Kryeministri Edi Rama deklaroi sot se, kandidati apo kandidatja për president të Republikës nuk do të jetë nga grupi parlamentar i PS-së.
Pas mbledhjes së kryesisë së PS-së, pasditen e sotme, Rama u shpreh se, “sot ne u mblodhëm për vënien në zbatim të vendimeve që morëm në Kongres dhe për këtë arsye do të mbledhim dhe Asamblenë Kombëtare në fund të javës së parë të majit”.
Ashtu sikundër, shtoi Rama, “diskutuam për procesin e identifikimit të kandidaturës për presidentin apo presidenten e re të Republikës, pasi ditët po kalojnë dhe momenti i fillimit të procesit zyrtarisht po afron”.
I pyetur nëse ka identifikuar një person që plotëson pritshmëritë, Rama u shpreh se, “po ta kishim identifikuar do ta kishim publikuar”.
“Ndërkohë që nuk kuptoj ç’do me thënë më të votuarit, sepse ne nuk kemi bërë votim, ne kemi mbledhur propozimet, dhe ajo çka ne e kemi thënë publikisht dhe sot në mbledhjen e Kryesisë është një vendim i konsoliduar është se kandidati apo kandidatja nuk do të jetë nga grupi parlamentar i PS”, theksoi Rama.
Rama u shpreh se, “të gjitha këto historitë e profileve, të kritereve, të fushave janë mekanizma për të krijuar mjegull gjatë rrugës. Ndërkohë që është shumë e qartë që nuk është se janë mbledhjet për profilet që nxjerrin kandidaturën për presidentin e Republikës, sepse pavarësisht nga fusha dhe pavarësisht nga çfarë mund të shkruajmë, është absolutisht e panevojshme të shkojmë në një drejtim që thjesht është për të konsumuar kohën deri ditën kur del emri”.
“Kushtetuta ka nevojë për një garant. Republika ka nevojë për një figurë që të mishërojë normalitetin e bashkëjetesës mes palësh dhe komunitetesh me besime të kundërta, me bindje të ndryshme, me prejardhje të ndryshme, me opinione të ndryshme. Dhe patjetër që e gjithë kjo bashkësi shqiptare ka nevojë për një pikë referimi. Dhe në fund të fundit për një shqiptar apo shqiptare të denjë që gjithsekush do të donte që ta konsideronte një person, me të cilin e lidh një urë respekti”, theksoi ai.
I pyetur nëse ka marrë PS ndonjë sinjal nga PD për të negociuar, Rama tha se, “nuk ka akoma një proces”.
“Kemi dëgjuar edhe raportin e bërë nga komisioni i posaçëm që kemi ngritur. E kam thënë dhe e përsëris që është shumë e qartë vija e kuqe për ne. Ne nuk bëjmë asnjë negociatë dhe nuk kemi asnjë komunikim për të bërë në funksion të së ardhmes, me atë që në funksion të politikës është përfaqësues i botës së përtejme”, tha Rama.
I pyetur nëse presidenti i ri mund të vijë edhe përtej territorit shqiptar, Rama u shpreh se, “do të ishte shumë mirë të vinte, por Kushtetuta jonë ka një pengesë në këtë aspekt. Është një kushtetutë e bërë në një kohë tjetër dhe ka parashikuar që president i Republikës nuk mund të zgjidhet dikush që në 10 vitet e fundit nuk jeton në Shqipëri. Kështu që kjo në një farë mënyre e kufizon, në mos e eliminon fare mundësinë e një presidenti që vjen nga jashtë territorit zyrtar të Republikës së Shqipërisë”.
I pyetur për deklaratën e bërë prej tij në parlamentin e Kosovës se ka ardhur koha për të pasur një president të përbashkët, Rama theksoi se, “ne do të kishim vënë Hashim Thaçin president, me siguri edhe do të ishte një president i shkëlqyer për Shqipërinë, edhe për Kosovën, dhe do ta kishim votuar me bindjen dhe me kënaqësinë më të madhe, por fatkeqësisht Hashim Thaçi nuk është i pranishëm për momentin në jetën e bashkësisë shqiptare si një qytetar i lirë, sepse ndaj tij po zhvillohet një proces, i cili mos bëni ta them se çfarë procesi është”.
Për qëndrimin e Bullgarisë ndaj Maqedonisë së Veriut për negociatat, Rama u shpreh se, “nuk kam asnjë surprizë”.
“Unë i kam thënë ato që kam pasur për të thënë lidhur me këtë proces. Unë nuk jam optimist për rezultatin e negociatave që po zhvillohen mes Maqedonisë së Veriut dhe Bullgarisë. Dhe sikundër e kemi ndarë dhe me shqiptarët përmes Këshillimit Kombëtar dhe bazuar edhe në opinionin që kemi marrë nga qytetarët tanë. Nëse në fund të këtij 6-mujori me Presidencën franceze ky ngërç nuk zgjidhet, ne do të ndryshojmë kursin dhe do të kërkojmë me insistim nga të gjithë që të na ndajnë dhe s’ka arsye fare pse Shqipëria të shikohet e lidhur më tutje me Maqedoninë e Veriut, jo për shkak të Maqedonisë së Veriut, por për shkak të një absurdi bullgar që lidhet me problematika që s’kanë lidhje fare me Shqipërinë dhe që faktikisht, është një absurd që nxjerr në pah një problem të madh të brendshëm të BE. Shpresoj që rizgjedhja e presidentit Macron do t’i japë një shtysë proceseve të brendshme të BE dhe uroj që presidenti Macron do të jetë i motivuar dhe do të jetë në gjendje që të përdorë më shumë forcë në çuarjen përpara të këtyre proceseve, së bashku me kancelarin e ri gjerman, sepse ndryshe situata e brendshme e BE do të jetë shumë problematike. Jo thjesht në raport me ne, por në raport me shumë aspekte të tjera që janë dhe më të mëdha sesa aspektet që lidhen me pjesën tonë, por që sigurisht, për ne aspekti që lidhet me pjesën tonë janë më të rëndësishme kjo nuk diskutohet, sepse fillimisht vjen interesi i Shqipërisë, interesi ynë kombëtar, pastaj të gjitha të tjerat”, tha Rama.
Për vullnetin e grupit parlamentar të PS në lidhje me emrin e presidentit të ri, Rama tha se, “grupi parlamentar i PS nuk ka shprehur ndonjë vullnet. Grupi parlamentar i PS ka kontribuar me propozime”.
“Dhe ka bërë shumë propozime, nga më të ndryshmet. Kështu që aty ku janë bërë nga 3 propozime nga çdo deputet ka edhe nga brenda, ka edhe nga jashtë grupit parlamentar të PS, dhe është gjëja më e bukur dhe më natyrale. Dhe nuk shoh ndonjë problem me vullnetin e grupit. Ndërkohë që po ju përsëris, në kryesi sot ka qenë i konsoliduar opinioni që kjo nuk është radha e një presidenti që del nga grupi parlamentar i PS”, vuri në dukje ai.
I pyetur se edhe sa do e presë PS për negociata kreun e grupit parlamentar të PD, Alibeaj, Rama u shpreh se, “është një proces që po e ndjek komisioni që kemi ngritur”.
“Dhe me sa unë dëgjova nuk ka problem afatesh. Po ndërtohet procesi. Por natyrisht që do presim deri në momentin kur do duhet pastaj të fillojmë procesin dhe të kemi emra. Kështu që nëse ata nuk do të sjellin asnjë kontribut, është zgjedhja e tyre, nuk ka këtu ndonjë dramë të madhe. Nuk do ishte hera e parë në fakt. Mbase e kundërta është e vërteta, do ishte hera e parë që do sillnin një kontribut gjithë këto vite. Ndërkohë ne, kur ishim në opozitë, jo vetëm herën e parë kur kishim si të thuash deri në njëfarë momenti vota në proces, po edhe herën e dytë, kur s’kishim vota dhe kur e dinim shumë mirë që në fund gjasat ishin të gjitha që do dilte një kandidat partizan i PD-së, ne ishim aty dhe dhamë kontributin tonë, sepse kjo është jeta e opozitës. Opozita nuk është në parlament që të imponojë vullnetin e vet. Opozita është në parlament që të kërkojë rrugë për të dhënë kontributin e vet. Që të mundohet që të bindi pjesën tjetër, por që jo domosdoshmërisht, arrin ta bindë pjesën tjetër. S’ka asnjë dramë këtu”, theksoi ai.
Për mospranimin e Komisionit të Rithemelimit në procesin e zgjedhjes së presidentit të ri, Rama tha se, “me botën e përtejme PS nuk ka asnjë lidhje”.
“Dhe as nuk negocion, as nuk komunikon, as nuk bën asgjë. Dhe sa herë do na jepet mundësia do t’i themi të gjithë atyre që gabimisht kujtojnë se përfaqësuesi i botës së përtejme është akoma gjallë se në fakt gjallimi i tij fizik është diçka tjetër dhe gjallesa politike është diçka krejt tjetër. Dhe nuk është koha u them gjithë atyre që ndjekin përfaqësuesin e botës së përtejme, për ta turpëruar Shqipërinë në këtë farë feje, pavarësisht se janë një pakicë e cila do vazhdojë të rrudhet, se nuk ka asnjë shans tjetër përveç se të rrudhet, nëse do vazhdojë t’i shkojë mbrapa përfaqësuesit të botës së përtejme”, përfundoi Rama.
Magazinë2 months ago
Bota4 weeks ago
Bota4 weeks ago
Bota4 weeks ago