Deputetja e zgjedhur në listën e Lëvizjes Vetëvendosje, Mimoza Kusari – Lila, ka kritikuar partitë PDK, LDK dhe AAK për bllokimin e procesit të formimit të institucioneve të reja, duke e konsideruar përgjegjësinë e këtyre partive në këtë bllokadë.

Kusari – Lila ka theksuar se, nëse vazhdon dështimi i konstituimit të Kuvendit, duhet shqyrtuar mundësia e një dialogu mes partive politike, përfshirë ftesën për diskutimin e veprimeve të ardhshme.

Ajo e cilësoi të pakuptimtë që partitë që ishin në opozitë gjatë mandatit të kaluar po hezitojnë të pranojnë mandatet që fituan në zgjedhjet e 9 shkurtit.

Deputetja e zgjedhur e AAK-së, Time Kadrijaj, ka reaguar pas ndërprerjes së seancës konstituive, duke thënë se kishin pritur që seanca të vazhdonte dhe të kalonte në votim.

Ajo e cilësoi ndërprerjen e seancës si antikushtetuese dhe antiligjore, duke shtuar se kryesuesi duhej ta kishte hedhur raportin në votim.

“Pas konstatimit të numrit të deputetëve të pranishëm, u tha se nuk kishte konsensus. Ky veprim është antikushtetues dhe antiligjor. Kryesuesi duhej të kishte hedhur raportin në votim sot,” ka theksuar Kadrijaj.

Kryetari i Partisë Demokratike të Kosovës, Memli Krasniqi, ka deklaruar se Lëvizja Vetëvendosje po e zvarritë procesin e seancës konstituive me qëllim të zhvillimit të pazareve politike.

Pas ndërprerjes së seancës, e cila do të vazhdojë më 19 prill, Krasniqi theksoi se Lëvizja Vetëvendosje po përpiqet të fitojë kohë për të siguruar numrat e nevojshëm për formimin e institucioneve.

“Këta nuk kanë shumicë parlamentare dhe, pasi nuk e kanë, po përpiqen të blejnë kohë për të bërë pazaret e tyre,” tha ai.

Kryetari i Lidhjes Demokratike të Kosovës, Lumir Abdixhiku, ka reaguar pas ndërprerjes së seancës konstituive të Kuvendit, duke e cilësuar vendimin e kryesuesit Avni Dehari si të pabazuar dhe në kundërshtim me Rregulloren e Kuvendit.

Sipas tij, në sallë kishte kuorum të mjaftueshëm për të kaluar në pikën e parë të rendit të ditës – miratimin e Raportit për Verifikimin e Mandateve – dhe nuk kishte arsye që seanca të ndërpritej.

“Kryesuesi, që rastis të jetë më i vjetri në moshë dhe nga partia e parë, veproi në kundërshtim me Rregulloren dhe praktikën kushtetuese. Pa të drejtë ndërpreu seancën, ndonëse ishin plotësuar kushtet për votim,” u shpreh Abdixhiku.

Ai e cilësoi këtë si një praktikë bllokuese që dëmton institucionin më të lartë të vendit dhe një veprim me pasoja të rënda politike.