Aleanca për Ardhmërinë e Kosovës ka zhvilluar një aksion simbolik para Kuvendit të Kosovës, duke akuzuar deputetët e Lëvizjes Vetëvendosje se nuk kanë liri të mendimit, shprehjes dhe veprimit.

Anëtarë të AAK-së kanë vendosur postera me emrat e deputetëve të LVV-së, me mbishkrimin “Jemi të shqetësuar për lirinë e deputetëve të LVV-së”, duke kritikuar atë që e quajtën “regjimi Kurti-Dejona”.

Deputeti i AAK-së, Burim Ramadani, tha se deputetët e LVV-së udhëhiqen, sipas tij, me “grusht të hekurt” dhe se nuk kanë hapësirë për të shprehur qëndrimet e tyre personale.

Ramadani pretendoi gjithashtu se disa deputetë të LVV-së janë ankuar për mungesë të lirisë së shprehjes brenda grupit parlamentar, duke paralajmëruar se një model i tillë, sipas tij, po tentohet të shtrihet edhe në institucionet e tjera të Kosovës./A.K/

Në Gjykatën Themelore ka nisur seanca fillestare ndaj Fatmir Shehollit, i cili akuzohet për veprat penale “Spiunazh” dhe “Shantazh”.

Pas leximit të aktakuzës, Sheholli është deklaruar i pafajshëm, duke thënë se nuk i pranon akuzat dhe se e ndjen veten të pafajshëm.

Mbrojtja, përmes avokatit Mentor Neziri, ka hequr dorë nga e drejta për të kërkuar hudhjen e aktakuzës dhe kundërshtimin e provave, duke kërkuar që rasti të kalojë sa më shpejt në shqyrtim gjyqësor.

Edhe Sheholli ka deklaruar se heq dorë nga këto të drejta. Gjykata ka bërë të ditur se rasti do të gjykohet nga një trup gjykues, ndërsa data e shqyrtimit gjyqësor do të caktohet pasi të përfundojnë procedurat për përbërjen e trupit.

Sipas aktakuzës, Sheholli dyshohet se, deri më 9 tetor 2025, ka vepruar si person i rekrutuar nga shërbimi inteligjent serb BIA, duke mbledhur dhe përcjellë informacione e dokumente lidhur me aktivitetet politike, sigurinë dhe institucionet e Kosovës.

Ai akuzohet gjithashtu për shantazh ndaj një personi me inicialet A.J., të cilin, sipas aktakuzës, e ka detyruar të veprojë në dëm të pasurisë së tij në vlerë mbi 13 mijë euro.

Në seancë ishte i pranishëm edhe Nenad Rashiq, në cilësinë e të dëmtuarit./A.K/

Ka nisur në Gjykatën Themelore në Prishtinë gjykimi ndaj Fatmir Shehollit, i akuzuar për spiunazh dhe shantazh, raporton KosovaPress.

Sheholli është ulur në bankën e të akuzuarit, ndërsa seanca fillestare ishte caktuar të niste në orën 09:30.

Prokuroria Speciale e Republikës së Kosovës e ngarkon Shehollin me veprat penale “Spiunazh” dhe “Shantazh”.

Sipas aktakuzës, Sheholli akuzohet se ka vepruar si person i rekrutuar nga Shërbimi Informativ i Serbisë, i njohur si BIA, duke zbatuar urdhra dhe detyra të një zyrtari të këtij shërbimi.

Prokuroria pretendon se ai ka mbledhur dhe përcjellë informacione e dokumente që lidhen me aktivitetet politike, gjendjen e sigurisë dhe funksionimin e institucioneve të Kosovës.

Në pikën tjetër të aktakuzës, Sheholli ngarkohet edhe për shantazh.

Seanca e sotme është paraqitja e parë e Shehollit para gjykatës pas ngritjes së aktakuzës nga Prokuroria Speciale, më 25 shtator 2026./Kosovapress/

Të paktën pesë persona kanë humbur jetën pasi një avion transportues i Amazon doli nga pista gjatë uljes në Aeroportin Ndërkombëtar të Miamit të dielën pasdite, duke goditur disa automjete dhe më pas duke u përfshirë nga zjarri.

Pesë persona të tjerë u lënduan në aksident, bëri të ditur shefi i Shërbimit të Zjarrfikësve dhe Shpëtimit të Miami-Dade, Raied “Ray” Jadallah, gjatë një konference për media të dielën në mbrëmje.

Tre prej të lënduarve janë në gjendje kritike dhe janë dërguar në një qendër traumatologjike, ndërsa dy të tjerë janë transportuar në një spital lokal.

Sipas Jadallah, disa nga viktimat kishin mbetur të bllokuara brenda automjeteve që u goditën nga avioni dhe ekipet e shpëtimit u detyruan t’i nxirrnin nga to.

Avioni, një Boeing 767-300 për transport mallrash, po fluturonte nga San Juani i Porto Rikos drejt Miamit. Administrata Federale e Aviacionit e Shteteve të Bashkuara bëri të ditur se fluturakja doli nga pista pasi u ul në Miami rreth orës 14:00.

Ende nuk dihet arsyeja pse avioni nuk arriti të ndalej.

Sipas të dhënave të faqes për gjurmimin e fluturimeve Flightradar24, avioni po lëvizte me shpejtësi prej afro 209 kilometrash në orë kur doli nga pjesa e përdorshme e pistës.

CNN, pas shqyrtimit të komunikimeve ndërmjet pilotëve dhe kontrollit të trafikut ajror, raportoi se ekuipazhi nuk kishte shpallur gjendje emergjente para uljes, transmeton KosovaPress.

Më shumë se 60 njësi të emergjencës mbërritën në vendin e ngjarjes, ku gjetën avionin të përfshirë nga flakët, ndërsa një re e dendur tymi të zi ishte ngritur mbi zonë.

“Djema, avioni është në zjarr. Avioni është në zjarr. Bëhuni gati”, dëgjohet duke thënë një pjesëtar i ekipeve të emergjencës në komunikimet e siguruara nga Broadcastify.

Ekipet e shpëtimit raportuan se pilotët ishin nxjerrë nga avioni dhe po merrnin trajtim mjekësor. Gjendja e tyre shëndetësore nuk është bërë e ditur.

Zyra e Sherifit të Miami-Dade njoftoi se autoritetet po punojnë për konfirmimin e identitetit të personave që humbën jetën. Për familjarët është hapur gjithashtu një linjë e posaçme telefonike për informacione./A.K/