Arve Hjalmar Holmen, një qytetar norvegjez jo publik, u përball me një përgjigje të rreme nga ChatGPT, e cila e akuzonte gabimisht për një krim të rëndë.

ChatGBT tha se ai ishte babai i dy djemve të rinj, 7 dhe 10 vjeç, të cilët u gjetën tragjikisht të vdekur në një liqen pranë shtëpisë së tyre në Trondheim, Norvegji, në dhjetor 2020.

Përgjigja vazhdoi duke pretenduar se rasti “tronditi” kombin dhe se Holmen u dënua me 21 vjet burg për vrasjen e të dy fëmijëve.

Në një ankesë drejtuar Autoritetit Norvegjez të Mbrojtjes së të Dhënave, Holmen tha se historia, megjithëse “plotësisht e rreme”, kishte disa elementë që përputheshin me jetën e tij, si vendlindja, numri i fëmijëve dhe diferenca në moshë midis djemve të tij.

“Ankuesi ishte i shqetësuar nga këto rezultate, të cilat mund të kishin efekte të dëmshme në jetën e tij private nëse ato riprodhoheshin ose zbuloheshin në komunitetin ose qytetin e tij”, thuhet në ankesën, e cila u depozitua nga Holmen dhe Noyb, një grup fushatash për të drejtat dixhitale.

Ai tha se nuk është akuzuar kurrë apo dënuar për ndonjë krim dhe është qytetar i ndërgjegjshëm.

Në ankesën e tij, Holmen pretendoi se përgjigja “shpifëse” e ChatGPT shkelte dispozitat e saktësisë të përcaktuara nga ligji evropian për mbrojtjen e të dhënave (GDPR).

Ai kërkoi nga autoriteti mbikëqyrës norvegjez që të urdhëronte OpenAI të korrigjonte modelin e saj për të shmangur informacionin e pasaktë në lidhje me të dhe ta gjobiste kompaninë.

Sipas organizatës Noyb, që nga ndërveprimi i Holmen me ChatGPT, OpenAI ka lançuar një model të ri me aftësi kërkimi në internet, duke e bërë gabime të tilla “më pak të mundshme”.

Bashkimi Evropian ka konfirmuar zyrtarisht se Apple mund të prezantojë një iPhone pa një portë fizike USB-C, edhe pse ka hyrë në fuqi direktiva për karikuesin universal.

Ky vendim i mundëson kompanisë të prezantojë potencialisht një iPhone plotësisht pa kabllo, pa u përballur me shkelje të rregulloreve evropiane. Sipas rregullave të BE-së, të gjithë telefonat e rinj të shitur në treg duhet të mbështesin standardin e karikimit USB-C.

Megjithatë, ligji nuk kërkon domosdoshmërisht një portë fizike – mjafton që pajisja të mbështesë këtë standard. Kjo do të thotë se Apple mund të përdorë MagSafe ose teknologji të tjera të karikimit pa kabllo, për sa kohë që ato mund të përdoren me adaptorë USB-C.

Nëse Apple vendos të heqë portat nga modelet e ardhshme të iPhone, kjo sjellë përparësi, si rezistencë më e mirë ndaj ujit dhe pluhurit.

Nga ana tjetër, përdoruesit mund të përballen me probleme të mundshme në lidhje me pajtueshmërinë e aksesorëve dhe shpejtësinë e transferimit të të dhënave, e cila mund të jetë më e ngadaltë krahasuar me opsionet me kabllo.

Thashethemet për një iPhone pa porta qarkullojnë prej disa kohësh, e kjo konfirmim nga BE-ja forcon më tej spekulimet se Apple mund të prezantojë modelin e parë të tillë në vitet e ardhshme.

Kompania ka ndërmarrë tashmë hapa të mëdhenj drejt një të ardhmeje pa kabllo me karikuesit MagSafe dhe kufjet AirPods, dhe hapi i radhës logjik mund të jetë një përvojë plotësisht pa kabllo, sipas raportimeve të 9to5Mac.

Edhe pse rregulloret e BE-së kërkojnë përputhshmëri me USB-C, ato nuk i kufizojnë prodhuesit në përdorimin e porteve fizike.

Kjo i jep Apple lirinë për të eksperimentuar me teknologji pa kabllo, gjë që mund të ndryshojë rrënjësisht të ardhmen e smartfonëve.

Planet sipas të cilave industria e automobilave duhet të kalojë plotësisht në energji elektrike në fillim të viteve 2030 po duken gjithnjë e më shumë si utopi.

Kështu sugjerojnë të paktën informacionet më të fundit nga kampi i prodhuesve më të mëdhenj. I fundit në këtë radhë është Audi, i cili po e rishqyrton seriozisht njoftimin e mëparshëm se nga viti 2032 do të ofrojë ekskluzivisht vetura elektrike. Të dhënat e shitjeve për vitin 2024 tregojnë se kërkesa për automjetet elektrike të Audi ka rënë me 19.5 për qind, duke arritur në 158,343 njësi.

Gjatë konferencës vjetore të medias për vitin 2025, CEO i Audis, Gernot Dollner, deklaroi se “si pjesë e iniciativës sonë për sjelljen e produkteve, ne jo vetëm që do të prezantojmë modele të reja elektrike, por edhe një gjeneratë të re të automjeteve me motorë me djegie të brendshme dhe hibride plug-in. Prodhimin e makinave me motorë me djegie të brendshme do ta përshtatim sipas tendencave të zhvillimit në tregjet botërore”.

Për t’ju rikujtuar, Audi kishte njoftuar se modeli i ri Q7 ishte risia e fundit që do ofrohej me motor me djegie të brendshme, për t’u përputhur me ndërprerjen e zhvillimit të motorëve të planifikuar për 2026.

Plani ishte që këto modele të mbeteshin në treg deri në vitin 2032. Audi, duke ndjekur vendime të ngjashme nga BMW, Mercedes dhe Volvo, po e shtyn vendimin. Kjo ishte e pritshme, duke pasur parasysh që dhe Porsche do mbajë në ofertë makinat me motorë me benzinë.

Modelet PHEV (hibride plug-in), për të cilat Dollner tha se janë pjesë qendrore e portofolit të kompanisë në rrugën drejt ofertës plotësisht elektrike, po fitojnë rëndësi në gamën e tyre. Në të njëjtën konferencë, Dollner prezantoi prurjet e ardhshme të modeleve për 2025, “aktualisht po punojmë për rifreskimin e të gjithë gamës sonë të modeleve, dhe deri në fund të vitit do të kemi portofolin më të ri në segmentet tona të tregut”.

Ai konfirmoi se gjenerata e re e modelit Q3 do të dalë këtë verë dhe njoftoi se versioni plug-in hibrid i modelit A5 do të debutojë më 25 mars, si një nga 10 modelet e reja PHEV që do të prezantohen këtë vit. /Telegrafi/

Meta po sjell inteligjencën artificiale në 41 vende të Evropës, përfshirë edhe vendet e BE-së, duke filluar nga kjo javë.

Gjithashtu kjo do të jetë e disponueshme edhe për 21 territore evropiane, raporton Engadget.

Në njoftim, “Meta” është shprehur se i është dashur më shumë kohë për të sjellë këtë teknologji për përdoruesit europianë pasi po “lundron në sistemin e ndërlikuar rregullator”.

Kompania planifikonte që “Meta AI” të prezantohej në Evropë vitin e shkuar, planet u pezulluan pasi Komisioni irlandez i mbrojtjes së të dhënave i kërkoi të vononte trajnimin e modeleve të gjuhës në përmbajtjet e shpërndara në rrjet, nga përdoruesit evropianë.

Një muaj pas kësaj, “Meta” tha “si rrjedhojë e natyrës së paparashikueshme të mjedisit rregullator evropian”, nuk do të prezantonte Llama-n, modelin e tij, në këtë rajon.

Meta AI do të shpërndahet në Evropë duke integruar teknologjinë në aplikacionet Facebook, Instagram, WhatsApp dhe Messenger, ku së shpejti do të shfaqet një rreth blu.

Do të jetë i disponueshëm në 6 gjuhë dhe për momentin do të ketë aftësi të kufizuara që lidhen kryesisht me mesazhet, por kompania thotë se shpreson që ta zgjerojë ofertën derisa të jetë “e barabartë me SHBA-në”.