Lajmet

QKRMT ndan “Çmimin për Guxim-Vasfije” për Shukri Gërxhaliun

Published

2 years ago

on

Në nderim të jetës dhe veprës së doktorit Shukri Gërxhaliu, familja e tij ka pranuar “Çmimin për Guxim-Vasfije” nga Qendra Kosovare për Rehabilitimin e të Mbijetuarve të Torturës në 24-vjetorin e themelimit të saj.

Presidentja Vjosa Osmani ka lartësuar veprën e tij, në mbështetje të viktimave të dhunës seksuale. Ajo tha se Gërxhaliu ka trajtuar me dhjetëra gra të cilat i mbijetuan aktit makabër. Dëshmia e tij u dëgjua edhe në Tribunalin e Hagës por edhe në gjykatat vendore, me qëllim që të kërkohet drejtësi për të mbijetuarat.

Vajza e tij, Gonxhja tha se dëshira më e madhe e babës së saj ishte drejtësia për të gjitha këto gra.

“Dëshmia e babit ndihmoi edhe në dënimin e një dhunuesi dhe dëshira e tij më e madh gjithmonë ka qenë që të zbardhen krimet e luftës në Kosovë, veçanërisht gratë e dhunuara. Andaj edhe ne si familje e tij i inkurajojmë të gjitha gratë e dhunuara, të mbijetuarat e luftës që të vazhdojnë të kërkojnë drejtësi. Vlerësojmë shumë kontributin e zonjës Vasfije, e cila është heroina e të gjithë shqiptarëve jo vetëm e grave të dhunuara dhe të mbijetuarave”, u shpreh ajo mes lotëve.

E mbijetuara e dhunës seksuale, Vasfije Krasniqi tha se vet ajo ishte trajtuar në Vushtrri nga Shukri Gerxhaliu.

“Unë edhe pse nuk kam qenë në dijeni, në kohën e luftës ai mua më ka shëruar në malet e Vushtrrisë”, tha shkurt e mbijetuara e parë e cila foli publikisht.

Presidentja Osmani u zotua se do të rrisin përpjekjet që bota të dëgjojë për të mbijetuarat nga Kosova. Ajo tha se puna e institucioneve duhet të rritet në mbështetje të të mbijetuarave të dhunës seksuale.

“Ky përvjetor i qendrës na bëri bashkë, por ne në fakt bashkë jemi gjithmonë. Jemi bashkë në një luftë, e cila po vazhdon. Është luftë për t’u ngritur mbi një dhimbje e cila është vështirë të përshkruhet me fjalë. Është luftë për të ngadhënjyer mbi një ndër plagët me të thella që i ka kjo shoqëri. Mirëpo, kur njeriu flet me të mbijetuarat dhe kur përballet me këto storje dhe kur e shohim se me çfarë guximi të jashtëzakonshëm gra e burra të Kosovës janë shndërruar në heronj e heroina të këtij vendi, nuk ka se si të mos na i ngritë vullnetin edhe neve që t’i rrisim përpjekjet tona të përbashkëta që të sigurohemi që lufta jonë për drejtësi, mbi të gjitha lufta jonë për drejtësi të vazhdojë”, deklaroi ajo.

Ajo përmendi edhe rastin e parë të dënimit për dhunim seksual gjatë luftës, ku u shpreh se ka edhe raste të tjera për të cilat janë ngritur aktakuza. Më tej, theksoi se doktor Shukri Gërxhaliu ka trajtuar shumë gra të dhunuara seksualisht.

“Dua sot ta kujtojmë kontributin e doktorit, i cili që nga fillimi i luftës ka bërë punë të jashtëzakonshme, asnjëherë duke mos e përmend punën e tij në mbështetje të grave viktima në një rajon ku ka pasur aq shumë viktima dhe unë kam qenë e nderuar që vitin e kaluar për nder të Ditës së Pavarësisë t’ia ndaj atij medaljen më të lartë presidenciale, medaljen presidenciale të meritave për kontributin e jashtëzakonshëm në mbrojtjen e së vërtetës dhe mbrojtjen e të mbijetuarave në një kohë ku ndoshta shumë prej tyre nuk kanë pasur derë tjetër. Dhe në ato momente të rënda, që kanë qenë më të rëndat në historinë jetësore të këtyre grave dhe burrave ta kesh një derë ku mund të mbështetesh dhe ku mund të kërkosh shërim është e jashtëzakonshme”, u shpreh ajo.

Drejtoresha e QKRMT-së, Feride Rushiti tregoi se ka qenë vjeshta e vitit 1999 kur nisën të punojnë me një grup te mjekëve por pa u shfaqur.

“Ai (Shukri Gërxhaliu) ka pasur atribute të veçanta si person, se të vish dhe t’i shprehësh dhimbjen një viktime e dhunës seksuale një doktori, nuk ka qenë e lehtë. E ka pasur një intuitë të tillë që ka bashkë ndjerë plagën me të mbijetuarat. Dhe në atë kohë ai nuk ka qenë vetëm doktor, ka qenë psikolog për to. Përtej asaj nuk ka mbetur vetëm me kaq, sepse në rrethana lufte secili e ka ndjerë obligim që të kontribuojë, mirëpo e ka vazhduar punën me to dhe duke i ruajtur me fanatizëm dosjet që i ka mbajtur dhe i ka shënuar që në të ardhmen e afërt këto dosje t’i shërbejnë drejtësisë. Dhe jo vetëm në Tribunalin e Hagës që ka dëshmuar suksesshëm qoftë gjatë gjykimit të Millosheviqit, por edhe në rastin e Zoran Vukotiqit për t’u vu drejtësia në vend, dëshmia e tij ka qenë qenësore”, theksoi ajo.

Rushiti tha se edhe rastet e tjera të cilat janë në proces gjyqësor, i ka referuar vet Shukri Gërxhaliu.

Prokurorja speciale, Drita Hajdari deklaroi se është numër i vogël i të mbijetuarave të cilat po raportojnë dhunimin seksual gjatë luftës së fundit në Kosovë.

“Nga fundi i vitit 2018 deri më tani kemi ngritur gjithsej gjashtë aktakuza për dhunë seksuale gjatë luftës në Kosovë. Prej të cilave një rast është gjykuar me aktgjykim të formës së prerë. Mirëpo ajo që dua të them është se në të ardhmen duhet të punohet sa më shumë me viktimat e dhunës seksuale në mënyrë që viktimat të raportojnë rastet, të ju jepet kurojë dhe garancia që identiteti i tyre nuk do të zbulohet në asnjë mënyrë gjatë procedurës penale”, përfundoi ai.

Ajo u shpreh se Shukri Gërxhaliu ka dhënë dëshmi për gjykatën në rastin e Zoran Vukotiqit, i cili është i dënuari i vetëm nga gjykatat vendore.

Presidentja Osmani është takuar me pesë të mbijetuara të dhunës seksuale gjatë luftës. Këto gra kanë raportuar rastin në institucionet e drejtësisë. Takimi është zhvilluar me dyer të mbyllura për shkak të ndjeshmërisë së rasteve.

Related Topics:
Continue Reading

Aktualitet

KEK thirrje bizneseve që kanë dalë në treg të hapur

Published

7 hours ago

on

June 3, 2025

By

Korporata Energjetike e Kosovës ka lëshuar një njoftim duke thënë se inkurajojnë të gjithë konsumatorët që ende nuk kanë siguruar furnizues të energjisë elektrike të lidhin kontrata komerciale me KEK.

“Korporata Energjetike e Kosovës (KEK sh.a.) inkurajon të gjithë konsumatorët që ende nuk kanë siguruar furnizues të energjisë elektrike, që të lidhin kontrata komerciale të drejtpërdrejta me KEK, për të siguruar furnizim të qëndrueshëm.”

KEK thotë se deri tani ka lidhur 15 marrëveshje komerciale.

“Sipas vendimit të Zyrës së Rregullatorit për Energji (ZRRE), KEK është e licencuar për furnizim në treg të hapur dhe deri më tani ka lidhur me sukses 15 marrëveshje komerciale, duke përfshirë edhe ndërmarrje publike strategjike.”

KEK ka listuar disa arsye se pse duhet të zgjidhet KEK’u si furnizues.

“Pse të zgjidhni furnizimin komercial direkt nga KEK?

·         Furnizimi nga Furnizuesi i Mundësisë së Fundit është një zgjidhje e përkohshme, me periudhë 60-ditore dhe çmime më të larta nga tregu.

·         Sipas udhëzimeve të ZRRE-së, konsumatorët që nuk zgjedhin furnizues kalojnë automatikisht te FMF për 60 ditë, ku çmimet janë më të larta se në tregun e lirë. Pas afatit, kontratat me furnizues të rregullt është e detyrueshme.

·         Marrëveshjet komerciale me KEK ofrojnë çmime konkurruese, furnizim të qëndrueshëm dhe transparencë.

·         KEK siguron furnizim referuar në çmimet e tregut të publikuara në bursën zyrtare të energjisë ALPEX.”

“Veproni tani! Lidhja e kontratës komerciale është hapi më i sigurt për të shmangur pasigurinë dhe kostot e larta të furnizimit përmes FMF-së.”

Continue Reading

Lajmet

​Osmani fton në takim partitë për dekretimin e datës së zgjedhjeve lokale

Published

9 hours ago

on

June 3, 2025

By

Presidentja e Republikës së Kosovës ka ftuar në takim partitë politike, ku pritet të diskutohet data e zgjedhjeve të reja lokale.

Këshilltari për media i presidentes Vjosa Osmani, Bekim Kupina bëri të ditur për KosovaPress se takimi do të mbahet të mërkurën.

“Në bazë të kompetencave kushtetuese, Presidentja Osmani ka ftuar subjektet politike në takim të mërkurën, më 4 qershor 2025, për konsultime për caktimin e datës së zgjedhjeve lokale. Menjëherë pas konsultimeve, Presidentja do të caktojë datën e zgjedhjeve”, ka thënë ai.

Ende nuk dihet ora se kur do të mbahet takimi.

Continue Reading

Lajmet

Global UBT Fest 2025 – Festivali veror i dijes po vjen së shpejti

Published

9 hours ago

on

June 3, 2025

By

Jeni të ftuar të bëheni pjesë e ngjarjes më të madhe dhe më emocionuese të verës në botën e dijes dhe inovacionit! Global UBT Fest 2025 është festivali veror i dijes që mbledh në një vend mbi 30 shkolla verore të ndryshme, me mbi 300 folës kombëtarë dhe ndërkombëtarë nga fusha të ndryshme të shkencës, teknologjisë, artit, kulturës dhe zhvillimit personal.

Ky festival unik zhvillohet gjatë gjithë muajit Korrik 2025, duke ju ofruar një program të pasur dhe shumëdimensional që synon të zgjojë kuriozitetin, të frymëzojë dhe të lidhë njerëz nga e gjithë bota.

Çfarë do të përjetoni në Global UBT Fest 2025?

  • Forume të dedikuara me diskutime dhe debate mbi temat më të rëndësishme dhe aktuale të kohës;
  • Punëtori praktike që ju japin mundësi të mësoni aftësi të reja dhe të zhvilloni potencialin tuaj në fusha të ndryshme;
  • Gara të ndryshme që sfidojnë kreativitetin dhe dijen tuaj, me mundësi për çmime dhe njohje;
  • Koncerte dhe aktivitete kulturore që sjellin argëtim dhe një atmosferë festive për të gjithë pjesëmarrësit;
  • Eksperienca unike që vetëm Global UBT Fest mund t’ju ofrojë — një mundësi për rrjetëzim, shkëmbim ideje dhe krijim lidhjesh të reja në një mjedis stimulues.

Ky festival është projektuar për të ofruar një eksperiencë gjithëpërfshirëse dhe të paharrueshme për çdo pjesëmarrës, qoftë student, profesionist apo thjesht një person që kërkon të zhvillojë veten dhe të zgjojë pasionin për dijen.

Regjistrimi është tashmë i hapur: REGJISTROHU TANI

Mos e humbisni shansin për t’u bërë pjesë e kësaj ngjarje të jashtëzakonshëm.

Për më shumë informacion dhe për të siguruar vendin tuaj, vizitoni: https://forms.office.com/e/kwSSxXfsq0

Bashkohuni me ne këtë verë në Global UBT Fest 2025 dhe përjetoni verën më të pasur me dije, inspirim dhe argëtim!

Continue Reading

Lajmet

Takimi i radhës me Dr. Tanja Tamminen: Studentët e UBT-së thellojnë njohuritë mbi sigurinë evropiane dhe diplomacinë ndërkombëtare

Published

9 hours ago

on

June 3, 2025

By

Në vazhdën e aktiviteteve ndërkombëtare akademike dhe angazhimit të UBT-së për të sjellë ekspertizë globale në auditorë, studentët e Studimeve të Sigurisë zhvilluan me sukses takimin e radhës me Dr. Tanja Tamminen, eksperte e njohur në fushën e politikës së jashtme dhe sigurisë së Bashkimit Evropian.

Ky takim u zhvillua si vazhdim i ligjëratës së mëparshme dhe dëshmon interesimin e ndërsjellë për thellimin e bashkëpunimit ndërmjet UBT-së dhe ekspertëve ndërkombëtarë. Temë qendrore e diskutimit ishte dinamika e përfshirjes së Bashkimit Evropian në misionet civile të menaxhimit të krizave, si dhe ndikimi i tyre në vendet e Ballkanit Perëndimor, përfshirë Kosovën.

Studentët patën mundësinë të ngrenë pyetje më të thelluara dhe të diskutojnë çështje praktike që lidhen me sfidat dhe rolin strategjik të BE-së në garantimin e sigurisë në rajonet me ndjeshmëri politike dhe institucionale. Diskutimi u pasurua me përvoja të drejtpërdrejta nga misionet EULEX në Kosovë dhe EUAM në Ukrainë, të cilat Dr. Tamminen i ndau me pjesëmarrësit me shumë transparencë dhe profesionalizëm.

Ky takim u mundësua falë përkushtimit të Profesor Naim Dedushaj, i cili ka luajtur një rol kyç në ndërtimin e urave të komunikimit me profesionistë të profilit të lartë në nivel evropian. Për më tepër, u diskutuan edhe hapa konkretë për praktika studentore në institucionet evropiane, duke hapur mundësi të reja për studentët që synojnë karrierë ndërkombëtare në fushën e diplomacisë dhe sigurisë.

Continue Reading

Të kërkuara