Bashkimi Evropian do të rrisë kapacitetin e eksportit të energjisë elektrike në Ukrainë dhe Moldavinë nga 1 dhjetori në përgatitje për dimrin e ardhshëm.

Rrjeti Evropian i Operatorëve të Sistemit të Transmetimit të Energjisë Elektrike (ENTSO-E) ka njoftuar se kufiri i eksportit mund të rritet nga 1,700 megavat në 2,100 MW nga 1 dhjetori, pa rrezikuar stabilitetin e energjisë elektrike dhe sigurinë operative të BE-së.

Lajmin e bëri të ditur Komisioni Evropian përmes një shënimi, duke pranuar rekomandimin e operatorëve të sistemit të transmetimit (OST) në Evropën kontinentale.

”Një shenjë e mbështetjes së fortë që BE i ofron Ukrainës dhe ndaj Moldavisë, dhe i solidaritetit të komunitetit evropian të OST”, komenton komisioneri përgjegjës, Kadri Simson.

Nga marsi 2025, OST-të do të rivlerësojnë kufirin e kapacitetit tregtia midis BE-së dhe Ukrainës dhe Moldavisë në baza mujore./UBTNews/

Izraeli është akuzuar për bllokimin e dërgesave të ndihmave humanitare që po përpiqen të hyjnë në Gaza gjatë javëve të fundit, një situatë që ka shkaktuar shqetësim të thellë mes aleatëve të tij. Votimi i fundit në Knesset për ndalimin e UNRWA-s, agjencisë që ofron ndihmë për refugjatët palestinezë, është parë si një masë që mund të rrezikojë të gjitha dërgesat humanitare ndërkombëtare në Gaza.

Ministri i Mbretërisë së Bashkuar, Sir Keir Starmer, ka shprehur shqetësim se kjo situatë do të përkeqësojë më tej vuajtjet e popullsisë.

Më herët në muajin tetor, Shtetet e Bashkuara i dhanë një paralajmërim Izraelit që të rrisë ndihmën në enklavë ose të përballet me kufizime për ndihmën ushtarake. Si rezultat, Izraeli lejoi një rritje të ndihmës në Gaza, por një zyrtar i lartë i OKB-së e përshkroi këtë si një përmirësim minimal, duke theksuar se nevojat ishin akoma shumë më të mëdha.

Philippe Lazzarini, shefi i UNRWA-s, ka akuzuar autoritetet izraelite për vazhdimin e bllokimit të misioneve humanitare, duke e bërë të pamundur arritjen e ndihmës në veriun e Gazës. Izraeli, megjithatë, e mohon se po pengon dërgesat e ndihmave dhe shpesh fajëson agjencitë e ndihmës për dështimin në shpërndarjen e ndihmës së nevojshme për popullatën.

Situata humanitare në Gaza është bërë gjithnjë e më alarmante, me njerëzit që vuajnë nga mungesa e ushqimit dhe resurseve të tjera thelbësore, duke nxitur thirrje për veprime të menjëhershme dhe përmirësimin e kushteve të jetesës në këtë rajon të prekur nga konflikti./UBTNews/

Ministri i Financave, Punës dhe Transfereve, Hekuran Murati është deklaruar sa i përket bllokimit të llogarisë së Komunës së Suharekës. Ai ka thënë se ankesat karshi qeverisë në këtë drejtim janë në adresë të gabuar, pasi qeveria nuk bllokon këto llogari.

Në një konferencë për media të martën, ministri tha se po ka tendencë të shfrytëzohen për sulme politike ndaj qeverisë.

Ndërsa, ka folur edhe për kontratën kolektive, për të cilën u shpreh se nënshkruesi i kësaj kontrate ka qenë bashkëpartiaku i kryetarit që dje ishe ankuar se qeveria ka bllokuar llogaritë.

Ai ka theksuar se bllokimet bëhen nga përmbaruesit dhe nga urdhrat e formës së prerë të gjykatave, vendimeve të gjyqësorit për pagimin e obligimeve të prapambetura.

“Në lidhje me llogaritë e komunave dhe bllokimin që kishim rastin më e fundit, konsideroj që ankesat edhe janë në adresë të gabuar, dhe madje po ka tendencë të shfrytëzohen për sulme politike ndaj qeverisë. Në vazhdimësi kemi parë nga eksponentë qoftë nga Asociacioni i Komunave apo edhe nga niveli komunal, që të tentohet të bëhet bartja e fajit. Qeveria nuk bllokon llogari, nëse ka shkuar njoftimi prej thesarit që po bllokohen llogaritë, është ngjashëm sikur të pretendojmë, që kur vjen mesazhi që të ka dalë paga në banka, banka ta ka qit pagën, në fakt punëdhënësi e ka qit, por banka të njofton. Edhe në këtë rast, thesari është banka e komunave që i njofton për veprimet që ndërmerren, dhe nuk ka bllokim të llogarive të tilla. Bllokimet bëhen nga përmbaruesit dhe nga urdhrat e formës së prerë të Gjykatave, vendimeve të gjyqësorit për pagimin e obligimeve të prapambetura. As tendencë politike nuk ka këtu e as nuk është obligim i qeverisë që qeveria ua ka bartë. Se paku kjo qeveri nuk u ka bartë komunave këtë obligim, çfarëdo politike që kemi shtuar në këtë mandat, e kemi përcjellë edhe me buxhetin përkatës”, ka thënë Murati.

Sa i përket kontratës kolektive, Murati ka theksuar se ka qenë pikërisht, Ramë Likaj, ministër në qeverinë e PAN-it, ministër i AAK-së, që ka nënshkruar një kontratë kolektive. Ai shtoi se për t’u zgjidhur problemi, duhet fillimit të identifikohet.

“Për në tepër, nëse shohim tërësinë e buxhetit, pra, gjatë mandatit tonë qeverisës buxheti i komunave është shtuar për më shumë se 200 milion euro, d.m.th i kanë më tepër seç kanë pas buxhet kur kemi marrë mandatin në fillim të qeverisjes. Ndërkaq, nëse duam të shohim se kush e ka nënshkruar, kanë qenë pikërisht qeverisjet e kaluara, e madje nënshkruesi i kontratës kolektive ka qenë bashkëpartiaku i kryetarit që dje ishe ankuar se qeveria ka bllokuar llogaritë. Ka qenë pikërisht, Ramë Likaj, ministër në qeverinë e PAN-it, në qeverinë Haradinaj, ministër i AAK-së, që ka nënshkruar një kontratë kolektive, shkelje ligjore, pa mbulesë buxhetore dhe ka fut në obligim gjitha këto komuna duke shkaktuar një dëme mbi 100 milion euro, dhe ende nuk kemi llogaridhënie për këtë çështje. Pra, le të adresojmë, sepse për t’u zgjedh problemi, fillimisht duhet të identifikohet cili është problemi, jo të merremi me pasojën, por duhet të merremi me shkakun dhe shkaktarin”, ka shtuar Murati.