Një punim i ri shkencor me autorë nga UBT është publikuar në një revistë prestigjioze braziliane të fushës së stomatologjisë, e indeksuar në Web of Science (ESCI) dhe Scopus, si dhe e klasifikuar në Q2 sipas SCImago në fushën e ortodoncisë, duke përfaqësuar një arritje të rëndësishme akademike dhe shkencore për institucionin.

Autorë të këtij punimi janë Prof. Dr. Vesel Rrustemaj, si autor i parë dhe korrespondent, dhe Prof. Dr. Jeta Kiseri-Kubati, si bashkëautore, të dy profesorë në programin e Stomatologjisë në UBT dhe ekspertë në fushën e ortodoncisë.

Punimi shkencor trajton një temë me rëndësi të veçantë shëndetësore dhe epidemiologjike: lidhjen ndërmjet karakteristikave okluzale, zakoneve orale dhe kariesit dentar tek fëmijët e moshës 3–6 vjeç në Prishtinë, Kosovë. Studimi fokusohet në një problematikë të shpeshtë tek moshat e reja, duke ofruar të dhëna të vlefshme për gjendjen e shëndetit oral në këtë grupmoshë.

Hulumtimi është realizuar si studim epidemiologjik dhe ka sjellë rezultate të rëndësishme mbi faktorët që ndikojnë në shfaqjen e kariesit dentar dhe zhvillimin okluzal te fëmijët, duke kontribuar në literaturën shkencore ndërkombëtare në fushën e stomatologjisë dhe ortodoncisë.

Publikimi në një revistë të këtij niveli shkencor përbën një arritje të rëndësishme jo vetëm për autorët, por edhe për UBT-në, duke dëshmuar angazhimin e vazhdueshëm të institucionit në kërkimin shkencor, ndërkombëtarizimin dhe kontributin në zhvillimin e dijes në fushën e shkencave shëndetësore.

Ky studim pritet të shërbejë si referencë e vlefshme për studiuesit dhe profesionistët e stomatologjisë, si dhe për përmirësimin e praktikave klinike në trajtimin dhe parandalimin e problemeve dentare tek fëmijët.

Studimi i plotë

Sekretari amerikan i Shtetit, Marco Rubio, ka deklaruar se Kuba përbën “kërcënim për sigurinë kombëtare” të Shtetet e Bashkuara të Amerikës dhe se një marrëveshje paqësore mes palëve nuk duket shumë e mundshme.

Deklaratat e tij vijnë një ditë pasi SHBA ngriti akuza ndaj ish-presidentit kuban Raúl Castro për një incident të vitit 1996, ku u rrëzuan dy avionë dhe humbën jetën shtetas amerikanë.

Rubio tha se Uashingtoni preferon zgjidhje diplomatike, por paralajmëroi se presidenti Donald Trump ka të drejtë të mbrojë vendin nga çdo kërcënim.

Nga ana tjetër, ministri i Jashtëm i Kubës, Bruno Rodríguez, i hodhi poshtë akuzat duke i quajtur “gënjeshtra” dhe duke akuzuar SHBA-në për presion dhe “agresion të ashpër” ndaj Kubës.

Tensionet mes dy vendeve janë rritur, ndërsa Kuba po përballet edhe me krizë karburanti, mungesa ushqimesh dhe ndërprerje të energjisë.

Në kuadër të aktiviteteve të vazhdueshme akademike dhe profesionale, Fakulteti i Psikologjisë në UBT ka organizuar një ligjëratë të veçantë me psikoterapistin Migjen Amzai, me temën “Analiza Karakteriale”.

Ky aktivitet u zhvillua nën përkujdesjen e profesoreshës Besarta Sadriu dhe profesorit Emrush Thaçi, duke sjellë një qasje të avancuar akademike dhe praktike për studentët e psikologjisë, me fokus në thellimin e njohurive profesionale dhe zhvillimin e mendimit kritik.

Gjatë ligjëratës, psikoterapisti Migjen Amzai trajtoi në mënyrë të detajuar konceptet bazë të analizës karakteriale, rëndësinë e saj në procesin psikoterapeutik dhe rolin që ajo luan në kuptimin e strukturës së personalitetit njerëzor. Përmes shembujve praktikë dhe diskutimeve interaktive, studentët u angazhuan aktivisht në analizimin e rasteve dhe interpretimin e qasjeve të ndryshme terapeutike.

Ky aktivitet u karakterizua nga një atmosferë e hapur akademike dhe reflektuese, ku studentët patën mundësinë të ndërlidhin teorinë me praktikën dhe të përfitojnë nga përvoja e drejtpërdrejtë profesionale e ligjëruesit.

Fakulteti i Psikologjisë në UBT vazhdon të mbetet i përkushtuar në organizimin e ligjëratave, punëtorive dhe aktiviteteve profesionale të këtij lloji, duke krijuar mundësi të vazhdueshme për zhvillimin akademik dhe praktik të studentëve, si dhe për forcimin e lidhjes mes universitetit dhe profesionistëve të fushës së psikologjisë.

Studentët e vitit të tretë të Fakultetit Menaxhment, Biznes dhe Ekonomi (MBE) në UBT përfunduan me sukses trajnimin praktik “Micro Business Game”, një program tashmë tradicional që prej disa vitesh po kontribuon në përgatitjen profesionale të studentëve në fushën e biznesit dhe sipërmarrjes.

Ky aktivitet u zhvillua nën udhëheqjen e trajnerëve Kujtim Zylfijaj, Ardian Uka dhe Mentor Shaqiri, në bashkëpunim me profesorët Fisnik Bytyqi dhe Agon Dula. Trajnimi u organizua nga UBT me mbështetjen e German Sparkassenstiftung, duke reflektuar angazhimin e vazhdueshëm institucional për të ofruar edukim praktik dhe të orientuar drejt tregut të punës.

Përmes simulimeve reale dhe sesioneve intensive interaktive, studentët patën mundësinë të përjetojnë funksionimin e një biznesi në kushte të ngjashme me tregun real, duke aplikuar njohuritë teorike në vendimmarrje konkrete dhe situata dinamike menaxheriale.

Gjatë trajnimit, studentët zhvilluan aftësi të rëndësishme në disa fusha kyçe të menaxhimit të biznesit, duke përfshirë:
• Menaxhimin financiar, përmes buxhetimit, kontrollit të fluksit të parasë dhe vendimeve investuese
• Menaxhimin e operacioneve, duke u fokusuar në zinxhirin e furnizimit dhe proceset e prodhimit
• Marketingun dhe shitjet, përmes strategjive kreative dhe fushatave të tregut
• Shërbimin ndaj klientit, me theks në komunikim dhe menaxhim të kërkesave
• Burimet njerëzore, duke përfshirë organizimin dhe zhvillimin e ekipit

Atmosfera e trajnimit u karakterizua nga angazhim i lartë, punë ekipore dhe diskutime konstruktive, duke i ndihmuar studentët të forcojnë kompetencat e tyre praktike dhe të përgatiten më mirë për sfidat e tregut modern të punës.

“Micro Business Game” edhe këtë vit dëshmoi vlerën e tij si një platformë unike e të nxënit përmes përvojës, duke e bërë Fakultetin MBE në UBT një hapësirë ku teoria dhe praktika ndërthuren në mënyrë të drejtpërdrejtë për zhvillimin e profesionistëve të ardhshëm në biznes dhe ekonomi.