Pjesa e dytë e podcastit me gazetarin, profesorin dhe publicistin Musa Sabedini, ku vazhdon diskutimi mbi sfidat reale të gazetarisë hulumtuese dhe rolin e mediave në shoqërinë bashkëkohore.

Në këtë episod, biseda thellohet në çështje si kërcënimet ndaj gazetarëve, mungesa e unitetit në media, raporti me institucionet dhe perceptimi i publikut ndaj gazetarisë. Përmes përvojës së tij shumëvjeçare, profesori Sabedini ndan këshilla konkrete për gazetarët e rinj dhe rrëfen realitetin e profesionit në terren.

Podcasti i plotë:

Driton Hyseni: Të fokusohemi te gazetaria hulumtuese dhe të bërit e gazetarisë sot. Të rinjtë i shohim se po përdorin edhe mekanizma të tjerë, ndoshta më relaksuese dhe më të lehtë, për shembull si inteligjenca artificiale, diçka që ka ardhur me kohën dhe është më e lehtë për të bërë gazetari. Sa ka qenë e vështirë në kohën kur e keni bërë ju?

Prof. Musa Sabedini: Dallimi ka qenë shumë i madh, si nata me ditën, por aty është ideja se kjo inteligjencë artificiale ka shumë dobësi dhe mangësi, por ka edhe anë pozitive. Për shembull, në kohën time kur kam punuar, ke pasur kohë me bërë temën nga dy ditë deri në dhjetë ditë, sepse tema hulumtuese, tema e mirë, nuk bëhet për një orë.

Nuk të ka penguar askush, pengesa e vetme kanë qenë njerëzit që i ke takuar, mandej kanë gjetur lidhje dhe të kanë kërcënuar, të kanë shantazhuar, por te unë e kanë pasur problem.

Por pjesa e rrjeteve sociale i ka dhënë dimension tjetër gazetarisë, dhe jo vetëm asaj hulumtuese.

Vërejtja ime kryesore është që po i shoh portalet dhe gazetarët, dhe e keqja më e madhe e këtyre është që po bien rob të Facebook-ut dhe rrjeteve tjera.

Nëse një temë e mirë hulumtuese e ke publikuar në portal, nuk ka nevojë ta vendosësh në Facebook personal dhe të merresh me temën. Kjo për mua është neveritëse, e ul totalisht vlerën që e ka gazetaria hulumtuese.

Kjo ndodh sepse njerëzit duan të bëhen faktor për like dhe klikime, por kjo e ul shumë nivelin e gazetarit.

Njoh gazetarë që për diçka të vogël e vendosin në rrjetin e tyre Facebook dhe lexuesi nuk e di, pastaj edhe kërcënimet e kanë një rend dhe rregull.

Kur kërcënon pala, urdhëro dhe paraqite në polici, është prokuroria edhe gjykata. Unë nuk i lodh lexuesit dhe familjen pa nevojë.

Driton Hyseni: Kërcënimet, si duhet t’i përballojmë kërcënimet? Ndoshta gazetarët e rinj, me një përvojë shumë të vogël në gazetarinë hulumtuese, hyjnë në këtë treg dhe kanë frikë ndaj kërcënimeve, dhe ndoshta tërhiqen e nuk merren më me këtë industri. Si të përballohet kërcënimi?

Prof. Musa Sabedini: E keqja më e madhe do të ishte nëse ata tërhiqen, pra tërheqje kjo punë nuk ka. Esenca kryesore këtu është që çdo gazetar hulumtues, në përgjithësi, duhet të ketë durim. Pra arma ime kryesore ka qenë durimi.

Unë kam duruar shumë. Më kanë kërcënuar njerëzit dymbëdhjetë herë brenda ditës dhe më thoshin: “ora 12:10 kam me ardhë me të vra në zyrë”. Unë isha i qetë dhe i thosha: “le shtyje për 12:30”. Pra i kam marrë me sportivitet. Nuk do të thotë që kjo nuk ka ndikuar në shëndetin tim, të merremi vesh.

Por nëse do të merresha më seriozisht me njerëz kriminelë, duhet ta lësh gazetarinë. Unë kam fituar në raport me ata. Ata kanë humbur.

Unë kam rreth dymbëdhjetë raste që i kam futur në burg. Janë arrestuar, e kanë mbajtur dënimin ose më kanë kërkuar falje dhe e kanë parë që kanë gabuar, sepse nuk mund të shpikësh diçka kur unë kisha tema hulumtuese të mira. Dhe njerëzit që janë të pakënaqur gjejnë lloj-lloj alibish.

Kurrë mos harro, është një porosi e imja: kur shkruan për korrupsion, ryshfet, për krim të organizuar, mos prit që ai ka me të dhënë lule. Ata janë të revoltuar dhe janë njerëz të ndjeshëm. Kini kujdes, mos u dilni përballë. Ditën e parë të botimit të teksteve, gjithmonë gazetarët duhet të kenë kujdes, duhet të ruhen, të mos dalin në vende publike nëse të fyejnë ose të kërcënojnë.

Tash është bërë problem Facebook-u për t’u menaxhuar, por edhe në Facebook kurrë mos u shtyni me ta, kurrë mos u ktheni përgjigje. Le të fyejnë, le të shajnë. Ti, me maturi, me urtësi, me dinjitet duhet ta kalosh këtë problem.

Përndryshe, edhe e shkatërron veten, edhe mbetesh pa e realizuar temën hulumtuese.

Driton Hyseni: Tash, nëse e marrim parasysh, një gazetar hulumtues mund të ketë edhe pasoja individuale. Ndoshta kërcënimet mund të jenë individuale. A mendoni që këtu mund të ketë rol edhe redaksia, ndoshta tërësia e mediave ku punon gazetari? A duhet ta mbrojë, a ka mekanizma mbrojtës?

Prof. Musa Sabedini: Ka mekanizma mbrojtës. Në çdo prokurori është një prokuror që merret veç me gazetarë, por kjo është e pamjaftueshme. Elementi më kryesor për mua është uniteti mes gazetarëve.

Kërcënohet një gazetar, të gjithë gazetarët duhet ta shohin si kërcënim. Është Këshilli i Mediave të Shkruara, është Komisioni i Pavarur për Media që reagojnë nëse është një gazetar profesionist. Kjo është e mirë kur reagojnë, por ka shumë raste që fare nuk reagojnë, pra nuk ka unitet.

Ti kërcënohesh, ai çohet e gjen një portal dhe shkruan kundër teje, e kështu me radhë.

Media dhe as gazetari nuk duhet ta kenë prokurorin si çelës.

Unë kurrë nuk kam dëshirë ta çoj palën në gjykatë. Gjykatën e shoh si mjetin e fundit dhe kurrë nuk kam frikë pse më kërcënon dikush.

Por kur më padit në Këshill ose bën një ankesë në Këshillin e Mediave të Shkruara, atëherë kam nevojë të ndihem keq, kur e di që nuk të kanë paditur lehtë. Edhe pse edhe kjo është çështje diskutabile.

Por është shumë me rëndësi që gazetarët të kenë bashkëpunim mes veti, të jenë unifikues, të jenë solidarë. Kjo neve na shpëton, na jep motiv, na jep frymë të re, na jep energji dhe ne fitojmë. Pra humbin gjithmonë ata që konsiderojnë se e kanë shtetin afër vetes.

Driton Hyseni: A shihni sot që gazetarët kanë unitet mes veti?

Prof. Musa Sabedini: Jo, siç thashë, nuk ka absolutisht. Mund të ketë deri diku, por nuk është siç kam unë dëshirë. Jo të gjitha portalet janë në Këshill, Këshilli është i kufizuar.

Këshilli mund të reagojë, është mirë dhe po them që në çdo rast, nuk ka lidhje, mund të jetë në Han të Elezit ai djali gazetar i ri, ne duhet ta mbrojmë.

Në redaksi, përpara kur kam punuar online, ka qenë Faton Osmani, ai kolegu që vdiq dhe më ka thirrur në Gjilan i pari. Tha: “Unë vij në Gjilan për ty.”

Fatonin e kam pasur redaktor, ai ka qenë për mua si me ma dhënë krejt Gjilanin, sepse ishte një motiv shumë i madh kur më tha redaktori: “Unë vij për ty.” Tha që ti s’ke nevojë të shtyhesh me njerëz e të kërcënohesh.

Edhe kjo është me rëndësi, domethënë redaksia me të mbrojtur, por edhe institucionet, edhe policia duhet të reagojnë, edhe policia duhet të reagojë me kohë, sepse ndonjëherë vonohet.

Driton Hyseni: Po ndalem te kjo pjesë, meqë thamë që mungon uniteti i gazetarëve. A ka faj ndoshta gazetari? A duhet gazetari të fajësojë institucionet publike ose institucionet tjera nëse ato nuk japin fakte ose qasje në dokumente gazetarëve? A duhet t’i fajësojë institucionet gazetari?

Prof. Musa Sabedini: Patjetër, gazetari ka gjithmonë të drejtë, vetëm duhet ta ndjekë në rrugë ligjore. Mos harroni, kjo më shumë është punë teknike, çështja e email-eve.

Unë e kam provuar vetë, u kam shkruar tri deri në katër ministrive email-e, kurrë një përgjigje nuk kam marrë. Pastaj kam filluar me telefona, as telefonat nuk i hapin, sepse nuk ta njohin gazetarin, ikin.

Është me rëndësi që gazetari të jetë insistues, të mos dorëzohet, gjithmonë insistues, sidomos për tema hulumtuese.

Ne e thamë që kemi problem me qeveri, kemi problem me kryetarë komunash, me ministra, kemi problem me njerëz në sistemin e drejtësisë, njerëz që janë të korruptuar.

Ata kanë njerëz, kanë një garniturë aq të thellë sa që ti as ide nuk ke. Është problem me hyrë në mesin e kësaj strukture.

Por gazetari i mirë, gazetari që ka intuitë dhe shije profesionale, ai kurrë nuk dështon. Siç thashë më herët, beso në atë që ke hulumtuar, që e ke verifikuar.

Pra bëj material, grumbullo material, verifiko, verifiko, verifiko, që kur të shkosh të telefonosh, ti të flasësh me fakte, jo të thuash “kam dëgjuar”. Nuk ka nga gazetari “kam dëgjuar”, ajo vdes. Ajo është jo serioze.

Në gazetarinë hulumtuese mjafton t’i thuash: në filan datë ke vjedhur, kjo faturë është rritur, kjo e ka çmimin dhe kaq e ke dëmtuar buxhetin.

Driton Hyseni: Cili mendoni që është opinioni publik ndaj gazetarëve hulumtues, por edhe gazetarëve në përgjithësi?

Prof. Musa Sabedini: Kjo është pyetja ndoshta më e mirë, sepse lidhet me etikë. Fatkeqësisht, shoqëria në Kosovë nuk i do gazetarët, nuk po them e gjithë shoqëria, por i shohin mediat si armiq, i shohin gazetarët si rivalë.

Gazetarët nuk janë rivalë, mediat as të qeverisë, as të institucioneve, as të njerëzve të fushave të ndryshme. Gazetarët janë partnerë të mirë, por gazetaria hulumtuese dallon, nuk e njeh këtë orientim, e anashkalon, është në vete.

Por në përgjithësi, mediat kanë filluar… është ky pushtet i tanishëm që ka instaluar një gjuhë të urrejtjes të rrezikshme në raport me gazetarët. Nuk po them gjithmonë, sepse edhe gazetarët kanë të drejtë, ndonjëherë edhe e teprojnë.

Për shembull, i kam parë mediat si vrapojnë pas Albin Kurtit. Po pse po vrapon, nuk ka nevojë. Ai nuk po thotë asgjë. Injoroje, mos ia vendos mikrofonin përpara. Kjo është për mua gazetari i mirë.

Nuk është gazetari ajo që pret tri orë me mikrofon një kryeministër. Nuk ka rëndësi kush është. Ai të injoron, pse po shkon? Tregoje veten.

Gazetari duhet të ketë ego të shëndoshë, të ketë kredibilitet, ndershmëri, integritet në punë, që kur del një kryeministër, të frikësohet para teje.

Jo 15 gazetarë që ai i bën pesë pare, nuk ju jep përgjigje, ikën dhe e kryen punën e vet, ndërsa ti del keq.

Driton Hyseni: A po mendoni që kanë më tepër përgjegjësi institucionet ndaj këtij opinioni publik?

Prof. Musa Sabedini: Jo, institucionet janë përgjegjëse. Gazetarët kanë raste kur e teprojnë, por institucionet kanë më shumë përgjegjësi. Institucionet duhet ta ndërtojnë një raport të shëndoshë komunikimi.

Driton Hyseni: Sepse, me thënë drejt, po shohim që dalin edhe persona që ndoshta nuk janë gazetarë të mirëfilltë, por më tepër krijojnë show ose mekanizma të tjerë për të tërhequr vëmendjen e publikut.

Sidomos në rrjetet sociale shohim figura të reja që dalin dhe japin opinionin e tyre për tema të caktuara.

Prof. Musa Sabedini: Ato shumë rrallë i përcjell. Këta që dalin me mikrofon, edhe unë i urrej. Ato raste janë të tepruara, por nuk kanë lidhje me gazetarinë, janë pjesë e showbiz-it.

Ne po flasim për institucione. Një zëdhënës i qeverisë, ose zëvendësi i komunës, ose një drejtor duhet të krijojë raporte të shëndosha me media.

Kohëve të fundit, mediat po shihen si armiqësore dhe kjo ndikon edhe në publik. Kot thua unë jam portal serioz institucional kur publiku thotë: ti je portal i krimit, sepse dikush lart e ka thënë.

Kjo nuk më pëlqen. Institucionet duhet të kuptojnë që demokratizimi i tyre në raport me media duhet të jetë parimor. Gazetari është partner i mirë nëse di ta shfrytëzosh, media është partnere e shkëlqyeshme nëse di ta shfrytëzosh.

Pra nuk ka media që del e mirë, thuhet se të gjitha janë të korruptuara, të gjitha janë të Serbisë. Kjo është e tmerrshme, standard shumë i ulët dhe i pavërtetë.

Unë thashë në fillim, mund të ketë media dhe gazetarë që paguhen në forma të ndryshme, por nuk janë shumicë.

Shumica e mediave në Kosovë janë profesionale, janë gazetarë të vjetër, që e dinë çfarë është gazetaria. Ata sulmojnë, por kjo është puna e gazetarit hulumtues.

Driton Hyseni: A mendoni që kjo ka ndodhur ndër vite?

Prof. Musa Sabedini: Jo, ka pasur edhe më herët, por shumë më pak. Për shembull në kohën e Thaçit, Ramushit dhe Isës ka pasur fërkime, por jo në këtë mënyrë masive.

Tani mediat shpesh paragjykohen menjëherë. Nëse nuk shkon fare, ata automatikisht të etiketojnë: je i këtij klani apo atij klani.

Nuk është media e asnjë klani. Unë nuk kam klan, kam portal, jam gazetar profesional, 35 vite i kam bërë, i kam shërbyer qytetarëve dhe interesit publik.

Unë nuk punoj për para në portal, të tjerët mund të punojnë, por unë jo.

Nuk mund të jetoj pa këtë profesion. E kam dashur gjithmonë dhe prapë e dua, pavarësisht disa problemeve shëndetësore, të cilat i kam tejkaluar.

Driton Hyseni: E kemi edhe një pyetje të fundit, që lidhet me profesionin tuaj si profesor. Sa interes kanë të rinjtë për të studiuar gazetari dhe sa janë të aftë studentët t’i përballojnë këto sfida?

Prof. Musa Sabedini: Studentët sot kanë mundësinë ta përzgjedhin këtë profesion, këtë profil ose këtë fushë të medias dhe komunikimit.

UBT-ja ka një ekip të jashtëzakonshëm profesorësh. Unë kam bërë 15 vite aty dhe ka studentë të jashtëzakonshëm.

Çdo student në UBT nuk mbetet pa punë. Ai që është në Media dhe Komunikim bëhet gazetar. Ka studentë të mi që kanë portale, janë gazetarë të mirë, studiues dhe ekspertë të mirë.

Ata po vazhdojnë dhe madje po na kalojnë edhe neve, që tregon fuqinë dhe përvojën që kemi ndërtuar.

Unë do t’i sugjeroja të rinjve ta zgjedhin këtë drejtim, jo vetëm në UBT, por kudo, sepse është një profesion fisnik.

Është profesion që të mban gjithmonë aktiv. Autoriteti krijohet me punë, ndikimi krijohet me angazhim, me djersë.

Nuk ka më mirë se një gazetar të jetë i përpiktë dhe të edukohet mirë.

E kam thënë edhe në promovimin e librit: gjithmonë i pyes studentët në orën e parë çfarë duan – televizion, moderim, media të shkruara apo sport.

Por shumë rrallë dikush thotë gazetari hulumtuese, sepse është e vështirë dhe sfiduese, por jo e papërballueshme.

Një gazetar, pa bërë të paktën pesë ose gjashtë vite aktive, nuk mund të arrijë këtu.

Nuk janë të gjithë Messi. Dikush arrin më shpejt, dikush më ngadalë.

Por është shumë me rëndësi që të rinjtë të mos largohen nga ky profesion, sepse ka vlera të jashtëzakonshme.

Të jesh gazetar është punë e madhe. Je i pavarur, krijon vetë audiencë, hulumton vetë.

Ky profesion kërkon angazhim, nuk është për rehati.

Këshilla ime është: duajeni gazetarinë, të gjitha zhanret e saj.

UBT ka kuadër të jashtëzakonshëm dhe besoj që nuk gabon askush nëse zgjedh Media dhe Komunikim.

Driton Hyseni: Faleminderit shumë profesor. Po e përfundojmë këtë podcast me këto këshilla, duke shpresuar që do të trajtojmë tema të tjera në episodet e ardhshme.

Prof. Musa Sabedini: Faleminderit, Driton. Dua të të jap një falënderim, sepse për ty kam pasur gjithmonë qasje pozitive. Ke qenë student i zoti dhe e ke dashur këtë profesion, dhe po e shoh që e bën me shpirt.

20 mars 1993

 Lajmet kryesore:

Kryetari Rugova priti këshilltarin e Ministrisë së Jashtme të Francës;

Këshilltari i Ministrisë së Jashtme të Francës bisedoi me përfaqësues të partive politike të Kosovës;

Uoren Kristofer: SHBA-të do të veprojnë vendosmërisht në rast të agresionit në Kosovë e Maqedoni;

Manfred Verner: Konflikti në Kosovë rrezikon paqen ndërkombëtare;

Pjesë nga komenti i ATSH-së rreth luftës propagandistike serbe;

Pesë refugjatë të Kosovës pësuan në Itali;

Në fshatin Llazicë të Malishevës u stacionuan rreth 100 ushtarakë serbë;

Edhe në Klinë parakalime të ushtrisë serbe;

Në Gjilan vazhdon arrestimi i veprimtarëve shqiptarë;

Nga shkolla e mesme teknike “Fan S.Noli” të Podujevës u konfiskuan rreth 20.000 litra naftë;

Në Torinë të Lipjanit u bastisën gjashtë familje;

“Die Presse”: Austria veçmas do të ndihmojë arsimin shqiptar;

Nënkryetari i Bosnjës thotë se sulmi serb në Kosovë vjen mbas rënies së Bosnjës;

Kryeministri i Serbisë paralajmëron aksion energjik në Kosovë;

Arkani – personifikim i klasës politike të gangsterëve në Serbi;

Policia e Malit të Zi i dëboi emigrantët që kishin ardhur nga Shqipëria;

Policia serbe thekson se zuri një bandë vjedhësish të veturave;

Francezët ofruan ndihmë profesionale ndërmarrjeve të dhunshme serbe në Kosovë.

 

 

Dr.Ibrahim Rugova: NATO-ja do të na mbrojë

 Presidenti i Republikës së Kosovës dr.Ibrahim Rugova pas turneut diplomatik në SHBA, Bruksel, Paris, Romë dhe Tiranë, i dha një intervistë revistës “Zëri” të Prishtinës.

Pas kontakteve që patëm me administratën e re amerikane, tha dr.Rugova, u vërtetuam se ajo ka një disponim mjaft të mirë ndaj çështjes së Kosovës dhe një interesim të shtuar për rajonin. Ne kërkuam nga SHBA-të të parandalojnë konfliktin në Kosovë, sepse po të ndodhë konflikti atëherë mund të jetë vonë. Deklarata e presidentit amerikan Klinton është një mbrojtje për Kosovën dhe një inkurajim për shqiptarët, që të qëndrojnë në rezistencën e tyre.

Duke folur për konfliktin e mundshëm në Kosovë, kryetari Rugova tha se shqiptarët nuk mund të fillojnë konflikt në Kosovë, sepse janë tërësisht të paarmatosur dhe janë populli më i pambrojtur, ata mund të revoltohen dhe Serbia mund ta përdor këtë si alibi për të intervenuar, prandaj mendimet e tilla se shqiptarët po inkurajohen nga Amerika për të hyrë në luftë janë joserioze. Brengën e SHBA-ve për Kosovën duhet ta shprehin edhe evropianët.

Në Kosovë mund të ketë grupe që janë më radikale në kërkesat e tyre, pra fjala është për një radikalizëm verbal, por askush nuk ka mundësi të organizojë mbrojtje. Ne kemi kontroll mbi popullin, por nëse nuk gjejmë zgjidhje në bazë të referendumit dhe kërkesave politike, atëherë radikalizimi do të shënojë rritje.

I pyetur të komentojë planin e tij paqësor, kryetari Rugova tha se është fakt se preventivë e vetme e sigurt, që të mos ndodhë konflikti në Kosovë, është vendosja e Kosovës nën protektoratin e Kombeve të Bashkuara. Kjo ide po depërton gjithnjë më shumë edhe në qarqet shtetërore diplomatike të Perëndimit dhe në vet OKB-në. Para nesh e shtrojnë çështjen e legalitetit të zgjedhjeve tona por ne ishim pjesë e ish-Jugosllavisë, e cila po ashtu nuk është legale, madje as vet Serbia nuk e ka njohjen ndërkombëtare. Po ashtu nuk mund të harrohet se Kosova ishte pjesë e ish-Federatës, kështu që ka legalitetin dhe legjitimitetin e vet edhe sipas ligjeve të ish-Jugosllavisë por edhe sipas atyre ndërkombëtare. Ideja e protektoratit do të ishte vërtetë zgjidhje që do të çonte kah një zgjidhje fatlume.

Duke folur për pritjen që iu organizua kryetarit Rugova në Itali, ai tha se Italia është zgjuar dhe ka zënë të interesohet më shumë për shqiptarët dhe për Ballkanin. Ajo e njeh më së miri çështjen shqiptare dhe Ballkanin në tërësi, ishte pak a shumë anash deri tash dhe tani dëshiron të inkuadrohet në këto çështje si anëtare e BE-së, e NATO-s dhe si fuqi në rajon. Ndoshta, Italia interesohet më shumë për këtë zonë edhe me mandatin e OKB-së, tha Rugova dhe vazhdoi se mund të jetë që Italia të ndërmjetësojë midis shqiptarëve dhe serbëve, por po ashtu ajo interesohet edhe për shkak të lidhjeve ekonomike në rajon.

Kryetari i Republikës së Kosovës foli edhe për rolin e NATO-s në Ballkan dhe shtoi se ajo po merr një rol të ri në Evropë, por jo më si në kohën e luftës së ftohtë. Aksionet e NATO-s i shikoj si preventivë në këtë pjesë të Ballkanit… NATO do të jetë mbrojtëse dhe stabilizuese në rajon.

Lidhur me marrëdhëniet e NATO-s me Shqipërinë, Rugova tha se Republika e Shqipërisë do të bashkëpunojë ngushtë me NATO-n dhe sigurisht do të bëhet edhe anëtare e saj, por dihet se janë edhe disa kushte të cilat duhet t’i plotësojë një anëtare e këtij pakti. Sidoqoftë, tha dr.Rugova në intervistën dhënë “Zërit”, është me rëndësi që Shqipëria është ndër vendet e para të Lindjes që bashkëpunon në mënyrë intensive me NATO-n.

 

 

20 mars 1995

 Lajmet kryesore:

Ministri Serreqi: Statusi i Kosovës është çështje e bisedimeve në prani të palës së tretë;

1. Zhulali: Të aftë për ruajtjen dhe mbrojtjen e sovranitetit;

Kultura shqiptare në Festivalin XII të Emigracionit në Luksemburg;

Eksodi ndërpritet me shembullin personal;

Dhjetëra shqiptarëve nuk iu lejua hyrja në vendkalimin kufitar në Suboticë;

Dhuna e përditshme në Kosovë;

Mbledhja e Këshillit Profesional të Festivalit Kombëtar të Komedisë në Preshevë;

Shtypi serb për veprimtarinë private në Kaçanik.

 

 

20 mars 1997

Përmirësohet gjendja në Durrës

Balla: Përmirësohet furnizimi me artikuj të domosdoshëm në Tiranë

Ministria e Shëndetësisë bën apel për vazhdimin e vaksinimit të fëmijëve

Katër të vrarë gjatë ditës së djeshme në Shqipëri

 

Prishtinë, 20 mars (QIK)

Katër veta u vranë me plumba gjatë 24 orëve të fundit në Shqipëri, njofton AFP, duke cituar burime të Ministrisë së Brendshme të Shqipërisë. Këta persona u vranë në Pukë, Korçë dhe Fier dhe në Tiranë, ndërsa pesëmbëdhjetë persona ishin vrarë një ditë më parë.

Këto viktima të reja e çojnë në më se 115 veta numrin e të vdekurve, që nga 28 shkurti.

 

Lajmet kryesore:

U rihap Aeroporti i Rinasit;

Banorët e Gjirokastrës kërkojnë mbrojtje prej bandave;

Shpëtoi nga përmbytja një anije me 350 shqiptarë;

Sovraniteti i Maqedonisë mbështetet mbi sovranitetin e qytetarëve;

Parlamenti i Maqedonisë miratoi deklaratën për marrëdhëniet ndëretnike.

 

 20 mars 1997

Lajmet kryesore:

Komiteti i Shpëtimit Mbarëkombëtar në mbrojtje të institucioneve demokratike;

Rezolutë e Unionit Kombëtar të studentëve danezë për arsimin në Kosovë;

Komitetit Danez për Kosovën nuk i lejohet vizita në Kosovë;

Rektori i UP-së priti diplomatët gjermanë;

Qeveria Shqiptare hodhi poshtë ultimatumin e rebelëve;

Shehu: Për organet legjitime, e jo komitetet e vetëshpallura;

BE e kushtëzon dërgimin e ndihmave në Shqipëri;

Brengosje për shkak të një vale të re të refugjatëve nga Shqipëria;

De Sharet: Evropianët të gatshëm për të ndihmuar Shqipërinë;

Tirana kritikon qëndrimin e zëvendësministrit të jashtëm grek në Gjirokastër e Sarandë;

Qeveria analizoi punën dhe detyrat që i dalin SHIK‑ut;

Korçë: Merren masa për stabilizimin e situatës;

Në Shqipëri vazhdon dorëzimi i armëve;

U mor në pyetje një nxënës nga Kamenica;

Dhuna e përditshme në Kosovë;

U lirua nga burgu Halit Rama.

 

 

Autoritetet italiane shpëtuan 400 shqiptarë

 Prishtinë, 20 mars (QIK)

Autoritetet ushtarake të Barit kanë shpëtuar jetën e rreth 400 qytetarëve shqiptare, të cilët gjatë lundrimit për në Itali, kishin mbetur në det të hapur, pasi anija e tyre “Rozafa” pësoi një defekt të rëndë, ndërkohë që deti ishte me dallgë të medha.

Ka qenë një sinjal i Rita Bishës, punonjëse tek firma “Poseidon” në Shëngjin që ka njoftuar pronarin e kësaj firme në Itali, Alfredo Shermino për këtë ndodhi. Shermino mënjëherë ka njoftuar autoritetet ushtarake të Barit, të cilat kane nisur 2 helikopterë dhe 3 anije ushtarake në drejtim të anijes “Rozafa” që po mbytej.

Sipas zotit Shermino, rreth orës 16.00, të gjithë njerëzit janë imbarkuar në anijet ushtarake, duke i shpëtuar kështu tragjedisë.

 

20 mars 1999

Edicioni i orës , 10:00:

Sulme të forcave serbe në disa komuna të Kosovës

Në ditën e parë të largimit të Misionit Verifikues të OSBE-së nga Prishtina dhe qendrat tjera të Kosovës, forcat serbe kanë ndërmarrë aksione në disa anë të Kosovës.

Burime të degëve të LDK-së kanë njoftuar për sulme të ndërmarra nga forcat serbe që në orët e mëngjesit në komunat e Podujevës, Vushtrrisë, Mitrovicës, Skënderajt e Gllogocit.

Banorët e fshatrave Dumnicë e Epërme dhe Përpellac të komunës së Podujevës, që gjenden afër kufirit Kosovë-Serbi, janë larguar me orët e para të ditës së sotme nga shtëpitë e tyre.

Në këto fshatra ka hyrë një kolonë e madhe e forcave serbe e cila tash një kohë të gjatë qëndronte e stacionuar në afërsi të kufirit. Forca të mëdha dhe automjete të shumta luftarake janë vendosur në vendin e quajtur “Te lisat” në Dumnicë të Epërme dhe në afërsi të objektit të shkollës në Përpellac.

Ndërkohë forcat serbe në orët e mëngjesit kanë granatuar fshatrat Majac, Buricë, Godishnjakë e Sallabajë të Podujevës.

Nga ora 6.30 forcat serbe kanë filluar të granatojnë në drejtim të fshatrave Ashlan, Pantinë e Lkej të Vushtrrisë, të cilat pothuaj tash një muaj me radhë sulmohen e granatohen për çdo ditë.

Një konvoj i madh i forcave serbe, i përbërë prej mbi 50 automjetesh luftarake, ka shkuar sot nga Mitrovica në drejtim të Skënderajt, prej ku ditëve të fundit gjithashtu ka pasur njoftime për koncentrim të madh forcash dhe për zhvendosje të popullsisë nga frika e aksioneve të mundshme.

Në orën 6.30 forcat serbe kanë filluar granatimet në drejtim të Mikushnicës e Prekazit të Skënderajt.

Nga Mitrovica u njoftua se në rrugën nga Tërrnafci e deri në Skënderaj ka automjete të shumta të forcave serbe, ndërkohë që këmbësoria serbe ka mësyrë Prekazin e Ulët, Prekazin e Epërm dhe Polacin.

Ndërkohë, një burim nga Skënderaj njoftoi se përreth kësaj qyteze ka shumë forca serbe, ndërsa banorët kanë nisur të zhvendosen nga lagjja në afërsi të Fabrikës së Municionit. Gjithashtu, thuhet se rrugëve të Skënderajt po vërehen pjesëtarë të forcave serbe të veshur me uniforma të bardha. Banorët që kanë mbetur nëpër shtëpitë e tyre druajnë për ndonjë aksion të mundshëm kundër popullatës së pambrojtur.

Edhe nga komuna e Gllogocit është njoftuar se forcat serbe në orët e mëngjesit kanë filluar granatimet në drejtim të fshatrave të kësaj komune.

 

 

Edicioni i orës 11:30:

KMDLNJ: Forcat serbe sulmuan sot pesë fshatra të Prishtinës;

Kanë filluar të granatohen shumë fshatra të Drenicës;

Vazhdon gjendja e rëndë në Skënderaj;

Vushtrri: Granatohen disa fshatra shqiptare – stacionime të forcave serbe në Mihaliq;

Në Lipjan kanë mbërritur një konvoj i madh i mjeteve ushtarake;

Deçan: Policia arrestoi një të ri shqiptar;

Mediat serbe njoftojnë për tri sulme në stacionet e policisë serbe.

 

Edicioni i orës , 14:00:

LDK: Të mbrohet populli i Kosovës sa s’është bërë vonë;

Klinton: “Hezitimi për të vepruar është dhënie e lejes për të vrarë”;

Shtetet perëndimore u kërkojnë qytetarëve të tyre të largohen nga “RFJ”-ja;

Thaçi: “Morëm garanci për intervenim ndërkombëtar”;

Komunikatë e Kryesisë së Degës së LDK-së në Podujevë;

Vazhdojnë sulmet në fshatrat e Drenicës – mijëra të zhvendosur në Qirez;

Obiliq: Forcat serbe granatuan sot edhe Milloshevën e Breznicën;

Granatat serbe ranë edhe në katër fshatra të Vushtrrisë;

Shumë shtëpi të demoluara në Dumnicë te Epërme të Podujevës;

Podujevë: U varrosën Nazmi Ismajli e Ismet Beqiri;

Kaçanik: Forcat serbe hynë në fshatin Llanishtë, dogjën 2 shtëpi dhe arrestuan 11 shqiptarë;

Nuk dihet për fatin e Shqipe Kacabashit nga Topliçani i Lipjanit;

Ferizaj: Në stacionin e policisë u sollën rreth 20 persona të keqtrajtuar fizikisht;

Rahovec: Të shtëna me armë automatike dhe lëvizje të mëdha të forcave serbe;

Nga Bujanoci në drejtim të Gjilanit shkoi një konvoj i madh i ushtrisë serbe;

Anan: “Shpresoj se serbët do të marrin qëndrim pozitiv”;

Solana: “NATO është e gatshme të marrë gjithë përgjegjësinë”;

Klark: NATO ka disa opcione të gatshme;

KKA i Vushtrrisë ndërpreu procesin mësimor;

Rekomandim i LASH-it dhe organeve arsimore të Kosovës;

Për Moskën të papranueshme sulmet pa pëlqimin e KS të OKB-së;

Partia Socialdemokrate e Serbisë: “Procesi i negociatave nuk bën të mbyllet”.

 

Edicioni i orës , 17:30:

Në fshatin Vranidoll nga shpërthimi i një granate u plagosën babë e bijë;

Rreth 2000 banorë shqiptarë të Breznicës i braktisën shtëpitë e tyre;

Tensionet situata për shkak të lëvizjeve të forcave ushtarake serbe në Kamenicë e rrethinë;

LD në Mal të Zi kërkon kthimin e ushtrisë “jugosllave” në kazerma;

Gjakovë: Lëvizje të shtuara të forcave serbe;

U gjet trupi i Murat Sylajt nga Sllapuzhani i vrarë më 18 mars;

Në drejtim të Drenicës shkuan 12 tanke dhe disa kamionë ushtarakë;

Në fshatin Lubizhdë të Vitisë u arrestua një grup qytetarësh;

Fushë-Kosovë: Civilë të armatosur serbë sulmuan të rinjtë shqiptarë;

Forcat serbe për 10 orë kanë djegur shumë shtëpi në disa fshatra të Vushtrrisë;

Fëmija Gentian Nezir Berisha gjendet në Prishtinë.

 

Masat ndëshkuese që Bashkimi Evropian ia vendosi Kosovës në qershorin e vitit 2023, u hoqën përfundimisht vetëm në mars të këtij viti, ani pse drita e gjelbër u dha në fund të dhjetorit të vitit 2025. Kosova ka insistuar për kohë të gjatë se masat ishin të padrejta dhe që i kishte plotësuar të gjitha kushtet për heqjen e tyre. Kush saktësisht ua sheh hairin fondeve evropiane për Kosovën?

Pas gati tre vjetëve, Kosovës nuk i rëndon më pesha e masave ndëshkuese që Bashkimi Evropian ia vendosi për shkak të tensioneve në veriun e banuar me shumicë serbe.

Lajm edhe më i mirë është se përfituesit më të mëdhenj janë qytetarët e Kosovës, pasi lëshimi i fondeve pritet të ndikojë, mes tjerash, edhe në hapjen e vendeve të reja të punës.

Autoritetet në Kosovë i kanë cilësuar masat vazhdimisht si të padrejta, pasi deklaronin me bindje se i kishin plotësuar kohë më parë kërkesat e BE-së për heqjen e tyre: uljen e tensioneve dhe zvogëlimin e pranisë policore afër objekteve të katër komunave në veri të Kosovës.

Masat patën kosto të konsiderueshme financiare për Kosovën, pasi u pezulluan apo u shtynë projekte të ndryshme në kuadër të Instrumentit të Para-Anëtarësimit (IPA II dhe III), si dhe Kornizës Investuese për Ballkanin Perëndimor (WBIF).

 

Përfitimet kryesore

Njomza Arifi, drejtoreshë ekzekutive në Grupin për Studime Juridike dhe Politike (GLPS), thotë për Radion Evropa e Lirë (REL) se në dhjetor të vitit 2025 u liruan 216 milionë euro që lidheshin kryesisht me arsimin, sikurse është skema e bursave Young Cell dhe projekte infrastrukturore e mjedisore.

Young Cell ofron bursa për të rinjtë që dëshirojnë të studiojnë në vendet evropiane. Këtë muaj, kjo skemë përmbylli aplikimin për 37 bursa të plota pasuniversitare. BE-ja i ka ndarë 3 milionë euro, ndërsa Kosova 1 milion shtesë.

Te projektet infrastrukturore përfshihet ndarja e 12 milionë eurove për ndërtimin e impiantit për trajtimin e ujërave të zeza në termocentralin Kosovën B, mbështetja për ngrohjen qendrore me 17.6 milionë euro si dhe projekte të tjera.

“Pjesa e mbetur prej 205 milionë eurosh që u lirua këto ditë përfshin kryesisht fonde të IPA-s dhe të WBIF-it dhe do të programohen për të mbështetur reforma të ndryshme që ndërlidhen kryesisht me fushat thelbësore siç janë sundimi i ligjit, qeverisja e mirë, zhvillimi ekonomik, dhe arsimi”, thotë Arifi për REL-in.

Për Rrona Zhurin, koordinatore e hulumtimeve në Institutin për Studime të Avancuara – GAP, heqja e masave mundëson rikthimin e normalitetit në raportet me BE-në.

“Lirimi i fondeve pritet të ketë një ndikim të gjerë pozitiv në disa dimensione të zhvillimit. Në aspektin ekonomik dhe të punësimit, rifillimi i projekteve kapitale dhe investimeve pritet të gjenerojë vende të reja pune dhe të rrisë aktivitetin ekonomik në vend. Njëkohësisht, në fushën e shërbimeve publike, sektorë si energjia, mjedisi dhe infrastruktura do të përfitojnë drejtpërdrejt, duke kontribuar në përmirësimin e cilësisë së jetës për qytetarët”, thotë Zhuri.

Sipas saj, ndikimi i lirimit të fondeve shtrihet edhe në reformat strukturore, pasi fondet e Bashkimit Evropian zakonisht lidhen me kushte të caktuara reformash, duke nxitur përparim në fusha të rëndësishme sikurse sundimi i ligjit, administrata publike dhe zhvillimi i qëndrueshëm.

E, Arifi beson se pikërisht këto reforma e përmirësojnë mirëqenien e qytetarëve.

“Prandaj përfitues të këtyre fondeve natyrisht që janë qytetarët e Kosovës, në përgjithësi. Si të tilla, ndihmojnë vendin për të shënuar progres në rrugën evropiane, duke mbështetur procese reformuese që ndërlidhen ngushtë me parakushtet për anëtarësim në BE”, thotë ajo.

Kosova është vendi i vetëm i Ballkanit Perëndimor që nuk e gëzon statusin e vendit kandidat për anëtarësim në BE. Aplikimi që ka bërë vendi më 2022, nuk është shqyrtuar ende nga institucionet e bllokut evropian.

 

Pasojat e masave

Përveç bllokimit të fondeve, masat e prekën edhe aspektin politik, meqë pati kufizime të takimeve dypalëshe të nivelit të lartë dhe në nivelin e nënkomiteteve të lidhura me Marrëveshjen e Stabilizim – Asocimit, marrëveshjen e parë kontraktuale mes Kosovës dhe BE-së.

Megjithatë, Brukseli ka sinjalizuar se synon riangazhim të plotë me autoritetet në Kosovë.

Arifi beson se kështu do të krijohet momentum i ri në dialogun e ndërsjellë me BE-në, pasi masat patën “ndikim negativ në kredibilitetin ndërkombëtar të Kosovës”.

Edhe Rrona Zhuri beson se masat i humbën shumë mundësi Kosovës.

“Çdo vonesë apo pezullim i projekteve nënkupton shtyrje apo humbje e mundësive për zhvillim, përmirësim të mirëqenies së qytetarëve, forcim institucional dhe vonesë në procesin e integrimit evropian”.

Sipas një hulumtimi të GAP-it të vitit 2025, masat financiare rezultuan me 613.4 milionë euro projekte të pezulluara apo të shtyra, dhe sektori më i goditur ishte ai i mjedisit me 350 milionë euro.

Sipas njohëseve të këtyre çështjeve, realiteti i ri duhet të shërbejë si shtysë për përparim në fusha që lidhen me integrimin evropian.

“Mbetet shumë e rëndësishme që Kosova ta shfrytëzojë këtë moment pozitiv për t’i përshpejtuar proceset integruese, duke shmangur bllokimet e mëtutjeshme nga krizat e brendshme politike”, porosit mes tjerash Njomza Arifi. /REL/

 

 

Përzgjedhësi i Sllovakisë, Francesco Calzona, ka publikuar këtë të enjte listën e lojtarëve për ndeshjen vendimtare kundër Kosovës, e cila do të luhet më 26 mars në Bratislavë.

Kjo përballje është gjysmëfinalja e plejofit kualifikues për Kupën e Botës 2026, ku sllovakët kanë përfshirë dy yjet kryesorë, Milan Skriniar dhe Stanislav Lobotka, pavarësisht problemeve të tyre fizike.

Kapiteni Skriniar nuk ka luajtur fare që nga lëndimi me Fenerbahçen më 19 shkurt në Ligën e Evropës, por stafi teknik po shpreson në rikuperimin e tij të shpejtë për sfidën ndaj “Dardanëve”.

Krahas tij, në dyshim mbetet edhe gjendja e mesfushorit me përvojë, Stanislav Lobotka, duke krijuar pasiguri në formacionin e Calzonës para këtij takimi jetik që do të zhvillohet në Stadiumin Nacional.