Monedha e Iranit rial ra sot në nivelin më të ulët në histori, duke sinjalizuar sfida të reja përpara Teheranit, pas fitores së Donald Trump në zgjedhjet presidenciale në Shtetet e Bashkuara të Amerikës.

Sipas burimeve nga Teherani, sot është thyer rekordi i vlerës më të ulët të monedhës iraniane, kur 703 mijë rialë iranianë kapin vlerën e një dollari dhe gjatë ditës monedha u rikuperua lehtë me vlerën 696.150 rial për 1 dollar.

Në kohën e marrëveshjes bërthamore të Iranit me fuqitë botërore në vitin 2015, sipas kursit zyrtar të këmbimit, 32 mijë rialë vlenin një dollar.

Gjatë mandatit të tij të parë presidencial, Trump e tërhoqi në mënyrë të njëanshme Amerikën nga ajo marrëveshje në vitin 2018, gjë që shkaktoi tensione mes dy vendeve që vazhdojnë edhe sot e kësaj dite.

Në ditën kur presidenti reformator i Iranit Masoud Pezeshkiyan u betua dhe filloi mandatin e tij, më 30 korrik të këtij viti, 584 mijë rialë vlenin një dollar.

Prej javësh, qeveria iraniane është përpjekur të minimizojë ndikimin e rezultateve të zgjedhjeve presidenciale amerikane në Teheran dhe këtë qëndrim e përsëriti sot zëdhënësja e administratës Pezeshkian, Fatema Mohajerani.

“Zgjedhja e presidentit amerikan nuk ka të bëjë me ne. Politikat kryesore të Amerikës dhe Republikës Islamike nuk do të ndryshojnë ndjeshëm nga njerëzit që zëvendësojnë të tjerët. Ne tashmë kemi bërë përgatitjet e nevojshme paraprakisht”, tha ajo./newyorkpost/

Lidhja Demokratike e Kosovës (LDK) nis sot Turneun e Ndryshimit.

Kryetari i Lidhjes Demokratike të Kosovës (LDK), Lumir Abdixhiku, dje ka thënë se nesër do të prezantojnë kandidatët e Prishtinës për zgjedhjet parlamentare të 9 shkurtit.

Ai tha se ka vullnet e energji në ekipin organizativ për përgatitjen e takimit në Prishtinë – nisja që LDK e quan Turneu i Ndryshimit.

“Turneu i Ndryshimit nisë nesër në Kryeqytet, për të vazhduar nëpër Kosovë. Nesër, LDK, prezanton kandidatët e Prishtinës për zgjedhjet e 9 shkurtit! Eja nesër. Nga ora 19:00, në AMC Hall! Bëhu ndryshimi”, ka shkruar Abdixhiku dje në Facebook.

Qeveria e Australisë ka propozuar një projektligj që synon të ndalojë fëmijët nën 16 vjeç të kenë qasje në platformat e mediave sociale si Facebook, Instagram dhe TikTok. Sipas projektligjit të ri, kompanitë e teknologjisë që nuk respektojnë këtë kufi do të përballen me gjoba të mëdha. Kryeministri Anthony Albanese ka njoftuar se ky ligj ka për qëllim të rrisë sigurinë e të rinjve online, duke mbrojtur ata nga përmbajtje të rrezikshme si mizogjinia dhe imazhi negativ i trupit.

Albanese dhe ministrja e komunikimit, Michelle Rowland, kanë përmendur se metodat e verifikimit të moshës janë ende në shqyrtim. Një prej opsioneve mund të përfshijë përdorimin e skanimeve biometrike ose të dhënave qeveritare, por nuk janë vendosur ende detajet. Aktualisht, qeveria po teston teknologjitë e verifikimit të moshës, ndërsa Meta (kompania mëmë e Facebook dhe Instagram) shprehu shqetësime për implikimet teknologjike dhe private të këtij procesi.

Koalicioni opozitar ka kërkuar që projektligji të diskutohet në parlament brenda tre javëve të ardhshme, ndërsa shqyrtimet për teknologjinë e verifikimit të moshës vazhdojnë. Ndërkohë, Rowland deklaroi se platformat do të duhet të marrin masa për të parandaluar aksesin për të miturit, duke lënë në dorë të kompanive teknologjike zbatimin efektiv të kësaj rregulloreje./Guardian/