Lajmet

Qytetarët ankohen për ndryshimin e linjave të autobusëve, Komuna: Riorganizimi i linjave është i përshtatshëm

Sipas qytetarëve po shkaktohet tollovi në kryeqytet, dhe po u duhet të presin autobusin rreth një orë.

Publikuar

Qytetarët shprehen të mllefosur me ndryshimin e rrjedhës së qarkullimit të autobusëve e cila ka ndodhur me vendimin e Komunës së Prishtinës për mbylljen e rrugës për kalimin e veturave nga Katedralja në drejtim të Hotel Grand-it. Rrugë kjo që do të shërbejë në përgatitjet për dekorimin e qytetit për festat e fundvitit.

Sipas tyre po shkaktohet tollovi në kryeqytet, dhe po u duhet të presin autobusin rreth një orë, derisa kërkuan nga komuna të shtojë autobusë.

Qytetari, Sadik Gjukolli këtë vendim e vlerëson problematik. Sipas tij me këtë vendim qytetarët janë të detyruar të presin rreth gjysmë ore një autobus. Derisa kërkoi nga komuna ta zgjerojë rrugën.

“Tollovi është bërë, veç për me dalë te një rrugë po bëjmë gjysmë ore, kjo është kiamet… Komuna duhet të shtojë autobusë, por duhet edhe ta zgjerojnë rrugën pasi nuk ka rrugë…Problem po është me prit kur është ftohtë, mirëpo jemi pensionistë dhe nuk vonohemi për punë”, tha Gjukolli.

Sara Maqedonci, nxënëse në kryeqytet, po ashtu ka kërkuar nga komuna ta shtojë numrin e linjave të autobusëve.

“Në stacion po na bjen me prit shumë dhe po ka mungesë të autobusëve shumë, kështu kam lutje që të ndreqet ky problem… dhe të shtohen edhe linja tjera të reja të autobusëve… Pasi po më duhet me prit rreth një orë për autobus dhe po ka shumë tollovi rrugës”, tha ajo.

Agim Subi, qytetar është shprehur i shqetësuar me vendimin për ndryshimin e linjave të autobusëve. Sipas tij duhet të presë rreth një orë për autobus.

“Po janë shumë problem duke prit nga një orë… Po vanohen, por s’po kemi çfarë të bëjmë”, tha Subi.

Në lidhje me këtë, drejtori i shërbimeve publike, Ilirik Musliu tha se arsyja e mbylljes është për disa intervenime në infrastrukturë me qëllim që të përshtatet për projektin e festave të fundvitit.

Musliu tha se në momentin që është mbyllur rruga “Xhorxh Bush”, është paraparë që do të ketë ngarkesë, por sipas tij riorganizimi i linjave është i përshtatshëm sa i përket kësaj mbyllje.

“Qëllimi i mbylljes ka të bëjë me projektin e festave të fundvitit. Është e mbyllur deri me datën 8 janar, aktiviteti mendohet të fillojë prej datës 12 dhjetor, pra ideja pse është mbyll dy javë më herët ka të bëjë me intervenimin dhe përgatitjen e asaj zone për festimin e festave të fundvitit. Me 8 janar prapë do të kthehemi në gjendje siç ka qenë… Në momentin që është mbyll rruga “Xhorxh Bush”, është paraparë që do të ketë ngarkesë në rrugën “Bill Clinton” dhe “Tirana”, për arsyeje se me automatizëm bëhet bartja e ngarkesave, veturave. Ne e kemi bërë riorganizimin e linjave, në momentin kur e kemi bllokuar rrugën dhe kemi dalë në njoftim për bllokim, gjithashtu edhe trafiku urban ka dalë me njoftim për riorganizimin e linjave i cili është bërë, andaj numri i autobusëve dhe riorganizimi i linjave besoj se është i përshtatshëm, më i miri i mundshëm sa i përket kësaj mbyllje”, tha Musliu.

Sa i përket kërkesave të qytetarëve për shtimin e linjave të autobusëve, Musliu tha se problemi me linjat e trafikut urban dhe transportit publik në përgjithësi do të zgjidhet më së largu në janar të vitit 2024.

Ai tha se me 10 dhjetor do të nënshkruajnë kontratë në Londër, në zyrën kryesore të BERZH-it prej 10 milionë euro, me të cilën tha se parashohin të blejnë flotën e re prej 30 autobusëve, shtatë prej tyre do të jenë elektrik.

“Me 15 dhjetor do të nënshkruajmë në Londër, në zyrën kryesore të BERZH-it kredinë e re prej 10 milionë euro me të cilën parashohim të blejmë flotën e re prej 30 autobusë, rreth shtatë prej tyre kanë me qenë elektrik, të cilët mendohen në të ardhmen të shfrytëzohen në unazën qendrore. Siç e parasheh plani i mobilitetit duhet të jenë 161 autobusë, dhe 81 veçse po plotësohen në trafikun urban, 80 të tjerë do të jenë në sektorin privat, do të bëhen kontratat me sektorin privat në formatin e njëjtë sikur trafiku urban me pagesë për kilometër. Brenda kësaj kredie është një linjë në të cilën ata do të na mbështesin me konsulentë. Këtë rast do të bëhet riorganizimi i të gjitha linjave por edhe shtimi i linjave të reja, për arsyeje se në zonat rurale kemi mungesë të linjave dhe është një kërkese e kamotshme e qytetarëve. Andaj, mendojmë se transportit publik konkretisht në janar, 2024 të japim zgjidhje të përhershme në kryeqytet”, shtoi Musliu.

Lajmet

​Kusari-Lila: Qeveria s’pajtohet me draftin e Asociacionit nga BE-ja, prandaj nuk e dërgon në Kushtetuese

Publikuar

nga

Shefja e Grupit Parlamentar të Lëvizjes Vetëvendosje, Mimoza Kusari-Lila, ka thënë se Qeveria e Kosovës nuk mund të dërgojë draft-statutin e Asociacionit të propozuar nga BE-ja në Gjykatë Kushtetuese, pasi nuk pajtohet me të njëjtin.

Sipas saj, ka brenga serioze sesi draft-statuti i Asociacionit të dërgohet në Kushtetuese, mirëpo tha se duhet të ekzistojë një rrugë e ndërmjetme në të cilin duhet të ketë diçka nga ana e qeverisë, por edhe të merren garanci serioze nga faktori ndërkombëtar se i njëjti s’mund të ketë kompetenca ekzekutive.

“Jemi në rrethana të cilat asnjëherë – formë apo mënyrë nuk duam që të krijojmë mekanizma që mund të ketë mosfunksionalitet apo dëmtim të brendshëm të rendit kushtetues në Kosovë, përkundër që është thënë se ka garanci se asociacioni nuk ka kompetenca ekzekutive. Ajo çka është prezantuar në draftin e BE-së në të cilin janë dhënë komente, të cilat nuk kanë reflektuar si të tilla. Kemi brenga serioze mbi atë sesi mund të realizohet apo çfarë forme i dërgohet Gjykatës Kushtetuese. Nuk mund t’i dërgohet si një draft i pranuar pa pasur një vendim të qeverisë. Qeveria nuk ka vendim për atë draft pasi s’pajtohet me atë draft në tërësinë si është dorëzuar. Prandaj duhet të ekzistojë një rrugë e ndërmjetme në të cilin duhet të ketë diçka nga ana e qeverisë, por në afate në të cilat duhet të merren garanci serioze, që deri tash s’ka pasur”, tha ajo.

Kusari-Lila shprehu zhgënjimin e saj me mosanëtarësimin e Kosovës në Këshill të Evropës.

“Jemi të zhgënjyer me atë çfarë ndodhi, me mosfutujen në agjendë. E kuptojmë se ka pasur kërkesa individuale të shteteve pastaj në raport me kërkesën që u tha më e artikuluar nga dy shtete, nga Franca dhe Italia. Por kjo nuk na zmbraps nga përpjekjet dhe kontinutitet për plotësimin e të gjitha standardeve që kanë të bëjnë me të drejtat, rendit, ligjin dhe zhvillimin. Ishte një përvojë jo e mirë, por nuk ishte hera e parë që Kosova u ballafaqua me një standard shtesë apo ndryshe nga organizata kishte për vendet të tjera. Është e paprecedent të kthehet një vendim i Asamblesë Parlamentare të mos trajtohet në Këshillin e Ministrave, siç ndodhi në rastin tonë”, theksoi ajo.

Vazhdo të lexosh

Lajmet

Atentati ndaj kryeministrit sllovak, dyshohet se autori mund të mos ketë vepruar i vetëm

Publikuar

nga

Zhvillime të reja kanë dalë në dritë nga hetimet lidhur me atentatin ndaj kryeministrit të Sllovakisë, Robert Fico. Ministri i Brendshëm, Matus Sutaj Estok deklaroi se për rastin ishte ngritur një ekip hetimor, i cili do të shqyrtonte nëse i dyshuari veproi si pjesë e një grupi të organizuar që kishin inkurajuar njëri-tjetrin për të kryer atentatin.

“Një akt që hedh dyshime për përfshirjen e personave të tjerë në ngjarje, ishte se komunikimet në internet të të dyshuarit ishin fshirë dy orë pas atentatit, por jo nga i dyshuari dhe me shumë mundësi as nga bashkëshortja e tij”, tha ministri , i cili shtoi se kjo është një shenjë se autori mund të mos ketë vepruar i vetëm, por krimi mund të jetë kryer nga një grup i caktuar njerëzish.

Ndërkohë zëvendëskryeministri Robert Kalinak tha të dielën se Fico ishte jashtë rrezikut për jetën, por gjendja e tij ishte ende shumë e rëndë për t’u transferuar në një spital në kryeqytetin Bratislavë.

Më herët Gjykata Speciale Penale e Sllovakisë vendosi se i dyshuari, i identifikuar nga prokurorët si Juraj Cintula, do të qëndrojë në paraburgim pasi akuzohet për tentativë vrasje. Ministri i Brendshëm tha pas ngjarjes se i dyshuari ishte i pakënaqur me politikën e qeverisë për Ukrainën.

Qeveria e Ficos i ka dhënë fund mbështetjes zyrtare ushtarake për Ukrainën dhe ka marrë një linjë më pro-ruse në konflikt, ndryshe nga shumica e partnerëve të Bashkimit Europian. Atentati ndaj Ficos ka bërë që i gjithë spektri politik i Sllovakisë të bëjë thirrje për ulje të tensioneve dhe zbutje të retorikës së ashpër mes politikanëve. Ndërkohë Policia sllovake tha të dielën se kishte arrestuar tre persona për postime në mediat sociale që mbështesnin atentatin ndaj kryeministrit.

Vazhdo të lexosh

Lajmet

Shpërndarja e Kuvendit, opozita vazhdon të jetë e përçarë

Publikuar

nga

Partitë parlamentare në Kuvendin e Kosovës ende nuk kanë pajtim për formën e dërgimit të vendit në zgjedhje të parakohshme.

Në partinë në pushtet, Lëvizjen Vetëvendosje theksojnë së në Kuvend s’ka kërkesë zyrtare për shpërndarje të legjislaturës së tetë, derisa theksojnë gatishmërinë për zgjedhje, por presin unifikimin e opozitës. Në anën tjetër, partitë opozitare vazhdojnë të mos dakordohen se si të shkojë vendi në zgjedhje të parakohshme. Në PDK presin që deri më 30 maj të shpërndahet Kuvendi, siç thonë për t’i hapur rrugë zgjedhjeve të parakohshme më 30 qershor ose më së largu 7 korrik.

Ndërkaq, AAK-ja si të vetmen formë të shkuarjes në zgjedhje të parakohshme e sheh dorëheqjen ose shkarkimin e kryeministrit Albin Kurti. Këtë të fundit synojnë të realizojnë në seancën e Kuvendit të premten, ku në debatin për tri vjet qeverisje të Kurtit pritet të prezantojnë një rezolutë për shkarkimin e tij.

Shefja e Grupit Parlamentar të LVV-së, Mimoza Kusari-Lila, tha se s’kanë frikë nga shkuarja në zgjedhje të parakohshme, mirëpo opozita duhet të jetë e unifikuar në kërkesën e saj. Ajo u shpreh kundër rezolutës së AAK-së për shkarkimin e kryeministrit Kurti.

“Asnjëherë nuk kemi thënë se kemi frikë nga shkuarja në zgjedhje apo rikonfigurimi i mandatit te sovrani. Megjithatë nuk mund të bëjmë këtë vetëm me një grup parlamentar të opozitës. Opozita duhet të jetë e unifikuar në kërkesën e saj, në fund të fundit opozita është ajo që kërkon zgjedhje apo ndryshim të qeverisjes, ndërsa ne konsiderojmë se kjo qeveri i ka plotësuar të gjitha kushtet për një mandat të rregullt”, tha ajo.

Mirëpo, shefi i Grupit Parlamentar të PDK-së, Abelard Tahiri, ritheksoi nevojën e shkuarjes në zgjedhje të parakohshme, përmes shpërndarjes së Kuvendit.

Ai paraqiti datën e fundit si opsion për shpërndarjen e Kuvendit, derisa tha se po punojnë intensivisht me partitë opozitare për t’u dakorduar për shpërndarjen e Kuvendit.

“Jemi në afatet e fundit kohore kur duhet të procedohet me mocionin për shpërndarjen e Kuvendit në mënyrë që vendi ynë t’i drejtohet kutive të votimit, me datën 30 qershor apo 7 korrik. Prandaj e them para jush se data 30 maj që i bie e enjtja tjetër është data e fundit kur Kuvendi i Kosovës duhet të shpërndahet në mënyrë që vendi t’i kap afatet kohore 30 qershor apo 7 korrik si data që i kemi propozuar. Deri tani ende s’kemi një situatë kur kemi një dakordim ndërmjet grupeve parlamentare në Kuvend që vendi të shkojë në zgjedhje të parakohshme…”, theksoi ai.

Mirëpo shefi i Grupit Parlamentar të AAK-së, Besnik Tahiri, tha se nuk do të përkrahim opsionin e shpërndarjes së Kuvendit, pasi sipas tij, përmes kësaj forme kryeministri Kurti po amnistohet për dështimin në ekzekutiv. Ai tha se qeverinë e ardhshme duhet të drejtojë opozita e tanishme në Kuvend.

“Shpërndarja e Kuvendit në këtë fazë nënkupton një dalje për qeverinë Kurti. Në një formë marrjen e fajit nga Kuvendi për dështimin e qeverisë. Shpërndarja duhet të vjen vetëm atëherë arrijmë të shkarkojmë një qeveri të dëmshme apo kur dorëhiqet, por jo në asnjë situatë që Kuvendi të merr një përgjegjësi që nuk i takon. Ne jemi në vit zgjedhor. Nëse shihni kalendarin zgjedhor për tre muaj apo katër muaj duhet të shpallet data e zgjedhjeve”, tha Tahiri.

Këto komente ata i bën pas mbledhjes së Kryesisë së Kuvendit, ku u caktuan dy seanca plenare gjatë kësaj jave. Të zgjedhurit e popullit do të mblidhen të enjten për të vazhduar pikat nga seancat e kaluara, ndërsa të premten do të mbahet seancë për të debatin parlamentar për tri vjet qeverisje të Qeverisë Kurti.

Vazhdo të lexosh

Lajmet

Gjykata Penale Ndërkombëtare kërkon urdhër arresti për liderin e Hamasit dhe kryeministrin izraelit për krime lufte në Gaza

Publikuar

nga

Gjykata Penale Ndërkombëtare po kërkon urdhra arresti për liderin e Hamasit, Yahya Sinwar dhe kryeministrin izraelit Benjamin Netanyahu me akuza për krime lufte dhe krime kundër njerëzimit lidhur me sulmet e 7 tetorit në Izrael dhe luftën pasuese në Gaza, tha kryeprokurori i gjykatës, Karim Khan për CNN.

Khan tha se ICC po kërkon gjithashtu urdhër për Ministrin e Mbrojtjes të Izraelit, Yoav Gallant, si dhe dy liderë të tjerë të lartë të Hamasit, Mohammed Diab Ibrahim al-Masri, udhëheqësi i Brigadave Al Qassem dhe i njohur më mirë si Mohammed Deif, dhe Ismail Haniyeh, Hamas, lider politik.

Urdhëresat kundër politikanëve izraelitë shënojnë herën e parë që ICC ka vënë në shënjestër udhëheqësin më të lartë të një aleati të ngushtë të Shteteve të Bashkuara. Vendimi e vendos Netanyahun në shoqërinë e presidentit rus Vladimir Putin, për të cilin GJNP lëshoi një urdhër arresti për luftën e Moskës kundër Ukrainës.

Një panel gjyqtarësh të ICC tani do të shqyrtojë kërkesën e Khan për urdhër-arrest. Khan tha se akuzat kundër Sinwar, Haniyeh dhe al-Masri përfshijnë “shfarosje, vrasje, marrje pengjesh, përdhunim dhe sulm seksual në paraburgim”.

Bota u trondit më 7 tetor kur njerëzit u hoqën nga dhomat e tyre të gjumit, nga shtëpitë e tyre, nga kibucitë e ndryshëm në Izrael”, tha Khan për Amanpour, duke shtuar se “njerëzit kanë vuajtur jashtëzakonisht shumë”.

Akuzat kundër Netanyahut dhe Gallantit përfshijnë “shkaktim të shfarosjes, shkaktimin e urisë si metodë lufte, duke përfshirë mohimin e furnizimeve me ndihma humanitare, duke synuar qëllimisht civilët në konflikt”, i tha Khan Amanpour.

Kur raportet u shfaqën muajin e kaluar se kryeprokurori i ICC-së po shqyrtonte këtë mënyrë veprimi, Netanyahu tha se çdo urdhër arresti i ICC-së kundër zyrtarëve të lartë të qeverisë dhe ushtarakëve izraelitë “do të ishte një fyerje e përmasave historike” dhe se Izraeli “ka një sistem ligjor të pavarur që heton me rigorozitet të gjitha shkeljet e ligjit.”

I pyetur nga Amanpour në lidhje me komentet e bëra nga Netanyahu, Khan tha: “Askush nuk është mbi ligjin”. Ai tha se nëse Izraeli nuk pajtohet me ICC-në, “ata janë të lirë, pavarësisht kundërshtimeve të tyre ndaj juridiksionit, të ngrenë një sfidë para gjyqtarëve të gjykatës dhe kjo është ajo që unë i këshilloj ata të bëjnë”.

Izraeli dhe Shtetet e Bashkuara nuk janë anëtarë të ICC. Megjithatë, ICC pretendon se ka juridiksion mbi Gazën, Jerusalemin Lindor dhe Bregun Perëndimor pasi udhëheqësit palestinezë ranë dakord zyrtarisht të jenë të detyruar nga parimet themeluese të gjykatës në vitin 2015. /UBTNews/

Vazhdo të lexosh

Të kërkuara