Japonia po dërgon dy avionë shtarakë në Afrikën Lindore për një operacion të mundshëm evakuimi të shtetasve të saj nga Lindja e Mesme, në mes të tensioneve në rritje mes Iranit dhe Izraelit, deklaroi të enjten ministri i Mbrojtjes, Gen Nakatani.

Dy avionët transportues C-2 të Forcave të Mbrojtjes Vetjake (SDF), me rreth 120 anëtarë ekuipazhi, do të fluturojnë drejt një baze të SDF-së në vendin e Bririt të Afrikës, Xhibuti, dhe do të qëndrojnë aty në gatishmëri, raportoi agjencia Kyodo News me bazë në Tokio.

Vendimi u mor pas një kërkese nga ministri i Jashtëm, Takeshi Iwaya.

Avionët pritet të nisen nga Japonia të shtunën, sipas Anadolu.

“Situata në Lindjen e Mesme është bërë më e tensionuar pasi Izraeli dhe Irani vazhdojnë sulmet e ndërsjella,” tha Nakatani.

Ai theksoi se qeveria “është ende në fazën përgatitore për një transport të mundshëm” të shtetasve japonezë.

Ministria po përpiqet të konfirmojë se sa nga rreth 280 shtetasit japonezë në Iran dhe 1,000 në Izrael dëshirojnë të largohen nga këto vende.

Japonia po planifikon gjithashtu të evakuojë me autobus rreth 90 shtetas dhe anëtarë të familjeve të tyre nga kryeqyteti iranian Teheran drejt Azerbajxhanit fqinj, ndërsa po u ofron gjithashtu atyre që jetojnë në Izrael mundësinë e evakuimit me autobus drejt Jordanisë.

Tensionet rajonale janë përshkallëzuar që nga e premtja, kur Izraeli ndërmori sulme ajrore mbi disa pika në Iran, përfshirë objekte ushtarake dhe bërthamore, duke nxitur përgjigje hakmarrëse nga Teherani.

Autoritetet izraelite thanë se të paktën 24 persona janë vrarë dhe qindra janë plagosur që nga ajo kohë nga sulmet me raketa iraniane. Ndërkohë, sipas mediave iraniane, në Iran janë vrarë 585 persona dhe më shumë se 1,300 janë plagosur nga sulmet izraelite.

Agjencia për Mbrojtje Civile në Gazë tha se si pasojë e sulmeve izraelite janë vrarë të paktën 25 persona, përfshirë 15 që ishin mbledhur pranë një qendre për shpërndarjen e ndihmës.

Zyrtari i kësaj agjencie, Mohammad al-Mughayyir, tha për AFP-në se 15 persona u vranë dhe 60 të tjerë u plagosën teksa po prisnin për ndihma në korridorin Netzarim, në pjesën qendrore të Gazës, ku mijëra persona mblidhen përditë me shpresën se do të marrin ushqime.

Ushtria izraelite tha se po heton raportimet për sulme vdekjeprurëse pranë qendrave të ndihmës.

Bassam Abu Shaar, dëshmitar okular, tha se mijëra persona ishin mbledhur gjatë natës me shpresën se do të merrnin ndihma nga qendra – që operohet nga një fondacion i mbështetur nga Izraeli dhe Shtetet e Bashkuara – kur ajo të hapej në mëngjes.

“Rreth orës 01:00 [sipas kohës lokale], ata nisën të shtinin drejt nesh. Më pas, zjarri u intensifikua nga tanket dhe avionët”, tha ai për AFP-në.

Në javët e fundit, dhjetëra palestinezë janë vrarë teksa tentonin të arrinin në qendrat për ndihma në Gazë.

Në mars, Izraeli vendosi një bllokadë të përgjithshme për hyrjen e ndihmave në territorin palestinez dhe e hoqi pjesërisht atë në fund të majit.

Që atëherë, Fondacioni Humanitar për Gazën – i mbështetur nga Izraeli dhe SHBA-ja – ka nisur shpërndarjen e ndihmave dhe para qendrave të tij janë parë skena kaotike.

Agjencitë e Kombeve të Bashkuara dhe organizata të tjera të mëdha të ndihmës kanë refuzuar të bashkëpunojnë me këtë fondacion, duke shprehur shqetësime se ai është krijuar për të ndihmuar Izraelin të arrijë qëllimet e tij ushtarake.

Gjetkë në Gazë, edhe dhjetë persona të tjerë u vranë nga sulmet izraelite më 19 qershor, tha Agjencia për Mbrojtje Civile në Rripin e Gazës.

Sipas kësaj agjencie, tre u vranë kur u bombardua një ndërtesë banimi në Qytetin e Gazës dhe shtatë të tjerë pas një sulmi ajror në kampin e refugjatëve Al-Shati.

Lufta në Gazë filloi kur militantë të udhëhequr nga Hamasi – grupi palestinez i shpallur organizatë terroriste nga SHBA-ja dhe Bashkimi Evropian – sulmuan jugun e Izraelit, duke vrarë afër 1.200 njerëz dhe duke marrë rreth 250 pengje. Izraeli thotë se 58 pengje mbeten ende në Gazë, megjithëse besohet se rreth 35 prej tyre janë të vdekur.

Që atëherë, lufta e Izraelit ka vrarë më shumë se 55.000 njerëz në Gazë, shumë prej tyre gra dhe fëmijë, sipas zyrtarëve shëndetësorë palestinezë./REL

Presidenti ukrainas, Volodymyr Zelensky, komentoi sulmet raketore të Rusisë ndaj një ndërtese banimi në Kiev, duke theksuar se këto sulme janë një shenjë e qartë se duhet të ushtrohet presion më i madh ndaj Moskës për të arritur një armëpushim.

Lufta midis Rusisë dhe Ukrainës, që ka filluar para tre vjetësh, është intensifikuar së fundmi, me sulme të përhapura me dronë dhe raketa, të cilat kulmuan me sulmin e së martës ndaj kryeqytetit ukrainas. Ky ishte sulmi më vdekjeprurës ndaj Kievit gjatë këtij viti, ku mbetën të vrarë 28 persona dhe u plagosën 142 të tjerë.

Zelensky së bashku me ministrin e Brendshëm, Ihor Klymenko, vizituan vendin e sulmuar, ku vendosën kurora me lule për të nderuar kujtimin e 23 personave që humbën jetën në këtë sulm.

Në një postim në Telegram, presidenti ukrainas shkroi se “ky sulm është një përkujtues për botën se Rusia refuzon armëpushimin dhe zgjedh vrasjet”.

Ai gjithashtu falënderoi partnerët ndërkombëtarë të Ukrainës, duke theksuar gatishmërinë e tyre për të rritur presionin mbi Rusinë, në mënyrë që Moska të “ndiejë koston e vërtetë të luftës”.

Në Shtëpinë e Bardhë po përshkallëzohen tensionet lidhur me mundësinë e një ndërhyrjeje ushtarake amerikane ndaj Iranit. Burime të brendshme raportojnë për përçarje të dukshme midis presidentit Donald Trump dhe drejtoreshës së Inteligjencës Kombëtare, Tulsi Gabbard, e cila është përjashtuar nga diskutimet më të rëndësishme strategjike mbi krizën.

Mungesa e saj në takimin e zhvilluar më 8 qershor në Camp David, ku u diskutuan tensionet mes Izraelit dhe Iranit, ka ngritur dyshime për një mosmarrëveshje të thellë në Shtëpinë e Bardhë. Zyrtarisht mungesa u arsyetua me angazhimin e saj në një trajnim të Gardës Kombëtare, por mediat amerikane bëjnë me dije se ajo ka qenë përjashtuar për shkak të qëndrimeve të saj skeptike ndaj ndërhyrjes ushtarake.

Presidenti Trump ka shprehur hapur mosbesimin ndaj Gabbard, veçanërisht pas dëshmisë së saj në Kongres në mars, ku ajo theksoi se komuniteti i inteligjencës nuk është i bindur se Irani po zhvillon armë bërthamore, që përbën një kundërshtim të hapur ndaj retorikës presidenciale.

Përplasja midis tyre u theksua edhe më shumë pas publikimit të një videoje nga Gabbard, e cila paralajmëron për rrezikun e një konflikti bërthamor dhe u interpretua si një kritikë e qasjes së administratës Trump ndaj krizës me Iranin.

Kjo përçarje reflekton ndarjet më të gjera brenda lëvizjes MAGA, ku një pjesë e republikanëve mbështesin linjën e ashpër ndaj Teheranit, ndërsa Gabbard promovon diplomacinë dhe shpreh skepticizëm për ndërhyrjet ushtarake.

Megjithatë, disa zyrtarë të administratës, përfshirë zëvendëspresidentin JD Vance, vazhdojnë ta mbështesin Gabbard si një zë të rëndësishëm brenda ekipit të sigurisë kombëtare, edhe pse pozita e saj politike mbetet e brishtë.