Një gjykatë ruse ka gjobitur kompaninë Google me mbi 8 miliardë rubla (afër 78 milionë dollarë) për mos përputhje me dënimet e mëparshme ndaj korporatës së teknologjisë me bazë në SHBA.

Sipas një njoftimi nga shërbimi për media i gjykatave në Moskë, një gjykatës nga rrethi Nagorny shpalli kompaninë Google fajtore për shmangien e zbatimit të një dënimi administrativ. Njoftimi i lëshuar në rrjetin social Telegram tha se Google u gjobit me pak më shumë se 8 miliardë rubla për shkeljen, por nuk specifikoi dënimin administrativ që kompania amerikane kishte shmangur.

Në muajin dhjetor, presidenti rus Vladimir Putin akuzoi kompanitë Google dhe YouTube, të dyja në pronësi të Alphabet Inc., për përdorimin e burimeve në internet për të “promovuar qëllimet politike të qeverive të tyre”. Ky akt ka shtuar tensionet midis Rusisë dhe kompanive të mëdha teknologjike ndërkombëtare, të cilat janë nën një presion gjithnjë e më të madh për të përmbushur kërkesat e autoriteteve ruse./UBTNews/

Lideri i shkarkuar i Koresë së Jugut, Yoon Suk Yeol, u arrestua të mërkurën për shkak të përpjekjes së tij të dështuar për të shpallur gjendje lufte, duke i dhënë fund një përballjeje disa javore me autoritetet dhe duke u bërë presidenti i parë në historinë e vendit që arrestohet.

Yoon, i cili përballet me akuza për kryengritje pas përpjekjes së tij jetëshkurtër për të shpallur gjendje ushtarake muajin e kaluar, tha se do të bashkëpunonte me hetuesit për të shmangur “derdhjen e gjakut”.

Si një ish-prokuror që udhëhoqi Partinë Konservatore të Fuqisë Popullore (PPP) drejt fitores në zgjedhjet e vitit 2022, Yoon mund të përballet me dënim me vdekje ose burgim të përjetshëm nëse shpallet fajtor për kryengritje.

Ai kishte tentuar ta shmangte arrestimin për javë të tëra duke qëndruar në rezidencën e tij, i mbrojtur nga anëtarët e Shërbimit të Sigurisë Presidenciale (PSS) që i kishin qëndruar besnikë.

Rojet e tij kishin vendosur tela me gjemba dhe barrikada në rezidencë, duke e kthyer objektin në atë që opozita e quajti “kështjellë”.

Yoon, i cili kishte premtuar të “luftonte deri në fund”, arriti të shmangte përpjekjen e parë për arrestimin e tij më 3 janar, pas një përballjeje të tensionuar disa orëshe midis rojeve dhe hetuesve anti-korrupsion që punonin me policinë.

Por, në orët e hershme të së mërkurës, qindra zyrtarë policorë dhe hetues nga Zyra e Hetimeve për Korrupsion rrethuan sërish rezidencën, disa duke u ngjitur mbi muret rrethuese dhe duke kaluar shtigje të fshehta për të arritur te ndërtesa kryesore.

Pas një përballjeje rreth pesë orëshe, autoritetet njoftuan se Yoon ishte arrestuar dhe lideri i shkarkuar publikoi një mesazh të regjistruar paraprakisht.

“Vendosa të përgjigjem ndaj Zyrës së Hetimeve për Korrupsion”, tha Yoon në mesazh, duke shtuar se nuk e pranonte ligjshmërinë e hetimit, por po bashkëpunonte “për të parandaluar çdo derdhje fatkeqe të gjakut”.

Hetuesit filluan menjëherë ta marrin në pyetje Yoonin, por ata thanë se ai kishte ushtruar “të drejtën e tij për të heshtur”.

Ai refuzoi të incizohej gjatë marrjes në pyetje, tha një zyrtar, duke shtuar se Yoon do të kalonte natën në një qendër paraburgimi.

Në një postim të mëvonshëm në Facebook, që Yoon tha se e kishte shkruar ndërsa ishte i ngujuar në rezidencën e tij, ai përsëriti pretendimet për mashtrim zgjedhor dhe foli për kombe “armiqësore” që po sulmonin vendin, duke iu referuar Koresë së Veriut.

Gazetarët e agjencisë së lajmeve AFP kanë raportuar për përleshje të vogla te porta e rezidencës, ku mbështetësit më të flaktë të Yoon ishin vendosur për ta mbrojtur atë, ndërsa autoritetet nisën operacionin për arrestim.

Mbështetësit e tij dëgjoheshin duke brohoritur “urdhër arresti i paligjshëm!” ndërsa në duar mbanin flamuj të Koresë së Jugut dhe SHBA-së. Disa prej tyre qëndronin të shtrirë në tokë para portës kryesore të kompleksit rezidencial./REL/

Fushata për zgjedhjet presidenciale në Poloni ka filluar, duke shënuar një moment të rëndësishëm në politikën e vendit. Fitorja është kritike për Koalicionin Qytetar në pushtet, pasi kjo do të mundësonte kalimin e propozimeve legjislative pa u bllokuar nga një president, Andrzej Duda, i cili është në linjë me partinë opozitare “Ligj dhe Drejtësi” (PiS).

Sipas sondazhit të fundit të realizuar nga Opinii24 për RMF FM, kandidat i Koalicionit Qytetar, Rafał Trzaskowski, kryetari aktual i Varshavës, ka shanset më të mëdha për të fituar zgjedhjet presidenciale. Ai ndiqet ngushtë nga Karol Nawrocki, i mbështetur nga PiS, dhe aktualisht president i Institutit të Kujtesës Kombëtare.

Në vendin e tretë renditet Sławomir Mentzen nga partia e ekstremit të djathtë, Konfederata, e cila e përshkruan veten si kombëtare dhe patriotike. Megjithatë, konkurrenca më e ashpër pritet të zhvillohet mes dy favoritëve kryesorë, Trzaskowsk e Nawrocki.

Trzaskowski, i cili në vitin 2020 humbi ngushtë nga Andrzej Duda, ku secili fitoi më shumë se 10 milionë vota, është një nga kandidatët më të njohur në politikën polake. Vetëm Lech Wałęsa ka marrë më shumë vota në historinë e zgjedhjeve presidenciale në Poloni.

Njëmbëdhjetë kandidatë do të garojnë në raundin e parë të zgjedhjeve. Ata përfshijnë Rafał Trzaskowski (Koalicioni Qytetar), Karol Nawrocki (mbështetur nga PiS), Szymon Hołownia (Trzecia Droga), Magdalena Biejat (E majta e re), Sławomir Mentzen (Konfederacja), Marek Jakubiak (Wolni Republikanie), Marek Woch (Bezpartyjni Samorządowcy), Romuald Starosielec (Ruch Naprawy Polski), Piotr Szumlewicz (Związkowa Alternatywa), Adrian Zandberg (Razem) dhe Katarzyna Cichos (Platforma Rozwoju Polski).

Nëse asnjë kandidat nuk fiton shumicën e votave në raundin e parë, raundi i dytë do të mbahet më 1 qershor 2025. Presidenti i Polonisë zgjidhet përmes një votimi të përgjithshëm, të drejtpërdrejtë dhe të barabartë, me votim të fshehtë, për një mandat pesëvjeçar dhe mund të mbajë detyrën maksimumi dy herë./UBTNews/