Gjatë ditës së premte, ministri i Jashtëm i Iranit, Abbas Araghchi, njoftoi se Ngushtica e Hormuzit është plotësisht e hapur për kalimin e të gjitha anijeve tregtare. Sipas tij, ky vendim vjen si rrjedhojë e armëpushimit në Liban dhe do të mbetet në fuqi gjatë gjithë periudhës sa zgjat ky akord. Transporti detar do të zhvillohet sipas itinerarit të koordinuar nga autoritetet detare iraniane.

Ky lajm u mirëprit menjëherë nga presidenti amerikan, Donald Trump, i cili përmes një postimi në rrjetet sociale falënderoi Iranin për hapjen e kësaj pike kyçe strategjike.

Rihapja e Ngushticës së Hormuzit ka dhënë efekte të menjëhershme në ekonominë globale. Duke qenë se përmes kësaj rruge transportohet rreth 20% e naftës dhe gazit botëror, çmimi i naftës ka pësuar një rënie të lartë prej 10% menjëherë pas njoftimit.

Hezbollahu ka deklaruar se po mban “gishtin në këmbëz” në rast të ndonjë “tradhtie apo pabesie” nga ana e Izraelit gjatë armëpushimit që po vazhdon në Liban. Në një deklaratë të shpërndarë në Telegram, grupi i mbështetur nga Irani përshkroi operacionet e tij gjatë konfliktit të deritashëm, duke thënë se ka kryer 2,184 operacione kundër Izraelit mes 2 marsit dhe 16 prillit.

Hezbollahu — i cili cilësohet si organizatë terroriste nga vende si Britania e Madhe dhe SHBA-ja — nuk ishte i përfshirë në bisedimet për armëpushim, pasi Izraeli negocoi drejtpërdrejt me qeverinë libaneze.

Duke reaguar ndaj lajmit për armëpushimin të enjten, Hezbollahu u shpreh se “çdo armëpushim duhet të jetë gjithëpërfshirës në të gjithë territorin libanez dhe nuk duhet t’i lejojë armikut izraelit asnjë liri lëvizjeje”.

Izraeli ka rënë dakord për një armëpushim të përkohshëm 10-ditor, por Kryeministri Benjamin Netanyahu këmbënguli se trupat izraelite do të qëndrojnë në “zonën e sigurisë” brenda territorit libanez përgjatë gjithë kohëzgjatjes së armëpushimit./ BBC/

Në hyrjen kryesore të qytetit jugor të Khiamit nga Bekaa, automjetet e ushtrisë libaneze bllokojnë rrugën. Ushtarët izraelitë janë ende duke pushtuar pjesë të këtij qyteti strategjik dhe banorëve u ndalohet hyrja në të.

Një burrë rreth të 70-tave qëndronte pranë barrierës dhe shprehet për BBC-në se shtëpia e tij është vetëm pak metra larg – por ai nuk mund të arrijë deri te ajo. “Shpresojmë që së shpejti,” shton ai.

Më pas, një zonjë nga ky qytet shpjegon se ajo e di që shtëpia e saj është shkatërruar. “Nuk ka rëndësi,” thotë ajo. “Shtëpitë mund të rindërtohen. Dhe gjithçka është e pavlerë krahasuar me një pikë gjaku të një dëshmori,” tha ajo duke iu referuar luftëtarëve të Hezbollahut që i rezistuan pushtimit izraelit.

Gjatë rrugës, pamë një kamion të ngarkuar me gjërat personale të një familjeje. Ata po ktheheshin në qytetin e tyre në Nabatiyeh. “U larguam para 25 ditësh dhe jemi mirënjohës për të gjithë ata që ndihmuan në përfundimin e luftës.”

E pyeta nëse mendonte se armëpushimi do të zgjaste. Ai u përgjigj: “Do të zgjasë – falë atyre që e imponuan këtë.”

Ushtria izraelite ka njoftuar se gjatë ditës së djeshme ka shkatërruar rreth 70 objekte të Hezbollahut në rajonin Bint Jbeil në jug të Libanit, veprim ky që pason deklaratën e kryeministrit Benjamin Netanyahu se Izraeli është pranë eliminimit të një baze të rëndësishme të grupit në këtë zonë, raporton BBC.

Përveç operacioneve tokësore, Forcat Mbrojtëse të Izraelit bënë të ditur se marina e tyre ka ndalur me sukses një sulm me dron të lëshuar nga Libani gjatë natës, duke e çuar në rreth 40 numrin e operacioneve mbrojtëse ajrore të realizuara nga ekipet detare që nga fillimi i konfliktit.

Paralelisht me zhvillimet ushtarake, anëtarja e kabinetit izraelit të sigurisë, Galia Gamliel, ka deklaruar për radion e ushtrisë se kryeministri Netanyahu pritet të bisedojë sot me presidentin e Libanit, Joseph Aoun.

Ky njoftim vjen pas një postimi të presidentit amerikan Donald Trump në rrjetet sociale, ku paralajmërohej një kontakt mes udhëheqësve të të dyja vendeve, ndonëse zyrtarë nga zyra presidenciale e Libanit i kishin thënë paraprakisht BBC-së se nuk ishin në dijeni për ndonjë komunikim të planifikuar me palën izraelite./BBC/