Presidenti rus Vladimir Putin shpalli të ashtuquajturin armëpushim “humanitar” nga 8 maji deri në mesnatën e 11 majit me rastin e 80-vjetorit të përfundimit të Luftës së Dytë Botërore, tha Kremlini në një deklaratë.

“Gjatë kësaj periudhe, të gjitha veprimet ushtarake do të pushojnë. Rusia beson se pala ukrainase duhet të ndjekë këtë shembull,” tha Kremlini në një deklaratë.

Njoftimi vjen pasi Moska vazhdon të refuzojë kërkesën e Kievit për një armëpushim të plotë dhe të pakushtëzuar si hapi i parë drejt një marrëveshjeje më të gjerë paqeje.

Putin më parë shpalli një armëpushim të përkohshëm në Pashkë, edhe pse Ukraina akuzoi forcat ruse për gati 3,000 shkelje gjatë asaj periudhe.

Rusia ka shpallur në mënyrë të përsëritur gatishmërinë e saj të supozuar për bisedimet e paqes, ndërsa njëkohësisht ka shtyrë për kërkesat maksimaliste. Kievi i ka hedhur poshtë këto deklarata si një marifet propagandistik, duke vënë në dukje se forcat ruse vetëm sa kanë intensifikuar sulmet e tyre ndaj qyteteve dhe qytezave të Ukrainës.

Koreja e Veriut konfirmoi, për herë të parë, se ka dërguar trupa për të mbështetur luftën e Rusisë në Ukrainë, me udhëheqësin Kim Jong Un që urdhëroi vendosjen e tyre, sipas një deklarate të publikuar nga agjencia shtetërore e lajmeve KCNA.

”Operacionet për të çliruar zonën e Kurskut me qëllim sprapsjen e pushtimit të guximshëm të Federatës Ruse nga autoritetet ukrainase kanë përfunduar me fitore”, raportoi KCNA, duke cituar zyrtarë ushtarakë të Koresë së Veriut.

Të shtunën, ushtria ruse pranoi gjithashtu për herë të parë vendosjen e ushtarëve të Koresë së Veriut në luftën në Ukrainë.

Më parë, të dy vendet as nuk e kishin konfirmuar dhe as mohuar dërgimin e trupave.

Sipas agjencisë së inteligjencës së Koresë së Jugut, Koreja e Veriut dërgoi rreth 11 000 trupa për të mbështetur Rusinë në fund të vitit të kaluar, kryesisht të vendosur në rajonin përreth zonave të pushtuara nga Ukraina në Kursk të Rusisë.

”3 000 trupa të tjera do të dërgohen deri në fillim të vitit 2025”, sipas zyrtarëve ushtarakë të Koresë së Jugut.

Seuli pretendon se ushtria e Koresë së Veriut ka pësuar rreth 4 000 viktima në luftën në Ukrainë, përfshirë të plagosur dhe të vrarë./ATSH/

Ushtarët e Indisë dhe Pakistanit kanë këmbyer zjarr në ditën e katërt me radhë në Kashmirin e kontestuar, tha ushtria e Nju Delhit më 28 prill.

Nuk ka raportime për viktima dhe Islamabadi ende nuk ka konfirmuar ende lajmin për këmbimin e zjarrit.

India e ka akuzuar Pakistanin se mbështet “terrorizimin ndërkufitar” pasi një sulmues i armatosur vrau 26 persona javën e kaluar, që ishte sulmi më i rëndë ndaj civilëve në Kashmirin – me shumicë myslimane – në çerekshekullin e fundit.

Ky sulm ka rritur tensionet mes dy rivalëve me fuqi bërthamore.

Islamabadi ka mohuar se ka pasur ndonjë rol, duke thënë se kjo ishte një përpjekje për ta lidhur Pakistanin me sulmin dhe duke u zotuar se do të përgjigjet ndaj veprimeve të Indisë.

“Gjatë natës midis 27 dhe 28 prillit… postet e ushtrisë pakistaneze nisën zjarr të paprovokuar përtej vijës së kontrollit”, tha ushtria indiane, duke iu referuar kufirit de facto në Kashmirin e kontestuar.

“Trupat indiane janë përgjigjur menjëherë dhe në mënyrë efektive”, u tha në deklaratë.

Pas sulmit të 22 prillit, Nju Delhi ndërmori disa hapa diplomatikë, duke tërhequr vizat për pakistanezët, duke pezulluar një marrëveshje për ndarjen e ujërave si dhe njoftoi për mbylljen e kufirit kryesor tokësor me Pakistanin.

Në përgjigje, Islamabadi urdhëroi dëbimin e diplomatëve dhe këshilltarëve ushtarakë indianë, anuloi vizat për shtetasit indianë dhe ndaloi avionët e Indisë që të përdornin hapësirën ajrore pakistaneze.

Kombet e Bashkuara u kanë bërë thirrje palëve për “përmbajtje maksimale” në mënyrë që çështjet të “mund të zgjidhen në mënyrë paqësore përmes një angazhimi të ndërsjellë dhe konstruktiv”./REL/

Gjermania i ka bërë thirrje Ukrainës të mos pranojë propozimin e fundit për paqe të presidentit amerikan Donald Trump, i cili sugjeron që Kievi të heqë dorë nga territore të mëdha në këmbim të një armëpushimi me Rusinë.

Ministri gjerman i Mbrojtjes, Boris Pistorius, deklaroi të dielën për transmetuesin publik ARD se një marrëveshje e tillë do të ishte e barasvlershme me një “kapitullim”. Sipas tij, ndonëse Ukraina mund të jetë e detyruar të bëjë disa kompromise territoriale për të arritur një armëpushim të qëndrueshëm, ajo nuk duhet të pranojë kushtet e ofruara nga Trump.

“Ukraina padyshim e di se mund të duhet të heqë dorë nga një pjesë e territorit për të arritur një armëpushim të qëndrueshëm që është rënë dakord me mirëbesim”, tha Pistorius. “Por ata sigurisht nuk do të shkojnë aq larg, ose nuk duhet të shkojnë aq larg, sa propozimi i fundit nga presidenti amerikan.”

Pistorius shtoi se propozimi i paraqitur nga Trump nuk sjell asnjë vlerë të shtuar për Ukrainën dhe se një marrëveshje e tillë mund të ishte arritur edhe një vit më parë, në kushte që ai i konsideron të papranueshme.

Sipas raportimeve të mëparshme nga Axios, e ashtuquajtura “ofertë përfundimtare” e Trump përfshin njohjen nga Shtetet e Bashkuara të Krimesë si pjesë e Rusisë, njohjen jozyrtare të kontrollit rus mbi territoret e pushtuara pas vitit 2022, ndalimin e anëtarësimit të Ukrainës në NATO dhe heqjen e sanksioneve kundër Rusisë të vendosura që prej vitit 2014.

Komentet e Pistorius vijnë në një kohë kur në Washington po diskutohet seriozisht mundësia e vazhdimit të rolit ndërmjetësues në konflikt. Senatori amerikan Marco Rubio deklaroi së fundmi se administrata Trump po shqyrton nëse palët janë mjaftueshëm afër një marrëveshjeje për të justifikuar një investim të mëtejshëm diplomatik. Megjithatë, Rubio nuk specifikoi një afat përfundimtar për arritjen e një përparimi.