Deputetja e Lidhjes Demokratike të Kosovës (LDK), Jehona Lushaku-Sadriu, ka deklaruar se interpretimi i bërë nga Gjykata Kushtetuese lidhur me procesin e votimit në Kuvend është i qartë dhe se tani pritet që të respektohet rendi i ditës.

Ajo gjithashtu ka shprehur bindjen se institucionet e sigurisë duhet të garantojnë zhvillimin e punimeve të Kuvendit pa pengesa.

“Interpretimi jonë është që Gjykata Kushtetuese e ka sqaruar proceduralisht. Tani presim që të respektohet rendi i ditës ashtu siç është,” tha Lushaku-Sadriu.

Duke folur për alarmimin e sotëm për një kërcënim me bombë në ndërtesën e Kuvendit, ajo tha se pret që Policia dhe Prokuroria ta kenë të sqaruar situatën dhe të kenë burimet e nevojshme për të garantuar sigurinë.

“Unë shpresoj që Policia dhe Prokuroria ta kenë të kenë sqaruara, t’i kenë burimet e tyre. Është tepër e rëndësishme që shteti jonë të garantojë që institucionet e veta mbajnë edhe seanca edhe mbledhje, sepse kanë siguri të plotë. Sepse kjo reflekton pastaj me sigurinë e vendit tonë.”

Deputetja e LDK-së u shpreh e bindur për rolin e deputetëve dhe qëllimin e tyre për të votuar për kryetarin e ri të Kuvendit.

“Unë ndjehem absolutisht e sigurt edhe unë kam ardhur. Edhe roli jonë si deputet ka një funksion të qartë: kemi ardhur që të votojmë propozimin për një kryetar Kuvendi dhe shpresojmë që kështu do të ndodh,” përfundoi ajo.

Deputeti i Aleancës për Ardhmërinë e Kosovës (AAK), Bekë Berisha, ka komentuar zhvillimet politike pas kërcënimit të rrejshëm me bombë në Kuvend, duke thënë se situata po bëhet e tepërt dhe se vendi ka nevojë për reflektim të përgjithshëm.

Ai paralajmëroi mundësinë e ndryshimit të qëndrimeve në votimin për kryetarin e Kuvendit dhe tha se nuk do të lejojë që hidhërimi politik të bëhet barrë për vendin.

Ai tha se sot mund të propozohet edhe mocioni për kalim në votim të fshehtë.

“Sikur ka ndodhur edhe më përpara, nuk kemi pasur ndonjë shqetësim se është pritur që të jetë i rrejshëm. Kjo situatë besoj që tani është bërë e tepërt dhe na duhet që të reflektojmë të gjithë. Po duket që dojnë me bë një mocion për çështjen e ndërrimit të votimit. Edhe kur dalim në atë pjesën e votimit të hapur, besoj që do të reflektoj unë së pari. Nuk dua që në kurriz të Kosovës të mbaj hidhërim me askënd. As nuk ma determinon mendimin politik as opozita, se unë nuk jam opozitë më së pari, se këtu nuk dihet kush do ta bëjë qeverinë. Do ta shikojmë momentin e parë me gjithë formën se si me dalë nga kjo situatë,” tha Berisha.

Ai shtoi se mungesa e institucioneve për një kohë të gjatë e rrit rrezikun për situata të tilla si alarmi i rremë për bombë, duke e quajtur paralajmërim të kahershëm të tij që nuk ishte marrë seriozisht.

“Kjo ka qenë një alarm i rrejshëm, mirëpo kur nuk ka institucione për një kohë kaq të gjatë, këto mund të bëhen të vërteta pastaj. E kam paralajmëruar edhe përpara dhe e merrshin sikur kiamet atë punë,” u shpreh ai.

Berisha tha se nëse në seancën e ardhshme krijohet shumicë për ta rrëzuar opsionin aktual për kryetar Kuvendi, atëherë do të jetë një hap përpara drejt zgjidhjes.

“Nëse ka sot prezencë të deputetëve që mund të rrëzohet ai opsion, është rrugëdalje dhe është reflektim. Besoj që seancën e ardhshme do ta rrëzojmë, sepse ka njerëz që dëshirojnë që ta rrëzojnë këtë opsion. Kur dalim hapur, pastaj duhet të kryhet punë.”

I pyetur nëse vota e tij do të jetë pro për secilin kandidat për kryetar Kuvendi që do të propozohet nga Lëvizja Vetëvendosje, ai u përgjigj shkurt:

“Po bash kanë të qesin,” tha Berisha.

Policia e Kosovës ka dënuar një shofer i cili po lëvizte me shpejtësi prej 115 km/h në zonën ku shpejtësia e lejuar ishte 50km/h.

Kundërvajtësi teksa po lëvizte në Prelez të Ferizajt u ndalua nga policia që i shqiptoi atij gjobë prej 300 eurosh, tre pikë negative dhe tre muaj ndalim vozitje.

“Njësia e Trafikut Rrugor, gjatë realizimit të kontrollit me radar në rrugën magjistrale Ferizaj-Prishtinë në fshatin fshatin Prelez të Ferizajt, rreth orës 03:05, ka evidentuar një automjet të markës Audi me targa vendore që po lëvizte me shpejtësi prej 115 km/h në zonën ku kufizimi i lejuar është 50 km/h. Ndaj shoferit F.B.,41 vjeç është shqiptuar një gjobë për kundërvajtje trafiku për tejkalim të shpejtësisë së lejuar: 300 €, 3 pikë negative dhe masë mbrojtëse (ndalim i drejtimit të mjetit për 3 muaj).Policia Rajonale e Ferizajt do të vazhdojë me kontrolle dhe aktivitete të intensifikuara në funksion të parandalimit të aksidenteve dhe rritjes së sigurisë në komunikacion. Apelojmë tek të gjithë shoferët që të respektojnë rregullat dhe shenjat e komunikacionit rrugor”, thuhet tutje në njoftimin e policisë.

Ministria e Punëve të Brendshme ka marrë vendim që ndalon rreptësisht ndezjen e zjarreve në të gjitha ambientet e hapura.

Ky vendim vie pas temperaturave të larta dhe rrezikut të përhapjes së zjarreve në pyje, fusha dhe livadhe.

Ministri në detyrë, Xhelal Sveçla përmes një postimi në Facebook tha se ndezja e zjarreve është vepër penale dhe shkelësit e këtij vendimi do të përballen me masa ndëshkuese.

“Ndezja e zjarreve është vepër penale andaj shkelësit e këtij vendimi do të përballen menjëherë e pa dilemë me masat ndëshkuese që parasheh legjislacioni ynë. I bëjmë thirrje të gjithë qytetarëve që të tregojnë kujdes maksimal dhe të respektojnë këtë vendim, duke shmangur çdo veprim që mund të shkaktojë zjarr ose përhapje të tij“, ka shkruar Sveçla.