Aktualitet

SHBA, dëshmon në Kongres kundër Facebook ish-punonjësja Frances Haugen

Zonja Haugen i ka mbështetur akuzat e saj tek dhjetëra mijëra faqe dokumentesh të brendshme kërkimore.

Published

on

Një ish-analiste e të dhënave e Facebook-ut po dëshmon sot përpara Kongresit rreth dokumenteve të rrjedhura se kompania ishte në dijeni të dëmeve të mundshme që u shkaktonte Istragrami disa adoleshentëve. Komentet e ish-menaxheres Frances Haugen rreth kësaj çështjeje si dhe akuzat e saj për pandershmëri nga ana e kompanisë së medias sociale në përpjekjet kundër gjuhës së urrejtjes dhe disinformatave, kanë krijuar një debat të gjerë publik. Ajo po paraqet dëshminë e saj para nënkomisionit të Senatit për Tregtinë për Mbrojtjen e Konsumatorit.

Zonja Haugen i ka mbështetur akuzat e saj tek dhjetëra mijëra faqe dokumentesh të brendshme kërkimore, që ajo i ka kopjuar fshehurazi, para se të largohej nga puna në Njësinë për Integritetit Qytetar brenda Facebook-ut. Ajo ka paraqitur gjithashtu një ankesë pranë autoriteteve federale duke pretenduar se kërkimet e vetë Facebook-ut tregojnë se ai e përforcon gjuhën e urrejtjes, disinformatat dhe trazirat politike, një gjë për të cilën kompania e mohon të ketë informacion.

Pasi njoftimet e fundit në “The Wall Street Journal”, bazuar në dokumente që zonja Haugen ia kishte dhënë vetë gazetës, u bënë shkak për nxitjen e një indinjate publike, zonja Haugen zbuloi identitetin e saj në një intervistë për rrjetin televiziv CBS të transmetuar mbrëmjen e së dielës. Ajo këmbënguli se “Facebook-u në mënyrë të vazhduar, ka treguar se zgjedh përfitimet mbi sigurinë”.

Ish-punonjësja që po sfidon gjigantin e medias sociale, me 2.8 miliardë përdorues në të gjithë botën dhe gati 1 trilion dollarë vlerë tregu është një eksperte 37-vjeçare, analiste e të dhënave nga Ajoua, me diplomë në inxhinieri kompjuterike dhe një master në biznes nga universiteti Harvard. Ajo ka punuar për 15 vjet për kompani si Google dhe Pinterest, përpara se të rekrutohej nga Facebook në 2019.

Nënkomisioni po shqyrton përdorimin e informacionit që analistët e vetë kompanisë i kanë dhënë Facebook-ut lidhur me atë se Instagrami mund të krijojë dëm tek disa nga përdoruesit e tij të vegjël në moshë, veçanërisht tek vajzat. Të dhëna që kompania i ka minimizuar publikisht. Të dhënat e rrjedhura nga zonja Haugen tregonin se tek ata adoleshentë, më të përkushtuar ndaj platformës popullore të shpërndarjes së fotografive, presioni i bashkëmoshatarëve, i krijuar nga Instagrami çon në probleme të shëndetit mendor dhe imazhit të trupit, dhe në disa raste, në çrregullime të ngrënies dhe mendime per vetëvrasje.

Një studim i brendshëm citonte se 13.5% e vajzave adoleshente pranonin se Instagrami i përkeqësonte mendimet e tyre për vetëvrasje dhe 17% e vajzave adoleshente pranonin se ai përkeqëson çrregullimet e të ngrënit. “Ajo që është tejet tragjike dhe që vjen nga kërkimet e vetë Facebook-ut, është se këto vajza të reja që fillojnë “të konsumojnë” këto lloj përmbajtjesh që nxisin çrregullimeve të të ngrënit, bëhen gjithnjë e më shumë depresive”, tha zonja Haugen gjatë intervistës televizive. “Dhe në fakt i bën ato ta përdorin edhe më shumë aplikacionin. Dhe kështu, ato përfundojnë në këtë cikël ku urrejnë trupin e tyre gjithnjë e më shumë”.

Me shpërthimin e debateve mbi këtë çështje Facebook-u pezulloi punën e tij mbi një variant për fëmijë të Instagramit, për të cilin kompania thotë se është menduar kryesisht për adoleshentë të moshës 10 deri në 12 vjeç./VOA

Continue Reading

Bota

Shpërthejnë përleshjet në Sudanin e Jugut, 30 të vdekur

Published

on

Në Sudanin e Jugut, përleshjet e dhunshme kanë shpërthyer në komunitetin e Abiemnom, në veri të vendit, duke lënë të paktën 30 të vdekur. Trazirat nisën pas një vjedhjeje të bagëtive nga një grup të rinjsh të armatosur në distriktin Rueng. Pas kësaj, forcat e sigurisë intervenuan, por një ditë më vonë, të rinjtë u kthyen me përforcime dhe sulmuan komunitetin Abiemnom.

Qytetarët dhe forcat e sigurisë tentuan të mbronin qytetin, por u përballën me një numër më të madh forcash armiqësore. Disa nga viktimat ishin pjesë e grupit të rinjve të armatosur.

Konfliktet midis barinjve dhe fermerëve janë të zakonshme në Sudanin e Jugut, por përleshjet e fundit vijnë pas tensioneve politike të rritura në vend. Arrestimi i Zëvendës Presidentit, Riek Macar, nga forcat besnike të Presidentit Salva Kiir, ka rritur shqetësimet për mundësinë e një ripërtëritjeje të luftës civile, që ka shkatërruar vendin gati shtatë vjet më parë.

Continue Reading

Bota

Kryeministri i përkohshëm i Serbisë: Jemi shumë pranë formimit të qeverisë së re, nuk përjashtohet as mundësia e zgjedhjeve

Published

on

Millosh Vuçeviç, kryeministri i përkohshëm i Serbisë dhe lideri i Partisë Progresive Serbe (SNS), ka deklaruar se formimi i qeverisë së re është shumë afër, por ka ende mundësi që të thirren zgjedhje të reja. Në një intervistë për Prva TV, Vuçeviç tha se një kryeministër i ri do të mund të formonte një kabinet deri më 18 prill, por theksoi se ka një mundësi të vogël që, nëse nuk arrijnë një marrëveshje për formimin e kabinetit, mund të shpallen zgjedhje të reja.

Ai përmendi se procesi i formimit të kabinetit do të jetë i vështirë dhe kërkon hartimin e një prezantimi brenda shtatë deri në dhjetë ditë. Pas konsultimeve me presidentin serb, Aleksandar Vuçiç, Vuçeviç theksoi se koalicioni që mbështet SNS është i bindur se nuk është e nevojshme të mbahen zgjedhje të reja dhe se do të propozojnë dy kandidatë për postin e kryeministrit të emëruar.

Continue Reading

Bota

Trump shkarkon kreun e Agjencisë së Sigurisë Kombëtare, Gjeneralin Timothy Haugh

Published

on

Administrata e Presidentit Donald Trump ka shkarkuar Gjeneralin Timothy Haugh, kreun e Agjencisë së Sigurisë Kombëtare (NSA) dhe të Komandës Kibernetike të SHBA-së, një vendim që ka shkaktuar diskutime dhe shqetësim mes zyrtarëve dhe politikës amerikane.

Arsyet e shkarkimit nuk janë bërë të qarta, por ky hap ka pasuar një takim të mërkurën mes Trumpit dhe aktivistes së ekstremit të djathtë, Laura Loomer. Raportohet se Loomer ka nxitur presidentin të largojë disa zyrtarë që ajo dyshonte se nuk mbështesnin agjendën e tij. Në një postim në platformën X, Loomer e ka quajtur Gjeneralin Haugh dhe zëvendësuesen e tij, Wendy Noble, “të pabesë” ndaj presidentit, duke e konsideruar këtë si shkakun kryesor të largimit të tyre.

Në një deklaratë për mediat, Trump ka thënë se do të largohet çdo punonjës që nuk është besnik ndaj tij, duke shtuar: “Ne gjithmonë do të largojmë njerëz – ata që nuk i pëlqejmë ose që përfitojnë, ose që mund të kenë besnikëri ndaj dikujt tjetër.” Ky koment është bërë ndërkohë që qarkullonin lajme për shkarkimin e të paktën tre zyrtarëve të tjerë nga Këshilli i Sigurisë Kombëtare të Shtëpisë së Bardhë, pas takimit me Loomer.

Agjencia e Sigurisë Kombëtare dhe Shtëpia e Bardhë kanë refuzuar të komentojnë në lidhje me shkarkimet, duke e referuar çështjen tek Zyra për Marrëdhënie me Publikun e Sekretarit të Mbrojtjes, e cila gjithashtu ka refuzuar të japë më shumë detaje.

Demokratët kryesorë në komitetet e inteligjencës të Dhomës së Përfaqësuesve dhe Senatit kanë shprehur shqetësim për këtë vendim. Përfaqësuesi Jim Himes dhe Senatori Mark Warner e kanë kritikuar shkarkimin, duke thënë se Haugh ka qenë një udhëheqës i ndershëm dhe të drejtë, dhe se mund të ishte pikërisht kjo integriteti që ka çuar në largimin e tij nga administrata Trump.

Në një deklaratë për CBS, Himes tha se ishte “thellësisht i shqetësuar” për shkarkimin, duke shtuar se Gjenerali Haugh ka vendosur sigurinë kombëtare në prioritet dhe ka ndjekur ligjin.

Continue Reading

Bota

Detaje mbi grumbullimin e forcave amerikane në Lindjen e Mesme

Published

on

Pentagoni ka njoftuar një forcim të pranisë ushtarake të Shteteve të Bashkuara në Lindjen e Mesme, duke dërguar aeroplanmbajtësen “Harry S. Truman” dhe vendosur avionë luftarak shtesë, përfshirë F-15, F-16 dhe F-35, në rajon. Këto përforcime kanë për qëllim të forcojnë aftësitë detare të SHBA-së dhe të mbrojnë stabilitetin rajonal, veçanërisht pas rritjes së tensioneve me Iranin dhe zhvillimeve të fundit në Jemen.

Një zyrtar amerikan tha për Al Jazeera se kjo ngritje e forcave përfshin gjithashtu dërgimin e bombarduesve B-2 në bazën Diego Garcia në arkipelagun Chagos. Ky hap synon të mbështesë qëllimet e SHBA-së për të penguar agresionet dhe për të mbrojtur rrjedhën e lirë të tregtisë në rajon. Forcat amerikane në Lindjen e Mesme do të arrijnë rreth 40 mijë ushtarë me këto përforcime. Aeroplanmbajtëset “Harry S. Truman” dhe “Carl Vinson” do të lundrojnë në rajon, edhe pse lokacionet e sakta të vendosjes së tyre mbeten të panjohura.

Përveç kërcënimeve të mundshme nga Irani, i cili ka paralajmëruar se do të reagojë me forcë në rast sulmi, ky grumbullim forcon angazhimin amerikan në rajon për të kundërshtuar çdo kërcënim ndaj sigurisë dhe stabilitetit të tij. Teherani ka theksuar se çdo agresion kundër tij do të çonte në një reagim të fuqishëm, ndërsa ministri i Jashtëm iranian kritikoi reagimin e Bashkimit Evropian ndaj politikave amerikane, duke e quajtur atë një kërcënim për paqen dhe sigurinë ndërkombëtare.

Continue Reading

Të kërkuara