Mbretëresha e popit, Madonna, ka anuluar performancën e saj të planifikuar në “London Pride” për shkak të shqetësimeve për sigurinë.

Artistja, e cila aktualisht po promovon albumin e saj të ri “Confessions on a Dance Floor: Part II”, ishte paraparë të ngjitej në skenën e Trafalgar Square në Londër së bashku me Beth Ditto dhe MNEK, në kuadër të “Pride Parade”, një nga ngjarjet më të mëdha vjetore në mbështetje të komunitetit LGBTQ+.

Megjithatë, performanca u anulua në minutën e fundit.

Sipas një burimi për “The Sun on Sunday”, vendimi u mor pasi organizatorët dhe ekipi i këngëtares vlerësuan se prania e saj mund të shkaktonte turma të pakontrollueshme dhe të rrezikonte sigurinë në një aktivitet që tashmë mblidhte qindra mijëra pjesëmarrës.

“Madonna ishte shumë e emocionuar që do të performonte, sepse është një mbështetëse e madhe e të drejtave LGBTQ+. Por ekipi i saj vendosi në minutën e fundit të mos merrte pjesë për shkak të numrit të madh të njerëzve dhe frikës se mbërritja e saj mund të prishte organizimin e eventit”, citohet të ketë thënë burimi.

Edicioni i sivjetmë i “London Pride” mblodhi qindra mijëra pjesëmarrës dhe vizitorë në qendër të kryeqytetit britanik./A.K/

Koncerti i reperit amerikan Kanye West, që do të mbahet më 11 korrik në Tiranë, ka zgjuar interes të madh edhe jashtë Shqipërisë. Sipas kryeministrit Edi Rama, numri i biletave të blera nga shtetas të huaj për këtë event ka tejkaluar atë të finales së Conference League, e zhvilluar më parë në kryeqytetin shqiptar.

Përmes një postimi në rrjetet sociale, Rama publikoi pamje nga stadiumi i ndërtuar posaçërisht për koncertin, duke bërë të ditur se përgatitjet kanë hyrë në fazën përfundimtare.

“Mirëmëngjes, dhe me stadiumin e ngritur enkas për koncertin më të madh që ky vend ka parë ndonjëherë, për të cilin janë blerë nga të huajt më shumë bileta sesa për finalen e Conference League në Tiranë, e i cili do ta kthejë Tiranën të shtunën, më 11 korrik, në kryeqytetin botëror të spektaklit muzikor, ju uroj një ditë të mbarë”, ka shkruar Rama.

“Eagle Stadium”, i vendosur pranë autostradës Tiranë–Durrës, pritet të mirëpresë rreth 60 mijë spektatorë, duke u konsideruar si eventi më i madh muzikor i organizuar ndonjëherë në Shqipëri. Çmimet e biletave nisin nga 120 euro, ndërsa paketat VIP arrijnë deri në 339 euro.

Ndalimi në Tiranë është pjesë e turneut botëror të Kanye West për vitin 2026, një turne që në disa vende është shoqëruar me polemika.

Një muaj më parë, artisti performoi në Stadiumin Olimpik “Atatürk” në Stamboll. Sipas organizatorëve, koncerti u ndoq nga rreth 118 mijë spektatorë, ndërsa vetë West deklaroi se ishte vendosur një rekord për numrin më të madh të të pranishmëve në një koncert stadiumi.

Koncerti në Tiranë organizohet nga kompania “Streetlife”, me seli në Berlin, e njohur për organizimin e performancave të artistëve ndërkombëtarë si 50 Cent, Drake, Snoop Dogg, Kendrick Lamar dhe Nicki Minaj. Në Shqipëri, eventi mbështetet nga Redcloud dhe Live Label./A.K/

Harry Styles ka hyrë në historinë e muzikës live, pasi është shpallur rekordmen i ri i Guinness World Records për numrin më të madh të koncerteve të njëpasnjëshme në stadiumin Wembley, duke realizuar 12 shfaqje të gjitha të shitura.

Këngëtari britanik theu rekordin e mëparshëm të grupit Coldplay, i cili kishte mbajtur 10 koncerte radhazi në Wembley në vitin 2025.

Përfaqësuesi i Guinness World Records, Will Munford, tha se rekordi i Styles është dëshmi e përmasës, ambicies dhe ndikimit kulturor të performancave të tij live, si dhe e lidhjes së veçantë që ai ka me fansat.

Styles, 32 vjeç, nisi koncertet në Londër më 12 qershor në kuadër të turneut “Together, Together”, ndërsa shfaqja e fundit u mbajt të shtunën para rreth 80 mijë spektatorëve.

Gjatë koncertit përmbyllës, ai ndau një moment emocional duke kujtuar grupin One Direction.

“Nuk do të isha në këtë skenë pa katër miqtë e mi që ishin një pjesë e madhe e këtij rrugëtimi. Dua të falënderoj Niall, Louis, Zayn dhe mikun tim të dashur Liam për gjithçka që mësova gjatë asaj kohe. Asgjë nga kjo nuk do të ishte e mundur pa ju”, u shpreh ai.

One Direction u formua në vitin 2010 në emisionin “The X Factor” dhe hyri në pauzë të pacaktuar në vitin 2016. Ish-anëtari Liam Payne ndërroi jetë në vitin 2024, në moshën 31-vjeçare.

Styles kujtoi gjithashtu se kanë kaluar 16 vjet që nga koha kur mori pjesë në “The X Factor”, i cili u zhvillua pranë Wembley-t.

“Sa herë që kthehem në Wembley, kjo ka një domethënie të jashtëzakonshme për mua. Faleminderit shumë”, tha ai.

Karrierën solo e nisi në vitin 2017 dhe deri më tani ka fituar gjashtë çmime Brit Awards, tre Grammy dhe dy Ivor Novello Awards. Albumi i tij i katërt studio, Kiss All The Time. Disco, Occasionally, u publikua në janar të këtij viti.

Për të shënuar arritjen historike, Wembley Stadium zbuloi një baner përkujtimor me mbishkrimin: “12 koncerte. Një rekord. Një vend në historinë e Wembley-t”.

Fillimisht turneu në Londër ishte planifikuar me gjashtë koncerte, por për shkak të kërkesës së lartë u zgjerua në 12 net. Në këtë turne, Styles zgjodhi të performojë vetëm në Londër dhe në asnjë qytet tjetër të Mbretërisë së Bashkuar./BBC//A.K/

Tirana po përgatitet të mirëpresë një nga ngjarjet më të mëdha muzikore të organizuara ndonjëherë në Shqipëri, me koncertin e reperit amerikan Kanye West, i planifikuar të mbahet më 11 korrik.

Interesi për këtë event ka qenë i jashtëzakonshëm, me një numër të madh biletash të shitura si nga publiku vendas, ashtu edhe nga vizitorë ndërkombëtarë.

Kryeministri i Shqipërisë, Edi Rama, ka publikuar pamje nga stadiumi i ndërtuar posaçërisht për këtë koncert, duke theksuar se interesi ndërkombëtar ka qenë edhe më i madh se ai për finalen e UEFA Conference League që u zhvillua në Tiranë.

Sipas tij, gjatë fundjavës së koncertit kryeqyteti shqiptar do të shndërrohet në një qendër të rëndësishme të muzikës dhe argëtimit.

“Eagle Stadium”, i ndërtuar pranë autostradës Tiranë–Durrës, është projektuar për të pritur rreth 60 mijë spektatorë. Organizatorët e konsiderojnë këtë event si koncertin më të madh muzikor të mbajtur ndonjëherë në Shqipëri.

Çmimet e biletave variojnë nga 120 euro për hyrjet standarde deri në 339 euro për paketat VIP.

Koncerti në Tiranë është pjesë e turneut botëror të Kanye West për vitin 2026, i cili ka tërhequr vëmendje të madhe ndërkombëtare. Vetëm një muaj më parë, artisti performoi në Stadiumin Olimpik Atatürk në Stamboll, ku organizatorët raportuan pjesëmarrjen e rreth 118 mijë spektatorëve.

Organizimin e koncertit në Tiranë e ka marrë përsipër kompania “Streetlife”, me seli në Berlin, e njohur për organizimin e koncerteve të artistëve ndërkombëtarë si 50 Cent, Drake, Snoop Dogg, Kendrick Lamar dhe Nicki Minaj./A.K/