Vendet e Bashkimit Evropian ranë dakord sot për krijimin e një fondi me vlerë deri në 150 miliardë euro (170 miliardë dollarë) për prokurimin e përbashkët të armëve.

“Kreditë do të përdoren për të investuar në mbrojtjen ajrore dhe raketore, sistemet e artilerisë, raketat dhe municionet, dronë dhe sistemet anti-dronë – si dhe për të adresuar nevojat e tjera nga lëvizshmëria kibernetike deri te lëvizshmëria ushtarake”, tha presidentja e Komisionit Evropian, Ursula von der Leyen kur prezantoi planin në mars.

Përpjekjet aktuale të riarmatimit të vendeve të BE-se – kanë për qëllim të pengojnë Rusinë nga sulmi i mundshëm ndaj një vendi tjetër evropian pas Ukrainës.

Agjencitë e inteligjencës supozojnë se Rusia mund të fillojë një luftë tjetër deri në vitin 2030.

Presioni mbi BE-në për të rritur ndjeshëm shpenzimet e mbrojtjes dhe ndihmën për Ukrainën është intensifikuar më tej – pasi Uashingtoni pezulloi ndihmën ushtarake për Ukrainën dhe vuri në pikëpyetje angazhimin e saj për të mbrojtur Evropën.

“Po jetojmë në kohët më të rëndësishme dhe të rrezikshme”, tha Von der Leyen më herët.

“Ky është momenti i Evropës dhe ne duhet ta përmbushim atë”, shtoi ajo.

Von der Leyen shpreson që së bashku me kapitalin privat dhe fondet shtesë nga Banka Evropiane e Investimeve, fondi mund të mobilizojë deri në 800 miliardë euro për mbrojtjen.

Fondi i ri, i cili ende duhet të miratohet zyrtarisht nga ministrat e BE-së javën e ardhshme, është pjesë e një sërë iniciativash për të përmirësuar kapacitetet mbrojtëse të Evropës.

Komisioni Evropian gjithashtu u lejon shteteve anëtare më shumë liri veprimi për shpenzimet e mbrojtjes sipas rregullave zakonisht të rrepta të borxhit dhe deficitit të BE-së./atsh

Presidenti rus, Vladimir Putin vizitoi qytetin Kurchatov në rajonin e Kurskut, i cili ishte pjesërisht i pushtuar nga forcat ukrainase për disa muaj vitin e kaluar, tha sot Kremlini.

Ky ishte udhëtimi i parë i liderit rus në rajon – që nga inkursioni ukrainas vitin e kaluar.

Putini u takua dje në mbrëmje me guvernatorin rajonal, Alexander Khinshtein, organizatat vullnetare dhe zyrtarët lokalë.

“Presidenti rus premtoi mbështetje të vazhdueshme për përpjekjet e rindërtimit, veçanërisht për banesat e dëmtuara gjatë konfliktit”, tha Kremlini.

Putini vizitoi gjithashtu një njësi në Centralin Bërthamor Nr. 2 të Kurskut, i cili është aktualisht në ndërtim e sipër.

Gushtin e kaluar, trupat ukrainase nisën një ofensivë të papritur në rajonin e Kurskut dhe pushtuan një pjesë të vogël të territorit për disa muaj.

Ushtria ruse e shpalli rajonin “plotësisht të çliruar” në fund të prillit./atsh

Papa Leoni XIV i ka bërë thirrje të mërkurën Izraelit ta lejojë hyrjen e ndihmave humanitare në Rripin e Gazës, duke e përshkruar gjendjen në enklavën palestineze si “shqetësuese dhe tronditëse”.

“Ripërtërij thirrjen time të zjarrtë për të lejuar hyrjen e ndihmës së drejtë humanitare dhe për t’i dhënë fund armiqësive, çmimin shkatërrues të të cilave po e paguajnë fëmijët, të moshuarit dhe të sëmurët“, tha papa i ri në sheshin e Shën Pjetrit.

Leoni – i cili u zgjodh papë më 8 maj duke pasuar të ndjerin Papa Françesku – e ka përmendur luftën në Gazë disa herë në javët e para të papatit të tij.

Ai e bëri këtë lutje në fund të fjalimit para audiencës, duke shtuar disa fjalë përtej tekstit të përgatitur.

Në mesazhin e tij të parë të së dielës më 11 maj, Papa Leoni bëri thirrje për armëpushim të menjëhershëm në Gazë dhe për lirimin e të gjithë pengjeve izraelite që po mbahen nga grupi militant Hamas – i cili është i shpallur organizatë terroriste nga SHBA-ja dhe BE-ja.

Izraeli tha të hënën se do ta lejojë hyrjen e ndihmave në Gazë pas një bllokade 11-javore ndaj enklavës, por Kombet e Bashkuara thanë se deri të martën nuk është shpërndarë asnjë ndihmë.

Izraeli bëri të ditur se synon t’i intensifikojë operacionet ushtarake kundër Hamasit dhe të marrë nën kontroll të gjithë Gazën, e cila është shkatërruar nga një luftë ajrore dhe tokësore izraelite që nga sulmi i Hamasit ndaj komuniteteve izraelite në tetor 2023.

Ai thotë se bllokada ka për qëllim, pjesërisht, t’ua pamundësojë militantëve palestinezë devijimin dhe konfiskimin e ndihmave humanitare. Hamasi e ka mohuar këtë gjë./REL/

Presidenti amerikan, Donald Trump ka njoftuar programin e tij të ardhshëm të mbrojtjes nga raketat “Golden Dome” (Kupola e Artë) – një sistem shumështresor me vlerë 175 miliardë dollarë – që për herë të parë do të vendosë armët amerikane në hapësirë, sipas AP.

Duke folur dje nga Zyra Ovale, presidenti Trump tha se pret që sistemi mbrojtës të jetë plotësisht funksional para përfundimit të mandatit tim, i cili përfundon në vitin 2029, dhe të ketë aftësinë për të kapur raketat – edhe nëse ato lëshohen nga hapësira.

Trump, i ulur pranë një posteri që tregon SHBA-në kontinentale të lyer me ar dhe me përshkrime artistike të raketave interceptuese, njoftoi gjithashtu se Gjenerali Michael Guetlein – i cili aktualisht shërben si zëvendësshef i operacioneve hapësinore – do të jetë përgjegjës për mbikëqyrjen e progresit të sistemit mbrojtës raketor “Golden Dome”- “Kupola e Artë” .

“Golden Dome”-“Kupola e Artë” parashikohet të përfshijë aftësi tokësore dhe hapësinore që janë në gjendje të zbulojnë dhe ndalojnë raketat në të katër fazat kryesore të një sulmi të mundshëm: zbulimin dhe shkatërrimin e tyre para një lëshimi, kapjen e tyre në fazën e tyre më të hershme të fluturimit, ndalimin e tyre në mes të rrugës ajrore ose ndalimin e tyre në minutat e fundit ndërsa zbresin drejt një objektivi.

Zyra e Buxhetit të Kongresit vlerësoi këtë muaj se vetëm komponentët hapësinorë të “Golden Dome”- “Kupolës së Artë” mund të kushtojnë deri në 542 miliardë dollarë – gjatë 20 viteve të ardhshme.

Trump ka kërkuar një fond fillestar prej 25 miliardë dollarësh për programin – në projektligjin e tij të propozuar për lehtësimin e taksave – që tani i ka kaluar për miratim Kongresit.

Pentagoni ka paralajmëruar për vite me radhë se raketat e reja të prodhuara nga Kina dhe Rusia ishin aq të përparuara saqë kundërmasat e përditësuara ishin të nevojshme.

Satelitët dhe interceptorët e shtuar të “Golden Dome” – të cilat përbëjnë pjesën më të madhe e kostos së programit – do të përqendrohen në ndalimin e këtyre raketave të avancuara në fillim ose në mes të fluturimit të tyre.

Armët hapësinore të parashikuara për “Golden Dome”-“Kupolën e Artë” përfaqësojnë kërkesa të reja dhe në zhvillim për misione që nuk janë kryer kurrë më parë nga organizatat hapësinore ushtarake”, u tha dje gjenerali Chance Saltzman, kreu i Forcës Hapësinore të SHBA-së, ligjvënësve në një seancë dëgjimore.

Kina dhe Rusia kanë vendosur armë sulmuese në hapësirë, të tilla si satelitë me aftësi për të çaktivizuar satelitët e rëndësishëm të SHBA-së, të cilët mund ta bëjnë SHBA-në të prekshme ndaj sulmeve.

Vitin e kaluar, SHBA-ja tha se Rusia po prodhonte një armë bërthamore hapësinore që mund të qëndronte në hapësirë ​​për periudha të gjata kohore, e cila më pas do të shpërthehej për të shkatërruar satelitët përreth saj.

Trump tha dje se ende nuk kishte folur me presidentin rus, Vladimir Putin në lidhje me programin “Kupola e Artë”, por shtoi se do ta bënte në kohën e duhur”, u tha ai gazetarëve në Shtëpinë e Bardhë./atsh