Nuk kanë kaluar shumë javë nga ndarja me Shaun White dhe emri i aktores Nina Dobrev është lidhur menjëherë me një tjetër yll të Hollywood-it: Zac Efron.

Gjithçka nisi pas fotove dhe videove nga pushimet e tyre në Itali, ku u panë së bashku në një jaht me miq të përbashkët.

Shfaqjet e afërta dhe momentet e qeshura mjaftuan që rrjetet sociale të shpërthenin me pyetjen: “A ka diçka mes tyre?”

Por, aktorja e “Vampire Diaries” i dha fund aludimeve. Në një prononcim për TMZ, e pyetur nëse mes saj dhe Efron ka romancë, Nina u përgjigj prerazi: “Jo, jemi vetëm miq.”

36-vjeçarja nuk u ndal gjatë te thashethemet, por foli më shumë për veten dhe planet e së ardhmes: “Jam e emocionuar për atë që më pret. E vetmja gjë e sigurt është ndryshimi,” – u shpreh ajo.

Efron dhe Dobrev u panë muajin e kaluar në brigjet e Sardenjës, me Miles dhe Keleigh Teller, dhe Chace Crawford nga “Gossip Girl”.

Pamjet e afërta ndezën zërat për një lidhje, sidomos duke pasur parasysh periudhën e ndjeshme që po kalonte Nina pas ndarjes nga Shaun White. Aktorja dhe ish-kampioni olimpik i snowboard-it i dhanë fund fejesës në shtator, pas pesë vitesh lidhjeje dhe gati një viti të fejuar.

Burime pranë çiftit e kanë përshkruar ndarjen si një vendim të përbashkët, megjithatë arsyeja kryesore lidhej me prioritetet e ndryshme: Shaun donte të krijonte familje, ndërsa Nina ishte e fokusuar te karriera. /A.Z/UBT News/

Robbie Williams ka zbuluar se është diagnostikuar me sindromën Tourette, përveç ADHD-së dhe PTSD-së, të cilat i vuajnë prej vitesh.

Këngëtari ka pranuar se shëndeti mendor, dhe varësitë nga droga dhe alkooli, kanë pasur një ndikim të thellë në jetën dhe karrierën e tij.

Edhe pse testi për autizëm rezultoi negativ, Williams thotë se ka tipare të ngjashme, përfshirë ankthin që ndjen jashtë zonës së tij të sigurisë – siç është shtrati.

Në një intervistë, ai rrëfeu se turnetë ende e frikësojnë, pavarësisht dekadave të performancave para stadiumeve të mbushura. Diagnoza e Tourette-it, ashtu siç ka ndodhur edhe tek Lewis Capaldi, ka ndikuar ndjeshëm në performancat e tij.

Williams kujtoi se është diagnostikuar tri herë me ADHD, por shpesh e “harronte” diagnozën dhe kishte abuzuar me medikamentet.

Sot, është më i vetëdijshëm për gjendjen e tij mendore dhe përpiqet të gjejë mënyra për ta përballuar, duke pranuar se, ndonëse është në një rrugë përmirësimi, ende ndjen pasiguri.

Sindroma Tourette është një çrregullim neurologjik i trashëguar, i cili shfaqet me tike motorike dhe vokale, dhe shoqërohet me gjendje të tjera si ADHD, OCD dhe ankth. /A.Z/UBT News/

Pas 19 vitesh martesë, aktorja e njohur Nicole Kidman ka kërkuar zyrtarisht divorc nga këngëtari i muzikës country, Keith Urban.

Vendimi u depozitua më 30 shtator dhe, sipas burimeve pranë çiftit për revistën PEOPLE, ndarja po merr përmasa dramatike.

“Nicole është e lënduar dhe ndjehet e tradhtuar,” tha një burim. “Ajo u përpoq ta shpëtonte martesën dhe besonte se mund ta bënte, por duket se Keith ka vazhduar përpara.”

Në dokumentet e divorcit, Kidman citon “mosmarrëveshje të papajtueshme” si arsye për ndarjen, ndërsa si datë ndarjeje ka vendosur pikërisht ditën e depozitimit të kërkesës.

Megjithëse përfaqësuesit e tyre nuk kanë komentuar zyrtarisht, dokumentet tregojnë se marrëveshjet prindërore janë bërë disa javë para kërkesës për divorc.

Kidman do të ketë kujdestarinë kryesore të vajzave, Sunday Rose (17) dhe Faith Margaret (14), duke kaluar me to 306 ditë në vit, ndërsa Urban do t’i ketë për 59 ditë.

Të dy kanë rënë dakord të marrin vendime të përbashkëta për fëmijët dhe nuk do të paguajnë alimentacion ndaj njëri-tjetrit.

Çifti është zotuar të mos flasë keq për njëri-tjetrin dhe të mbështesë lidhjen e fëmijëve me të dy prindërit. Të dy do të ndjekin gjithashtu një seminar prindëror brenda 60 ditëve nga aplikimi për divorc.

Ndërkohë, burime pranë Urban thonë se ai “ka kaluar një periudhë të vështirë”, ndërsa të njohur të çiftit e përshkruajnë ndarjen si një “largim të ngadaltë dhe jo një krisje të befasishme”. /A.Z/UBT News/

Reperja Cardi B ka reaguar ashpër ndaj Nicki Minajt në rrjetin social X, pasi kjo e fundit e akuzoi për manipulim të shitjeve të albumit të saj më të ri “Am I the Drama”.

Në një seri postimesh të drejtpërdrejta, Cardi e akuzoi Nickin se po e përmend vazhdimisht pa arsye, duke ironizuar rolin dhe ndikimin në industrinë e muzikës.

Ajo u shpreh se Minaj, me mbi 16 vite karrierë, duhet të krahasohet me emra të mëdhenj si Rihanna, Taylor Swift apo Drake, dhe jo me artiste që kanë nisur së fundmi rrugëtimin e tyre muzikor.

“Pse vazhdon ta përmendësh albumin tim? Ti ke qenë në industrinë e muzikës për 16 vjet. Unë isha ende në shkollë të mesme kur ti ishe tashmë në skenë. Pse më krahason mua me veten tënde?”, shkroi Cardi B.

Debati u ashpërsua më tej kur Cardi u ndal edhe në jetën personale të Minajt, duke përmendur thashethemet për shëndetin e saj dhe duke i rikujtuar publikut rastin e vëllait të saj, Jelani Maraj, i cili u dënua më 2020 me 25 vite burg për abuzim seksual ndaj një të miture.

“Vëllai yt merret me vajza 12-vjeçare”, shkroi Cardi në një nga postimet. /A.Z/UBT News/