prej rreth 300 metrash katrorë.

Ndërkohë, në lagjen “Jeni Mahall” të Prizrenit është raportuar për djegien e telave elektrikë në një shtyllë të rrjetit të energjisë.

Institucionet kishin paralajmëruar më 18 nëntor për erërat e fuqishme që pritej të përfshinin vendin më 19 nëntor. Sipas paralajmërimeve, erërat pritet të vazhdojnë edhe gjatë pasdites së 20 nëntorit.

Qytetarëve u është bërë thirrje të shmangin qëndrimin pranë kulmeve të pasigurta, pemëve dhe shtyllave elektrike, si dhe të kenë kujdes të shtuar gjatë qarkullimit./A.K/

Continue Reading

Lajmet

Fati i Lojërave Mesdhetare “Prishtina 2030” në pikëpyetje

Published

on

By

Komiteti Ndërkombëtar i Lojërave Mesdhetare (ICMG) nuk ka dhënë një përgjigje të qartë nëse Kosova ende mund ta ruajë të drejtën për organizimin e Lojërave Mesdhetare “Prishtina 2030”, në një kohë kur shqetësimet për vonesat në përgatitje dhe përmbushjen e obligimeve po shtohen. Në një përgjigje të shkurtër dërguar të enjten në mbrëmje për KosovaPress-in, Sekretariati i ICMG-së ka shmangur sqarimet se a është ende e mundur realizimi i zotimeve apo nëse procesi ka kaluar pikën e kthimit, duke e orientuar median që për informata të mëtejshme t’i drejtohet Komitetit Organizativ të Lojërave Mesdhetare Prishtina 2030 (OCMG).

Kjo paqartësi ndërkombëtare vjen paralelisht me një përplasje të hapur institucionale brenda vendit, ku faji për rrezikimin e kësaj ngjarjeje sportive po hidhet nga njëri institucion te tjetri. Një ditë më parë në Kuvendin e Kosovës, kryeministri Albin Kurti deklaroi se mungesa e unitetit të brendshëm po e rrezikon organizimin e Lojërave, duke e vlerësuar si të mirë bashkëpunimin me Komitetin Olimpik të Kosovës, por duke kritikuar raportet me Komunën e Prishtinës, teksa shtoi se mbetet optimist i përmbajtur se procesi do të çohet përpara pa korrupsion.

Ndaj këtyre deklaratave reagoi ashpër kryetari i Prishtinës, Përparim Rama, i cili ia atribuoi Qeverisë përgjegjësinë e plotë për dështimin dhe anulimin e takimit të paraparë me përfaqësuesit e ICMG-së në Athinë. Përmes një reagimi publik, Rama theksoi se komunikimi i fundit i ICMG-së konfirmon se takimi është anuluar për tri arsye që binin mbi ekzekutivin: moskryerja e pagesës, mosdërgimi i emrave të delegacionit dhe mungesa e përgjigjeve në postat elektronike.

Këto akuza të ndërsjella pasojnë paralajmërimet serioze që ICMG-ja i kishte dërguar palës kosovare në letrën e 15 tetorit, ku evidentoheshin rreziqet nga mungesa e garancisë bankare ose të sigurimit, pagesat e papërfunduara dhe moskthimi i përgjigjeve. Të gjitha këto zhvillime pritet të marrin një drejtim më të qartë më 19 dhjetor, kur Komiteti Ekzekutiv i ICMG-së do të shqyrtojë gjendjen aktuale dhe propozimin për thirrjen e një Asambleje të Jashtëzakonshme që do të vendosë për fatin e “Prishtina 2030”, ngjarje kjo e fituar nga Kosova në shtator të vitit 2023 dhe e paraparë të mbahet nga 24 korriku deri më 4 gusht 2030 në disa komuna të Kosovës dhe në Durrës. /Kosova Press/

 

Continue Reading

lajme

UEFA dënon FFK-në me 42 mijë e 250 euro gjobë dhe mbyllje të pjesshme me kusht të stadiumit

Published

on

By

Konfederata Evropiane e Futbollit (UEFA) ka shqiptuar një dënim të rëndë ndaj Federatës së Futbollit të Kosovës (FFK) për shkeljet e evidentuara në ndeshjen e Ligës së Kombeve ndaj Izraelit, e cila u zhvillua javën e kaluar dhe përfundoi me barazim 0:0. Pas hapjes së disa procedurave disiplinore, Trupi i Kontrollit, Etikës dhe Disiplinës i UEFA-s vendosi ta gjobisë FFK-në me gjithsej 42 mijë e 250 euro, si dhe t’i shqiptojë dënim me kusht për mbylljen e pjesshme të stadiumit “Fadil Vokrri” në ndeshjen e ardhshme si vendase.

Sipas vendimeve të publikuara të enjten, pjesa më e madhe e gjobës, prej 20 mijë eurosh, është shqiptuar për transmetimin e një mesazhi të papërshtatshëm për ngjarje sportive, pa saktësuar se për cilin mesazh bëhet fjalë. Për sjellje raciste ose diskriminuese, FFK-ja është ndëshkuar me 10 mijë euro gjobë dhe me urdhrin për mbylljen e një sektori të stadiumit për një ndeshje, dënim ky që mbetet me kusht. Po ashtu, 10 mijë euro të tjera janë ndarë për fishkëllimat dhe pengesat gjatë intonimit të himnit të Izraelit, ndërsa 2 mijë e 250 euro për hedhjen e gjësendeve në fushën e lojës.

Ky është ndëshkimi i dytë që UEFA i shqipton Kosovës në edicionin e pestë të Ligës së Kombeve, pas ndeshjes që bëri bujë edhe për faktin se disa lojtarë të Kosovës mbajtën kokën ulur në shenjë proteste gjatë himnit kundërshtar. Në po të njëjtën paketë vendimesh disiplinore, UEFA ka dënuar edhe federatat e Bosnjë-Hercegovinës, Rumanisë dhe Anglisë. /E.A/

Continue Reading

Lajmet

Komisioni Hetimor për rastin e Arlinda Zekajt interviston sot tre zyrtarë institucionalë

Published

on

By

Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës ndaj fëmijëve dhe grave në familje, do të vazhdojë sot me intervistimin e zyrtarëve përgjegjës.

Në mbledhjen që nis në orën 09:00 në ambientet e Kuvendit të Kosovës, para anëtarëve të këtij komisioni pritet të japin dëshmitë e tyre drejtoresha e Drejtorisë për Mirëqenie Sociale në Komunën e Pejës, Albulena Mujaj-Bajraktaraj, zyrtarja për Barazi Gjinore në po këtë komunë, Samka Drançolli, si dhe drejtori i departamentit në Ministrinë për Punë, Familje dhe Vlerat e Luftës Çlirimtare, Blerim Shabani.

Këto intervistime vijnë në kuadër të hetimeve parlamentare për të zbardhur përgjegjësitë e institucioneve para ngjarjes tragjike në Vitomiricë të Pejës, ku viktima u vra nga ish-kunati i saj, vetëm dy ditë pasi para këtij komisioni dëshmoi edhe kryetari i Komunës së Pejës, Gazmend Muhaxheri.

Ndërkaq, krahas punimeve të këtij komisioni, në Kuvendin e Kosovës sot me fillim nga ora 10:00 do të mblidhet edhe Komisioni për Çështje të Sigurisë dhe Mbrojtjes, i cili do të zhvillojë një takim të përbashkët me Komitetin për Mbrojtje dhe Siguri të Odës Ekonomike Amerikane. /E.A/

Continue Reading

Të kërkuara