Shtatë vite pas shkatërrimit të shtëpisë së saj në Malibu, këngëtarja e njohur Miley Cyrus ka zbuluar se procesi i rindërtimit është pothuajse i përfunduar.

Në një intervistë me Pamela Anderson për CR Fashion Book, 32-vjeçarja tha se brenda pak javësh do të mund të rikthehet të jetojë aty.

“Kam qenë duke punuar për rindërtimin,” rrëfeu Cyrus. “E humba shtëpinë time në zjarrin Woolsey Fire dhe prej pesë vitesh po e ndërtoj nga e para. Tani, duket se do të jetë gati për mua shumë shpejt.”

Banesa që ndante dikur me ish-bashkëshortin Liam Hemsworth, u shkatërrua më 2018, teksa Miley ndodhej në Afrikën e Jugut për xhirimet e serialit Black Mirror. Çifti u martua pak muaj më vonë, por rrugët e tyre u ndanë në vitin 2019.

Megjithëse humbja ishte e dhimbshme, këngëtarja e Flowers e ka quajtur këtë përvojë një “bekim të madh”.

“Kur më dogji shtëpia, në fakt ishte një nga bekimet më të mëdha të jetës sime,” tha ajo në një event në maj. “Më dha mundësinë të rindërtoj gjithçka me qëllim dhe vetëdije – nga sendet në shtëpi deri te njerëzit në jetën time.”

Shtëpia në Malibu ka një domethënie të veçantë për Cyrus, pasi aty regjistroi albumin e saj të parë si artiste solo. Në një video në TikTok gjatë vitit 2023, ajo kujtoi: “Ai vend kishte magji. Ndryshoi jetën time.”

Ngjarja ka lënë gjurmë edhe në artin e saj. Në një intervistë pranoi:“Mund të këndoj më mirë që pas zjarrit. Ishte sikur çliroi diçka tek unë.” /A.Z/UBT News/

Filmi “One Battle After Another”, i regjisorit të njohur Paul Thomas Anderson dhe me protagonist Leonardo DiCaprio, ka debutuar me sukses në arkëtimet e fundjavës së parë.

Produksioni fitoi 22.4 milionë dollarë në tregun amerikan, duke vendosur rekord personal për regjisorin dhe duke e konfirmuar si një nga projektet më të shumëpritur të vitit, sipas Forbes.

Në nivel ndërkombëtar, filmi grumbulloi edhe 26 milionë dollarë, duke e çuar fitimin global në 48.5 milionë dollarë.

Performanca e tij u përforcua nga një vlerësim “A” në CinemaScore dhe komente të shkëlqyera nga kritikët.

Në Metacritic, filmi u rendit mes më të vlerësuarve të dekadës, me “mirënjohje universale” si nga publiku ashtu nga ekspertët e kinemasë.

Megjithatë, rruga drejt fitimit mbetet sfiduese. Buxheti i prodhimit vlerësohet në 130 milionë dollarë, ndërsa shpenzimet e marketingut kanë arritur deri në 70 milionë dollarë shtesë, sipas The New York Times.

Kjo do të thotë se “One Battle After Another” do të duhet të mbajë ritëm të fortë edhe për disa fundjava për të justifikuar investimin. /A.Z/UBT News/

Kai Trump, mbesa 18-vjeçare e ish-presidentit amerikan Donald Trump, ka prezantuar linjën e saj të parë të modës.

Në Instagram, ajo njoftoi me entuziazëm koleksionin që mban emrin e saj, që përfshin bluza sportive uniseks me logon “KT” – inicialet e saj.

Një bluzë sportive e koleksionit kushton 130 dollarë (rreth 110 euro), çmim që ka nxitur reagime të ndryshme në rrjetet sociale.

Disa e kanë cilësuar të lartë për një markë debutuese, ndërsa të tjerë e kritikuan si mënyrë të diskutueshme për një adoleshente që të mësojë vlerën e parasë. Koleksioni ofrohet në ngjyrat e zezë, të bardhë dhe blu të errët, me variacione të thjeshta në dizajn.

Kai u shfaq me versionin e bardhë të bluzës gjatë pjesëmarrjes në Ryder Cup 2025 në Nju Jork, pranë Donald Trump. Ajo e kombinoi me xhinse të zeza dhe një çantë të madhe shpine, duke treguar një hyrje të sigurt në stilin e saj të përditshëm-luksoz.

Fotot promocionale u realizuan në oborrin e Shtëpisë së Bardhë, ku Kai pozohet me veshjet e saj. Kjo shkaktoi debate, pasi kritikët e akuzuan për përdorim të hapësirës presidenciale për qëllime komerciale, gjë që rriti edhe më shumë vëmendjen ndaj koleksionit.

Ekspertja e financave për brezin Z, Taylor Price, e cilësoi lansimin si një lëvizje të mençur: “Brezi Z po hyn fuqishëm në ekonominë e krijuesve, dhe linjat e tyre shpesh janë hapi i parë drejt ndërtimit të një marke personale. Nëse menaxhohet mirë, ky projekt mund të kthehet në fitime milionëshe,” tha ajo për The Telegraph.

Polemikat nuk munguan. Përveç çmimeve të larta, disa vërejtën se “KT” i ngjan asaj të sportistit Travis Kelce. Kai nuk ka reaguar ende ndaj kritikave, por debati ka bërë debutimin e saj në modë edhe më të dukshëm.

Përveç modës, Kai është golfiste e talentuar, ajol ka siguruar bursë sportive për Universitetin e Majamit, ku do të luajë në ekipin universitar.

Mediat amerikane raportojnë se ajo ka fituar mbi një milion dollarë nga sponsorimet sportive, duke treguar se suksesi i saj nuk kufizohet vetëm në modë. /A.Z/UBT News/

Phoebe Gates, vajza më e vogël e bashkëthemeluesit të “Microsoft”-it, Bill Gates, ka zbuluar së fundmi arsyen pse prindërit e saj i këshilluan të mos përdorte mbiemrin e vërtetë gjatë fëmijërisë.

Të rritesh nën hijen e njërit prej njerëzve më të pasur në botë solli sfida të veçanta, ndaj prindërit zgjodhën këtë mënyrë për ta mbrojtur.

Bill Gates, i njohur për revolucionin në teknologji, është tërhequr nga operacionet e përditshme të “Microsoft”-it që nga 2008, për t’iu përkushtuar punës bamirëse. Më 2014 dha dorëheqjen si kryetar i bordit, ndërsa më 2020 u largua tërësisht edhe nga bordi i drejtorëve.

Në fokusin kryesor mbetet Fondacioni Gates, përmes të cilit ai ka vendosur që tre fëmijët – Jennifer, Rory dhe Phoebe – të trashëgojnë më pak se 1% të pasurisë së tij, e cila vlerësohet në mbi 100 miliardë dollarë.

“Fëmijët e mi kanë marrë një arsimim të shkëlqyer, por nuk do të trashëgojnë më shumë se një përqind të pasurisë, sepse besoj se nuk do të ishte në të mirën e tyre”, tha Gates në një podcast, duke shtuar: “Nuk është një dinasti. Nuk pres që ata të drejtojnë Microsoft-in.”

Në podcast-in e saj “The Burnouts”, të cilin e drejton me shoqen e dhomës Sophia Kianni, Phoebe tregoi se prindërit e saj i këshilluan të përdorte mbiemrin e vajzërisë së nënës, French, deri në shkollën e mesme.

“Ata ishin të vendosur të mos përdornim mbiemrin Gates që në fëmijëri. Në vend të tij, përdornim mbiemrin e nënës sonë, French,” u shpreh 22-vjeçarja.

Sipas saj, ky vendim i ndihmoi fëmijët të krijonin shoqëri në mënyrë më të natyrshme, pa paragjykime për shkak të pasurisë dhe mbiemrit të njohur. Megjithëse Bill Gates është i vendosur që fëmijët të ndërtojnë vetë rrugën e tyre në jetë, mbetet e qartë se edhe një përqind e pasurisë së tij përfaqëson mbi një miliard dollarë – një e ardhme financiare mëse e sigurt për ta. /A.Z/UBT News/