Aktualitet

Rreth një mijë pacientë vuajnë nga skleroza multiple në Kosovë

Në Klinikën e Neurologjisë janë të regjistruar 600 pacientë për trajtim nga kjo sëmundje

Published

4 years ago

on

Në Kosovë mendohet se rreth një mijë pacientë vuajnë nga skleroza multiple, ndërsa në Klinikën e Neurologjisë janë të regjistruar 600 pacientë për trajtim nga kjo sëmundje.

Kështu u tha në konferencën e organizuara nga Shoqata e Neurologjisë së Kosovës dhe Klinikës së Neurologjisë me rastin e shënimit të Ditës Botërore të Sklerozës Multiple me temën “Qasjet aktuale në diagnostikimin dhe menaxhimin e pacientëve me sklerozë multiple”.

Kryetari i Shoqatës së Neurologjisë së Kosovës, Afrim Blyta u shpreh se në mungesë së Sistemit Informativ Shëndetësor nuk dihet saktë numri i pacientëve që kanë telashe me sklerozën multiple.

Blyta u shpreh se kjo sëmundje kryesisht prek moshat e reja dhe mund të shkaktojë paaftësi të konsiderueshme fizike dhe mendore.

“Numri i pacientëve me sklerozë multiple krahasuar me sëmundjet e tjera është relativisht i vogël ne mendojmë që kemi rreth diku 1 mijë pacientë që janë edhe pse për shkak të mungesës të Sistemit Informativ Shëndetësor këto janë më tepër vlerësime të përafërta sesa që kemi të dhëna ekzakte, por në bazë të numrit të atyre të cilët janë në regjistrin e Klinikës, ky numër shkon deri në 600, normalisht ka raste kur trajtohen edhe diku tjetër dhe nuk janë pjesë e regjistrave kombëtar për trajtimin e sklerozës multiple. Problematika me sklerozën mutliple është se e prek moshën e re. Në esencë fillon në kohën kur një person i ri në fillimin e decenies së tij të tretë dikur pas moshës 20 vjeçare. Për fat të keq dhe nëse nuk trajtohet si duhet ecuria e sëmundjes e bënë që herët apo vonë ka mundësi të vijë deri tek paaftësia e konsiderueshme jo vetëm fizike por edhe mendore”, u shpreh ai.

Derisa tha se kryesisht femrat janë më të prekur me këtë sëmundje, Blyta u shpreh se tashmë Kosova ofron terapi të avancuar për pacientët me sklerozë multiple.

“Nëse e krahasojmë situatën me 10 apo 15 vite kur ne me të vërtetë nuk kemi qenë në gjendje me bë asgjë në përjashtim të terapisë simptomatike kur japim ilaçe apo medikamente me përmirësua një simptomë por jo me trajtu dhe mjeku në mënyrë esenciale në këto vitet e fundit është bërë një shpërthim i jashtëzakonshëm dhe sot ne në Kosovë në Klinikën e Neurologjisë në kuadër të programit kombëtar për trajtimin e sklerozës multiple kemi në dispozicion medikamentet të cilat janë më të avancuara dhe këtu jemi me standarde regjionale për trajtimin e sklerozës multiple”, theksoi Blyta.

Këshilltari i kryeministrit të Kosovës, Jusuf Ulaj duke e konsideruar si një sëmundje mjaftë serioze sklerozën multiple theksoi nevojën që kanë këta pacientë edhe në aspektin psikologjik.

“Konsideroj se është mjaftë e rëndësishme që pacientët tanë me një sëmundje mjaftë serioze të shohin që ne bashkërisht mendojmë për problemin e tyre që është problem mjaft serioz dhe problematik. Pra, prezenca jonë është një mbështetje e madhe psikologjike për ata pacientë të cilët përpos problemit organik që kanë në faza të avancuara invaliditeti dhe vdekja e hershme është edhe mbështetja e shëndetit të tyre mental, i cili gjithmonë është i atakuar. Uroj që kjo ditë të shënohet si është më së miri me prezantime të duhura, të cilat do të jenë gjithmonë në përmirësimin dhe avancimin e shërbimeve shëndetësore për këtë problem serioz”, theksoi Ulaj.

Kurse, drejtori i Shërbimit Spitalor Klinik Universitar i Kosovës, Valbon Krasniqi u shpreh se gjatë kësaj jave për një monitorim të këtyre pacientëve që vuajnë nga kjo sëmundje kanë lansuar programin elektronik të menaxhimit.

“E di që i kemi borxh po e them publikisht Klinikës së Neurologjisë prej doktor Nexhmedin Shalës sepse u kemi zënë disa hapësira për trajtimin e infarktit akut të miokardit dhe do të bëjmë çmos që vitin e ardhshëm të fusim në projekt shtimin apo zgjerimin e kapaciteteve me shtretër për Klinikën e Neurologjisë. Tash së fundmi duke iu falënderuar edhe mbështetjes të shërbimeve teknike por edhe vetë juve kemi lansuar programin elektronik të menaxhimit të pacientëve me sklerozë multiple, që do të mundësojë një ndjekje dhe monitorim më të avancuar dhe më të suksesshëm të pacientëve që vuajnë nga skleroza multiple”, u shpreh ai.

Related Topics:
Continue Reading

Vendi

Kurti: Zgjedhja e presidentit është emergjente, moszgjedhja na pamundëson mbrojtjen e krerëve të UÇK-së

Published

6 minutes ago

on

October 6, 2026

By

Kryeministri Albin Kurti ka deklaruar se zgjedhja e presidentit të ri është një çështje emergjente, pa të cilën Kosova nuk do të mund t’iu ndihmojë katër ish-krerëve të UÇK-së në procesin e apelimit të dënimit të tyre nga Gjykata Speciale në Hagë.

Kurti theksoi se vendi ka nevojë të menjëhershme për një strategji shtetërore e kombëtare, e cila duhet të trajohet gjatë këtij muaji dhe jo vitin e ardhshëm. Sipas tij, nëse deri në mesnatë nuk zgjidhet presidenti, Kosova rrezikon të mbetet me muaj të tërë pa institucione funksionale për shkak të shkuarjes në zgjedhje të jashtëzakonshme.

“Moszgjedhja e Presidentit na çon drejtpërdrejt në zgjedhje. Por jo vetëm kjo, ajo na kufizon edhe mundësinë që të merremi me strategjinë shtetërore dhe me çështjen e apelit. Pa President, Kosova rrezikon të mbetet pa institucione funksionale”, u shpreh Kurti. /E.A/

Continue Reading

Aktualitet

PDK kërkon nënshkrimet e opozitës dhe shumicës për seancë të jashtëzakonshme për Specialen

Published

43 minutes ago

on

October 6, 2026

By

Partia Demokratike e Kosovës ka nisur mbledhjen e nënshkrimeve të deputetëve për thirrjen e një seance të jashtëzakonshme, me qëllim votimin në lexim të dytë të ndryshimeve në Ligjin për Dhomat e Specializuara.

Gjatë një konference për media, kryetari i PDK-së, Bedri Hamza, bëri të ditur se deri më tani janë siguruar 29 nënshkrime – 22 nga grupi parlamentar i PDK-së dhe 7 nga Aleanca për Ardhmërinë e Kosovës. Për thirrjen e seancës së jashtëzakonshme sipas Rregullores së Kuvendit nevojiten së paku 40 nënshkrime.

Hamza konfirmoi se i kanë dërguar ftesë zyrtare kryetares së Kuvendit dhe u kanë kërkuar mbështetje me nënshkrime deputetëve të Lidhjes Demokratike të Kosovës, Lëvizjes Vetëvendosje si dhe komuniteteve joshumicë joserbe.

“PDK-ja po pret dhe po kërkon që të thirret seanca në mënyrë që të aprovohet Ligji për Dhomat e Specializuara. Iu kemi dërguar ftesë të gjithë deputetëve të VV-së, LDK-së dhe komuniteteve joshumicë joserbe që të na japin nënshkrimet, meqë kërkojmë me ngulm që ky ligj të miratohet”, deklaroi Hamza. /E.A/

Continue Reading

Vendi

Mblidhet grupi parlamentar i LVV-së, pritet caktimi i seancës për presidentin

Published

2 hours ago

on

October 6, 2026

By

Grupi Parlamentar i Lëvizjes Vetëvendosje pritet të mblidhet sot në orën 14:00, mëson Ekonomia Online nga burimet e saj brenda këtij subjekti politik.

Mbledhja e parlamentarëve të shumicës vjen në një moment të tensionuar politik, kur Kuvendi i Kosovës ende nuk ka caktuar një orar zyrtar për mbajtjen e seancës plenare.

Sot është afati i fundit kushtetues për zgjedhjen e kreut të ri të shtetit. Nëse deputetët dështojnë të zgjedhin presidentin e ri deri në mesnatë, Kuvendi shpërndahet automatikisht dhe vendi shkon në zgjedhje të jashtëzakonshme parlamentare. /E.A/

Continue Reading

Lajmet

UBT ofron 20% bursë studimi për Masterin në Shkenca dhe Teknologji të Ushqimit

Published

2 hours ago

on

October 6, 2026

By

Në një kohë kur siguria ushqimore përbën një nga sfidat më kryesore globale, UBT ka hapur aplikimet për programin Master në Shkenca dhe Teknologji të Ushqimit, duke ofruar 20% bursë studimi përmes skemës “Engaged Scholarship” për të gjithë kohëzgjatjen e studimeve.

Bursa vlen për një sere profesionistësh të fushës, përfshirë teknologët e ushqimit, nutricionistët, infermierët, kontrollorët e cilësisë, inspektorët ushqimorë dhe laborantët ushqimorë.

Programi është i ndërtuar sipas standardeve të universiteteve më të avancuara evropiane dhe synon përgatitjen e kuadrove udhëheqëse për tregun e punës. Përmes punës praktike në laboratorë modernë, studentët trajnohen në kontrollin e cilësisë, inxhinierinë e përpunimit, kiminë e mikrobiologjinë ushqimore, si dhe zhvillimin e produkteve inovative në përputhje me legjislacionin dhe normat ndërkombëtare.

Përveç komponentës teoretike dhe praktike, ky program vë fokus të veçantë te kërkimi shkencor dhe zgjidhja e problemeve reale me të cilat përballet industria ushqimore sot. Studentët aftësohen për të analizuar parametrat dietikë, për të optimizuar linjat e prodhimit industrial me eficiencë energjetike dhe për të garantuar qëndrueshmëri mjedisore në çdo fazë të përpunimit të ushqimit.

Gjithashtu, mjedisi interaktiv, stafi akademik me përvojë ndërkombëtare dhe rrjeti i gjerë i partneriteteve u mundësojnë studentëve përfitimin e kompetencave të nevojshme për pozita drejtuese e ekzekutive në sektorin publik dhe privat, si dhe për vazhdimin e studimeve të doktoraturës.

Për më shumë informata mbi aplikimin dhe përfitimin e bursës prej 20%, të gjithë të interesuarit mund të drejtohen pranë hapësirave të UBT-së apo faqeve zyrtare të këtij institucioni.

Continue Reading

Të kërkuara