Ministri në detyrë i Financave, Hekuran Murati, ka bërë të ditur se buxheti i ndarë për komunat e Kosovës pritet të rritet në 907 milionë euro në vitin 2027.

Murati ka njoftuar se Ministria e Financave javën e kaluar ka lëshuar qarkoren e dytë buxhetore për komunat, përmes së cilës përcaktohen kufijtë buxhetorë për secilën komunë.

Sipas tij, rritja e buxhetit komunal është mundësuar nga rritja e të hyrave buxhetore.

“Falë performancës së jashtëzakonshme të të hyrave buxhetore përgjatë viteve të fundit, është krijuar hapësira fiskale për rritje të vazhdueshme të buxhetit që u ndahet komunave”, ka shkruar Murati.

Ai ka krahasuar nivelin e buxhetit komunal me atë të vitit 2021, duke theksuar se atëherë komunat kishin në dispozicion 546 milionë euro.

“Nga 546 milionë euro sa e kishim gjetur në vitin 2021, buxheti i ndarë për komunat do të shkojë në 907 milionë euro në vitin 2027”, ka deklaruar Murati.

Rritja e paralajmëruar për vitin e ardhshëm përfaqëson një shtesë prej rreth 361 milionë eurosh krahasuar me nivelin e vitit 2021. /A.K/

UBT forcon edhe më tej pozitën ndërkombëtare në sport dhe shëndetësi. Instituti i Mjekësisë Sportive (ISM) në UBT është pranuar zyrtarisht nga Federata Ndërkombëtare për Mjekësinë Sportive (FIMS) si Collaborating Centre of Sports Medicine, duke e bërë pjesë të rrjetit global të institucioneve të specializuara në këtë fushë.

Kjo njohje i hap UBT-së mundësi të reja për bashkëpunim ndërkombëtar, kërkim shkencor, shkëmbim të përvojave dhe zhvillim profesional, duke sjellë më afër Kosovës ekspertizën dhe praktikat bashkëkohore të mjekësisë sportive.

Përfshirja në rrjetin e FIMS është pjesë e vizionit të UBT-së për të ndërtuar një ekosistem ku sporti, shëndetësia, edukimi dhe shkenca janë të integruara. Në këtë ekosistem, një rol të rëndësishëm ka edhe Fakulteti i Shkencave të Sportit dhe Lëvizjes, duke lidhur përgatitjen akademike me performancën sportive, rehabilitimin dhe mjekësinë sportive.

Për të rinjtë nga Kosova dhe rajoni, kjo do të thotë më shumë mundësi për të mësuar, bashkëpunuar dhe zhvilluar karrierën në një fushë që po merr gjithnjë e më shumë rëndësi në botë.

Kjo arritje i bashkohet edhe aktiviteteve të tjera të UBT-së në këtë fushë, përfshirë Konferencën Ndërkombëtare për Mjekësinë Sportive, e cila këtë vit zhvillohet për herë të dytë, në muajin tetor, me pjesëmarrjen e ekspertëve vendorë dhe ndërkombëtarë.

Tre partitë opozitare shqiptare – PDK, LDK dhe Aleanca – kanë refuzuar ftesën e ushtrueses së detyrës së presidentes, Albulena Haxhiu, për takimin konsultativ rreth zgjedhjes së presidentit dhe formimit të institucioneve.

Takimi është mbajtur të martën në orën 09:00, ndërsa në të kanë marrë pjesë përfaqësues të partive në pushtet dhe të subjekteve politike të komuniteteve.

PDK-ja dhe Aleanca e kishin refuzuar pjesëmarrjen që të shtunën, duke argumentuar se fillimisht duhet të vazhdojë seanca konstituive e Kuvendit. PDK-ja ka kritikuar rolin e Haxhiut në organizimin e takimit, ndërsa Aleanca ka kundërshtuar edhe ftesën e kryeministrit në detyrë, Albin Kurti, për liderët e partive politike.

Të hënën, edhe LDK-ja njoftoi se nuk do të merrte pjesë në takim, duke e konsideruar Haxhiun në këtë fazë vetëm deputete të Kuvendit. Megjithatë, LDK-ja është shprehur e gatshme të diskutojë me Albin Kurtin për një zgjidhje politike dhe zgjedhjen e një presidenti konsensual.

Ftesa e Haxhiut kishte për qëllim diskutimin për zhvillimet aktuale politike e institucionale dhe arritjen e një marrëveshjeje për një president konsensual, si dhe formimin e institucioneve të tjera kushtetuese.

Ngërçi politik lidhet ngushtë me mosvazhdimin e seancës konstituive të Kuvendit. Deputetët kanë dhënë betimin, por seanca ka mbetur pezull në pikën për zgjedhjen e kryetarit të Kuvendit, pasi Albin Kurti ka kërkuar fillimisht marrëveshje për presidentin.

LVV-ja dhe partnerët e saj nga komunitetet kanë numrat e nevojshëm për konstituimin e Kuvendit dhe formimin e Qeverisë, por për zgjedhjen e presidentit nevojitet pjesëmarrja e së paku 80 deputetëve në dy raundet e para të votimit.

Nëse presidenti nuk zgjidhet brenda afatit kushtetues prej 60 ditësh, Kuvendi shpërndahet dhe vendi shkon në zgjedhje të reja.

Kriza institucionale në Kosovë vazhdon prej një periudhe të gjatë, me disa procese zgjedhore dhe përpjekje të pasuksesshme për krijimin e institucioneve funksionale./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Sipas ministrisë së Shëndetësisë, në Shqipëri u vranë ose u plagosën 10.141 veta

18 gusht 1993

UNESCO e shqetësuar për situatën në arsimin e Kosovës

Në adresë të Këshillit për Mbrojtjen e të Drejtave dhe Lirive të Njeriut në Prishtinë, këto ditë erdhi një shkresë nga drejtori i Zyrës së Normave Ndërkombëtare dhe i Punëve Juridike të UNESCO-s, z.M.Paszkowski.

Zyrtari i UNESCO-s ia bën me dije KMDLNJ-së dhe veprimtarëve të tij që merren me çështje të arsimit se pritet që në fillim të tetorit problemet e arsimit shqip në Kosovë të rishqyrtohen nga ana e këtij organi të OKB-së. Po ashtu bëhet me dije se në këtë mbledhje të UNESCO-s nuk do të marr pjesë përfaqësuesi i qeverisë së Jugosllavisë së vetëshpallur.

Komiteti ka vendosur gjithashtu që ta lus drejtorin e përgjithshëm të UNESCO-s që të obligohet zyrtarisht dhe që në bashkëpunim me organet përkatëse të Kombeve të Bashkuara të angazhohet me qëllim që të kontribuojë për zgjidhjen e problemeve të parashtruara në informatat rreth gjendjes në arsimin shqip të Kosovës të KMDLNJ-së, thuhet ndër të tjera në letrën që zoti M.Paszkowski ia dërgoi këtij këshilli.

 18 gusht 1994

Situatë e tensionuar nga aksioni i forcave serbe në Zhabelin Plak të Gjakovës

Gjatë një aksioni të policisë serbe sot në fshatin Zhabeli Plak në komunën e Gjakovës përpak nuk u shkaktua gjakderdhje. Mirëpo në fshat mbretëron gjendje e tensionuar dhe frike nga ndonjë sulm i ri eventual i forcave serbe.

Komisioni për informim i Degës së LDK-së në Gjakovë njoftoi se sot rreth orës 4:00 të mëngjesit, një ekspeditë e policisë serbe e përbërë nga dhjetë policë keqtrajtoi për rreth 40 min. banorë të fshatit Zhabeli Plak.

Nën pretekst të kërkimit të armëve, pasi mori një pushkë në shtëpinë e Selim Maliqit, policia ndërhyri në shtëpinë e Adem Maliqit.

Me qëllim që të interesohej se çka po ndodhte në familjen e të afërmit të tij, ngat shtëpisë së Ademit shkoi, Ismeti, i cili me një shati në krah ishte nisur për të shkuar për punë në arën e tij. Policët i urdhëruan atij në gjuhën serbe të hidhte shatin në tokë, mirëpo, Ismeti nuk e bëri këtë, pasi ai nuk e di gjuhën serbe. Pas kërcënimeve të sërishme dhe shpjegimit të një fqiut të tij, ai më vonë e lëshoi shatin në tokë. Mirëpo policët filluan ta godasin Ismetin dhe pastaj u shkaktua një përleshje mes tij dhe policëve.

Në ndërkohë në vendin e ngjarjes arritën edhe disa banorë të fshatit dhe pati rrezik që përleshja me policinë të mirrte përmasa gjithnjë e më të gjera.

Policët shtinë edhe me armë zjarri dhe rrahën disa banorë të fshatit, por për fat nuk pësoi askush nga të shtënat.

Ismet Maliqi, në përleshje e sipër ia mori njërit prej policëve automatikun dhe ia hodhi më vonë para këmbëve.

Njoftohet se janë lënduar Ismet Maliqi, babai i tij Ramë Maliqi dhe banorë të tjerë.

Është arrestuar Adem Maliqi.

Komisioni për Informim i Degës së LDK-së në Gjakovë njofton se gjendja në fshatin Zhabeli Plak të Gjakovës vazhdon të jetë edhe më e tensionuar nga frika e ndonjë aksioni të ri nga ana e policisë serbe.

18 gusht 1995

Në Mitrovicë u instaluan rreth 200 refugjatë serbë

Dje, rreth orës 17:00 në stacionin e trenit në Mitrovicë, arritën rreth 200 refugjatë serbë nga Kroacia, njofton KI i Degës së LDK-së në Mitrovicë.

Ata pastaj, me 6 autobusë dhe disa kamionë u bartën deri tek palestra e sporteve prej ku u shpërndanë në drejtime tjera.

Tre autobusë me refugjatë u nisën në drejtim të Zubin-Potokut, 2 në drejtim të Vushtrrisë, kurse 1 në drejtim të Zveçanit.

Nga Mitrovica gjithashtu njoftohet se dje dhe pardje inspektorët komunalë serbë ua shpërndanë firmave private të kësaj komune vendimet që në afat prej dhjetë ditësh të paguajnë nga 500 dinarë, në emër të njëfarë takse komunale.

Supozohet se këto të holla do të përdoren për instalimin e refugjatëve serbë.

Ndërkaq, sot rreth orës 9:00, shtatë qytetarë që kishin dalë për të shitur rërë në tregun e këtushëm, policia i detyroi ta dërgojnë rërën në oborrin e fabrikës “Betonjerka”.

Pronarët e rërës veç që u plaçkitën edhe u provokuan nga policia pse nuk japin ndihma për refugjatët.

Në Kamenicë u instaluan 80 refugjatë nga Kroacia

Në Kamenicë, më 15 gusht, u instaluan 80 refugjatë serbë nga Kroacia, njofton Komisioni për Informim i Degës së LDK-së.

Refugjatët serbë u vendosën në Shtëpinë e Kulturës, në hotelin “Mineral”, në konviktin e nxënësve, në Shtëpinë e Shëndetit, si dhe në lokalet e shkollës fillore “Fan S.Noli” në Kamenicë.

Bëhet e ditur se gjatë ditës së djeshme, një refugjat serb ka ikur, çka dëshmon se ata po instalohen në Kosovë kundër dëshirës së tyre. Pjesa dërmuese e këtyre refugjatëve janë pleqë e fëmijë.

18 gusht 1997

Sipas ministrisë së Shëndetësisë, në Shqipëri u vranë ose u plagosën 10.141 veta

Ministria shqiptare e Shëndetësisë shpalli dje shifrat e të vrarëve e të plagosurve të cilët arritën në spitale, kështu që këto shifra, sipas ministrisë nuk janë të plota pasi nuk përfshinë rastet të cilat nuk kanë arritur në spitale. Kështu, në mënyrë të ndryshme, e më së shumti me armë zjarri, u plagosën 9081 veta, ndërsa humbën jetën 910 veta. Nga qytetet ku u shënua numri më i madh i të plagosurve, kjo ministri veçon Korçën me 960, Beratin me 864, Vlorën me 725, ndërsa numri më i madh i të plagosurve të paraqitur në spitale është ai në Spitalin Ushtarak të Tiranës ku arritën 1124 të plagosur.

Nga 960 të vrarë, më së shumti pati në Vlorë 107, Fier 100, Elbasan 81 dhe Tiranë 80.

Nga numri i përgjithshëm i të plagosurve, u shënuan 1232 raste të plagosjes së fëmijëve, ndërsa shikuar nëpër rrethe, më së shumti fëmijë u plagosën në Peshkopi 148, Korçë 144, Gjirokastër 130 dhe Tiranë 122, njofton “Bujku”.

Që nga fillimi i trazirave në Shqipëri, në fillim të këtij viti, sipas disa shënimeve zyrtare, janë vrarë ose kanë humbur jetën në fatkeqësi të ndryshme, mbi 2. 000 persona. Ndërsa , burime jozyrtare thonë se kjo shifër mund të jetë më e lartë së paku edhe për 1. 000 të vrarë!

18 gusht 1998

Katër shqiptarë nga komuna e Deçanit akuzohen për “terrorizëm”

Prokuroria serbe e Pejës bëri kërkesën për fillimin e hetimeve kundër 4 shqiptarëve nga komuna e Deçanit të cilët i akuzon për “terrorizëm”. Këta janë: Izet Zenuni nga fshati Gramoçel, me punë të përkohshme në Lucernë të Zvicrës, Brahim Isufi nga i njëjti fshat, me punë të përkohshme në Dyzeldorf të Gjermanisë, Jakup Zekaj, nga fshati Carrabreg i Epërm dhe Sylejman Ukëhaxhaj nga po ky fshat.

Ata akuzohen se si pjesëtarë të UÇK-së disa herë kanë qenë në Shqipëri për të sjellë armë për pjesëtarët e UÇK-së me të cilat pastaj janë sulmuar policët serbë. Ata janë kapur më 2 gusht, kur nëpër malet e Strellcit provuan të sjellin armë dhe municion nga Shqipëria.

Raporti i KMDLNJ-së për muajin korrik

Këshilli për Mbrojtjen e të Drejtave dhe Lirive të Njeriut (KMDLNJ) në Prishtinë publikoi sot raportin e pasojave të ofensivës së forcave serbe në Kosovë gjatë muajit korrik.

Sipas të dhënave me të cilat disponon ky këshill gjatë këtij muaji në Kosovë janë vrarë, masakruar ose ekzekutuar 201 shqiptarë, janë plagosur 152, janë keqtrajtuar në mënyra të ndryshme 1566, janë marrë peng, janë kidnapuar ose janë zhdukur 185 vetë, janë arrestuar në mënyrë arbitrare 196 vetë, ndërsa janë rrahur rëndë 275 shqiptarë, 26 prej të cilëve kanë pësuar lëndime të rënda trupore. Raporti dëshmon se dhunës së aparatit shtetëror serb i janë nënshtruar edhe fratë e fëmijët. Sipas të dhënave të deritashme, 102 gra janë vrarë, janë plagosur, janë arrestuar, janë dënuar, janë keqtrajtuar ose janë zhdukur gjatë korrikut, ndërsa 12 fëmijë janë keqtrajtuar.

Sipas burimeve të KMDLNJ-së muajin e kaluar forcat serbe kanë detyruar zhvendosjen e 350. 000 shqiptarëve nga shtëpitë e veta, shumë prej të cilëve nuk kanë as ku të kthehen pasi shtëpitë e tyre janë plaçkitur, janë rrënuar dhe janë djegur nga forcat serbe.