Edhe në 8 komuna të tjera pritet të fillojë procesi i numërimit të votave të kandidatëve për deputetë dhe verifikimi i votave të subjekteve politike nga formularët të cilët janë plotësuar në vendvotime pas numërimit të votave për subjektet politike.

Kësisoj, numri i komunave në të cilat ka filluar numërimi më 11 dhe 12 shkurt apo planifikohet që të nisë gjatë ditës së enjte më 13 shkurt, është: 26 komuna.

Lajmi është konfirmuar në një përgjigje me shkrim për KosovaPress nga Zëdhënësi i KQZ-së, Valmir Elezi.

“Mund t’iu konfirmoj se gjatë ditës së sotme, e enjte (13 shkurt) ka filluar procesi i numërimit në Qendrat Komunale të Numërimit në komunat Suharekë, Ferizaj dhe Vushtrri, ndërkaq gjatë pasdites do të fillojë numërimi edhe në qendrat tjera në komunat Kaçanik, Novobërdë, Prizren, Shtime dhe Junik”, ka thënë Elezi.

Sipas tij, “procesi i numërimit të votave të kandidatëve për deputetë dhe verifikimit të votave të subjekteve politike nga formularët të cilët janë plotësuar në vendvotime ka filluar më 11 dhe 12 shkurt edhe në QKN-të e komunave: Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Lipjan, Obiliq, Prishtinë, Skënderaj, Shtërpcë, Viti, Ranillug, Partesh, Kllokot, Mitrovicë e Veriut dhe Hani i Elezit”.

Procesi i numërimit nuk ka filluar ende në QKN-të e komunave Dragash, Istog, Klinë, Leposaviq, Rahovec, Pejë, Podujevë, Zubin Potok, Zveçan, Malishevë, Mamushë dhe Graçanicë, ku janë duke u bërë përgatitjet e fundit teknike dhe administrative.

Sipas KQZ-së, gjatë procesit të numërimit të votave të kandidatëve për deputetë, do të bëhet verifikimi i votave të subjekteve politike nga formularët të cilët janë plotësuar në vendvotime pas numërimit të votave për subjektet politike.

Ky verifikim është paraparë me aktet nënligjore që janë miratuar nga KQZ qysh para shpalljes së datës së zgjedhjeve dhe sigurisht se kjo do të heq të gjitha dilemat që janë krijuar gjatë problemeve në publikimin e rezultateve preliminare për subjektet politike.

Një operacion i gjerë policor ka çuar në arrestimin e katër personave, përfshirë shefin dhe disa inspektorë të Departamentit për Mbikëqyrjen e Kujdesit Social, pas zjarrvënies tragjike në Shtëpinë e të Moshuarve dhe të Rriturve “Ivanović” në Barajevë. Ky zjarr, i cili shpërtheu më 20 janar, shkaktoi vdekjen e tetë personave dhe la pas një mori pyetjesh për dështimet institucionale dhe përpjekjet për të mbajtur të hapur një institucion që nuk plotësonte kushtet ligjore.

Një hetim i iniciuar nga Prokuroria e Lartë Publike në Beograd ka çuar në arrestimin e shefit të Departamentit të Mbikëqyrjes Inspektuese dhe tre inspektorëve të mbrojtjes sociale. Ata dyshohen se kanë lejuar funksionimin e Shtëpisë së Akomodimit “Ivanović”, pavarësisht se ajo nuk i kishte përmbushur kërkesat ligjore dhe kishte pasur parregullsi të evidentuara nga kontrollet periodike që ishin kryer nga inspektorët që nga viti 2014.

Në deklaratën e kryeprokurorit Nenad Stefanoviq, theksohet se inspektorët e dyshuar, edhe pasi kishin identifikuar shkeljet e rregullave, nuk kishin ndërmarrë masat e duhura për të ndaluar veprimtarinë e shtëpisë, duke rrezikuar jetën e individëve të shtruar atje. Ai gjithashtu e akuzon shefen e departamentit për pakujdesi në kryerjen e detyrave të saj, duke lënë të hapur mundësinë për shkelje të rënda të të drejtave të qytetarëve.

Pas ngjarjes tragjike, hetimet janë zgjeruar për të përfshirë tre persona të tjerë që drejtonin shtëpinë e të moshuarve. Ata janë hetuar për veprat penale të Krimeve të Rënda kundër Sigurisë Publike, ndërkohë që ndodhen në paraburgim.

Ky rast ka nxjerrë në pah dështimet e sistemit të kujdesit social dhe ka ngritur shqetësime serioze për mbikëqyrjen e institucioneve që ofrojnë kujdes për të moshuarit. Pavarësisht kontrolleve të rregullta, mbetet e paqartë si një institucion që kishte shpërthyer parregullsi ka mundur të vazhdojë të funksionojë, duke rrezikuar jetën e shumë individëve të pambrojtur.

Ky zjarri i tmerrshëm ka hapur një debat të gjerë mbi përgjegjësitë e autoriteteve për mbikëqyrjen e këtyre institucioneve dhe ka theksuar nevojën urgjente për reformë dhe kontroll më të ngushtë mbi shtëpitë e kujdesit për të moshuarit në Serbi./UBTNews/

Ministri gjerman i Mbrojtjes, Boris Pistorius tha se Evropa duhet të përfshihet në bisedimet e paqes Rusi-Ukrainë.

Përpara takimit të ministrave të Mbrojtjes të NATO-s në Bruksel, Pistorius tha se presidenti amerikan Donald Trump dhe presidenti rus Vladimir Putin zhvilluan një bisedë telefonike dhe ranë dakord të fillojnë negociatat për t’i dhënë fund luftës Rusi-Ukrainë.

“Nëse Putini është vërtet serioz për të hyrë në këto negociata, që duke u bazuar në përvojën e tre viteve të fundit mund të ketë të paktën disa dyshime për këtë, atëherë ai duhet të marrë masa të menjëhershme në fushën e betejës dhe të ndalojë shkatërrimin e Ukrainës“, tha ministri gjerman.

Pistorius tha se Evropa duhet të jetë pjesë e këtyre negociatave. “Për mua është e qartë se Evropa duhet të përfshihet në negociata dhe nuk ka asnjë dyshim për këtë çështje“, theksoi ai.

Sipas tij, ende nuk është e qartë se si do të vazhdojnë negociatat e paqes në Ukrainë dhe më e rëndësishmja, cilat do të jenë rezultatet e negociatave. “Gjëja e trishtueshme është se administrata e Trumpit tashmë i ka bërë lëshime të qarta Putinit përpara fillimit të negociatave. Nga këndvështrimi im, do të kishte qenë më mirë anëtarësimi i mundshëm i Ukrainës në NATO ose humbja e mundshme e territorit të vendit të diskutohej vetëm në tryezën e negociatave“, tha Pistorius.

Ai potencoi se është e rëndësishme t’i jepet fund vrasjes së njerëzve mbi bazën e një paqeje të qëndrueshme, të përhershme, të drejtë dhe të barabartë.

Shefi i Zyrës së Bashkimit Evropian në Kosovë, Aivo Orav vizitoi të enjten Qendrën Komunale të Numërimit në Prishtinë – sallën 1 Tetori, ku po numërohen votat e kandidatëve për deputetë.

“Vizitova sot Qendrën Komunale të Numërimit në Prishtinë, ku është duke vazhduar procesi i numërimit”, shkroi Orav në X.

Nga 258 kuti të rregullta të votimit, shtatë me kusht dhe 11 nga ekipe mobile sa gjenden në këtë qendër, janë numëruar 13 kuti me vota të kandidatëve për deputetë. Ndërkaq, tetë prej tyre janë në proces, ka bërë të ditur më herët të enjten kryesuesja e Komisionit Komunal Zgjedhor në Prishtinë, Fatmire Bajrami.

Sot është dita e tretë prej kur ka nisur numërimi i votave të kandidatëve për deputetë në Qendrën Komunale të Numërimit në Prishtinë, në Obiliq, në Lipjan dhe Partesh.

Këto ditë janë karakterizuar me telashe teknike, derisa sistemi ka rënë disa herë në Qendrën Komunale të Numërimit në Prishtinë. Kjo ka bërë që të ripërsëritet numërimi.

Përveç kësaj, edhe të martën kur ka filluar procesi, por edhe dje, është raportuar për përleshje në mes të vëzhguesve nga Lëvizja Vetëvendosje dhe Lidhja Demokratike e Kosovës.

Procesi i numërimit gjatë këtyre ditëve ka filluar me vonesë për shkak të telasheve teknike.

Përveç komisionerëve dhe vëzhguesve të subjekteve politike, të pranishëm në këtë qendër janë edhe vëzhguesit e Bashkimit Evropian.

Përveç në Prishtinë, numërimi i votave të kandidatëve për deputetë, njëkohësisht verifikimi i votave për subjekte politike, të martën ka filluar edhe në Obiliq, Lipjan dhe Partesh.

Ndërkaq, Komisioni Qendror i Zgjedhjeve të mërkurën ka njoftuar se ka filluar procesi i numërimit të votave të kandidatëve për deputetë dhe verifikimit të votave të subjekteve politike në 14 komuna të tjera.

Të mërkurën, procesi i numërimit ka filluar në Qendrat Komunale në Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut dhe Veriut, Skenderaj, Shtërpc, Viti, Vranidoll, Kllokot dhe Han të Elezit.

Ndërkaq, ende nuk është bërë e ditur se kur do të fillojë numërimi i votave në komunat e tjera.