Mungesa e zyrtarëve të lartë institucionalë të Kosovës në inaugurimin e presidentit të zgjedhur të Shteteve të Bashkuara, Donald Trump, po konsiderohet shqetësuese nga analistët politikë. Sipas tyre, kjo tregon për “raportet e dëmtuara të këtij estabilishmenti politik me SHBA-të”.

Trump betohet sot si president i 47-të i Shteteve të Bashkuara dhe do të mbajë fjalimin tradicional të inaugurimit para shumë të pranishmëve dhe personaliteteve botërore.

Presidentja Vjosa Osmani dërgoi një delegacion i cili kryesohet nga ambasadori në SHBA, Ilir Dugolli.

Ndërkaq, kryetari i Aleancës për Ardhmërinë e Kosovës, Ramush Haradinaj, ish-presidenti Behgjet Pacolli, kryetari i Prishtinës, Përparim Rama si dhe biznesmeni Shkëlqim Devolli, por marrin pjesë në ceremoni.

Analistja politike, Magbule Shkodra thotë se është mirë që politikanë dhe biznesmenë të ndryshëm nga Kosova po marrin pjesë në betimin e Trumpit si president, mirëpo sipas saj, ka qenë me rëndësi që vendi të përfaqësohet nga niveli më i lartë.

“Nuk ka marrë një ftesë ai [kryeministri Albin Kurti] si një udhëheqës i shtetit tonë dhe zyrtarët të tjerë të tij. Në anën tjetër, presidentja ka marrë një ftesë por sa kemi kuptuar ajo ka autorizuar ambasadorin tonë atje që të na përfaqësojnë. As kjo nuk më pëlqen, megjithëse presidentja Osmani mund të ketë arsyet e veta çfarëdo që të jenë ato përveç shëndetësore, ajo do të duhej të ishte atje. Është me rëndësi për Kosovën që të përfaqësohemi nga zyrtarët shtetëror. Mirë që po marrin pjesë zyrtarë të tjerë, pasi kemi një përfaqësues nga një parti opozitare, po ashtu përfaqësues të biznesit. Mirëpo mungesa e zotëri Kurtit atje flet më shumë. Raportet jo të mira të zotit Kurti me Shtetet e Bashkuara po reflektohet tani me këtë ftesë”, thekson ajo.

Edhe analisti politik, Arbnor Sadiku e sheh si shqetësuese mos-prezencën e ndonjërit prej krerëve të shtetit në inaugurimin e Trumpit.

“Kjo tregon për qasjen e presidentit Trump dhe Partisë Republikane se një qeveri, le të themi e kryesuar nga Kurti, që aktualisht është duke qeverisur, nuk është e mirëpritur për ta, pasi nuk është zgjidhja e duhur për bashkëpunim me Shtetet e Bashkuara të Amerikës….[Mospjesëmarrja as e presidentes Vjosa Osmani] Konsideroj se kjo mund të vije për faktin që presidentja Osmani është në vitin e fundit presidencial dhe roli i saj në politikë është jo më i peshuar se kur ishte në koalicion në listën e Vetëvendosjes. Natyrisht ajo është në një fazë të fundit të presidencës së saj dhe e konsideron vetën si pa të rëndësishme”, deklaron Sadiku.

Presidentja Vjosa Osmani, ditë më parë ka bërë të ditur se a marrë ftesë nga anëtarë të Kongresit të Shteteve të Bashkuara, Senati dhe Dhoma e Përfaqësuesve, për të marrë pjesë në inaugurimin e presidentit të ri amerikan Donald Trump, mirëpo ajo ka vendosur që të delegojë një zyrtar nga kabineti i saj që të përfaqësojë Kosovën.

Në anën tjetër, nga Zyra e Kryeministrit të Kosovës nuk kanë treguar për KosovaPress nëse kanë marrë ftesë për inaugurimin e presidentit Trump.

Trump ka fituar zgjedhjet presidenciale në SHBA në muajin nëntor, duke mundur kundër-kandidaten nga demokratët, Kamala Harris.

Donald Trump do të përdorë Biblën e Abraham Lincoln kur të betohet sot si president, njoftoi komiteti i tij i inaugurimit.

Lincoln përdori Biblën gjatë ceremonisë së tij të betimit në 1861.

Trump do të përdorë gjithashtu një Bibël personale kur të bëjë betimin. Të dyja Biblat u përdorën nga Trump gjatë inaugurimit të tij në 2017.

Ish-presidenti Barack Obama përdori Biblën e Linkolnit gjatë dy ceremonive të tij të inaugurimit.

Nënkryetari i sapozgjedhur JD Vance do të bëjë betimin duke përdorur një Bibël familjare që daton nga stërgjyshja e tij.

Në një moment të veçantë për historinë politike të SHBA-së, Presidenti aktual Joe Biden dhe Zonja e Parë Jill Biden kanë pritur në Shtëpinë e Bardhë Presidentin e zgjedhur Donald Trump dhe bashkëshorten e tij, Melania Trump. Ky takim, i cili ka ndodhur pak orë para ceremonisë zyrtare të inaugurimit të Trumpit, është shoqëruar me një mikpritje formale, ku dy çiftet kanë ndarë një çaj së bashku.

Ky është takimi i parë mes Presidentit Biden dhe Trumpit gjatë ditës, pasi dy liderët nuk kishin pasur mundësinë të takohej më parë. Takimi ka pasur një karakter simbolik, duke shënuar një hap të rëndësishëm në kalimin e pushtetit në SHBA, i cili shpesh është i mbushur me tensione, por gjithashtu është një mundësi për të përcjellë mesazhe të unitetit dhe bashkëpunimit mes dy administratave, ndonëse ato ndajnë pozita të kundërta politike.

Përpara këtij takimi, disa minuta më parë, anëtarë të familjes Trump ishin parë duke hyrë në ndërtesën e Capitolit, ku Presidenti i zgjedhur do të drejtohet për të vazhduar përgatitjet për ceremoninë e tij të inaugurimit. Ky moment shënon një kalim të rendësishëm në traditën amerikane të inaugurimeve dhe pasueshmërisë në pushtet, duke i dhënë mundësinë Trumpit të marrë detyrën dhe të fillojë mandatin e tij si president i 45-të i Shteteve të Bashkuara të Amerikës./UBTNews/

Presidenti rus Vladimir Putin uroi Presidentin e sapozgjedhur të Shteteve të Bashkuara, Donald Trump, për marrjen e detyrës disa orë para ceremonisë së inaugurimit të tij në Washington. Ky akt i urimit nuk ishte thjesht një formë protokolli, por një mundësi për të shprehur gatishmërinë e Rusisë për të hapur një kanal të ri dialogu me administratën e re amerikane.

Në këtë kuadër, Putin theksoi se ishte i hapur për një bashkëpunim të mundshëm me SHBA-në, duke përmendur dy çështje kryesore që kishin dominuar marrëdhëniet ndërkombëtare ndër vite: Ukraina dhe armët bërthamore. Duke folur për situatën në Ukrainë, ai shprehu dëshirën për një zgjidhje afatgjatë, në kundërshtim me opsionet e mëparshme që ofronin thjesht armëpushime të përkohshme. Në këtë kontekst, Putin theksoi se një marrëveshje që siguron paqe të qëndrueshme në Ukrainë ishte më e rëndësishme se një zgjidhje momentale.

Ky koment u bë gjatë një takimi të Këshillit të Sigurisë të Rusisë, ku Putin diskutoi shqetësimet e tij për zhvillimet aktuale dhe për mundësinë e një marrëveshjeje me administratën e Trump. Të gjitha këto zhvillime përbënin një reflektim të vullnetit të Kremlinit për të gjetur një udhë të përbashkët me Uashingtonin, por gjithashtu tregonin qëndrimet e forta dhe shqetësimet për çështje të cilat mbeten të nxehta në marrëdhëniet ndërkombëtare./UBTNews/