Lajmet

Rama kujton nga Hiroshima 1 vjetorin e luftës në Ukrainë

“Ishin të shumtë ata që menduan se pushtimi rus i Ukrainës do ishte çështje ditësh, por ja ku jemi këtu sot, 1 vit rezistencë” tha ai.

Published

2 years ago

on

Gjatë vizitës që Kryeministri Edi Rama po zhvillon në Japoni, në kuadër të 42 vjetorit të vendosjes së marrëdhënieve diplomatike mes dy shteteve, kreu i shtetit shqiptar u ndal në Hiroshima ku vendosi një buqetë me lule në Memorialin Përkujtimor të Paqes si dhe vizitoi Muzeun Përkujtimor të Paqes.

Pas vizitës së tij në Muze, në këtë ditë që shënon plot një vit nga fillimi i luftës së Rusisë kundër Ukrainës, Kryeministri Rama u shpreh:

“Ishin të shumtë ata që menduan se pushtimi rus i Ukrainës do të ishte çështje ditësh, por ja ku jemi këtu sot, 1 vit rezistencë heroike e popullit të Ukrainës nën lidershipin guximtar dhe vullnet hekurt të presidentit Zelenskyy, me mbështetjen e botës demokratike dhe tanimë është e qartë për të gjithë se Rusia nuk mund ta fitojë luftën.

Ndërkohë që kur them ja ku jemi këtu, dëshiroj të shtoj se unë kam nderin ta bëj këtë mesazh këtu nga Hiroshima, pas një momenti të gjatë dhe jashtëzakonisht të veçantë nderimi në Memorialin e të humburve e të zhdukurve nga goditja e bombës atomike dhe pastaj në muzeun e tmerreve të bombës atomike dhe shtoj që të luash sot me fjalën bombë atomike sikur flet për kukulla, është vërtetë një turp i civilizimit tonë dhe kjo e bën edhe më të rëndësishme mbështetjen për Ukrainën, aleancën e të gjitha vendeve demokratike dhe mbi të gjitha, vendosmërinë e secilit që ka respekt për dinjitetin njerëzor, për lirinë, për vlerat e demokracisë, në mënyrë që e shkuara të mbetet e shkuar dhe çdo përpjekje për ta kthyer të shkuarën të dështojë me turp”.

Related Topics:
Continue Reading

Lajmet

Elezi njofton se ka përfunduar numërimi i votave me postë

Published

18 minutes ago

on

March 4, 2025

By

Zëdhënësi i Komisionit Qendror Zgjedhor, Valmir Elezi ka njoftuar se sot ka përfunduar numërimi i votave jashtë vendit, atyre me postë.

Elezi para mediave tha se sot KQZ-ja do ta përmbyll procesin e numërimit përmes postës.

Continue Reading

Lajmet

Maqedonia e Veriut gjen bakter në një mostër uji nga Kosova

Published

21 minutes ago

on

March 4, 2025

By

Agjencia e Ushqimit dhe Veterinarisë në Maqedoninë e Veriut tha se është duke inspektuar të gjitha dërgesat e ujit të importuar burimor nga Kosova, pasi analizat laboratorike zbuluan praninë e bakterit koliform në një mostër uji nga shteti fqinj, raporton Shërbimi maqedonas i Radios Evropa e Lirë.

Disa media në këtë vend publikuan edhe vendimin e agjencisë, sipas të cilit bëhet fjalë për mostra të ujit “Rugove”.

REL-i në Prishtinë kontaktoi pronarin e kësaj kompanie, Visar Kelmendi, i cili tha se shitjet në Maqedoninë e Veriut janë duke vazhduar.

“Ka qenë një problem që dy-tri javë me një provë të analizës… Pastaj janë marrë edhe dhjetë analiza të tjera të ujit në Maqedoni të Veriut, në Kosovë dhe në një shtet të tretë dhe është konfirmuar se nuk ka asgjë”, tha Kelmendi.

REL-i kontaktoi edhe Agjencinë e Ushqimit dhe Veterinarisë në Kosovë në lidhje me këtë rast dhe është në pritje të përgjigjes.

Agjencia e Ushqimit dhe Veterinarisë në Shkup tha se “nga secila dërgesë e ujit burimor dhe pijeve joalkoolike me origjinë nga Kosova, do të merren mostra laboratorike për testimin e mikroorganizmave, në përputhje me Rregulloren për kërkesat specifike, që kanë të bëjnë me kriteret mikrobiologjike për ushqim”.

Paralelisht, kjo agjenci tha se Maqedonia e Veriut ka intensifikuar kontrollet edhe për frutat dhe perimet e importuara nga të gjitha vendet, për të monitoruar mbetjet e pesticideve.

Ajo tha se produktet nuk do të lejohen në treg pa i pasur rezultatet që e konfirmojnë sigurinë e tyre.

Continue Reading

Lajmet

​KPK dhe ZKPSh i reagojnë Kurtit: Zbatimi i ligjit nuk mund të keqinterpretohet sipas interesave

Published

24 minutes ago

on

March 4, 2025

By

Këshili Prokurorial i Kosovës dhe Zyra e Kryeprokurorit të Shtetit, i kanë reaguar deklarimeve të kryeministrit Albin Kurti duke thënë se veprimet për zbatimin e ligjit janë detyrim, jo vetëm për sistemin prokurorial, por edhe kryeministrin, qeverinë, por edhe për cilindo institucion tjetër dhe qytetar të vendit.

“Këshilli Prokurorial dhe Zyra e Kryeprokurorit të Shtetit, rikujtojnë se zbatimi i ligjit nuk mund të keqinterpretohet sipas shijeve, interesave dhe nevojave ditore të Kryeministrit në detyrë, duke dhënë deklarata jashtë parimeve bazë të sundimit të ligjit në Republikën e Kosovës”, thuhet në njoftim.

KPK dhe ZKPSH, potencojnë se deklaratat e dhëna në vazhdimësi nga Kryeministri Kurti e dëmtojnë seriozisht funksionimin e institucioneve demokratike dhe kanë për qëllim minimin e angazhimit të Prokurorit të Shtetit në përpjekjet për forcimin e sundimit të ligjit në Republikën e Kosovës.

“Pa marrë parasysh përpjekjet për degradimin e organeve kushtetuese nga ana e Kryeministrit Kurti, KPK dhe Prokurori i Shtetit inkurajojnë dhe mbështesin fuqishëm Prokurorinë Speciale për realizimin e detyrave dhe përgjegjësive ligjore të saj, siç janë hetimi, ndjekja dhe ndriçimi i secilit rast penal që bie në kompetencë të saj, me qëllim të ngritjes së moralit dhe forcimin e detyrimit për respektimin e ligjit në vendin tonë”, përfundon njoftimi.

Prokuroria Speciale e Republikës së Kosovës ka njoftuar se kryeministri Albin Kurti nuk është paraqitur sot për të dhënë dëshminë e tij përkundër faktit që ka qenë i obliguar me urdhër të gjykatës.

Kryeministri Kurti tha se nëse prokuroria e ka pasur të rëndësishme dëshminë e tij do të duhej të shkonte te ai.

“Kjo prokurori më shumë po e lufton qeverinë sesa krimin e korrupsionin”, tha Albin Kurti të martën në Gjilan.

Ai, me urdhër të Gjykatës Themelore, duhej të paraqitej sot më 4 mars në Prokurorinë Speciale të Kosovës për të dhënë dëshmi në një rast të rezervave shtetërore, por zgjodhi të marrë pjesë në një ngjarje të Ministrisë së Arsimit, Shkencës dhe Teknologjisë.

Continue Reading

Lajmet

Takimi Mickoski-Orban në Budapest, mbahet mbledhja e qeverive të Maqedonisë së Veriut dhe Hungarisë

Published

44 minutes ago

on

March 4, 2025

By

Kryeministri i Maqedonisë së Veriut, Hristijan Mickoski dhe kryeministri i Hungarisë, Viktor Orban kanë zhvilluar një takim ‘kokë më kokë’ në Budapest, ku nga dje po qëndron një delegacion qeveritar me rastin e samitit hungarezo-maqedonas.

Pas takimit me Orbanin, kryeministri Mickoski në profilin e tij në X njoftoi se është biseduar për çështje kyçe me interes të përbashkët si dhe për “forcimin e bashkëpunimit ekonomik, investimet, energjinë, infrastrukturën dhe perspektivën evropiane të Maqedonisë”.

Ai gjithashtu bëri të ditur se është mbajtur mbledhje e përbashkët mes qeverive të dy vendeve, duke shtuar se “janë shqyrtuar dhe është rënë dakord për çështje kyçe me interes të përbashkët”. Mbledhja u mbajt pas takimeve dypalëshe të ministrave përkatës, të cilat shërbyen si bazë për thellimin dhe forcimin e bashkëpunimit”.

“Ne nuk mund t’i mbrojmë njerëzit e Evropës nga migrimet ilegale pa mbështetjen e vendeve të Ballkanit Perëndimor“, tha kryeministri hungarez Orban përmes X në një njoftim me rastin e fillimit të sotëm të samitit të dytë ndërqeveritar hungarezo-maqedonas.

“Maqedonia e Veriut është një nga partnerët tanë më të rëndësishëm në këtë drejtim“, tha ai, duke falënderuar kryeministrin Mickoski.

Pas takimeve është planifikuar konferencë e përbashkët për media.

Samiti ndërqeveritar filloi dje me takimin e ministrave të Politikës së Jashtme dhe Tregtisë, Timço Mucunski dhe Peter Szijjarto. Në takim, Szijjarto theksoi edhe një herë mbështetjen që Hungaria i jep Maqedonisë së Veriut për anëtarësim në Bashkimin Evropian (BE).

Përndryshe, mbledhja e parë ndërqeveritare mes Maqedonisë së Veriut dhe Hungarisë u mbajt vitin e kaluar në Ohër.

Continue Reading

Të kërkuara