Presidenti i Shteteve të Bashkuara, Donald Trump, në një intervistë ekskluzive për revistën The Atlantic, ndau reflektimet e tij mbi ndryshimin mes dy mandateve presidenciale, duke e përshkruar mandatin aktual si një periudhë me ndikim global dhe autoritet më të konsoliduar.

“Po argëtohem shumë, duke marrë parasysh seriozitetin e punës që bëj,” deklaroi ai. “Herën e parë, kisha dy sfida, të drejtoja vendin dhe të mbijetoja. Tani, po drejtoj vendin dhe gjithë botën. Askush nuk mund të më ndalojë,” deklaroi Trump.

Trump u shpreh se përballja me atë që ai e quajti “një sistem të korruptuar” karakterizoi mandatin e tij të parë, ndërsa tashmë ndihet më i lirë për të ushtruar ndikimin e tij politik dhe ndërkombëtar.

Që nga rikthimi në Shtëpinë e Bardhë në janar, Presidenti Trump ka ndërmarrë një sërë veprimesh ekzekutive, veçanërisht në fushën e emigracionit dhe tregtisë. Politikat e tij mbi tregtinë, përfshirë vendosjen e tarifave të reja ndaj vendeve partnere, kanë shkaktuar tronditje në tregjet globale dhe reagime të ashpra nga udhëheqësit ndërkombëtarë. Disa prej këtyre tarifave janë pezulluar përkohësisht deri në muajin korrik.

Lëvizjet e fundit të administratës, përfshirë komentet rreth Groenlandës dhe sugjerimet për një “bashkim” hipotetik me Kanadanë, kanë rritur tensionet me aleatët tradicionalë të SHBA-së. Në të njëjtën kohë, Trump ka përqendruar përpjekjet e tij diplomatike në ndërmjetësimin e një armëpushimi mes Rusisë dhe Ukrainës.

Në intervistë, presidenti komentoi gjithashtu spekulimet rreth një kandidature të mundshme për një mandat të tretë, një ide e pazakontë në kontekstin e kufizimeve kushtetuese.

“Nuk është diçka që po e kërkoj të ndodhë. Do të ishte jashtëzakonisht e vështirë për t’u realizuar,” tha ai.

Intervista u zhvillua me kryeredaktorin e The Atlantic, Jeffrey Goldberg, i cili së fundmi ishte përfshirë në një bisedë konfidenciale mes zyrtarëve të lartë amerikanë mbi një operacion të mundshëm ushtarak ndaj militantëve Houthi.

Ndërkohë, Presidenti Trump pritet të vizitojë sot shtetin e Michiganit për të mbajtur një tubim elektoral, ku do të përkujtojë 100 ditët e para të mandatit të tij të dytë.

“Presidenti Trump është i emocionuar që të kthehet në shtetin e madh të Michiganit për të festuar 100 DITËT E PARA!” shkroi zëdhënësja e Shtëpisë së Bardhë, Karoline Leavitt, në një postim në platformën X.

Partia Liberale e Mark Carney ka fituar zgjedhjet kanadeze dhe pritet të formojë qeverinë e ardhshme.

Megjithatë sipas BBC mbetet shumë e vështirë të thuhet nëse Carney ka mbështetje të mjaftueshme për të siguruar shumicën në parlament, apo do të duhet të mbështetet te partitë e tjera për të qeverisur.

Konservatorët, të udhëhequr nga Pierre Poilievre, duket se kanë arritur fitore të mëdha, por prapëseprapë u mundën në garën vendimtare.

Në selitë e dy partive rivale, pati gëzim midis liberalëve dhe lot nga konservatorët ndërsa ata u larguan me shpejtësi nga vendi i ngjarjes.

Rezultati i parashikuar përfundon një kthesë mahnitëse për Partinë Liberale, e cila po dobësohej në sondazhe vetëm tre muaj më parë përpara se Carney të zëvendësonte Justin

Trudeau si udhëheqës dhe Presidenti i SHBA-së Trump të prishte marrëdhëniet.

Se si t’i përgjigjeshe Trumpit ishte çështja përcaktuese e fushatës, dhe Carney, një ish-guvernator i Bankës së Anglisë, shfrytëzoi zemërimin e përhapur ndaj politikës tregtare dhe kërcënimeve të presidentit amerikan.

Furnizimi me energji elektrike u rikthye në shumicën e Spanjës dhe Portugalisë më 29 prill pasi një ndërprerje masive e rrymës goditi gadishullin Iberik, duke lënë pasagjerët të bllokuar në trena dhe qindra ashensorë, ndërsa miliona njerëz mbetën pa sinjal në telefonat e tyre dhe pa qasje në internet.

Operatori i energjisë REE tha se energjia elektrike ishte rikthyer në më shumë se 90 për qind të territorit të Spanjës kontinentale, në orët e para të së martës. Dritat u ndezën sërish në Madrid dhe në kryeqytetin e Portugalisë.

Pothuajse asnjë cep i gadishullit, i cili ka një popullsi të përbashkët prej gati 60 milionë banorësh, nuk i shpëtoi ndërprerjes të rrymës. Megjithatë, ende nuk dihet pse pati ndërprerje të energjisë, ndonëse në rrjetet sociale u përhapën thashetheme se kishte pasur një sulm kibernetik.

Kryeministri portugez, Luis Montenegro, tha se burimi i ndërprerjes “ka gjasa të jetë në Spanjë”. Kryeministri spanjoll, Pedro Sanchez, tha se “të gjitha shkaqet e mundshme” janë duke u analizuar dhe paralajmëroi publikun që “të mos spekulojë”, për shkak të rrezikut të “dezinformimit”.

Sanchez tha se rreth 15 gigavat energji elektrike, më shumë se gjysma e konsumit në atë moment, “u zhdukën papritur” brenda rreth pesë sekondash.

Kryeministri spanjoll nuk ishte në gjendje të thoshte se kur do të rikthehej plotësisht energjia në Spanjë dhe paralajmëroi se disa punëtorë do të duhej të qëndronin në shtëpi të martën. Kryeministri portugez Montenegro, tha se energjia në Portugali do të rikthehej “brenda disa orëve”.

Rreth 6.2 milionë nga 6.5 milionë familje në Portugali u furnizuan sërish me energji gjatë natës, tha operatori kombëtar i rrjetit elektrik.

Ndërprerja e rrymës ndikoi për pak kohë edhe në jugperëndim të Francës, ndërsa në Marok pati ndërprerje të shërbimeve të disa operatorëve të internetit dhe sistemeve të regjistrimit në aeroporte.

Kryeministri spanjoll Sanchez, tha se ndërprerja e energjisë elektrike mesditën e së hënës shkaktoi “ndërprerje serioze” dhe “humbje milionëshe ekonomike në biznese, kompani dhe industri”.

Komisioni Evropian tha se ishte në kontakt me Spanjën dhe Portugalinë lidhur me ndërprerjen e rrymës. Ndërkaq, presidenti i Këshillit Evropian, Antonio Costa, shkroi në X se “nuk ka tregues për ndonjë sulm kibernetik”.

Ndërprerjet e rrymës shkaktuan anulimin e shumë fluturimeve nga Madridi, Barcelona dhe Lisbona, sipas organizatës evropiane të trafikut ajror, Eurocontrol.

Edhe shtetet e tjera në mbarë botën viteve të fundit janë përballur me ndërprerje masive të rrymës.

Ndërprerje të rrymës kishte në Tunizi shtatorin e vitit 2023, në Shri Lankë në gusht të vitit 2020, dhe në Argjentinë e Uruguai në qershor të vitit 2019. Edhe India në korrik të vitit 2012 ishte përballur me një ndërprerje masive të furnizimit me rrymë.

Në Evropë, nëntorin e vitit 2006, 10 milionë persona kishin mbetur pa rrymë për një orë në Francë, Gjermani, Belgjikë, Holandë, Itali dhe Spanjë. Ndërprerja kishte ndodhur për shkak të problemeve me rrjetin në Gjermani./REL/

Diplomati më i lartë i Iranit, Abbas Araqchi, e ka akuzuar kryeministrin izraelit, Benjamin Netanyahu, se po përpiqet ta diktojë politikën amerikane ndaj Iranit, pasi Netanyahu përsëriti thirrjen e tij për shpërbërjen e plotë të programit bërthamor të Teheranit.

Negociatorët iranianë dhe amerikanë përfunduan një rund të tretë të bisedimeve indirekte mbi programin bërthamor të Iranit më 26 prill, ndërsa një raund i katërt është planifikuar për më 3 maj, me shumë mundësi në një vend evropian.

Duke folur në Jerusalem një ditë pas bisedimeve, Netanyahu tha se çdo marrëveshje me Iranin duhet të synojë shpërbërjen e plotë të programit bërthamor dhe gjithashtu të trajtojë kapacitetet raketore të Teheranit.

“Marrëveshja e vërtetë që funksionon është marrëveshja që eliminon kapacitetin e Iranit për të pasuruar uranium për armë bërthamore”, tha Netanyahu, duke shtuar se një marrëveshje e mirë duhet gjithashtu “të përfshijë parandalimin e raketave balistike”.

Duke shkruar në X, ministri i Jashtëm iranian, Abbas Araqchi, tha se ishte “tronditëse… se sa hapur Netanyahu po i dikton tashmë presidentit Trump se çfarë mund dhe çfarë nuk mund të bëjë në diplomacinë e tij me Iranin”.

Diplomati iranian theksoi se vendi i tij ishte “mjaftueshëm i fortë dhe i sigurt” për të “penguar çdo përpjekje të aktorëve të jashtëm dashakeqës për të sabotuar politikën e tij të jashtme ose për t’i diktuar drejtimin e saj”.

“Ne mund të shpresojmë vetëm që homologët tanë amerikanë të jenë po aq të vendosur”, shtoi ai.

Komentet e Netanyahut erdhën pasi një shpërthim vdekjeprurës goditi portin Shahid Rajaei në Iran, duke vrarë të paktën 46 njerëz dhe duke plagosur më shumë se 1.000 të tjerë.

Disa spekulojnë se shpërthimi kishte lidhje me një dërgesë të një përbërësi kimik të përdorur për të prodhuar karburant për raketa balistike, megjithëse Irani mohon se ndonjë lloj karburanti ishte ruajtur në terminalin e konteinerëve.

Farzin Nadimi, një bashkëpunëtor i lartë në Institutin e Uashingtonit, i tha Radios Farda të REL-it se ngjyra portokalli e ndezur e zjarrit fillestar ishte në përputhje me djegien e një komponenti që përdoret në karburantin për raketa.

Të dhënat publike sugjerojnë se Irani ka marrë dërgesa të këtij kimikati në port më herët gjatë këtij viti.

Sipas disa raporteve, administrata e Donald Trumpit më parë e kishte penguar Netanyahun të ndërmerrte sulme ndaj objekteve bërthamore të Teheranit. Megjithatë, presidenti amerikan ka thënë se vetë ai do të ishte “në krye të sulmit” drejt një lufte me Iranin nëse nuk do të mund të arrinte një marrëveshje.

Ali Shamkhani, një ndihmës i lartë i liderit suprem të Iranit dhe ish-këshilltar i sigurisë kombëtare, paralajmëroi më 28 prill se Izraeli do të përballej me “pasoja të paimagjinueshme” nëse do të sulmonte objektet bërthamore të Iranit.

“Pyetja është: A janë këto kërcënime rezultat i veprimit të pavarur të Izraelit, apo janë të koordinuara me Trump për të shtyrë përpara negociatat me Iranin?” shkroi ai në X./REL/